Genesis 2
2
1Sa voy ta oye rani no vodu ni te lua no tabae oyra pita te rani no vodu ni te lua sa bosi.
2Te vavetua tava Bangara sa vabosi moyna jaju oye sa joyjuni; si te vavetua tava oye sa mamana te tabae ona jaju oye sa joyjuni. 3No Bangara sa manani vavetua tava no oye sa vatoybo, bati te tava noyene oye sa mamana te tabae oyra ona jaju vavaporo oye sa joyjuni.
Boysi kinaka no Quole kinaka
4Goyti sa voy toritoria rani no vodu ni te lua kuru poro me. Sada Iaova Bangara sa vaporo vodu ni te lua no rani- 5no aba sa kareo oyra bobosu me takabula me te lua te vodu ni te lua no sa kareo ka pita titiba te lua me tuoqolo puka me, bati Iaova Bangara korovita peqani mevo moyqa te vodu ni te lua no aba kareo boysi me zetuni lua. 6Ba kasuku sa takabula me te vodu ni te lua no sa vamoqete sarapokae lua- 7Iaova Bangara sa pubo boysi te kaua lua no sa ngasapua la te zengo, ngasapuae tu, no oye sa boysi tu.
8Sinani Iaova Bangara sa teba keike barue te neva sa pukae me ngada, te vodu ni Idini: no te ngoyni noyene oye sa la voykuni boysi oye sa pubo te kaua lua. 9No Iaova Bangara sa vatuqolo me te lua taba adoadoa doyra oyra azu- oyra azu ka miminoyi te mata no sa noyi moyra oyke. Te arakaluoboroa barue sa kue azua tu no azua taruenia noyi no roka.
10Keike vuru sa juolo tae me Idini sa vamomoqa barue: te ngoyni noyene same tauta te vati oyra boytua bi. 11Taritongoa vuru kinakasua Pisoni: sa lieqolame te kolabae vodu ni Havila, te ngoyni sa kue qolu. 12(Qolu sa kuo te vodu ta sa noyi: oyra poporae azu sa nanabu noyi no katora ngoyjala majamajala ka kuo te ngoyni ta.)
13Toritongoa vakeria vuru Qioni: sa lieqolame te kolabae vodu ni Kusi. 14Toritongoa vatulua vuru Tiqirisi: sa juolo voy la te neva sa pukae me ngada Asari. No vavatia vuru Uperetesi. 15No Iaova Bangara sa koype boysi no sala voyko oye te baruoe ni Idini soy me zetuni no me asetoyke.
16No Iaova Bangara sa voytuni boysi, <<Tabae oyra azu ka kuo te barue re ko soyko oyke re ko majala oyke veverea; 17ba te azua taruenia noyi no roka re kasi mo oyke veverea, bati te tava re ko oyke sa tuna re ini mo lei.>> 18Iaova Bangara sa voy, <<Kama noyi vo boysi leike me kuo veke. Aro me joyjuni koyna oye keike boysi arasasaoto me araviri oye,>> sa voy.
19No sinani Iaova Bangara sa pubo me te lua taba pita peru te sanoyqa no taba oyra roroko te maloykanae. Oye sa koype me oyra te kue boysi soy me mia adoa toritongo me koyna oyra: no ka pita boysi me keleikini oyra, susupae doyra oyra pita ka tu, oye to ta me toritongoa doyra. 20Sa voy ta oye, boysi sa vataritenge taba oyra pita pupura, oyra roroko te maloykanae no taba oyra pita peru te sanoyqa. Ba te kue boysi kama zari vo boysi arasasaoto me araviri oye. 21Sa voy ta oye Iaova Bangara sava poymo sua boysi: sada oye aba sa pam, oye sa pale kieke poyda raqaraqae no sa kumo velini ni zio te ngoyni noyene. 22Sinani Iaova Bangara sa joyjuni quole te raqaraqa oye sa pale kesini moyna te kue boysi, no oye sa koype me oye te kue boysi.
23Sa voy goyti boysi,
<<Goyti poydae poydaqu ro
No zioa zioqu ro:
Oye moyra kelikini < boysiquole,>
Bati oye ka pale te kue boysileike.>>
24Ta te soy oye boysileike me kesini tamae no sinae no me kuo vakeike te kue ona quole no oyru me keike to senini doyru.
25Boysi no ona quole aba kuru qula to, no oyru kama mamaqatae doyru.
Atualmente Selecionado:
Genesis 2: BAA
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
© 2024, Islands Bible Ministries. All rights reserved.
