I LUKASI 21

Pesombano aasa tuwu beine mongkokolaro

21:1-4

(Mrk. 12:41-44)

1Mansa-Do mewanguako i Yesu, Dokita ira mia mengkaea mpowinso pesombado a laro burua pesomba. 2Dokitao mbo'u aasa tuwu beine mongkokolaro mowinso orua lewe doi a laro burua atuu. 3Ka Do'amba motae, ”Kupauakomiu, menteeano tuwu beine andio mompowee hadioopo sekono luwuno mia atuudo. 4Hangano luwudo mpompowee pesombado inso a mare'edo, sine tuwu beine andio mompowee inso a makurano, tendeano ipeweengakono luwuno pepotuwuno.”

Raha-Do Ue Ala ta hinoa

21:5-6

(Mat. 24:1-2; Mrk. 13:1-2)

5Tempono ba opia mia mpepau mongkona Raha-Do Ue Ala ka mpetekosio raha atuu anu rinamba-rambaako watu anu ntekokosi ka mperupa-rupa parewa mpesomba, motae Iramo i Yesu, 6”Hapa anu kinitamiu i tu'ai – ta hawe oleono nahina maupo te'asa watu ta pino'inee mo'ia a wawo watu susua; luwuno ta hinoa.”

Pompu'uano tebobarasaia

21:7-19

(Mat. 24:3-14; Mrk. 13:3-13)

7Ka ana guru mpesikeno ndi Ondae i Yesu, dompotae, ”Guru, te'ipiake atuu gagiano? Ka hapake tondonino, tewala ta gagi atuu?” 8Dosangki ira, ”Impetangkoromo, ka si ntepopo'oo. Hangano hadio mia ira mehawe mpeneeako nee-Ku ka dompotae: Ongkuemo Ondae, ka: Rangkuomo tempono. Si mentonda ira. 9Ka tewala mporonge komiu mongkona peteaa ka pe'ewaa, si ntededengke. Hangano luwuno atuu asalakono ta gagi se'elu, sine atuu napi ta liu hawe pokotampulaano.” 10Dopotaeako ira, ”Tongku ta mentade umewaio tongku ka poparentaa umewaio poparentaa, 11ka ta gagi lelu anu meroku ntu'u ka a sompo po'ianga ta hina haki lele ka mokoninggoa ka ta gagi mbo'u mperupa-rupa anu mompokotededengke ka luwuno petondoni anu mongkokongiri inso i langi. 12Sine se'eluno luwuno atuu komiu merinako ka mebinobarasai; komiu mempineweengako a hadio raha tepumpua ka torungku, ka komiu mempino'aro a hadio mokole ka anu mempabawa hangano nee-Ku. 13Mongkona atuu ta gagi tempomiu mpesakosii. 14#Luk. 12:11-12 Onaemo pu'uno imempakosiomo i laro aroamiu, ka si mpewowoloo se'elu hapa ta sangkimiu. 15Hangano Ongkue isa'a mowee komiu pau ponto'ori, ranta nahi dompoko'ewai komiu ke mesangki komiu taromiu. 16Ka ira mpeweengakomiu mbo'u mia mota'umiu, pepaekompomiu, pe'etumiu ka luwuno sambe'emiu ka ba opia mia i olomiu ira mempinepate 17ka komiu ira me'o'aliaakomiu luwuno mia hangano nee-Ku. 18Sine maupo te'asa ngkeu wuu a ulumiu nahi ta tetadi. 19Tewala pompetea komiu mpiha, komiu mehaweo tuwumiu.”

Mongkona tekaleno Yerusale

21:20-24

(Mat. 24:15-21; Mrk. 13:14-19)

20”Tewala imengkitao Yerusale domengkaduo sorodadu, imento'oriomo, nine tekaleano rangkuomo. 21I tempo atuu mia anu mekongko i Yudea asalakono mempolai a mentorukuno, ka mia anu mekongko a laro ngkota asalakono mpeliahako, ka mia anu mekongko a inia kodei si dompewinso mbo'u a laro ngkota, 22#Hos. 9:7 hangano onaemo atuu tempo pombaloa nde ta inihii luwuno anu binuri. 23Memasola iramo ine anu kontongaado mementia ke anu mompo'uo nana'ote kodei i tempo atuu! Hangano ta hawe ma'isoa anu mongkokongiri i asa wawo wita ka pontekudaako a tongku andio, 24ka ira memateako mata mponai ka mewinawa gagi mia mentinawa a luwuno tongku, ka Yerusale ira melolandao luwuno tongku anu nahi domento'ori Ira Ue Ala, hawe ka isompoomo tempodo tongku atuudo.”

Hawe-Do i Ana Manusia

Potundaano mongkona keu ara

21:25-33

(Mat. 24:29-35; Mrk. 13:24-31)

25 # Yes. 13:10; Yeh. 32:7; Yoe. 2:31; Meng. 6:12-13 ”Ka ta hina luwuno petondoni a mata'oleo ka wula ka a anano wula, ka i tolino luwuno tongku ira medoito ka mebulalingo me'aropio u'uruno ka pebundeno tahi. 26Mia ira memateako doito hangano mensala-laroako luwuno ba hapa anu umaluo tolino andio, hangano luwuno pabawa i langi ta telelu. 27#Dan. 7:13; Meng. 1:7 I tempo atuu mia ta kumita Ira i Ana Manusia hawe a laro nseru saru luwuno pabawa ka maramba-Do. 28Tewala mompu'uomo gagi luwuno atuu, pentademo ka pewanguakomo, hangano tekaduduiamiu rangkuomo.”

29Ka Do'amba i Yesu pauako ira potundaano andio, ”Impekokoongakono keu ara ke keu hapamo koa. 30Tewala imengkita ira keu atuu mentumbaomo, imento'oriomo nine tempo motu'i-tu'i rangkuomo. 31Kanatuu koa mbo'u, tewala imengkitao igagi luwuno atuu, imento'oriomo, nine Poparentaa-Do Ue Ala rangkuomo. 32Kupauakomiu: Menteeano mia andiodo nahi ta upu, ba napi gagi luwu. 33Langi ka tolino ta moliu, sine pau-Ku nahi ta moliu.”

Patudu ka impedaga-dagai

21:34-38

34”Dagaiomo koroimiu, ka si aroamiu bukeako pogawea ka molangua saru luwuno po'eheno wawontolino ka si mansa mepobingko hawe oleo-Do i Ue a ngkoroimiu kana aasa oho. 35Hangano ta umaluo luwuno anu mpo'ia i tolino andio. 36Impedaga-dagai mpiha saru mpekakai, ka impohawe roso mentola inso a luwuno anu ta gagi atuu, ka imemoroso mpentade i aro-Do i Ana Manusia.”

37 # Luk. 19:47 Tempono meene Ondae i Yesu mompaguru a Raha-Do Ue Ala ka tempono wongi meluarako Ira ka merato a ntorukuno anu meneeako Pongku Saitu. 38Ka mo'o-mo'oru luwuno mia hadio mehawe ndi Ondae a laro Raha-Do Ue Ala ka domperorongeako Ira.

Atualmente Selecionado:

I LUKASI 21: XMZ

Destaque

Copiar