मत्ती 3
3
1ओहाङःसैको ओउःनम् दीन्हाङः बाप्तीस्मा बयःओ युहना त तोओ यहुदीया देस्कोः मान्ता याक्गार्सीःमालो बेलाङ्हाङः दाह्ती वाङ्आ। 2ओहाङः दाह्ती वाङ्आक्तीको “लौ नीङ्पाय् लःलयःकोः रेव्ओ काम्लम् फेनु दा। दोह् हायःती दाय्ह्सा परमेस्वर्कोः राजी दाह्खेःआ बा” त दाय्ह्ती मान्तालम्कायः थोल्ह्ती तोओ खेःतो। ओउः बाप्तीस्मा बयःओ युहना त तोओकायः उय्ह्लेहाङः एसायाइ इ कुरा लेखआकान् 3“लौ मान्ता याक्गार्सीःमालो बेलाङ्हाङः यात्चाक्इ कुरा तोती गोःती मुनाः। लौ प्रभुकायः पेतो रोम्साकायः ओउः वाङ्धाङ्माःखाहाङः ओउःकोः वाह्सा खेःओ ल्याम् ङ्हालेः जाङ्ह्आक्नु दा” त दाय्ह्ती ओउःपाय् दाय्ह्आ। इतलेः ओउः परमेस्वर्कोः कुरा छ्यानःओ एसाया त तोओइ परमेस्वर्कोः आखरःहाङः लेखआकान्। 4ओहाङःसैको ओउः बाप्तीस्मा बयःओ युहनापाय् उत्स्याः मेनःकोः क्याह्ओ क्रमःनाय् लावती पाम्हाङः छालाकोः पेती तोङःसतो बन्कोः तुमः खुदुमा राय्क्न्यामःमा जेःओ खेःतो। 5ओउःइ परमेस्वर्कोः कुरा थोल्ह्ती तोतोक्हाङः यरुसालेम् सहर्सैमा यहुदीया अन्चल्सैमा योर्दन् खोला वेङ्ह्ग चीङ्ह्गसैमा सबै मान्तालम् ग्ल्युङ्ह्ती युहनाकःताङ् सायःलाङ् वाङ्आकाय्। 6वाङ्आक्तीको लःलयःकोः रेव्तो हायःओ घोती तोआक्तीको ओउःमयःकायः युहनाइ योर्दन् खोलाहाङः बाप्तीस्मा बयःआथास।
7ओहाङःसै ओउःकःताङ् नाःतो फरीसीलम्मा सादुकी त तोओलम्मा वाङ्आकाय्। युहनाइ ओउःमयः वाङ्ओ च्यवःती “लौ नीङ् कुयः युक्कोः चोःलेःतेः खेःतेःनै। नीङ्पाय् इहाङः वाङ्ती ‘रेव्ओ काम् जाङ्ह्झ्याङ्कोः न्युम्ह्ताक्ओसै दल्सा दोःलेःनाः’ त म्हर्तेःनै यादो। इत हायःसा सुइ तोतेःआकाय्। परमेस्वर्इ न्युम्ह्ताक्ओसै नीङ् गत हायःती क्रव्सा खाय्तेःनानी र। 8-9‘लौ ङी आब्राहाम्कोः प्लोमःदानेकायःपाय् परमेस्वर्इ न्युम्ह्ताक्तय्हीली वाय्तय्हीली’ ततेः ताःतेःचनै। नीङ्खे मीह्ती वाय्ओ त खेःया दोङ्सीलेः परमेस्वर्इ अरु अरु आब्राहाम्कोः प्लोमःदानेखे इ साःहाङः मुओ बाङ्लम् थाङ्ताक्ती जाङ्ह्सालेः खाय्नौ बा। लौ नीङ्मा ल्हुङ् द्यान्ह्ती रेव्ओ काम् फेसा खेःतेःनै बा। 10सायः पेतो ग्रान्ह्ती सायःमालो सीङःकायः मान्ताइ खाम्ह्ती ओल्ती तुस्ओ सीङः जाङ्ह्ती वाय्नानी माः र। इलो लेखा नीङ्इ पेओ काम् जाङ्ह्माःयामा परमेस्वर्इ नीङ्कायःमा ह्र्योङःती वाय्तेःताक्तेःनै” त दाय्ह्ती युहनाइपाय् बाप्तीस्मा त्याक्लाङ् वाङ्ओलम्कायः तोआथास। 11“लौ नीङ्इ रेव्ओ काम् फेतोक्हाङः ङाखेइ तीःइ बाप्तीस्मा बयःनाङ्सतो लोन्तेसै ङासै आन ताङ्ह्ओ मान्ता चाक्आः वाङ्नाः बा। ओउःकायःपाय् ङाच्युक् मीओ मान्ता ओउःकोः जुत्ता लात्सा स्याव्ङल। ओउःखेइ नीङ्कायः परमेस्वर्कोः ग्वालामःइमा म्हेःइमा बाप्तीस्मा त तोओ बयःतेःनै। 12फेरी ओउःइ पेओ मान्ताकःसै पेमालो मान्ता पेङ्कलःसाकायः चुय्कोः धान्ह्लो लेखा चल्नौ। पेओ मान्तालम्खेकायः परमेस्वर्इ चुय्लो लेखा लयःकःताङ् वानःनाःथास पेमालोलम्खेकायः धान्ह्लो लेखा गलमा सीमालो म्हेःहाङः ताती वाय्नाःथास” त दाय्ह्तीमा युहनाइ तोआथास।
13ओहाङःसै येसुपाय् गालीलसै आल्ती योर्दन् खोलाहाङः मुओ युहनाकःताङ् बाप्तीस्मा त्याक्लाङ् वाङ्आ। 14वाङ्आक्तीको “लौ ङाकायः बाप्तीस्मा बयःची दा” त दाय्ह्ती येसु युहनाकः तेतो “खेःल दा ङाखेकायः नाङ्खेइ बाप्तीस्मा बयःसा खेःतेःतो बा। नाङ् ङाकःहाङः तेसा खेःतेःआक्ल” त दाय्ह्ती युहना त्याङ्आ 15“खेःल ओउःतलेः जाङ्ह्चाक्ची दा ओउःत हायःओ परमेस्वर् झाक्ओ काम् लेःआः बा। इतलेः जाङ्ह्सा खेःतो” त येसुइ दाय्ह्ती होम्आथै ओउःत झ्यान्ते युहनाइ ग्याती येसुकायः बाप्तीस्मा बयःआथै। 16ओहाङःसैको बाप्तीस्मा जाङ्ह्आक्तीको येसु तीःसै ग्ल्युङ्ह्तोक्हाङः फेल्बाङ् वाक्ती फोल्आक्तीको परमेस्वर्कोः ग्वालामः धुकुर्वाःकोः रुप्लो थाङ्ती लयःकःताङ् ग्ल्युङ्ह्ओ येसुइ च्यवःआकान्। 17एत च्यवःतोक्हाङः “लौ इपाय् ङाकोः आन राप्ओ ल्हुङ्गोरे चोःलेःतेः खेःनाः बा। ओउःकः ङा आन म्रोनाङः” त दाय्ह्ती लाङ्कासै यात्ज्योः हाव्नयः दाय्ह्ओ वाङ्आ।
Atualmente Selecionado:
मत्ती 3: CDM93
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
© 1993 Wycliffe Bible Translators Inc., All Rights Reserved.
