Markus 2

Ap inggis-isok nggedok-kobok erek werekma sek ogagagi wene

(Matius 9:1-8; Lukas 5:17-26)

1At Yesus avakwa dekma akoma welagagirik, o Kapernaum wagagirikmu, “Amwa wagya lagarik agarik o,” yugu lagagwama, 2avakwa wisane homari wagagwa ako amwa o hobo iri lagagimu, sup mbanggut vaga inim hobalek inigik, At Yesus en Ala wene Sek Wene ako yugeragagi. 3Yugirigyama, ap ambi inggis-isok nggedok-kobok erek, ap eneyave 4 en yo durogo wolok Yesus adema bawagagwa. 4Bawagu lagagwarik, avakwa wisane en o hobalek halok, virimu wolok unggu lagagwarik, o wake mbeyakbaluk o viril ndendalogo ap ako yo durik wolok wagagwa ako vaga nggilik hegek, mbauk erogo Yesus amor-amot wombabagagwa. 5Wombabagu lagagwama, At Yesus akoen it enendawima At ovaga vanggabaluk avyarat umbutu dugwit wolok wagagwa ako yedok inugu lagagirik, ap isok weyak ako yugugu dugwit, “Nabut wai. Hat weyak ogagya lagen ako degerogo bagagi o,” yiluk, yugogogi.

6Yugugu lagagimu, it Ala wene vagago welagagwa menda andoma horaik dugwit enendawima en umbutu dugwit, 7“Ap yi nggarogo yiluk, anderogo yagaliga embetep? Nit weyak ogasagwi degerogo bininaliga ako, At Ala adigat agarik hegek, At inis wiyiknom-weyaknom erogo baliga yi,” it enendawima en umbutugwa.

8It enendawi anderogo umbutwi ako, At Yesus endawima yedok inugu lagagirik, “Hit nggarogo yiluk, henendawi anderogo winggilisagwi? 9At ap isok weyak yi ako, ‘Hat weyak ogagya lagen ako degerogo bagagi o,’ yugurup andi iya a, ata ‘Hat mendek yiluk, hagone ndalek nogo yiliga menda hedelok elak,’ yugurup andi iya a? Yukneres!” yugirigya lagagirik, 10“An Ap-At Endaklagagis wen vaga yoma dugwit, avakwa weyak ogasagwi menda Anen degerogo bisagiluk, Ala en An andok okbaninggigi hinilup erogo yukherayogon o,” yiluk, yugirigya lagagirik, at ap inggis-isok weyak ako yugugu dugwit, 11“Mendek yiluk, hat hagone nogo yiliga menda ndalek andi hedelok, hamwa lanok yiluk yukhisiga,” yugogogi.

12Ap ako ao yugugu hegek, mondok iri lagagirik, at agone ndalek nogo yiliga menda ako hedelok, it avakwa ovok inil inigik wasim wunggu lagagimu, “Nit yerogo ambi ninil helagwidek menda, At ovok ogaga yi, wi,” yiluk, At Ala inis siyabagu dugwit vok yagagwa.

Ap Lewi ayonggo bagagi wene

(Matius 9:9-13; Lukas 5:27-32)

13Vok yugusigik, Yesus ako wunggu lagagirik, ndugwis ambi vaga ambi inim inamut Galilea omban vaga lagya lagagimu, avakwa ovok erogo At adema wagwi, Ala wene yugirigya, ogagu lagagwa. 14Ala wene yugirigya lagagirik, suvaga lagya dugwit ap ambi inis Lewi, Alepeus abut, at it pemerintah enake yoparip wonggalisagwima horaik werekma il hagagi. Il higya lagagirik, “Ninim lasogom en, oma,” yugugu lagagimu, mendek iri lagagirik, Yesus inim lagagi.

15Andi okbaluk, hivis Yesus inim, At eyaganggom ane welagwi menda ako inim, it pemerintah enake yoparip wonggalisagwi menda inim, it weyak ogasagwi menda inim, it wisane Yesus inim nagu lagagwa ako at Lewi amwa lagu lagagwarik, Yesus inim erom nunggusim, 16it ap Varisi menda Ala wene vagago welagagwa menda nin akoma en Yesus it weyak menda ako inim At erom nunggwi inil inugu lagagwarik, At eyaganggom yugurugu dugwit, “It pemerintah enake yoparip wonggalisagwi menda inim, it weyak ogasagwi menda inim, Yesus nggarogo yiluk inim dambulik dugwit erom naliga?” Yesus avok mbanggu dugwit, yugeragagwa.

17Yugurugwi ako At Yesus aruk hunggu lagagirik, “It ap aup edudek halok, dokter adema laup ombasagwidek. Ata, aup edup halok sek oknerapwak en yiluk, dokter adema laup ombasagwi. Andi ndatak, Anen it ap ‘An sek,’ ombasagwi menda eneyanggup yugeragiluk wagatek o, ata weyak ogasagwi menda eneyanggup yugeragiluk wagagis,” yiluk, At Yesus en it Varisi menda enadema yugeragagi.

Ala ake yiluk, erom hunis dugwit, samban ogasagwi wene

(Matius 9:14-17; Lukas 5:33-39)

18Ndugwis ambi vaga o akoma dugwit, it Yohanes ane welagwi menda inim, it Varisi menda ako inim, Ala ake yiluk, erom hunis dugwit, samban ogagu lagagwa. Werekma, Yesus ane welagwi menda erom ugun nungguselok, avakwa Yesus adema wagu lagagwarik, “It Yohanes ane welagwi menda inim, it Varisi enane welagwi menda inim, Ala ake yiluk, erom hunis dugwit, samban ogasagwi ovara, Hat hane welagwi menda andi nggarogo yiluk, ugun erom nelagwi?” yugogogwa.

19Yugugu lagagwama, At Yesus en, “Ap ambien hwa hidigyaim, owa-asin isogo isagu dugwit, enendawi anggin vaga erom hunis dogop sek embetep? Anderogo dek. Agun inim dugwit, enendawi adenggen vaga naup sek. 20Hivis owa-asin inigik, agun ako wolok laup vage amor ari wagyaim, enendawi anggin vaga erom hunis dogosogom o,” yiluk, yugeragagi.

21Yugirigya lagagirik, “Yum endak yugup digi swi dalwogo monggatu halok, digi swi dalwik ao yugup hegek, yum endak yugup ako ombok erogo hivitlandiga atma, digi swi dalwogo yum endak atok hunogo monggadisagwidek o. Swi yugup endak yugup vaga lombalogo monggadisagwi halok, swi yugup lombalek agarik ako hivitlagya dugwit, endak yugup ako ombok erogoat hivitlandiga o,” yiluk, yugeragagi.

22Yugirigya lagagirik, “Anggur agas swi menda is owak kambin agamut endak mendago vaga nudisagwidek. Anggur agas swi menda is owak kambin agamut endak mendago vaga nudup halok andi, is owak endak menda ako viklagya dugwit, yanggalogo anggur agas ako dilagya, eke, is owak eyave weyak lagya, ogasiga. Anderogo atma, anggur agas swi menda is owak endak menda ako vaga nudisagwidek. Ata, anggur agas swi menda is owak kambin agamut swi mendago vaga nudisagwi o,” yiluk, yugeragagi.

It Yakuri samban ogasagwi vaga ogagagwa wene

(Matius 12:1-14; Lukas 6:1-11)

23Andi okbaluk, ndugwis ambi vaga it ap Yakuri samban ogasagwi vaga At Yesus gandum yagoma suvaga lagyama, At ane welagwi menda ako inim, lagu dugwit, gandum enggen hoda atma, naguluk heralit lagagwa. 24Heralit lagusim, it Varisi menda akoen inugu lagagwarik, “Yesus wai. Samban ogasagwi vaga yi ogagek ndi ogagek ogarup moga wene hobalek hegek, it nggarogo yiluk ogarit lendagwi?”

25Yugugu lagagwama, At Yesus akoen, “Wene at Daut aori inim, erom dekma, erom uvup en ogagagwa wene ako, Ala wene dirup warek bikhegetek dugwit yagalagwi yi? 26Andi o endak ap Abyatar it imam-imam enasin werekma, at Daut ako At Ala awi valekma nunggwigya lagagirik, erom roti Ala ake bago ako, ninggigi. Erom roti ako it ugun naup moga. It imam-imam adigat nunggu dogopwak yiluk, wene hobalek hegek ovara, at ninggigi. Ninggya lagagirik, it inim welagagwa ako wogirigya lagagimu, it ovok nunggugwa o, yiluk, wene ako hinil dibagetek dugwit yagalagwi?” yiluk, yugeragagi.

27Yugirigya lagagirik, “Ala en ‘Samban ogasagwi vaga yi yavup ndi yavup ogarubuk o,’ yagagi ako nit avakwa nenake-at bagagi. Eke, nit avakwa samban ogasagwi vaga yi ogarubuk ndi ogarubuk ogarupwak yiluk, okbininggitek. 28Andi atma, samban ogasagwi vaga yerogo ogarup nderogo ogarup yugu dogop andok ako andi, An Ap-At Endaklagagis aro,” yiluk, yugeragagi.

Atualmente Selecionado:

Markus 2: nbq2013

Destaque

Copiar