Mateghusi 1
1
Mashimurukero ghaJesus Kristusi
(Luk 3:23–38)
1Agha ne ghomashimurukero ghaJesus Kristusi ghoMwana Davita, Mwana Abrahamu: 2Abrahamu wiha Isaka, Isaka wiha Jakopu, Jakopu wiha Juda nawaminendi. 3Juda wiha Peresi, naSeraga paTamara, Peresi wiha Esromi, Esromi wiha Arami, 4Arami wiha Amminadabu, Amminadabu wiha Nagsoni, Nagsoni wiha Salmoni, 5Salmoni wiha Boghasi paRagabu, Boghasi wiha Obeti paRuti, Obeti wiha Isayi, 6Isayi wiha fumu Davita.
Davita wiha Salomo pamuna Uriya, 7Salomo wiha Rehabeghamu, Rehabeghamu wiha Abiya, Abiya wiha Asa, 8Asa wiha Josafati, Josafati wiha Jorami, Jorami wiha Ussiya, 9Ussiya wiha Jotami, Jotami wiha Agasi, Agasi wiha Hiskiya, 10Hiskiya wiha Manase, Manase wiha Amosi, Amosi wiha Josiya, 11Josiya wiha Jegonya nawaminendi. Popo ko kuditwara diko kumukwato ghomuBabiloni.
12Munyima dhon̂otwa dhomuBabiloni ya karire ngeno: Jegonya wiha Seghaltili, Seghaltili wiha Serubbabeli, 13Serubbabeli wiha Abiyudi, Abiyudi wiha Eliyakimu, Eliyakimu wiha Asori, 14Asori wiha Sadoki, Sadoki wiha Agimu, Agimu wiha Eliyudi, 15Eliyudi wiha Eleyasari, Eleyasari wiha Mattani, Mattani wiha Jakopu, 16Jakopu wiha Josefu ghomuna Maria oyu gha shamurukire Jesusi oyu ha toya eshi Kristusi.
17Hanahoka wahe kutunderera kwaAbrahamu kate kwa Davita ne mako dikumi nomane, no kwaDavita kate kun̂otwa dhawakaBabiloni mako dikumi nomane, no kutunderera kun̂otwa dhawakaBabiloni kate kwaKristusi mako dikumi nomane.
Mushamurukero waJesus Kristusi
(Luk 2:1–7)
18Apa no kuna kuranda ko mbudhi dhomushamurukero waJesus Kristusi.
Oku shime ha kwandekerera haJosefu naMaria ghoNyina Jesusi, awo nokukuyeka temba, ko kukara ghuremu. Ghuremu ghu, wa tundire kwaMupepo ghoKupongoka. 19Josefu ghombandeke dhendi, gha karire muhunga no gha shwenine kumuhokora. Gha ghayarire eshi gha mu thighe mughudhindo. 20Oku shime ha ghayadhara, ko kumuhokokera muengeli waFumu muyirota ghuninga eshi: “Josefu ghomwana Davita, wa yapa kumughombotha Maria ghomunu ghoye. Yoyishi eyi yi mu di, kwaMupepo ghoKupongoka ya tunda. 21Mbo ghana reta katughuru mukaye, ho mbo ghu mute eshi Jesusi. Aye yo mbo gha komonona diko dyendi kumaharwero ghadyo.”
22Yoyiheya yi ya hokokire eshi, dhi rikanye n̂ando dhaFumu edhi gha ghambire pamuporofeta wendi eshi:
23“Mbuyama mbo ghana kara mudira
no mbo ghana reta katughuru mukaye,
no mbo hana mu ti eshi Emanuweli.”
Dina, dina kuninga eshi: Nyambi netu.
24Apa gha pindukire Josefu muturo, ha tendi thika di gha yi mu rawerire muengeli waFumu no gha ghombothire mukamadi wendi. 25Ene mbadi gha mu pirukerire oku mbadi ghana shamuruka mwanendi mukaye. Ko kumuta kwendi eshi Jesusi.
Atualmente Selecionado:
Mateghusi 1: MHW1986
Destaque
Compartilhar
Copiar
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fpt.png&w=128&q=75)
Quer salvar seus destaques em todos os seus dispositivos? Cadastre-se ou faça o login
Mbunga dhoBayibili dhaNamibia (Bible Society of Namibia) 1986