Matius 23
23
Ala wene vagago welagagwa menda inim, ap Varisi menda inim, enavok yagagi wene
(Markus 12:38-39; Lukas 11:43, 46; 20:45-46)
1Anderogo okbaluk, At Yesus en it avakwa wonggalek ako inim, At ane welagwi menda inim, yugirigya dugwit, 2“It Ala wene vagago agarwik menda inim, ap Varisi menda inim, Musa yugirigya lagagi avoloma irat yukherelagwi atma, 3iren, ‘Yerogo ogarup, nderogo ogarup,’ yukhiruguselok, des erogo ogagu dogop segat ovara, it ogagetek dugwit, yukherelagwi atma, hit ogo anderogo ogagu dogobuk. 4Iren wene anggin menda avakwa enom vaga bisiluk, hedelok nagusigik, yonggar-inivup embetetek inil mengga-mengga yagan nagwis.”
5“Iren yi menda ndi menda ogasagwi ovok erogo ako andi, ‘Avakwa inil neyapwak o,’ yiluk, ogarit nelagwi. Anderogo ogarit nagu dugwit, ‘An Ala wene des erogo ogasiga menda,’ yiluk, hiwene dirup warogo enembet vaga obak erogo hondabaluk heda matwis, enasum atok vaga nggagalogo baluk sivinogo wombabagwi, ogasagwi. 6Eke, isogo isagusigik, ap ombok-ombok hora yagalagwima hora yugwi, it Yakuri samban ogasagwima akoma ap ombok-ombok hora yagalagwima hora yugwi, 7it avakwa pasar ogasagwima andoma en, ‘Nit adigat heyaga watninivup,’ umbutwi, avakwa en, ‘Nasin ngguru wa,’ yiluk, yuknerapwak umbutwi, ogagu dogop enendawi sek adigat ombasagwi. 8Ovara, hit andi, Henasin Ngguru yugakheraliga menda andi, ambiat, eke, henaswei henarupwi hinim ndatak agipik atma, avakwa en, ‘Ngguru wai,’ yukherabuk. 9Hit Henasin mbogot vaga menda ambiat atma, it ap wen vaga yoma menda ambi, ‘Nasin o,’ yiluk, yugurup moga.”
10“Wene aik magago yukheraliga andi ambiat An Keretus atma, avakwa en, ‘Wene aik makninivisiga o,’ yukheraup andi degat. 11Hit henanggelekma ap ambi ombok agarik halok, at andi, henayelomanat dogopwak. 12Ap saen endawi siyabatigya halok, sovabagya, eke, endawi sovabatigya halok, arat siyabagya, ogagya hagup o,” yiluk, yugeragagi.
“Hit ap Varisi menda inim, Ala wene vagago agipik menda inim, anggin henovaga arugup,” yugeragagi wene
(Markus 12:40; Lukas 11:39-42; 20:47)
13Wene ambi inim yugirigya dugwit, “Hit Ala wene vagago agipik menda inim, ap Varisi menda inim henagavoval ovagak yagalagwi menda yi, avakwa At mbogot vaga menda avema nunggugu saoen yiluk, sup larogo wibugwis, hit nonggegetek dugwit, it nunggup ombasagwi ako, sup monggalogo bugwis, ogasagwi menda atma, anggin henovaga arugup!”
14[“Hit Ala wene vagago agipik menda inim, ap Varisi menda inim henagavoval ovagak yagalagwi menda yi, it akwa sogwa enangge dek okbugwis, eke, avakwa iya nenombarupwak yiluk, samban adup erogo ogagwi, ogasagwi atma, hivis onggo anggin mondok iya erogo henovaga bigigu hagup.”]
15“Hit Ala wene vagago agipik menda inim, ap Varisi menda inim, henagavoval ovagak yagalagwi menda yi, ap ambiat henane wigya dogopwak yiluk, yi awi ndi awi walinit nagwis, o adumu erogo avakwa haverinivit nagwis, ogagu lagipik, henane wigya halok, hali abyama hirat nunggusogom yiluk, ogagu dugwit, at halok andi, weyak iya erogo okhedelok hinimat nungguguluk, ogasagwi atma, anggin henovaga arugup!”
16“Hinil mbuk dugwit avakwa woginiviluk lendagwi menda yi, hiren yugu dugwit, ‘Ala awi valek inis vaga hanum mbangguselok, enam warogo-at hanum mbalisagwi ovara, mbusi emas Ala awi valekma ilim agarik ako vaga hanum mbangguselok, enane yagalagwi ako mondok-mondok ogagu dogopwak,’ yiluk, yagalagwi atma, anggin henovaga arugup!”
17“Hit ap henendawi apik hinil mbuk menda yi! Ngga menda iya ombasagwi? Emas andi iya a? Ata emas Ala awi valekma banunggwisagwi vaga Ala ake enlandiga atma, awi valek andi iya a? Hit nggarogo ombasagwi? 18Hit yagalagwi ambi yi: ‘Ala ake warogo hali hunisagwima inis vaga hanum mbangguselok andi, enam warogo-at hanum mbalisagwi ovara, Ala ake bagova hali hunisagwima hanum mbangguselok andi, enane yagalagwi ako mondok-mondok ogagu dogopwak,’ yiluk, hirenen yagalagwi.”
19“Hit hinil mondok mbuk yi! Ngga menda iya ombasagwi? Yi menda ndi menda Ala ake bago andi iya a? Ata yi menda ndi menda Ala ake bago ako hali hunisagwima hali hunggu dugwit Ala ake enlandiga atma, hali hunisagwima ako andi, iya a? Hit nggarogo ombasagwi? 20Anderogo atma, ap saen Ala ake warogo hali hunisagwima inis vaga hanum mbanggya halok andi, hali hunisagwima eyave ogarek inim, yi menda ndi menda andoma Ala ake bago ako inim, ovok dambup erogo inis vaga-at hanum mbalisiga. 21Eke, ap saen Ala awi valek inis vaga hanum mbanggya halok andi, o eyave valek inim, At andoma agarik Ala eyave ako inim, dambup erogo ininis vaga-at hanum mbalisiga. 22Eke, ap saen mbogot inis vaga hanum mbanggya halok andi, At Ala horaik dugwit wene yugeraligama inim, At eyave andoma horaik agarik Ala inim, dambup erogo ininis vaga-at hanum mbalisiga o, yiluk, yukheraliga.”
23“Hit Ala wene vagago agipik menda inim, ap Varisi menda inim, henendawi henagavoval ovagak dugwit, un divu angga inim, hibi angga inim, henda inim, mariduk ako menda wogogo Ala ake sek belagwi ovara, hegek, avakwa enowak sek erogo dilisagwidek, avakwa enabwa en okbiselagwidek, eke, henendawi des erogo Ala avyarat ombasagwidek. Anderogo atma, anggin henovaga arugup! Wene adem ombok andi, ogagu dugwit, maridik-mariduk andi inim hondalogo ogarup sek atma, ogagu dogop. 24Hit hinil mbuk dugwit avakwa woginiviluk lendagwi menda yi, hit is nunggu dugwit, damis maduk henelagapma nunggwigya haoen, is ndilhelagwi ovara, is ako nunggu dugwit wam unta is elakamu agarik ako hinunggutmu is inim dunggun erogo nelagwi, hit wakhegek andi wane-wane agipik.”
25“Hit Ala wene vagago agipik menda inim, ap Varisi menda inim, henagavoval ovagak yagalagwi menda yi, hit henagas owak sogolowak inim, henowalup inim, agap weram adigat hurisagwi ovara hegek, henendawi sogolowak ilim ovagak dugwit, avakwa enangge haurogo hedaup inim, ‘An nadigat woknirup,’ ombasagwi inim, henendawima ovok erogo mbin erek agipik atma, anggin henovaga arugup! 26Hit ap Varisi hinil mbuk yi, henagas owak inim, henowalup inim, ilim endak sek erogo hokhidugu hiniselok, weram inim horek-at hagup.”
27“Hit Ala wene vagago agipik menda hinim, ap Varisi hinim, henendawi henagavoval ovagak yagalagwi menda yi, ap hambuguselok wen sabugu dugwit eneyave vidis agya, enowak nggililagya, ogagya hegek ovara awi weram adigat cet mudu vaga warek elose mondok sek ovagak agipik yi, anggin henovaga arugup. 28It avakwa en heneyave bikhinugu dugwit, ‘Ai, yi ap sek,’ henombasagwi ovara, henendawi henagavoval yagalagwi menda inim, yi weyak ndi weyak ogasagwi menda inim, henendawima mbin erek agarik higi,” yiluk, yugeragagi.
It ap Varisi enowak dilogo weyak enovaga bisaup wene
(Lukas 11:47-51)
29Yugirigya lagagirik, wene ambi inim yugirigya dugwit, “Hit Ala wene vagago agipik menda hinim, ap Varisi hinim, henendawi henagavoval ovagak yagalagwi menda yi, anggin henovaga arugup! It ap Ala en yugirigya hegek yugurugu lagagwa navi-navi o muk erogo henombawi en initugwa ako, enowak vaga enawi sek erogo vanggwis, eke, it o muk enendawi sek adigat dugwit hombagagwa ako enowak vaga enawi sek erogo wet ogagwi, ogagu dugwit, 30hiren, ‘Nit andi, nit nenombawi o muk welagagwa ako, o andi hudi ninim duklurigen, it Ala en yugirigya hegek yugurugu lagagwa navi-navi initugwa ako, nit ninim iniklubuk,’ 31yagalagwi ako vaga, hirenen ‘It ap Ala en yugirigya hegek yugurugu lagagwa menda navi-navi initugup ako enombawi wigalek menda andi, nirat agurik o,’ yiluk, sigam yagalagwi. 32Andi halok, adem endak hit henombawi asinggugwa ako, hirenen atok weralogo ogarilales!”
33“Hit mbas idup aburi endago menda yi! Ala en henowak dilogo hali abya wuluk-herek adigat yagaligama andoma lakbigigu halok, hit nggarogo hoda wulumwi? Mondok meyan. 34Andi halok, Anen it ap Ala en yugirigya hegek yukherelagwi menda navi inim, ap enendawi werek menda inim, ap yugatheralagwi menda inim, henadema lakbisa warimindikmu, nin hirenen enatwis, nin yo winik vaga lobalogo bugwis, nin hit samban ogasagwima akoma nabirok vaga enatwis, it nin o kota ambima en o kota ambima enamusek haryogo wibugwis, okbisagup o. 35Anderogo atma, at Havel ovavut hwalek hegek amuya wombagagi andi hudien mbikit, ap Mberekia abut Sakaria ako, o Ala awi valekma ake warogo hali hunisagwima milimu andoma watugup hudi, it ap enendawi hwalek inigik enamuya wen vaga yoma wombagagi ako, ovok erogo hit henovaga durigat dogosogon. 36Hit avakwa yogak agipik yi, wene yi ovok erogo hit henovaga-at dogosogon, an avyarat yukheraliga o,” yiluk, yugeragagi.
Avakwa o Yerusalem menda enabwa imbitigi wene
(Lukas 13:34-35)
37Wene ambi inim yugirigya dugwit, “Ai! Yerusalem, Yerusalem! Hiren it ap navi-navi ako initwis, ap Ala en yonggo henadema lakbisa wagagi andi, helep vaga initwis, ogasagwi menda atma ai! Swa ayam inisa en eyagi alup amik avema sovabisiluk agarik hak, Anen hit heneyagi anderogoat wonggalogo bisaup ndugurek-ndagarek imbita lagagis ovara, hiren, ‘Nenanggon,’ umbutu lagagupmu, ai! 38Hit Yerusalem menda hit henawi yoma Ala en hekbigigayogon atma, hit hinil nggale yusogom. 39Hiren, ‘Nenasin Ala inis vaga wandiga yi, inis siyabelagwi o,’ yiluk, ao yegetek hinigik, hinil mondok neyagetek-at dogosogom o,’ yiluk, yukheraliga,” yugeragagi.
Atualmente Selecionado:
Matius 23: nbq2013
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
