Matyiu 2

1O Jisus a jakudwě o Běthlihěm ya Judia, o hwi ja upolo Hěrod, umbwakiyate, bato b‘ iyowě ba vakiyendi oviya madiki na pâ o Jěrusalěm, na, 2A di jawěngo Upolo mua Jiu a l‘ âve? Ikabojana ho yěněngo nyětět‘ ’aju o madiki, ho ma viyandi ka kaliya Mâ. 3O upolo Hěrod a yokakidi, a yěněkindi njuke, na ba Jěrusalěm běhěpi. 4O mâ‐a latakidě prist ja meolo na balěndi běhěpi, ka mâ‐a batě bâ iboko via Kraist vi ka jawě. 5Ka bâ‐ba va na mâ, na, O Běthlihěm ya Judia, ikabojana e lěnděkudwěndi na usaki, na,

6Âvě, Běthlihěm e jadi o ehe ya Juda o ’bě o hâlâviyě o mepolo mea Juda: ikabojana Gâven e ka viyandi o âvě o jadi e ka pangiyě bato bamě Israěl.

7Jâ ndi ja Hěrod ja bě bato b‘ iyowě ndiyango ikutakuta, ka mâ‐a batě bâ nangudi o pělě ’a ’gombe ya nyětěti e pumakidě. 8Ka mâ‐a loma bâ o Běthlihěm, na, Kěkěni, ka butakěni ukěkě bwam‘; oningě oa duwi mâni oa timbana pi ’mbani ndaga, ovaně nd‘ umba‐mbi ka ’le ka kaliya Mâ tepě. 9O bâ‐ba běkidi yokango k‘ upolo u vâkidi, na bâ na kěkě; na, umbwakiyate, nyětěti ’abu e yěněkidi o madiki e kěkě o boho boabu na ’la ka těmě o Ukěkě u diyakidi. 10Ba yěněkindi mbya ’něně mětě o bâ‐ba yěněkidi nyětěti těně. 11O bâ‐ba ngakiyedi o ndabo, ka bâ‐ba yěně Ukěkě na nyangwě Meri, ka bâ‐ba kwa o he ba ka kalakiya Mâ: o bâ‐ba dubwakidi belandi beabu, ka bâ‐ba vě Mâ Bova; gold, frankinsěns na měr. 12Ka Anyambe a kelevidě bâ o ndâtâ, na, baa timbake pě o Hěrod a jadi, ka bâ‐ba vala o ehe ’abu na njeya ’pâkwě.

13O bâ‐ba dujakidi ba vala, ka enjěl ya Upangiyi ya pumiya Josěf o ndâtâ, na, Umwaka, na nâvě wa nangâ Ukěkě na nyangwě, wa kweya o Ijipt, o ka diyaka ovoně kabo ’mba běkid‘ âvě ndaga: ikabojana Hěrod a vahakand‘ o weya Mwana. 14O mâ‐a umwakidi, ka mâ‐a nângâ Ukěkě na nyangwě na bulu, ka mâ‐a vala o Ijipt; 15A diyakindi ovoně kwanga nala iwedo ja Hěrod: na ovaně nd‘ o ya Upangiyi e kalakidi na usâki e ka hohonganě, na, O Ijipt nd‘ Umba‐mbi ndiyi Mwan‘ ’amě.

16Jâ ndi ja Hěrod ja yoka ngamb‘ eitě, o mâ‐a yěněki na bamo b‘ iyowě ba henjiyi mâ, ka mâ‐a lomidě o Běthlihěm n‘ indendandenda těvině viěhěpi, ka weya betumbě be diyakid‘ omě beěhěpi oviya be diyakidi mepuma mebale utodu na be diyakidi be t‘ o pâdě, hohonganěngo na ’gombe ’aju e batakidě bamo b‘ iyowě. 17Jâ ndi ja ya usaki Jěrimi e kalakidi ya hohonganě, na,

18Joyi i yokanakindi o Rama, mbembe na iya na kwedi ’něně, Ratyěl a yaka bana baju, au bâbâkâ o hwěmudwě, ikabojana ba iběwě.

19Nd‘ o Hěrod a běkidi wango, ka, enjěl ya Upangiyi ya pumiya Josěf o ndâtâ o mâ‐a diyakidi o Ijipt, na, 20Umwaka, wa nângâ Mwana na nyangwě, na nâvě wa vala o ehe ya Israěl: ikabojana ba vahakidi o weya Mwana ba wendi. 21Ka mâ‐a ’muwa ka mâ‐a nângâ Mwana na nyangwě, ka mâ‐a vala o ehe ya Israěl. 22Nd‘ o mâ‐a yokakidi na Arkileâs a bě nd‘ upolo mua Judia o maihana ma hangwě Hěrod, a bangakindi o vala ovoně: ndi o mâ‐a kelevakudwě na Anyambě o ndâtâ, ka mâ‐a ’luwa na vala o pělě ja Galili; 23ka mâ‐a vala ka diya o mboka e tubakwě na Nazarěth: na ovaně nd‘ o yâ e ka hohonganě ka basâki ba kalakidi, na, A ka tubwi na, Nazarini.

Atualmente Selecionado:

Matyiu 2: BNG1895

Destaque

Copiar