I LUKASI 13
13
Hala ka tebobarasaia
13:1-5
1I tempo atuu mehawe iramo ndi Ondae i Yesu ba opia mia mpowawa lele mongkona to Galilea, anu reado isaloakono i Pilatu saru reano pesomba anu pinesombaakodo. 2Dosangki ira i Yesu, ”Imengko'aro-aroa to Galilea andiodo langkaiopo halado sekono halado luwuno to Galilea anu mehano, hangano mpopembasai ira kanatuu? 3Kupauakomiu, naahi! Sine tewala nahi ntepidi, komiu memate luwu a nteweweu kanandio. 4Ke imengko'aro-aroa mia hopulu ka oalu, anu memate dinunsino menara umpeda i Siloa, langkaiopo salado sekono salado luwuno mia mehano anu mpo'ia i Yerusale? 5Naahi! Kupauakomiu. Sine tewala nahi ntepidi, komiu memate luwu a nteweweu kanandio.”
Potundaano mongkona keu ara anu nahi pewua
13:6-9
6Ka Do'amba i Yesu pauo potundaano andio, ”Asa mia hinao keu arano anu tuwu a lere anggorono, ka onae aiwa ta mo'ungke wuano a ngkeu atuu, sine nahina ipohawe. 7Ka i'amba motaeakono anu mompekakaako lere anggoro atuu: Otolu nta'umo ku'aiwa mo'ungke wuano a ngkeu ara andio ka nahina kupohawe. Tuehiomo keu andio! Pombio ituwu a wita andio nahina tuduno! 8Sumangki mia atuu: Ue, po'ineeomo ka ituwu ta'u mbo'u andio, aku bingkuo wita lumimbuo ka moweeakono pompokomewalo, 9bara'ura ta'u ramai ipewua; tewala naahi, ituehiomo!”
Mompokotompa mia mahaki a oleo Saba
13:10-17
10Pohona Ondae i Yesu kontongaa-Do mompaguru a laro aasa raha tepumpua a oleo Saba. 11I tu'ai hinao aasa beine anu hopulu ka oalu nta'umo ipewinsokio onitu nsa'o onaemo ka imahaki ranta bungkulosu ka nami pokompentade mbo'u moleo. 12Mansa-Do kumitao i Yesu beine atuu, Dopoboio ka Dopotaeakono, ”Hei ine, hakimu tompaomo.” 13Ka Do'amba dumampoo beine atuu, ka i tempo koa mbo'u atuu mentadeomo beine atuu, ka i'unde-unde Ira Ue Ala. 14#Pel. 20:9-10; Win. 5:13-14 Sine mosa'ono petewawa a raha tepumpua hangano Ondae i Yesu mompokotompa a oleo Saba, ka i'amba motaeako ira mia hadio, ”Hinao onoo oleo po'anggaa. Onaemo pu'uno ime'aiwamo a aasa oleo atuu ka imempinokotompa ka komba a oleo Saba.” 15Sine Dosangkio i Ue, Dopotae, ”Hei mia mempo'onde-onde, kombake sompo mia i olomiu mpopotola sapino ke kalideno inso a walano a oleo Saba ka wawao a mpo'inuano? 16Kombake beine andio, anu hopulu ka oalu nta'umo iponguo i Mosa'o, asalakono ka ipinotola inso a mponguno atuu, hangano onae inuleno koa i Burahima” 17Ka tempono Dopepau kanandio, luwuno anu umewai Ira memongkoko'ii ka luwuno mia hadio mempo'unde hangano luwuakoano maramba, anu Doweweuomo.
Potundaano mongkona wuku rawoho ka ragi
13:18-21
(Mat. 13:31-33; Mrk. 4:30-32)
18Motae Iramo i Yesu, ”Pinotundaako hapake mongkona Poparentaa-Do Ue Ala ka saru hapake Aku motundaakono? 19Onae pinotundaako wuku rawoho, anu inala ka irawoo mia a lereno; wuku rawoho atuu tuwu ka igagi keu ka manu-manu i laro meene mpeseno a sampa-sampano.” 20Ka Dopotae mbo'u, ”Saru hapake Aku motundaakono Poparentaa-Do Ue Ala? 21Onae pinotundaako ragi anu inalano aasa beine ka isaloakono tarigu otolu ponsa'u hawe ka isoopio luwu.”
Isema anu kinadudui
13:22-30
22Ka Do'amba i Yesu melempa sumompo ira kota ka inia saru mompaguru ka motilaloakono pelempaa-Do lumako i Yerusale.
23Ka hinao asa mia motaeako Ira, ”Ue, tedei koake mia anu kinadudui?” 24#Mat. 7:13-14 Dosangki ira i Yesu mia i tu'ai, ”Imempari-pariomo ka impewinso telalo a mpewowa anu ma'iso atuu! Hangano Kupauakomiu: Hadio mia anu pompari-pari ira mpewinso, sine nahi ira mempolio. 25Tewala mentadeomo umbu raha ka itondoomo pewowa, komiu mpentade i bungkuno ka metingko-tingkoo tondo saru mpotae: Ue, I'ungkahiakami tondo! Ka Ira sumangki ka motaeakomiu: Nahi Kuto'orio ba isua ime'inso. 26#Mat. 7:22-23 Ka komiu mpotae: Mpongkaa kamimo ka mpo'inu i aro-Miu ka mompaguru Komiumo a nsala i kotamami. 27#Pud. 6:9 Sine Ira motaeakomiu: Nahi Kuto'orio ba isua ime'inso, impolaimo inso i aro-Ku, hei luwumiu anu mpoweweu mosa'o! 28#Mat. 22:13; 25:30 #Mat. 8:11-12 I ra'aimo ta hina ponsabangia ka ke'ingisia, tewala komiu mengkita ira i Burahima ka i Saki ka i Yako ka luwuno nabi a laro Poparentaa-Do Ue Ala, sine omiu-miu mempinetadiako i bungkuno. 29Ka mia ira mehawe inso i sabaano oleo ka sumooano oleo ka inso i utara ka selata ka ira mpentoro mpongkaa a laro Poparentaa-Do Ue Ala. 30#Mat. 19:30; 20:16; Mrk. 10:31 Ka menteeano hinao mia anu pokotompa anu ta gagi mia anu tese'elu ka hinao mia anu tese'elu ta gagi mia anu pokotompa.”
Ondae i Yesu asalakono mate i Yerusale
Pinemasusano Yerusale
13:31-35
(Mat. 23:37-39)
31I tempo atuu mehawe iramo ba opia to Parisi ka dompotae ndi Ondae i Yesu, ”Ilakomo, bintaomo po'ianga andio, hangano i Herode ta mepate Komiu.” 32Dosangki ira i Yesu, ”Imelakomo ka imempauakono serigala atuu: Ongkue monsaari onitu nsa'o ka mompokotompa mia, a oleo andio ka tisomo, ka ko'otolu oleono Akumo umari. 33Sine oleo andio ka tisomo ka te'ipua asalakono Aku motilaloakono pelempaa-Ku, hangano nahi pototono aasa nabi pinepate tewala komba i Yerusale. 34Yerusale, Yerusale, omue anu mepate ira nabi ka wunoako ira watu mia anu mentinena ndi omue! Mararu Kumingki pumpu ira anamu, mengkena kana ineno manu pumpu ira anano a ntoto panino, sine nahi imebehe. 35#Pud. 118:26 Menteeano rahamiu andio ta bininta ka gagi boni-boni. Sine Kupauakomiu: Nahi komiu mengkita Aku mbo'u hawe a tempono ka impotae:
Rinonso Iramo anu hawe a nee-Do i Ue!”
Atualmente Selecionado:
I LUKASI 13: XMZ
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
LAI 2021
