लूका 17

पापा ची माफी

(मत्ती 18:6,7,21,22; मरकुस 9:42)

1बल्ति ईशु ने आपणे चैला नु केहले, “हो ना सग़ी कि ठोकरा ना लाग़ो, पर हाय, ओ इन्साना उपर जाई वजह कनु ठोकरा लाग़ी। 2जको कुई यां छोटा महु कानु ठोकर खुलाओ, ओचे वास्ते ईं भले हुवीया कि घर्टी चा पोड़ ओचे गले मां लटकाला जईया, ते ओ समुन्दरा मां नाखती ङिला जईया।

3 # मत्ती 18:15 “सचेत रिहा, अगर दुधा भऊ अपराध करे तां ओनु दड़का, ते अगर पछतावे तां ओनु माफ कर। 4अगर ङिओ भर मां ओ सात वारी दुधे बारे मां पाप करे ते सात वारी दुधे गोढु बल्ति आती कर किहे, ‘मैं पछतावे पला,’ तां ओनु माफ कर।”

विश्‍वास

5तब प्रेरितां ने प्रभु नु केहले, “अम्चे विश्‍वासा नु बधा।”

6प्रभु ने केहले, “अगर तम्हानु राई चे ङाणे चे बराबर वी विश्‍वास हो, तां तम्ही ऐ सतूता चे दरख्ता नु किहा, ‘जड़ही कनु उखड़ती कर समुन्दरा मां लाग़ती जा,’ तां ओ तम्ची मनती गिहा।

दास चे काम

7“पर तम्चे महु इसड़े कूण छै, जाया दास हल बाहवीया, जा भेङा चराता हुवीया, ते जब ओ खेता महु आवीया, तां ओनु किहे, ‘तुरन्त आती कर खाणे वास्ते ब़ेस’? 8का ओ ओनु ईं नी किही, ‘माये खाणे तियार कर, ते जब तक मैं खाये पीयें तब तक कमर कसती माई सेवा कर, ऐचे बाद तु वी खाती-पीती गिहो’? 9का मालिक ओ दासा चा ऐहसान मनी कि ओणे ऊंही काम करले जिसे ची आज्ञा ङिली गेलती? 10ऐस रीति लारे तम्ही वी जब वां सब कामा नु करती चुका जाई तम्हानु आज्ञा ङिली गेलती, तां किहा, ‘अम्ही साधारण दास छिऊं, कि जको अम्हानु करने चाही हुते ऊंही करले।’ ”

ईशु ने ङस कोहड़ीया नु शोद्ध करले

11ते इसड़े हुले कि ओ यरुशलेम नु जता हुला सामरिया ते गलील चे बीच हुती जाये पलता। 12ते कुई गांवा मां घिरते बेले ईशु नु दूर भिले ङस कोहड़ी मिले। 13तब वाणे साङ मारती केहले, “हे ईशु, हे मालिक, अम्चे उपर दया कर।”

14ईशु ने वानु ङेखती कर केहले, “जावा ते आपणे आप नु याजका नु ङिखाणा।”

ते जते-जते ही वे शोद्ध हुती गेले। 15बल्ति वांचे महु हेके ने ईं ङेखती कर कि मैं ठीक हुती गेला, ऊंची अवाजी मां नरीकारा ची बढ़ाई करता हुला पुठा आला। 16ते ईशु चे पग़्ग़ा मां मुँहा भराणे ढेती, ओचा धन्यवाद करु लाग़ला, ते ओ हेक सामरी हुता। 17ऐचे पर ईशु ने केहले, “का ङस शोद्ध कोनी हुले तां बल्ति वे नाओ किठे छी? 18का ऐ प्रदेसी नु छोड़ती वांचे महु कुई नेरा कोनी निकड़ला, जको नरीकारा ची बढ़ाई करीया?” 19जब ईशु ने ओनु केहले, “उठती कर चाह्‍ला जा, कांकि तु माये उपर विश्‍वास करला ते दुधे विश्‍वास ने तनु ठीक करले।”

नरीकारा चा आणे आला राज़

(मत्ती 24:23–28,37–41)

20जिसे बेले फरीसिया ने ओकनु पूछले कि नरीकारा चा राज़ किसे बेले आवी, तां ओणे वानु उत्तर ङिला, “नरीकारा चा राज़ प्रकट रूपा मां ना आवी। 21ते लौक ईं नी किही, ‘ङेखा, इठे छै!’ जा, ‘उठे छै!’ कांकि नरीकारा चा राज़ तम्चे बीच मां छै।”

22ते ईशु ने चैला नु केहले, “वे ङिहें आवे, जाये मां तम्ही मैं इन्सान चे पूता चे ङिहां महु हेक ङिओ ङेखणा चाहवा, ते नी ङेख सग़ा। 23ते लौक तम्हानु किही, ‘ङेखा, ओठे छै!’ जा, ‘ङेखा, इठे छै!’ पर तम्ही चाह्‍ले ना जजा ते ना वांचे भांसु हुजा। 24कांकि जिंवे बिजली आसमाना चे हेक कूणे कनु चमकती कर आसमाना चे ङुजे कूणे तक चमकती जाये, यूंही मैं इन्साना चे पूता चे वी आपणे ङिहां मां आणे हुवी। 25पर पेहले जरुरी छै, कि मैं ब़ोहत ङोख चवे, ते ऐ युगा चे लौक मनु ठुकराती नाखो। 26जिंवे नूह चे ङिहां मां हुले हुते, यूंही मैं इन्साना चे पूता चे ङिहां मां वी हुवी। 27जिसे ङिओ तक नूह जहाजा उपर कोनी चढ़ला, ओ ङिओ तक लौक खाते-पीते, ते वांचे मां बीहा शादीया हुतीया, तब जल प्रलय ने आती कर वां सब नु नाश करले। 28ते जिंवे लूत चे ङिहां मां हुले हुते, लौक खाते-पीते लेन-देन करते, दरख्ते राहते ते घर बणाते। 29पर जिसे ङिओ लूत सदोम महु निकड़ला, ओ ङिओ जाखते ते गन्धक आसमाना महु बरसली ते सब नु नाश करती नाखले।

30“मैं इन्सान चे पूता चे प्रकट हुवणे चा ङिओ वी इसड़े हुवी। 31#मत्ती 24:17,18; मरकु 13:15,16 ओ ङिओ जको छत्ते उपर हो, ते ओचा समान घरा मां हो, ओ ओनु चवणे वास्ते ना उतरो, ते यूंही जको खेता मां हो, ओ पुठे ना आओ। 32लूता ची घराआली नु चैते राखजा। 33#मत्ती 10:39; 16:25; मरकु 8:35; लूक 9:24; यूह 12:25जको कुई आपणी जीन्दगी बचावणा चाहवे ओ विनु गुंती ब़ेसी, पर जको आपणी जीन्दगी गुंवी ओ विनु जीते राखी। 34मैं तम्हानु किहे पला, वे राती नु ङोन इन्साने हेकी खाटे उपर हुवे, हेक गेहती गेले जई, ते ङुजे नु छोड़ती ङिले जई। 35ङोन असतरीया हेके लारे घर्टी पीसतीया हुवे, हेक गेहती गेली जई, ते ङुजी छोड़ती ङिली जई। 36ङोन जणे खेता मां हुवे हेक गेहला जई ते ङुजे नु छोड़ले जई।”

37ईं सुणती कर वाणे ओकनु पूछले, “हे प्रभु ईं किठे हुवी?”

ओणे वानु केहले, “जिठे लोथ हो, ओठे ग़िझा भेलिया हुवे।”

Atualmente Selecionado:

लूका 17: ODR

Destaque

Copiar