Genesis 1

A fasi fa ala sani bigin

1Na a bigin Gado#1:1 A Hebrewtongo taki: Elohim. meki heimel nanga grontapu. 2Grontapu ben bruya èn leigi. Wan dipi dungru ben de abra a watra di ben de na grontapu. A Yeye fu Gado ben e beweigi abra a watra.

3Dan Gado taki: “Faya mus de.” Èn faya ben de fu si. 4Gado si taki a faya ben bun, dan A prati a faya nanga a dungru. 5Dan Gado kari a faya dei èn a dungru A kari neti. Neti tapu èn dei ben opo. Na so a fosi dei psa.

6Dan Gado taki: “Wan sani mus de na mindri fu a watra di e prati a watra.” 7So Gado meki wan sani fu prati a watra di de na loktu, nanga a watra di de na gron. Na so a psa. 8Dan Gado kari a sani di A meki fu prati a watra, heimel. Neti tapu èn dei ben opo. Na so a di fu tu dei psa.

9Dan Gado taki: “A watra na grontapu mus kon makandra na wan presi, fu drei presi kan de fu si.” Èn na so a psa. 10Gado kari a dreipresi gron. A watra di ben kon na makandra A kari se. Èn Gado si taki a ben bun.

11Dan Gado taki: “Sani mus gro na grontapu: wiwiri mus de di e gi siri èn froktubon mus de di e gi froktu nanga siri.” Èn na so a psa. 12Sani bigin gro na grontapu: wiwiri ben de di ben e gi siri, nanga bon di ben e gi froktu nanga siri. Èn Gado si taki a ben bun. 13Neti tapu èn dei ben opo. Na so a di fu dri dei psa.

14Dan Gado taki: “Faya mus de na heimel fu prati dei nanga neti. Den mus de leki wan marki gi fasti ten fu a yari, gi spesrutu dei nanga spesrutu yari. 15Den mus de na heimel fu gi faya na grontapu.” Èn na so a psa. 16Dan so Gado meki den tu bigi faya. A moro bigiwan ben o de basi deiten, a pikinwan ben o de basi te neti. Èn Gado meki den stari tu. 17Gado gi den wan presi na loktu na heimel, fu gi faya na grontapu, 18fu den ben de basi fu dei nanga neti èn fu prati leti nanga dungru. Èn Gado si taki a ben bun. 19Neti tapu èn dei ben opo. Na so a di fu fo dei psa.

20Dan Gado taki: “Den watra mus lai nanga libisani di e beweigi na ini, èn fowru mus frei psa hei na loktu abra grontapu.” 21So Gado meki den bun bigi meti di de ini a se nanga wan heri ipi libisani di e beweigi ini a watra. A meki alamala na den eigi fasi. A meki ala sortu fowru tu na den eigi fasi. Èn Gado si taki a ben bun. 22Dan Gado blesi den èn a taki: “Un meki pikin, un meki furu pikin: a watra fu den se mus lai nanga libi èn grontapu mus kon furu nanga fowru.” 23Neti tapu èn dei ben opo. Na so a di fu feifi dei psa.

24Dan Gado taki: “Libisani mus de na grontapu: meti di yu kan kweki, meti di e kroipi, nanga krasi meti. Den mus de na den eigi fasi.” Èn na so a psa. 25So Gado meki den krasi meti. A meki den meti di yu kan kweki nanga ala den sani di e kroipi na gron. A meki den alamala na den eigi fasi. Èn Gado si taki a ben bun.

26Dan Gado taki: “Meki wi meki libisma di de leki wi èn di gersi wi. Den mus de basi abra den fisi fu den se, abra den fowru di e frei na loktu, abra den meti di yu e kweki, abra heri grontapu nanga ala meti di e kroipi na gron.” 27So Gado meki libisma di ben o de leki En. Leki fa En de, na so den ben o de. A meki man nanga uma. 28Dan Gado blesi den èn a taigi den taki: “Un meki pikin, un meki furu pikin fu den furu grontapu. Un mus de basi fu grontapu. Un mus de basi abra den fisi fu den se, abra den fowru di e frei na loktu, nanga abra ala meti na grontapu di e kroipi na gron.” 29Gado taigi den moro fara taki: “Luku, Mi e gi unu ala wiwiri na grontapu di e gi siri, nanga ala bon di e gi froktu nanga siri, fu un nyan fu den. 30Ma ala tra wiwiri Mi e gi na den meti fu grontapu, den fowru di e frei na loktu, na ala den meti di e kroipi na gron nanga ala tra libi sani.” Èn na so a psa. 31Dan Gado luku ala sani di A meki èn den ben bun fu tru. Neti tapu èn dei ben opo. Na so a di fu siksi dei psa.

Atualmente Selecionado:

Genesis 1: SB16

Destaque

Copiar