मरकुस 3

सूखे हाथा आले बन्दे नु ठीक करले

(मत्ती 12:9–14; लूका 6:6–11)

1ईशु बल्ति प्राथनाघरा मां गेला, ओठे हेक बन्दे हुते जाया हेक हाथ सूकती गेलता, 2ते वे ईशु उपर दोष लावणे वास्ते ओची घात मां लाग़ले आले हुते कि ङेखु, ओ सब्त चे ङिओ ओनु ठीक करे के ना। 3ओणे सूखले हाथा आले बन्दे नु केहले, “आधे मां खड़ा हो।”

4ते ओणे केहले, “का सब्त चे ङिओ भले करने वाजिब छै जा बुरे करने, जीन्दगी नु बचावणे जा मारणे ?” पर वे चोप रेहले।

5ईशु ने वांचे मना ची कठोरता कनु उदास हुती कर, वानु क्रोध लारे चारो-तरफ ङेखले, ते ओ बन्दे नु केहले, “आपणा हाथ आग़ु बढ़ा।” ओणे बढ़ाला, ते ओचा हाथ ठीक हुती गेला। 6तब फरीसी ब़ाहर जती कर तुरन्त हेरोदियां चे लारे ओचे विरोध मां सलाह करली कि ओनु किवें करती खत्तम करु।

घणी भीड़ ईशु चे भांसु हुती

7ईशु आपणे चैला लारे गलील ची झील सनु चाह्‍ला गेला, ते गलील कनु हेक बङी भीड़ ओचे भांसु टुरती पली, 8ते यहूदिया ते यरुशलेम, इदुमिया,ते यरदन चे पार, ते सूर ते सैदा चे आस-पास कनु हेक बङी भीड़ ईं सुणती कर कि ओ किवें अचम्भे चे काम करे, ओचे गोढु आली। 9#मरकु 4:1; लूक 5:1–3 ओणे आपणा चैला नु केहले, “भीड़ ची वजह हेक छोटी ब़ेड़ी माये वास्ते तियार रिहो कि वे मनु दब़ा ना सग़ो।” 10कांकि ईशु ने ब़ोहत बिमारा नु ठीक करले हुते, ऐवास्ते जितने लौक बिमार पले हुते, ओनु हाथ लावणे वास्ते ओचे उपर ढी पलते। 11जिसे बेले जिसा बन्दा मां अशुद्ध आत्मा हुतीया, ईशु नु ङेखती कर ओचे पग़्ग़ा मां ढेती पड़तीया ते बल्ति चीकती कर केहतीया, “तु नरीकारा चा पूत छी।” 12ईशु ने वानु ब़ोहत चिताले कि मनु प्रकट ना करजा।

ईशु ने ब़ारहा नु चुणले

(मत्ती 10:1–4; लूका 6:12–16)

13बल्ति ईशु पहाड़ा उपर चढ़ती गेला, ते जानु ओ चाहता, वानु आपणे गोढु हकारले, ते वे ओचे गोढु आले। 14तब ओणे ब़ारहा चैला नु चुणती गेले ते वानु प्रेरित चा पद्द ङिला कि वे ओचे लारे-लारे रिहो, ते ओ वानु भेज़ो कि वे प्रचार करो। 15ते दुष्टात्मा नु काढ़णे चा अधिकार राखो।

16ते वे ये छी,

शमौन, जाये नां ईशु ने पतरस राखले, 17ते जबदी चा पूत याकूब ते याकूब चा भऊ यूहन्‍ना, जाये नां ओणे बुअनर्गिस यानि, “गरजण चे पूत।” राखले 18ते अन्द्रियास, ते फिलिप्पुस, ते बरतुल्मै, ते मत्ती, ते थोमा, ते हलफई चा पूत याकूब, ते तद्दै, ते शमौन कनानी, 19ते यहूदा इस्करियोती जेह्णे ईशु नु पकड़वाती वी ङिले।

ईशु ते शैतान

(मत्ती 12:22–32; लूका 11:14–23; 12:10)

20बल्ति औ घरे आला। हेक वारी बल्ति इतनी भीड़ भेली हुली कि ईशु नु ते ओचे चैला नु रोटी खाणे चा समय कोनी मिड़ला। 21जिसे बेले ओचे कुणम्बा चे बन्दा ने सुणले ओनु आपणे लारे गेहणे वास्ते टुरती पली, कांकि बन्दी किही पलती, “ऐचा चैता टिकाणे कोनी।” 22#मत्ती 9:34; 10:25शास्त्री वी जको यरुशलेम कनु आले हुते, ईं केहते, “ओचे मां शैतान छै, ते ओ दुष्टात्मा चे सरदार ची सहायता लारे दुष्टात्मा नु काढ़े।”

23ईशु ने वानु आपणे गोढु हकारले ते वानु मिसाल ङिली, “शैतान, शैताना नु किवें काढ़ सग़े? 24अगर कुई राज़ मां फूट पड़े, तां ओ राज़ किवें टिकती कर रेह सग़े?। 25ते अगर कुई घरा मां फूट पड़े, तां ऊं घर किवें टिकती रेह सग़ी? 26ऐवास्ते अगर शैतान आपणा ही विरोधी हुती कर आपणे मां फूट घाले, तां ओचा राज़ किवें बणला रिही? ओचा तां अन्त ही हुती जाये। 27पर कुई बन्दे, कुई ताकतवार चे घरा मां घिरती कर ओचा माल ना लूट सग़ी, जब तक कि पेहले ओ ताकतवार नु ना ब़ांथी गिहो, ते तब ओचे घर लूटती गिही।

28“मैं तम्हानु सच्‍च किहे पला कि, इन्साना ची ऊलाद्धी चे सारे पाप ते निन्दा जको करे, माफ करती ङिले जाये, 29#लूक 12:10पर जको कुई पवित्र आत्मा चे विरोध मां निन्दा करे, ऊं कङी वी माफ नी करले जई, बल्कि ओ अनन्त पाप चा अपराधी हुती जई।” 30ईशु ने हा वानु ऐवास्ते केहले हुते कि शास्त्र नु सिखावणे आली बन्दी किही पलती, “ऐचे मां कुई अशुद्ध आत्मा समाली आली छै।”

ईशु चा परिवार

(मत्ती 12:46–50; लूका 8:19–21)

31तब ओची आई ते भऊ आली, ते ब़ाहरु भिले रेहती कर ओनु हकरवाले। 32भीड़ ओचे आस-पास ब़ेहली हुती, ते वाणे ओनु केहले, “ङेख, दुधी आई ते दुधे भऊ ब़ाहरु तनु सोधी पली।”

33ओणे वानु उत्तर ङिला, “माई आई ते माये भऊ कूण छी?” 34ते वांचे उपर जको ओचे आस-पास ब़ेहली हुती, नजर ङेखती कर केहले, “ङेखा, माई आई ते माये भऊ ये छी। 35कांकि जको कुई नरीकारा ची इच्छा उपर चले, वे ही माये भऊ, ते ब़ेहण, ते आई छै।”

Atualmente Selecionado:

मरकुस 3: ODR

Destaque

Copiar