मत्ती 12
12
सन्चारी छोमु च्यि च्यि काम खिता ओङगीते
(मर्कूस २:२३-२८; लूका ६:१-५)
1थेरूई येशूताङ चेलातेबा लामला डुइन ओतान। थे लामगी फारताङ छुरला ठे स्यीङ ओतान। त्वाबा लाबेकी चेलातेबेकीचेन ठे ङिमा ज्युरला मुरला सेइन ख्याम्सुङ। थे छोमु सन्चारी ओतान। 2थोक खिता थोङगीन फरिसी पाटी मिओनगी येशूला “च्यि खुई खोरोङ चेलाओनगी ठे ङिमा ज्युरा माथोङसुङ? परमेश्वर नियमलानी सन्चारी छोमु छ्याःङ काम खिता मेङगो सिन साबा ओत मेन?” सिन ङारसुङ। 3थेबेकी थोक सिरजीन थेकी “दाऊद गेल्बोकी चुक खाबा ओताने सिन ख्योकोनगी पढे खाबा मेतरो? फ्रोबा फापे बेलाला थेत्ताङ थे मिओनगी खापाङ छ्याःङ साच्येते मेङेत्जीन 4पालोई थेकी परमेश्वरला माने खित्च्येते खाम्बादु स्यूकीन थेरू चढे खाबाते स्योबेनराङ पूजारीला नाङ खाईन सोबा ओतान। थेमे थे खोरोङ मिओनलाङ थे स्योबेनराङ गोकीन बिन्दा ओतान। तर परमेश्वर नियमलाचेन थे स्योबेन पूजारीओनगीकामा सा ओङगो सिन टिबा ओत। 5याङराङ थे नियमलाराङ परमेश्वर मन्दिरदु देत्कान्ते पूजारीओनगी सन्चारी छोमुङ सधैँ च्योकराङ खाला काम खिता ओङगो सिन टिबा ओत मेन? काम खिता मेङगो सिन साबे छोमु मन्दिरदु खिता फाप्च्येते काम खासीनोङ थेबेते छ्याःङ गल्ती मेन सिन ख्योकोनला छ्याराङ ओत। 6थानी ख्योकोन दोन्दुराङ मिज्यीक ओत। परमेश्वर मन्दिर बात भन्दाङ थे छ्ये ईन। 7परमेश्वर बातला ‘ङाला सिन भोग बिन्ला जेसुकै चढे खाला खिता भन्दा बरू ख्योकोनगी ज्येनला ङिङज्ये खि,’ सिन परमेश्वरगी साबाते बात ख्योकोनगी खोबा चाला ईन्सीन छ्याःङ गल्तीराङ मेताला ङे चेलाओनला ख्योकोनगी दिबेकी परमेश्वर नियमताङ मिडिक्च्येते काम खासुङ सिन सिरच्या मेतान। 8परमेश्वर ओत्सादुई वाबाते मि ङात्ताङचेन सन्चारी छोमुङ दि खिता ओङगो, थे खिता मेङगो सिन सिरच्येते अधिकार ओत,” सिन सिदुक।
येशूकी सन्चारी छोमुराङ मिज्यीकला ठाक्पा खाबाते
(मर्कूस ३:१-६; लूका ६:६-११)
9थेरूई येशू थेरू ओताते मिटिङ खित्च्येते खाम्बादु गाल्सुङ। 10थेरू लाक्पाज्यीक काम्गीन थे लाक्पा चलेराङ खिता मुथुप्च्या गालाते मिज्यीगोङ ओतान। सन्चारी छोमु छ्याःङ काम खिता मेङच्येते दिन ईन सिन परमेश्वर नियमला टिबाते बात येशूकी माङेन्सीन थेकी गल्ती खासुङ सिराप सिन फरिसी पाटी मिओनगी थेला “थरिङ सुइँदा मिला ठाक्पा खाला तेरा परमेश्वर नियमताङ डिगीताना मिडिक्ते?” सिन सासुङ। 11थोक सिरजीन थेकी “दोक सिइना, सन्चारी छोमु ख्योकोनते लुकज्यीक लाङा मुथुप्च्या खाईन डालुम नाङ रिल्सुङ सासीन ख्योकोन थे छोमुराङ थे लुकला थेरूकी थेन्गीताना मेथेन्ते? 12थोगी लुक भन्दा मि खापान खापान छ्ये ईन्देकी सन्चारी छोमुङ मिला ठाक्पा खित्च्येते परमेश्वर नियमताङ डिक्च्येतेराङ ईन,” सिन सिदुक। 13थोक साकीन च्याकीन थेकी थे लाक्पा काम्बाते मिला “खुईते लाक्पा स्योङते,” सिन सिदुक। थे मिकीङ लाक्पा स्योङजीन थे लाक्पा ज्येनते साक्लोते च्योकराङ लेमु गाल्सुङ। 14थेकी थे मि लाक्पा ठाक्पा खानामेकी फरिसी पाटी मिओन स्येदाङ खिन थेरूकी गाल्गीन येशूला सेता फाप्क्यो सिन ठो खिताला स्यूसुङ।
येशूला परमेश्वरगीराङ छाने खाबाते ईन
15थोक खाईन थे खोरोङला सेताला ठो खाबाते बात छ्या स्येकीन येशू थेरूई ज्येननापा ड्वाप्ला ख्याम्सुङ। थेमे आउदी काल्बेई मि थे तिङ ङ्याकीन ख्याम्सुङ। थेकी थेबे नाङ नाबा ओताते गाङेला ठाक्पा खासुङ। 16थोक खिन थेकी थे मिओनला थे खोरोङगी दोक खासुङ सिन सुङलाङ मासेरा सिन कोत्सुङ। 17थोक खित्जीन थेकी चुक खिते सिन परमेश्वरगी दोक सिन थे खोरोङ बात खित्कान्ते यशैयाला सिर च्युताते बात साबा च्योकराङ ओङसुङ। 18चुक सासीन
“दिला ङे ङाराङ काम खिताला छाने खाबाते ईन। ङा दिला ङिङज्ये खिओ थेमे दित्ताङ खुशीङ ओत। ङा दिला ङाराङ आत्मा तेरग्यो।
थेमे दिकीराङ ङे जात जातकी मिला काका पाका मिक्किता खाला न्याय खिओ सिन लाप्ला तेरग्यो।
19दि सुङताङ थोम्मु मिक्किओ। थेमे दिकी ङोरो जोदाई तेन्ला बात खित्च्येतेङ मिक्किओ।
थेमे दि खोरोङ चुक्ते ईन्दे सिन छ्या स्येस्यीत सिन मि छ्वासा रूसे नाङला कस्स्ये खाला बादोङ मिक्किओ।
20दिकीचेन फ्रेगीन सिन्दाते काँसकी छिज्यीकलाङ मोच्योओ। थेमे स्याप खाईन सिन्दाते बत्तीङ मेसेदो।
दिकी खित्सादुराङ गाङेपा गाङेला लेमु खाला न्याय खित्च्येते समय ओङगो। थे दिन मालेपथुपसाक दिकी होदोक दोक खिनराङ देत्क्यो।
21गाङेला जोए खित्कान्ते दिराङ ईन सिन लुङबा लुङबे मि गाङेराङ दि लामराङ ताला देत्क्यो,” सिन साबा ओतान।#यशैया ४२:१-४
येशूकी शैतानताङ डिक्ला काम खित्च्येते मेन
(मर्कूस ३:२०-३०; लूका ११:१४-२३)
22थेरूई मिओनगी ल्हन्डीक खोबाते मिज्यीकला येशू ओत्सादु क्याल्सुङ। ल्हन्डीक खोबा ओतेकी थे मि मिगीङ मोथोङच्या थेमे बादोङ खिता मुथुप्च्या गाला ओतान। येशूकी थे मिदुकी ल्हन्डीक तेन्गीन ताङनामेई थे मि मिगी थोङच्याताङ बादोङ खिता थुप्च्या गाल्सुङ। 23थोक अचम्ब ओङा थोङगीन थेरू ओताते मि गाङे छक्क परे खिनकामा “आबिई, ना दिराङ परमेश्वरगी तोङगो साबाते दाऊद गेल्बो सन्तान ईन्ताका?” सिन सिराला स्यूसुङ। 24मिओनगी थोक सिरा थोकीन फरिसी पाटी मिओनगीचेन “दि छ्याःङ अचम्बते बात मेन। ल्हन्डीक गेल्बो बालजिबुलताङ डिक्लाका दिकी थे शक्तिदुकीराङ ल्हन्डीक तेन्ला तोङच्येते ईन,” सिन सासुङ।
25थेबेकी च्यि सिरा चालाते ईन्दे सिन छ्या स्येकीन येशूकी थेबाला “लुङबाज्यीगी मि माडिगीन खुदुक खुदुक पाटी ओङगीन जीसुङ सासीन थे लुङबा तोरला डुइओ। थेमे सारज्यीगी मि खोपरोङ नाङ माडिक्सुङ सासीन थेबाङ तोरला डुइओ। थोकराङ खाला खाम्बाज्यीगी मिङ माडिगीन खोपरोङ खोपरोङ नाङ थोम्मु खासीन थेबाबरीङ ठाल्ला याङराङ नोमुङ मिडिगो। 26बात दोक ईन्देकी ल्हन्डीक गेल्बो शैतान ल्हन्डीकओनताङराङ माडिक्ला थेकी थेबाला तेन्ला तोङच्येते ईन्सीन चुक खाला थे राज्य देत्कीते ओना? 27थेमे ख्योकोनगी साबा च्योकराङ ङे बालजिबुल शक्तिदुकी ल्हन्डीक तेन्ला तोङच्येते ईन्सीन खेराङ मिओनगीचेन सुई शक्तिदुकी थोक खिका याङ? थेबेकी परमेश्वर शक्तिदुकीराङ ल्हन्डीक तेन्ला तोङच्येते ईन सिन ख्योकोन सिओ, मेनरो? थोगी होथे खेराङ मिओन बात विचार खालाराङ ख्योकोनगी ङे बालजिबुल शक्तिदुकी ल्हन्डीक तेन्ला तोङच्येते ईन साबाते बात ईनराङ मेन सिन छ्या स्येक्यो। 28परमेश्वर आत्मे शक्तिदुकीराङ ङे ल्हन्डीक तेन्ला तोङच्येते ईन। थोगी था शैतान राज्यला ग्यालाला परमेश्वर राज्य दुरू वाकीन सिन्दाक्वा सिन ख्योकोनगी छ्या स्येबा खि। 29च्यि सुइँदा ङार्माते मि खाम्बा क्वा चाल्सीन गोमा थेला जुम्ला ठाक्पा माफाबोतरो? थेला ठाकीन मारिलाथुपनी थे खाम्बा क्वा थुबोङ सिन चितेराङ माक्यासीन ओङगो।
30थोगी बात च्यि ईन्दे सासीन ङात्ताङ मिडिक्कान्ते मिचेन ङे विरोध खित्कान्ते ईन। थोकराङ खाला ङे र्वा च्योक ओङला मिओनला परमेश्वर छ्य्वापा लै खित मुज्युत्कान्ते मिङ ङे काम ङ्ये ज्युत्कान्ते ईन। 31ङा ख्योकोनला च्यि सिते सासीन मिओनगी जे पाप खासीनोङ थेमे परमेश्वर विरोध खाईन जे सासीनोङ थे माफ ङेता थुप्क्यो। तर ईन्दा मेन्दा साला परमेश्वर आत्मे विरोध खित्कान्ते मिकीचेन नोमुङ माफ मेङेदो। 32थोकराङ खाला परमेश्वर ओत्सादुई वाबाते मि ङे विरोध खाला मेलेबा बात खिदुक सासीन थेकी माफ ङेता थुप्क्यो। ईन्दा मेन्दा साकीन परमेश्वर आत्मे विरोध खासीन थोक्ते मिकीचेन दि जुनीलाङ तिरी जुनीलाङ नोमुङ माफ मेङेदो।
सु मि चुक्ते ईन्दाका सिन चुक खाला ठाल्गीते
(लूका ६:४३-४५)
33बात च्यि सासीन रोग लै माक्याबाते दोङबोलाकामा लेमु खाला फलफूल गोन्ग्यो। रोग लै खाबाते दोङबोलाचेन लेमु खाला फलफूल मोगोनो। थोक ईन्देकी फलफूल तालाराङ थे दोङबो रोग लै खाबातेताङ माक्याबाते चुक्ते ईन्दे सिन डेला थुप्क्यो। 34छ्यि ख्योकोन ङोचा क्ये मेतातेबा, सेमला लेमु मेत्कीन मेत्कीन ख्योकोनगी चुक खाला लेमुते बात खिता थुप्कीका? मिकीनी दाक्पोन सेमदु जे दुक खालाङ थेराङ देन्ग्यो। 35चुक सासीन मिते सेम लेमु ओत्सीन थेते बानीताङ बात जेसुकै लेमु ओङगो। सेम मेलेबा ओत्सीनचेन बानीताङ बादोङ मेलेबाराङ ओङगो। 36दि बात ङेन। च्यि सासीन था तिरी परमेश्वरगी न्याय खिते छोमु मिओनगी दाक्पोनगी खाबाते सिरा मेङच्येते कामराङ लै मिक्किच्येते गाङे बातकी हर हिसाब परमेश्वरला तेरा फाप्क्यो। 37थे छोमु परमेश्वरगी ख्योकोन बात ताला लेमु ओत्सीन ख्योकोनला दोषी ईन मिसिरो, मेलेबा ओत्सीनचेन दोषी ईन साला सजाय तेरग्यो,” सिन सिदुक।
मिओनगी येशूला परमेश्वरगी ताङाते ईन सिन
पत्ते माक्याबाते
(लूका ११:२९-३२)
38थेरूई कोई कोई धर्मे गुरूताङ फरिसी पाटी मिओनगी येशूला “गुरू, लो खोत्ताङ परमेश्वर शक्ति ओत सासीन ङ्योकोनला खइँदा अचम्बते कामज्यीक खाला तेन्ते,” सिन सिदुक। 39थोक सिरजीन थेकी “ख्योकोन था समय मिओननी परमेश्वरला माने खिता ताङगीन मेलेबा मेलेबा काम खित्कान ईन। ङा ख्योकोनगी साबाच्योक खितराङ मिक्किओ। था ख्योकोनगी परमेश्वर बात खित्कान्ते योनाला ओङाते च्योक्ते कामज्यीककामा थोङा ङेत्क्यो। 40च्यि सासीन योनाला समुन्द्रे ङ्या जोदाज्यीगी मीक ताङनामेई थे ङीमा सुमताङ ग्वामा सुमसाक ङ्ये सुबे नाङ देता फापा च्योकराङ परमेश्वर ओत्सादुई वाबाते मि ङाङ स्यिनामेई ङीमा सुमताङ ग्वामा सुमसाक सबी चावादु देता फाप्क्यो। 41थेमे था परमेश्वरगी न्याय खिते छोमु निनवे सारगी मिओनगी परमेश्वर दोन्दु था समय मि ख्योकोन दोषी ईन सिओ। च्यिला सासीन योनेकी साबाते परमेश्वर बात ङेन्गीन खोपरोङ पापी दुका सिन छ्या स्येकीन थेबा परमेश्वर छ्य्वापा लै खाबा ओतान। तर ख्योकोननी योना भन्दाङ छ्येज्यीक खेराङताङ ङ्योम्बुराङ ओताते मिकी साबाते बादोङ मेङेन्दुक। 42थोकराङ खाला थे छोमु थाङबो दक्षिण छ्य्वामा ओताते लुङबे गेल्मुकीङ परमेश्वर दोन्दु ख्योकोन दोषी ईन सिन सिओ। च्यिला सासीन थेचेन सोलोमन गेल्बो आउदी बुद्धि खाबाज्यीक ओत्लो सिरा थोकीन थे बात ङेन्दाला आउदी थारीलेई थे ओत्सादु वाबा ओतान। तर ख्योकोनचेन सोलोमन भन्दाङ छ्येज्यीक थरिङोला खेराङताङ ङ्योम्बुराङ ओताते मिकी साबाते बात ङेनराङ मेङेन्दुक।
परमेश्वर छ्य्वापा लै माक्यासीन चुक ओङगीते
(लूका ११:२४-२६)
43थेमे याङराङ ल्हन्डीक तेन्ला तोङच्येते बातला ज्येनोङ च्यि सासीन सुइँदा मिला खोबाते ल्हन्डीकचेन तेन्गीन ताङनामेकी देत्च्येते ठाउँ छोलाला छ्यु सिराते थोपोई मेङेत्च्येते खालि ठाःकताङ बालुवाकामा ओत्साला डुइओ। 44थेला देत्की सिराच्योक लाबाते ठाउँ माङेत्सीनचेन था मायाङसुङ, याङराङ ङा थे मि नाङराङ गाल्ला देता फाप्सुङ सिन ग्युरला ओङगो। वाला ताजीन थेकी थे गोमा देताते ठाउँ खालीताङ लेमु गाला ओता थोङगो। 45थोक थोङनामेई था याङराङ देता ङेत्च्याक्वा सिन थे ग्युरला गाल्ला थे खोरोङ भन्दाङ मेलेबातेन्दे ल्हन्डीक दुईनटीकला टीला खुलाङगो। थेमे थेबाबरी थे मिलाराङ खोक्यो। थोक ओङनामेकी थे मि ल्हन्डीकज्यीककामा खोबा ओत्जीन भन्दाङ झन मेलेबा डुइओ। थेमे मेलेबा मेलेबा काम खित्कान ख्योकोन था समय मिओनलाङ होथोकराङ मेलेबा ओङगो,” सिन सिदुक।
येशूकी चुक्तेला थे खोरोङ मि ईन सिते
(मर्कूस ३:३१-३५; लूका ८:१९-२१)
46येशू थोक खाला मिओनताङ बात खिन ओते बेलालाराङ थेते आमातेताङ न्वातेबा थेला ठेताला थेरू ख्योल्सुङ। थेमे फिनामाराङ देत्कीन थेबेकी थेला फिनामा स्योक सि सिन कातोङ ताङसुङ। 47थेमे दोक्पोईकी थेला “गुरू, फिनामा खोरोङ आमाताङ न्वाओन खोल्ला ठेता खित्च्या सिन गुकीन देत्ला दुक,” सिन लाःप्सुङ। 48थोक सिरजीन थेकी “ङे आमाताङ न्वाओन सु ईन्दे सिन ङा ख्योकोनला लाःपामीन,” साकीन च्याकीन 49थेरू ओताते चेलातेबाला तेन्गीनकामा “ङेते आमाताङ न्वाओन उदिबाराङ ईन। 50स्वर्गने देत्कान्ते ङे आबेकी खि साबा साबाच्योक खित्कान्ते मिओनराङ ङे आमाताङ न्वा नुमु ईन,” सिन सिदुक।
Atualmente Selecionado:
मत्ती 12: JUL
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
© 1992 Wycliffe Bible Translators Inc. All rights reserved.
