Popodalaina 15
15
Na Vinaego Sa roitinia Na Tamasa Tai Ebarami
1Pa liguna api, na paranga tai Iahova sa lame tai Ebarami pa dodogoro.
<<Muke matagutu, Ebarami.
Ara sa na mua naqe,
Na mua pinia poreveveina jola,>> sau.
2Ba sa paranga tu si Ebarami, <<Kei bangara Iahova, na sa muna boka vanisiu ura ara kepore tuqu beto isa na tinoni mina teku vakarovia na isisongo taqu sa i Elieze na tinoni Damasikasi tu?>> sau sisa. 3Beto sa paranga mule si Ebarami, <<Quke vanisiu na koburu ke; ko kai nabulu gu pa qua tatamana sa mina beisiu sara,>> saunia.
4Poni sa lame tana sa na paranga tai Iahova: <<Na tinoni api sa minake beigo ao goto kai tumu marene mekamu tu mina koko lame vei pa tinimu mekamu sa mina beigo ao,>> sau. 5Beto sa toni votunia pa peguru beto sa paranga, <<Mu enga saea na oka beto mu anyeria sa na seru- vei sosoto tugu muna boka anyeria ao sa,>> sau. Beto sa paranga mutu, <<Mai vei inara sa na tutimu ao,>> saunia.
6Poni i Ebarami sa vasosotoa si Iahova ko i Iahova sa pojania na tinoni tuvisina sisa.
7Beto sa paranga lao tana mutugu, <<Ara si Iahova, qa toni votunigo pa Ur tadira na tinoni Kaladia ko ma vanigo na ia api ko mu isongia qau,>> saunia.
8Ba sa paranga tu si Ebarami, <<Kei bangara Iahova, Ai vei mana boka gigilai ara mana teku isongia sisa?>> sau.
9Poni sa paranga si Iahova tana, <<Mu teku vakamu vanisiu kai bulumakau kokoregana, kai qoti beto kai rami okoto ka ue aorodi, tavitiria kai kuru bora beto kai kuru kavu kokoregana,>> saunia.
10Ko sa teku vakamuria i Ebarami tana sa dorudi aipira, sa kobu ruaria beto sa vakole tuturu vaikaleniria sa na kokobudi; goto ira na mamanugu tatava sa sake kobu ruaria. 11Poni qai tatava kamu sira na mamanugu tatava gagani mamanugu pa kokobu tini matedi, ba sa adu variuria i Ebarami.
12Totonai sa korapa gore suvu na tapo, sa puta mumagana tu si Ebarami, poni sa kai rodomo kukuni vaivamatagutuna sa sa toqo pa arena isa. 13Beto sa paranga si Iahova tana, <<Mu gigila vatalea ao sa ira na tutimu ao sa mai tinoni kamudi pa ia qaike isongia, mai tavapinausu beto mai tangangangulu ka made gogoto puputa aoro, sau sisa. 14Ba mana vakilasia ara sa na bubutu tinoni ketakoi mai tavapinausu ira beto pa liguna sa mai votu riu tavitia soku isisongo poreveveidi. 15Ba ao sa muna baragoso vaparoi tu beto sa muna riu vabubulemua tutiria na mua tite. 16Pana vinamade sasae tinoni sa ira na tutimu ao sa mai mule kamu lani, ura na sela tadira na bubutu tinoni Amorai sa sa oqoro jutu kamua na ikerena sosoto,>> saunia.
17Totonai qi tei suvu tu sa na tapo ko sa tei opo tu sa na rodomo, poni sa kai raro mamanginina sa votua na tula tavitia kai gou iku vuvurungu sa sa bola votu beto sa alokata pa vaikorapaidi na kokobu tinidi na mamanugu. 18Na rane isa i Iahova sa roitinia na vinaego tai Ebarami, ko pira sau, <<Na ia api sa qa vaniria ara na tutimu ao, koko pa ovuku pa Ijipi ko mi lao kamu pa ovuku lavata pa Eupareti- 19na ia tadira na bubutu tinoni Kenai, na Kenizai, na Kadimonai, 20na Hitai, na Perizai, na Repai, 21na Amorai, na Kenani, na Qiqasai beto na Jebusai,>> sau sisa.
Atualmente Selecionado:
Popodalaina 15: LGA
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
© 2024, Islands Bible Ministries. All rights reserved.
