ALuka 4

Kuchɛrɛk aYeso

(AMatiyu 4:1-11; AMarkus 1:12,13)

1AYeso, ku hywa Ikabik Wɛsɛk, ati borok iKutsen aUrdun ikabik wɔtrhi ngu atak kayitkakot. 2Arɔko aShetan tu chɛrɛk nnom kobnass. Ngum ku ya kyɛŋ wɔgh nnom yama ya, amu te kpyak.

3AShetan nye ngu yah, “Be nwun yu yes aRenn KUNOM, nɔk kukoŋ kutah ntsa ku ti te nku ibiredi.”

4AYeso tu borokghi yah, “Ba karaŋ atak Kukaraŋkunom yah, ‘Kɔn ibiredi di zɔŋ ko anet se sot atsetrhi wɔgh.’ ”

5Ashetan tu sob awɔtrhi ngu aton karɔ ka gak atu tɔl atak izen ijajuk igwom azatse gbik. 6AShetan nye ngu yah, “Meŋ nza nɔk gbik kugyere aso ichwe, arɔko meŋghu ba ti nɔk nde, ndi ren ku nɔk koyaŋ anet ko meŋ shim ku tu nɔk. 7Arɔneŋgha be nwun te kuum ti yami mben, meŋ nza nɔk nde.”

8AYeso tu borokghi yah, “Ba karaŋ atak Kukaraŋkunom yah, ‘Adagbik KUNOM yu zɔŋ ko nwun su ya mben.’ ”

9AShetan wɔtrhi ngu aWurshelima aye tu sak aton kachuru karikunom. Anye ngu yah, “Be nwun yu yes aRenn KUNOM furuk ti kik aben azeŋgha.” 10Arɔko ba karaŋ yah:

“ ‘KUNOM bah nɔk bajel nku ntsa ba ta tɛnɛs ijel.

11Mbam bah ta bereŋ mbɔk mba, arɔko nwun si khirik kutak nwun ikutah wɔgh.’ ”

12AYeso borokghi yah, “Kukaraŋkunom be yah, ‘Kɔn ti chɛrɛk Adagbik KUNOM nwun wɔgh.’ ”

13Seko aShetan nghasaŋ kuchɛrɛk gbik, atu sak asaŋ tot ikak zen.

AYeso tsa kutomoŋ iGalili

(AMatiyu 4:12-17; AMarkus 1:14-15)

14AYeso ku ti borok iGalili ikugyigyak Ikabik, ba foss kukah ngu gyɔ mbeni gbik. 15Ataba taasi atak narizumuŋ baIserela, koyaŋ ngumi tu toroŋ.

16Awɔt iNazaret, karɔ ko ba tu shushumi, kun sɛh kunom aSabot ati wɔt karizumuŋ baIserela, aneŋko akusaŋ nye ya, ngum dutsik ko ase tɔŋ. 17Ba tu nabakghi kubɛbɛt adidɔk aIshaya. Seko abɛsɛ nku ase karɔ ko ba ti karaŋ yah,

18“Ikabik Adagbik se aton meŋ, arɔko ngum ti kasa ndi saraŋ kukah kulejel arɔ baya ko ba se iyɔm. Ngum ti tom nda bis baya ko ba se nyaŋ aso kutara ayisi bafe awil, nda hana baya ko ba taba yebesek,

19Meŋ nka bu tɔŋ iyɛh iroyɔm Adagbik.”

20Ngum kamre kubɛbɛtrha aborokghi anɔk afekubereŋghi amu sot aben. Koyaŋ anet atak karizumuŋ baIserela tu sɛmi ayisi, 21ngum nye mba yah, “Atutrha kufɛk koŋ tak shwak aneŋko nyin tesemɛn kutɔŋghi ya.”

22Gbik ba mbam tɔŋ mpɛk lejel aton ngu, mbam te zirit arɔ mpɛk inɔkkunom ko nna wuru anu ngu ya. Mbam rib yah, “Haŋ arenn aYusufu yoŋ wɔgh ye?”

23AYeso nye mba yah, “Ichini nyin si tɔŋghɛn kukoŋ kugorob, ‘Afekan, te chwe nwun ijel! Nye azeŋgha ikuwɔb nwuna nkyɛŋ ko yit foss ya nwun nye atak iKaparnahum ma.’ ”

24Ngum ya kashon anye yah, “Ichini di ko meŋ nda tɔŋghɛn, wallaŋ adidɔk ko ba ku tu nɔk igbanaŋ ikuwɔb ngu. 25Atak chin, izen aIliya babiniŋ kutuh ku se Iserela gbaraŋ. Seko ba tɛn icho ba ti tu ayɛh tat ankpit wallaŋ iza, izɔŋ nɔ gbik mbeni. 26Gbik aneŋgha kɔn ba kun ti tom aIliya arɔ kak mba wɔgh, ne ba tu tom arɔ abiniŋ kutuh aZarafat ko aku se ikunyi iSidon. 27Bankyikyɛnɛ kun ti se gbaraŋ Iserela izen adidɔk aIlisha ya gbik aneŋgha wallaŋ aya ko aku te kpɛsɛk ne aNaaman yu zɔŋ afe iSiriya.”

28Gbik banet ko ba ku se atak karizumuŋ baIserela ya ras nafah nkirit ko ba foss mpɛk aYeso ya. 29Ba dutsik, ba tu wuruk ikuwɔbi. Ba tu sob ba wɔtrhi ngu aton kachuru ihywɛnɛŋ ko ba ti nɔk kuwɔbi. Arɔ ba tu tomoŋ ati kpa atak kakyurukghi. 30Ne ngum rok kateh ishuun banetrhi atseŋ kyɛŋ ngu.

Anet ko abe nakabik nakpɛ

(AMarkus 1:21-28)

31AYeso kisik awɔt iKaparnahum, kuwɔb atak iGalili, se kunom aSabot ngum taas banetrhi. 32Mbam te zirit arɔ kutaas ngu ya, arɔko mpɛk ngu ku be ichwe. 33Yir anetrhi kun ti se atak karizumuŋ baIserela ko aku be nakabik nakpɛ. Agaŋ kukun agbaŋ izɔlɔs, 34“Ah! Ikyɛdi ko nwun shim iyitrhi, aYeso afe iNazaret? Nwun bɛh ti ye tik beseŋghi? Meŋ ren nwun yu se Wɛsɛk ko nwun ne arɔ KUNOM!”

35AYeso nɔk nna ntsa yah, “Man njet! Wuruk atak ngu!” Nakabik nakpɛ gaŋ anetrhi aben anushon mba gbik nnam mu wuruk kaŋ tu fokghi.

36Gbik banetrhi te zirit mbam nye arɔŋ yah, “Yaŋ kutaas koŋgha? Ichwe aso kugyigyak ngum nɔk nakabik nakpɛ ntsa nnam wuruk!” 37Ikukah aYeso tak saŋre ikoyaŋ karɔ.

AYeso te banet gbaraŋ ijel

(AMatiyu 8:14-17; AMarkus 1:29-34)

38AYeso ku sak karizumuŋ baIserela awɔt ari aSimon. Anyimkaŋgha anyiniŋ abiniŋ aSimon kusaŋ sɔh ngbaŋ ikufit, mbam mu nassaŋ aYeso yah atu fik. 39Ngum te kuum nɔk kufitrhi ntsa, nkum tu sak. Ngum dutsik izeni asaŋ taba nye kutomoŋ. 40Seko yinom wɔ kpa nde, banet bɛmi baya ko ba be asha jwajwa arɔ aYeso ya, ate rɔŋ yi mbɔk, ngum taba te ijel. 41Aneŋ ba, ba kutuk wuru atak banet gbaraŋ. Ba rɛkre, “Nwun yu yes aRenn KUNOM!” Ataba kpɛŋre abu taba nɔk ntsa ya ba ti fɛh wɔgh, arɔko mbam ku ren yah ngu yu yes aya ko KUNOM kasa.

AYeso saraŋ kukah kulejel

(AMarkus 1:35-39)

42Achetson aYeso wɔt arɔ kayak. Banet saŋ tu tɔk, seko ba tu sɛh ba saŋ shim ko ana tseŋ wɔgh. 43Ne ngum nye yah, “Ku se ngbiŋ nsaraŋ kukah kulejel igwom KUNOM ibiri nwɔb ma, arɔko nkuku te ba ti tom.” 44Aya kashon kusaraŋ kukah kulejel atak narizumuŋ baIserela aJudiya.

Atualmente Selecionado:

ALuka 4: FIR

Destaque

Copiar