Matius 27

Yesus wolok Pilatus adema lagagwa wene

(Markus 15:1; Lukas 23:1-2; Yohanes 18:28-32)

1O yanggo iri lagagimu, it imam-imam enasini ovok erogo inim, it avakwa enasini inim, Yesus warup wene amburup mbabaluk, 2eyave heda marogo at Gubernur inis Pilatus ako wogiri lagagwa.

Yudas hombagagi wene

(Lakbogogi Wene 1:18-19)

3Eke, avakwa en Yesus warupwak yiluk, onggo hedagagi at Yudas akoen Yesus mondok-at warup yagagwa ako higya lagagirik, endawi mondok wakhedegek, yoparip mbusi perak enggen 30 ako wolok, eyami vaga it ap imam-imam enasini inim, it ap enanggok inim, enadema bawagya lagagirik, 4“Ai. At weyak ogagetek hegek, anen warovovok yiluk, onggo wigi atma, weyagat ogagi.”

Yugirigya lagagimu, iren, “Wene andi, nit nenovaga aga ombasiga? Andi hat hovadombok.”

5Yugugu lagagwama, at Yudas en yoparip mbusi perak ako Ala awi valekma andoma mbo hanunggwigya lagagirik, wulu wakluk, avup heda yidilhidigya lagagirik, hombagagi.

6Hambigya lagagimu, it imam-imam enasini akoen yoparip mbusi perak ako wugu lagagwarik, “Yoparip yi, ap amuya onggo bago atma, Ala ake yoparip belagwima andoma baup moga o,” yiluk, yugu lagagwarik, 7it ap huru hambuguselok, wen sabugu dogomunda, ap ninuk vaga sogolowak mendarisiga menda awen ambi yoparip mbusi perak ako vaga onggo hunup yagagwa. 8Wen andi, ap amuya onggo bago atma, “Ap Amuya Winggigirikmu,” yiluk, wen inis sanggugwa. Eke, inis andi, yogak ogo aoat yagalagwi.

9-10 # Zakharia 11:12-13 yokhanes. Anderogo ogagagwa ako, Ala yugugu hegek yugeraliga menda navi Yeremia en, wene ambi o muk erogo yagagi ako o andi hudi vaga atma des yagagi. At wene yagagi ako, yi:

“Nenasin Inis Ombok en yuknogogi ndatak, it avakwa Iserali menda en,

‘At eyave onggo andi, yoparip mbusi perak enggen 30 baup o,’ yagagwa ako,

yoparip ako wogogo, ap ninuk vaga sogolowak mendarisiga menda awen onggo wogogwa,”

yugeragagi ako, o andi hudi atma des yagagi.

Pilatus en Yesus aigwakma wogogi wene

(Markus 15:2-5; Lukas 23:3-5; Yohanes 18:28-38)

11At Yesus ako ap Gubernur Pilatus adema mendek yi lagya lagagimu, at Gubernur akoen aigwakma wigya dugwit, “Ap Yakuri menda enasin hinis ombok Hat ai?”

Yugugu lagagimu, At Yesus en, “Hat yegen andiat.”

12Yugogogi ovara, it ap imam-imam enasini inim, ap enanggok inim, iren wene At ovaga bagusigik, At onggo ambi mondok yugeregetek mbuverek-at welagagi. 13Mbuverek welagagimu, at Pilatus en, “Yi wene ndi wene hovaga bagalyagwi yi, Hat haruk hunggitek agindik ai?” 14Yugogogi ovara, onggo ambi yugeregetek anedek mbup iri lagagimu, at Gubernur akoen, “Wi, nalon yi,” yiluk, vok yagagi.

“Yesus mondok warusogom,” yagagwa wene

(Markus 15:6-15; Lukas 23:13-25; Yohanes 18:39—19:16)

15Eke, it ap Yakuri isogo Vasika isagu dugwit, avakwa wonggalek akoen, “Ap heda mago ambi andi, visilogo wokneran o,” yuguselok, at Gubernur akoen visilogo wogeregek iri lagagi. 16Anderogo wogeregek iri lagagirikmu, o andi vaga ap weyak eve ombok ogarit lagya lagagi ambi inis Yesus Barabas it ovok inilup welagagwa ako, heda mago werekma, 17-18it avakwa wonggalagu lagagwama, at Pilatus en, “It ap imam-imam enasini en Yesus enanggon umbutu dugwit wolok wendagwi,” yedok inugu lagagirik, it yugirigya dugwit, “Hit henendawima sa visilogo wokheraup ombasagwi? At Yesus Barabas a, ata Yesus inis Keretus yagalagwi ako visilogo wokheraup a?” yugeragagi.

19Yugirigya lagagirik, owak dilivisigama andenam horaik werekma, at Pilatus ogwa en agun yugurupwak yiluk, ap ambi yugugu dugwit, “‘An o hup yi vaga nabi higya dugwit, ap andi endawi mondok sek adigat hegek weyak okbagu sigirikmu, nendawi anggin wisane asiga atma, nagun inim weyak ogagya haoen, yugirilak,’ yiluk, yuknugu lagama, yukhiri wandiga,” yugogogi.

20Ako yugugu hegek, it imam-imam enasini inim, ap enanggok inim, akoen it ap wonggalek welagagwa ako yugurugu dugwit, “Barabas heda visilogo woknirigya dugwit, Yesus adigat warupwak yiluk, Pilatus yugeres,” yiluk, wene enendawima malit lagagwa.

21Enendawima malit lagagwa ako at Gubernur inigu lagagirik, “Ap mberen yi, ambi sa visilogo hekbaup ombasagwi?”

Yugirigya lagagimu, iren, “Barabas heda visilogo wokneran,” yiluk, yugogogwa.

22Yugugu lagagwama, at Pilatus en, “Eke, andi halok, At Yesus inis Keretus yagalagwi yi, an nggarogo ogarik?”

Yugirigya lagagimu, it ovok en at yugugu dugwit, “Yo winik vaga lobalogo baup.”

23Yugugu lagagwama, “At weyak ambi ngga ogaga vaga yagalagwi?” yugeragagi ovara, “Dek, yo winik vaga lobalogo bain!” yiluk, evenuk enane ombok vaga yandyak-handyak yugogogwa.

24Yugugu lagagwama, at Pilatus en, “It avakwa yoma en ‘Warup-at,’ enane anye erogo yugu dugwit vage nadok-hadok yusogom atma, an nane un enam warogo yagaliga,” imbita lagagirik, it ap wonggalek ako inivaga is nudik wigya lagagirik, inggis hutu dugwit, “Ap yi, amuya an novaga hondaba warubuk. Hit henovaga-at dogosogon atma, henovadombok-at okhidugu dogones,” yiluk, yugeragagi.

25Yugirigya lagagimu, it avakwa ovok erogo enane wonggalogo yugugu dugwit, “At amuya andi, nit nenaburi-nenombawi ninim nenovaga dogop segat.”

26Yugu lagagwama, at Barabas ako heda visilogo wogeragagi ovara, At Yesus andi, nabirok-at wakbaluk, yo winik vaga lobalogo bapwak yiluk, ap enayegen werek wogeragagi.

Yesus wiyiknom-weyaknom erogo bagagwa wene

(Markus 15:16-20; Yohanes 19:2-3)

27Yugirigya lagagimu, it Gubernur aori enayegen werek akoen At Yesus wolok Gubernur amwa wene amburup mbalisagwima nunggugu lagagwarik, eneyave ovok erogo Yesus eyave huliklip erek dugwit, 28asum nggolabaluk, yum elokwe saup mudu ovagak yikbagwi, 29waren-waren adok werek menda unggul vaga walinogo yikbagwi, wanggun ndup owak mbalogo inggis amotkan bagwi, okbagu lagagwarik, eneyave At avema seve yiluk, aganda yagu dugwit, “Wa! It ap Yakuri enowa hinis ombok Haratma, wa. Nenasin wa,” yiluk, 30waris ovaga suvutwis, ndup mbalek ako vaga unggul vulilogo watwis, okbaluk, 31wiyiknom-weyaknom erogo okbagu lagagwarik, yum elokwe saup mudu ovagak ako nggolabaluk, At asum ako yikbagu lagagwarik, yo winik vaga lobabaguluk, wolok wulu wagagwa.

Yesus yo winik vaga lobalogo bagagwa wene

(Markus 15:21-32; Lukas 23:26-43; Yohanes 19:17-27)

32Wulu wagusim, ap awi Kirene menda inis Simon inim avuk agu lagagwarik, enane anye vaga, “Yo winik yi, wolok lau.” 33Yugugu lagagwarik, o inis it enane vaga, “Nggologota,” yagalagwi akoma ari lagagwa. Eke, o andi, nit nenane vaga, Unggul Owakma o, yagalagwi.

34Eke, andoma lagu lagagwarik, anggur agas inim, amumudi eda menda inim, nanggibuk-hanggibuk erogo baluk napwak yiluk, wogogogwa ovara, ai wal okhigya lagagirik, naup anggon imbita dugwit hekbagagi.

35Iren Yesus eyave inggis isok ako yo winik vaga lobalogo paku warogo bagu lagagwarik, “Asum sa hidigya hamwi?” yiluk, helep enggen vaga wakhegek ogagu dugwit, yum ako sumbukhedagagwa. 36Hidugu lagagwarik, andenam hora yiluk, Yesus malogo welagagwa. 37Andenam dugwit, “Ap Yakuri Enowa Inis Ombok Yesus ako, yi aro,” yiluk, ovaga bagagwa wene ako dirup warogo Yesus unggumu yo ako vaga lobalogo bagagwa. 38Eke, ap enonggop agodem menda mberen Yesus inim yo winik vaga lobalogo bugu dugwit, ambi Yesus inggis amot vikit bagwi, ambi inggis hware vikit bagwi, okbogogwa.

39Lobabugu lagagwama, it avakwa nin lagek-wagek yugu dugwit, inil heyakbaluk inut wadok yugu dugwit, “Inyagot! Nabirok ale! 40Hat ‘Ala awi valek masalogo baluk, hivis avoloma ndugwis henggam vaga valugwis,’ yegen yi, Hat Ala Abut-at heyalok, yo winik vaga en hagap wendakhedelok, soklok wambuma,” yiluk, wiyiknom-weyaknom erogo ovaga bagagwa.

41Bagu lagagwama, it imam-imam enasini inim, it Ala wene vagago welagagwa menda inim, it ap enanggok inim, anderogo wane-wane Yesus wiyiknom-weyaknom erogo aganda yagu dugwit, 42“Avakwa enagap wendaginivit nagu laga ovara, At agap wendakhedaup meyan yi helagwi a? Ap Iserali enowa inis ombok atma, yogak yo vaga en wambu wagya halok andi, nit avyarat ombarusogom. 43Endawi Ala ovaga vanggalek dugwit, ‘An Ala Abut,’ iri lagarikmu, Ala en endawi hunik halok, agap wendarupwak,” yiluk, yagagwa. 44Eke, it ap enonggop agodem menda Yesus inim yo winik vaga lobalogo bogogwa ako ogo, Yesus anggadi watu dugwit, anderogoat yugogogwa.

Yesus hombagagi wene

(Markus 15:33-41; Lukas 23:44-49; Yohanes 19:28-30)

45Yugugu lagagwama, o dingga jam 12 vaga yi awi ndi awi andoma, o hup agagi hegek, mbikit jam 3 howam vaga o awiya agagi. 46Eke, o vage howam agya hegek, jam 3 vaga At Yesus na iri dugwit, “Eloi, Eloi, lama savatani,” yagagi. Yagagi andi nit nenane vaga, “Nasin Ala o! Nasin Ala o! An nano yiluk hekbaniliga o?” yiluk, yagagi.

47Iri lagagimu, it nin andoma welagagwa menda ako en Yesus ane iris ako enaruk hunggu lagagwarik, “Ap yi, Elia eyanggup yagaliga,” yiluk, 48yugu lagagwama, ap it menda ambi hupuk lagya lagagirik, suk wambamok ambi anggur agas eda menda yomakbaluk, napwak yiluk, yo atok sapok erogo Yesus elagapma wogugu lagagimu, 49it ninen, “Yogak hekbas. At Elia agap wendari wagya haoen, sok hasogom o,” yiluk, yagagwa.

50Yugu lagagwama, At Yesus en ambi inim na iri dugwit, endawi weralhidigya lagarik, hombagagi.

51Endawi weralhedelok hambigya lagagimu, yum Ala awi valekma ilim sivinik welagagi ako, winimenggan en o ilim agako wane erogo mbetlarit wambu wagya, eke, wen wadok iri dugwit, helep nggago yagan lagya, ogagya dugwit, 52avakwa hombagagwa eneyave mabiselagwima akoma sup hutlarit lagya lagagimu, Ala aburi hombagagwa ako wisane iniluk akluk, mendek yagan lagagwa. 53Eke, hivis At Yesus iluk akluk mendek iri lagagimu, it ako wimu en wulu wagu lagagwarik, o kota Ala ake enek agarikmu akoma nunggugu lagagwama, avakwa wisane en inil enogogwa.

54Eke, at yegen werek enowa inim, it Yesus malogo welagagwa inim, akoen wen wadok iris, eke, yi ogagek ndi ogagek ogagya, ogagagi ako inil hugu lagagwarik, enalon wisane agya lagagimu, “At yi, Ala Abut avyarat higyo,” yiluk, yagagwa.

55Eke, it akwa wisane Yesus yonggat-hugu lagagwa menda inim o Galilea en wagagwa ako, o adumu lenak Yesus yo vaga lobalek ako inil hagagwa. 56Inil hagagwa ako andi, at Maria Makdalena inim, it Yakobus Yusup iperen inisa Maria inim, at Sevedius aburi inisa inim, akwa nin inimat inil hagagwa.

Yesus eyave wimu belagagwa wene

(Markus 15:42-47; Lukas 23:50-56; Yohanes 19:38-42)

57O hup agya lagagimu, ap inggis werek Arimateya menda ambi inis Yusup, Yesus ane wigya lagagi menda, 58Pilatus adema lagya lagagirik, “Yesus eyave warek wokniru o,” yiluk, nggino yugugu lagagimu, at Pilatus en wogirupwak yiluk, yugeragagi. 59Wogugu lagagwama, at Yusup akoen Yesus eyave wigya lagagirik, yum mudu obak swi hunik vaga dinggilogo, 60wis swi mendago helep elola at kubur okhedamunda bavunggigirikmu akoma mabagya lagagirik, helep obak ombok sigilogo sup lakbaluk, lagagi. 61Eke, at Maria Makdalena, hwa Maria ambi ako iperen Yesus warek bagagwarikmu akoma amor-amot horaik welagagwa.

Yesus eyave wa nunggugu saoen, malogo welagagwa wene

62It ap Yakuri samban ogaruguluk, dikduk okbagu lagagwarik, nogo yikbaluk, hutun andi vaga it ap imam-imam enasini inim, ap Varisi inim, homakbaluk, Pilatus adema wagu lagagwarik, at yugugu dugwit, 63“Nenasin wai. At avakwa enendawi nomalivisiga menda akoen ao iluk dugwit, ‘Nogo mberen yikbaluk, ndugwis ambi vaga mendek yisogon o,’ yagagi andi ninilup atma, 64At ane welagwi menda akoen wagu dogomundik, eyave mbauk erogo wugu dogomundik, avakwa yugurugu dugwit, ‘Hambuluk lendagwima en iluk akluk mendek yagas o,’ yiluk, yuguruguselok, At Yesus endak avakwa enendawi nomalinipu laga andi, madugat, eke, it At ane welagwi menda akoen ombok erogo nomalinipu saoen, haren Yesus warek eyave bagarukmu akoma ndugwis henggam vaga malogo dogopwak yiluk, haori yugeran.”

65Yugugu lagagwama, at Pilatus en, “Eyave bagarukmu malogo dogop eneyave yi. Iren sek erogo malogo dogopwak yiluk, wogonombolok elales.”

66Yugirigya lagagimu, lagu lagagwarik, helep sup larik ako ap en huruguven yiluk, wen mbamut erabaluk, it enayegen werek akoen ap warek bagagwarikmu akoma malogo dogopwak yiluk, bisiluk, lagagwa.

Atualmente Selecionado:

Matius 27: nbq2013

Destaque

Copiar