Popodalaina 16

I Haqa Beto i Isimeli

1Ego i Serai, na maqotana i Ebarami sa sake boka vapore vania na koburu si Ebarami. Ba sa isongia isa sa kai nabulu rereko Ijipi na isongona i Haqa; 2ko sa pojania si Ebarami, <<I Iahova sake vabokasiu ko mana isongo koburu sara. Ko mu lao puta tavitia na nabulu rereko taqu poni; palu pa boka tana mana boka podalainia kai tatamana,>> sau.

Poni sa nongoria i Ebarami sa na ovovelena i Serai. 3Ko pa liguna sa suvere pa Kenani ka manogaputa aoro si Ebarami sa, sa tekua i Serai si Haqa na ona nabulu rereko beto ko sa vania na marenena ko sa veinia na maqotana. 4Ko i Ebarami sa puta tavitia si Haqa ko sa pore iapana tu.

Totonai sa gigilai sa bogata si Haqa, sa podalai dodogoro vagorea isa sa na ona iviva rereko lavata. 5Poni pira sau si Serai lao tai Ebarami, Na tapata ao qu roitinia sa qa korapa gosoroni vitigi ara. Qa vanagonigo sa na qua nabulu beto kopira sa gigilai sa bogata sisa sa sa dodogoro vagoresiu sara. I Iahova mi pitua sa i sei sa sa sela gita karu, saunia.

6Poni pira sau si Ebarami, <<Ao gu qu gigilai sa na mua nabulu, mu roiti laonia tana isa vei qu rovea sa jonga,>> saunia.

Poni sa komiti vikeria i Serai si Haqa ko sa uku riuona.

7Ego na mateana tai Iahova sa batia si Haqa tata pa kai vuvugu pie pa qega, na vuvugu pie isa sa pa keketaina na soana sa lao pa Sua. 8Ko pira saunia, <<Haqa, ao na nabulu tai Serai, Pai qu koko lame vei beto pai qu korapa lao vei sao?>> sau.

Sa oe lao si Haqa, <<Qa korapa ukunia i Serai na qua iviva rereko lavata,>> sau.

9Poni sa pojania na mateana tai Iahova, <<Mu mule lao tana mua iviva rereko lavata beto mu suvere vaiketai tana,>> saunia.

10Beto pira saunia mule na mateana, <<Mana vavovonua ara sa na tutimu ao ko maike jonga taanye betodi,>> sau.

11Beto pira saunia mutu na mateana tai Iahova sisa:

<<Kopira qu bogata sao

Kode muna vaporea kai tumu marene.

Muna vaisongonia i Isimeli,

Ura i Iahova sa nongoria na mua kekebo.

12Isa sa mina kai tinoni piruna vei na dongiki;

Mina komitiria gu sa doru tinoni

Beto doru tinoni ba mai komitia tugu

Beto mina suvere vaikanai

Lao tadira doru tasina marene sisa,>> sau.

13Beto sa vania na isongo si Iahova isa sa parangia, <<Ao sa na Tamasa qu batisiu>> ura pira sau si Haqa, <<Kopira qa batia sa na tinoni isa sa batisiu,>> sau sisa. 14Isa sa na ginuana vei beto sa tavakukunia Bia Lahai Roi sa na oqili pie sa korapa tugu koleona kamua kopira, pa vaikorapaina pa Kadesi beto pa Beredi.

15Ko i Haqa sa vapodo vania kai koburu marene si Ebarami ko i Ebarami sa vaisongonia i Isimeli sa na tuna marene sa vapodo vania i Haqa. 16Ka vesu ngavulu vonomo aorona si Ebarami totonai i Haqa sa vapodoa si Isimeli.

Atualmente Selecionado:

Popodalaina 16: LGA

Destaque

Copiar