Matthew 1

Rhaepeto Kkewe Aaen Jesus Kristus

(Luke 3.23-38)

1Ikkaan tettaenin rhaepeton Jesus Kristus, iiy erhaep saengi David, iwe nge David erhaep saengi Abraham.

2Nge Abraham semaen Isaac, nge Isaac semaen Jacob, nge Jacob semaen Judah me mwaaen kkewe pwiin. 3Nge Judah semaen Peres me Zerah (itaen ineer nge Tamar), iwe nge Peres semaen Hezron, nge Hezron semaen Ram. 4Nge Ram semaen Amminadab, nge Amminadab semaen Nahshon, nge Nahshon semaen Salmon. 5Nge Salmon semaen Boaz (itaen inan nge Rahab), nge Boaz semaen Obed (itaen inan nge Ruth), nge Obed semaen Jesse, 6nge Jesse semaen king David.

Nge David semaen Solomon, iwe e naini me wooan niewe pwiuniuwaen Uriah, 7nge Solomon semaen Rehoboam, nge Rehoboam semaen Abijah, nge Abijah semaen Asa. 8Nge Asa semaen Jehoshaphat, nge Jehoshaphat semaen Jehoram, nge Jehoram semaen Uzziah. 9Nge Uzziah semaen Jotham, nge Jotham semaen Ahaz, nge Ahaz semaen Hezekiah. 10Nge Hezekiah semaen Manasseh, nge Manasseh semaen Amon, nge Amon semaen Josiah. 11Nge Josiah semaen Jehoiachin me mwaaen kkewe pwiin ikkiwe re asiiur nong noan Babylon.

12Mwirin aar asiiur noa Babylon: Jehoiachin semaen Shealtiel, nge Shealtiel semaen Zerubbabel. 13Zerubbabel semaen Abiud, Abiud semaen Eliakim, nge Eliakim semaen Azor. 14Azor semaen Zadok, Zadok semaen Achim, nge Achim semaen Eliud. 15Eliud semaen Eleazar, Eleazar semaen Matthan, nge Matthan semaen Jacob. 16Jacob semaen Joseph iwe pwiuniuwaen Maria, niewe a nainitiw Jesus iwe re faingi pwe Kristus.

17Seig me faawu saeren aeremas saengi Abraham ngaeni David, pwan seig me faawu saeren aeremas saengi David ngaeni oaton aar asiiur noa noan Babylon, pwan seig me faawu saeren aeremas saengi oaton we re asiiur noa Babylon ngaeni wupwutiwen Kristus.

Wupwutiwen Jesus Kristus

(Luke 2.1-7)

18Ieen wunuunun aaen Jesus Kristus wupwutiw. Maria we inan a kkefoat ngaeni Joseph, nge igiwe resaaen pwiuppwiuniuw mwo nge a pwae pwe niewe a pwoopwo reen kkemenaen Espritu Santus. 19Nge Joseph erhai mwaaen wenewen, ese mwerhaen aessaewa Maria me weni mmweer aeremas, iwe a niunniuwaennei epwene siusaengi, nge epwe feeori rhag noan mwoanomwoan. 20Igiwe e rhiuwen niunniuwaennei wunuunun, erhai naiun Soamwoon angkenus a pwae ngaeni noan aan ttan nge a aengaeni pwe, “Joseph we tettaenin David, wosoapw mesag oamw wopwe pwiuniuwaeni Maria, pwe iiy a pwoopwo reen kkemenaen Espritu Santus. 21Epwene naini erhai aetemwaaen, iwe wopwe aeita ngaeni Jesus,#1.21 Jesus wewen nge Soamwoon aemenewa pwe iga iiy epwe aemenewaar naiun aeremas saengi aar monofit.”

22A wen oanongaen minikkeei pwe epwe pwaeritae meeta we profeta a aepesa pwe mwaeniaei Soamwoon:

23“Erhai aeterhooapwut epwene pwoopwo nge a naini erhai aetemwaaen,

repwe aeitae ngaeni Immanuel”, (wewen nge “Deus eno reerh”).

24Iwe oatowe Joseph a mmasetae, a feeori wunuunun miniwe angkenus we naiun Soamwoon e aepesa ngaeni. Iwe a pwiuniuwaeni Maria. 25Nge Joseph ese maiur ngaeni Maria toori aan nainitiw aetewe naiun. Iwe, Joseph a aeita aetewe pwe Jesus.

Atualmente Selecionado:

Matthew 1: STW

Destaque

Copiar