Байбихьи 19
19
Содомги Гоморраги паналъизаби
1КӀиго малаик вачӀана Содомалде маркӀачӀубер рукӀкӀунеб гӀужалда. Шагьаралъул кавабахъ годекӀанив гӀодов чӀун вукӀана ЛутӀ. Гьел рихьидал, тӀадеги вахъун, гьезда данде ана гьев ва гӀодоб гьумер цузегӀан гьезие бетӀер къулана. 2Цинги гьес абуна:
«БетӀерчӀахъаял, рилълъа дир – нужер лагъасул – бакӀалде, нужерго хӀатӀалги чуризе хӀалхьиги гьабизе. Радал ине бегьила нужерго нухда».
«Рилълъинаро, – ян абуна гьез. – Гьанир къотӀнорго чӀела ниж къаси».
3Амма ЛутӀица тӀаса вичӀичӀого гьаридал, гьел разилъана ва гьевгун цадахъ гьесул рокъоре рилълъана. ЛутӀица, реччеб тӀечӀел панкъалги режун, лъикӀаб гьоболлъи гьабуна гьезие, ва гьел кванана. 4Къаси гьел регилалде, шагьаралъул гӀадамаз, гӀолохъабаздаса бахъараб харабазде гӀунтӀун Содомалъул киналго бихьиназ, ункъабго рахъалдасан сверун ккуна ЛутӀил мина.
5«Духъе сордо базе рачӀарал гӀадамал кир ругел? – абун ахӀдана гьел. – Гьанире нижехъе кье гьел, гьездасан нижеца лазат босизе!»
6Жиндаго хадуб нуцӀаги къан, ЛутӀ къватӀиве вачӀана. 7Гьес абуна:
«Те, вацал, гьеб иш! Гьабуге гьеб хъублъи. 8Дир кӀиго яс йиго, кӀияйгоги ясгӀадан – гьел кьела дица нужехъе. Нужеего бокьараб гьабе гьезие, амма гьал чагӀазда хъваге, гьал дир къавулъе рачӀарал дир гьалбал ругелъул!»
9«ТӀагӀа цевеса! – ян абуна гьез гьесда. – Мун вуго чияр ракьалдаса вачӀарав апараг, гьанже нижеда малълъаризейищ къасд ккараб? Гьезиеялдасаги квешаб гьабила нижеца дуе!»
Гьедин ахӀи-хӀуралда гьел ЛутӀида тӀаделъана ва нуцӀа бекизе лъугьана. 10Гьебмехалъ, ЛутӀил кӀиявго гьоболас, къватӀире квералги регьун, рокъове жаниве цӀан ана ЛутӀ ва жанисахун нуцӀа рахана. 11Ва рагьдухъе ракӀарун рукӀаралщинал – гӀисинал чӀахӀиял киналго бихьинал – беццлъизаруна гьез; кигӀан балагьаниги рукъалъул каву батулеб букӀинчӀо гьезда. 12Цинги кӀиявго чияс ЛутӀида абуна:
«Гьаб шагьаралда цоги щив вугев дур? Дурцал, васал, ясал яги цоги щал ратаниги, киналго гьаниса нахъе раче. 13Нижеца гьаб шагьар тӀагӀинабизехъин буго! Гьаб шагьаралъул гӀадамазул гӀорхъолъа араб квешлъиялъул кутакаб хъуй рагӀулеб буго БЕТӀЕРГЬАНАСДА, ва БЕТӀЕРГЬАНАС ниж ритӀун руго гьаб шагьар пасат гьабизе!»
14Жиндирго ясал абурал гӀолохъабазухъе вилълъана ЛутӀ ва гьес абуна:
«Хехго гьаб шагьаралдаса нахъе а! БЕТӀЕРГЬАНАС гьалда тӀаде балагь биччазехъин буго!»
Амма гьезда ккана ЛутӀил махсара батилилан.
15ХъахӀлъи балеб гӀужалда малаикзаби лъугьана ЛутӀ гӀедегӀизавизе:
«Дурго лъадиги ясалги рачун, хехго гьаниса нахъе а! Гьаб шагьаралъе жаза гьабулеб мехалъ мунгоги хвезе гурин!»
16Кингоги ЛутӀ гӀедегӀулев вукӀинчӀо. Амма БЕТӀЕРГЬАН гурхӀана ЛутӀида, гьединлъидал, ккун квералгун, ЛутӀги, гьесул лъадиги, кӀияйго ясги малаикзабаз жидецаго шагьаралдаса къватӀире щвезаруна.
17Шагьар тун къватӀире щведал, гьезул цояс ЛутӀида абуна:
«Гьанже лъута, хвасарлъизе гӀамал гьабе! Я нахъе валагьуге, я гьаб расалъиялда кивниги лъалхъуге – мугӀрузде лъута, гурони мунги хвезе вуго!»
18«Бажаруларо, дир БетӀергьан! – ин жаваб гьабуна ЛутӀица. 19– Дие, дурго лагъасе, лъикӀлъи гьабулеб буго Дуца! Дидехун дур гурхӀел-цӀобги кӀудияб буго! Дуца дир гӀумру хвасар гьабуна! Амма мугӀрузде лъутизе дихъа бажаруларо – гьеб балагь дида хадуб гӀунтӀила, дунги хвела. 20Доле цо гӀагардаго бугеб шагьар, дове щвезегӀан векеризе кӀвела дида. Дове векеризин дун, доб гьитӀинабго шагьар бугелъул – дова дунги хвасарлъила!»
21«ЛъикӀ буго, – ян абуна малаикас. – Дуе гӀоло гьебги гьабила дица: дуца бицунеб бугеб гьеб гьитӀинаб шагьар хвезабиларо. 22Гьа, гьанже хехго векере: мун дове щвезегӀан дица щибго байбихьизе бегьуларин». (Гьединлъидалин гьеб шагьаралда цӀар ЦогӀар#19:22 ЦогӀар – «ГьитӀинаб». бугеб.)
23Бакъ баккулеб гӀужалда ЛутӀ ЦогӀаралде щвана. 24Цинги БЕТӀЕРГЬАНАСУЛ амруялдалъун Содомалдеги Гоморраялдеги, зобалаздасан цӀад гӀадин, цӀа рекӀараб чӀабатӀ чвахана – БЕТӀЕРГЬАНАСДАСАН бачӀана гьеб. 25Ва пасат гьабуна кӀиябго шагьарги, тӀолабго расалъиги, киналго гьенир рукӀарал гӀадамалги, ракьалда бижарабщинабги. 26ЛутӀида цадахъ лъутун уней йикӀарай гьесул лъадийин абуни, нахъюссун ялагьана ва гьебсагӀатго цӀамул хӀубиялде сверана.
27Радал хехго вахъун, Ибрагьим вилълъана нолъ БЕТӀЕРГЬАНАСДА цеве живго вахъун чӀун вукӀараб бакӀалде. 28Содомалдехунги, Гоморраялдехунги ва расалъиялдехунги валагьидал, корохъ гӀадин кӀкӀуйдуца бацун бихьана ракь.
29ПалхӀасил, расалъиялъул шагьарал пасат гьарулеб мехалъ, Аллагьасда Ибрагьим ракӀалде щвана. ЛутӀ вукӀарал шагьарал тӀагӀинарулеб мехалъ, Аллагьас ЛутӀ балагьалъукьа ворчӀизавуна.
ЛутӀги гьесул ясалги
30ЦогӀаралда чӀезе хӀинкъун, кӀияйго ясги ячун, ЛутӀ мугӀрузде ана. Гьенив цо нохъода чӀана ЛутӀ жиндирго ясалгун.
31Цо къоялъ кӀудияй ясалъ гьитӀиналда абуна:
«Эмен херлъулев вуго. Гьаб дунялалъул гӀадаталда рекъон нилъгун рукӀине тӀокӀалъ бихьиналги гьечӀо ракьалда. 32РачӀа нилъеца, чагъирги гьекъезе кьун, эмен мехтизавизе ва гьесда аскӀор регизе. Гьедин нилъерго инсул наслу тӀагӀине биччаларо нилъеца!»
33Гьеб сордоялъ гьез эмен гьекъезавуна. КӀудияй яс гьесда аскӀой егана, амма гьесда щибго бичӀчӀичӀо – кин гьей жинда аскӀой егараялиги, кин нахъе араялиги. 34Нахъисеб къоялъ гьелъ яцалда абуна:
«Нолъ дун инсуда аскӀой егана. РачӀа чагъирги кьун, къасиги гьев мехтизавизе, ва мунги егизе гьесда аскӀой. Гьедин нилъерго инсул наслу тӀагӀине биччаларо нилъеца!»
35Гьеб сордоялъги гьез эмен гьекъезавуна. Цинги гьитӀинай ясги егана гьесда аскӀой. Амма гьесда щибго бичӀчӀичӀо – кин гьей жинда аскӀой егараялиги, кин нахъе араялиги.
36Гьедин жидерго инсудасан ЛутӀил кӀияйго ясалъул ургьибе лъимер ккана. 37КӀудиялъе вас гьавуна, гьесда цӀар МогӀав лъуна. Гьесдасан лъугьарал руго дол могӀавиял. 38ГьитӀиналъеги вас гьавуна, гьесда цӀар Бен-Амми лъуна. Гьесдасан лъугьарал руго дол аммониял.
Atualmente Selecionado:
Байбихьи 19: АварАК
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
© Институт перевода Библии, 2005-2023
