Matius 20
20
Ap wisane anggur yavup ogagu lagagwa vaga wakhegek yugeragagi wene
1Yesus en wene ambi inim yugirigya dugwit, “At mbogot vaga menda avema bisaligama ako andi, yerogo: Ap ambi awen werek en anggur yavup okbanupwak yiluk, o hutun erogo avakwa haverinivit winggigi ako ndatak-at. 2Wunggu lagagirik, avakwa havedogo anggur yagoma akoma lakbugu dugwit, ‘Ndugwis ambiat vaga ogagu hiniselok, yavup onggo ndugwis ambiat wogerelagwi hak, onggo yoparip denari#20:2: Denari ambiat andi yavup onggo satu hari wogerelagwi ako ndatak. ambiat wokheraup sek a?’ Yugirigya lagagimu, iren ‘Segat,’ yugugu lagagwama, eyavumu lakbogogi.”
3“Lakbogogi ako ogagusigik, at hivis o mo wilik-dingga wunggu lagagirik, ap nin o pasar andoma ugun hagalwik werekma il inigu lagagirik, 4‘Avyak. Hit ogo, an neyavup ogasagwima akoma, hinim ogarilales. Ogari lagu hiniselok, hit ogarumwi bikhegek, onggo wane-wane-at wokherayogon o,’ yiluk, yugeragagi.”
5“Yugirigya lagagimu, it ako lagu lagagwama, ap eyavup werek akoen, o dingga inim, o howam inim, wunggu lagagirik, anderogoat yugirigya, lakbugu, ogagagi. 6Hivis mo il huruk yigiluk ogagya hegek, at ambi inim wulu wagya dugwit, ap nin un hagalwik inigu lagagirik, ‘Ap yoma wai. Hit o hutun en mbikit, o howam hudi yavup ogagetek nggarogo yiluk yoma ugun hagalwik agipik?’
7“Yugirigya lagagimu, iren yugugu dugwit, ‘Dek. Yavup ogaruguluk, ambi yukneregetekma, unat agurik.’
“Yugugu lagagwama, ap akoen, ‘Hit ogo, an neyavup ogasagwima andoma hinim ogarilales.’
8“Yugirigya lagagirik, andien, o hup agya lagagimu, at eyavup werek akoen at ayeloman yavup kepala ako yugugu dugwit, ‘It ap yavup ogasagwi ako yanggup yugirigya dogomindik, waguselok, it hivis nunggu wagao ako onggo enendak wogirigya, eke, enendak nunggu wagao ako onggo hivis wogirigya, ogaru.’
9“Yugugu lagagimu, it mo il huruk yigiluk ogagya hegek hivis yavup ogari nunggu wagao ako, wagu lagagwama, yoparip denari ambiat wogeragagi. 10Andien, it enendak nunggu wagao akoen, ‘Nit andi, ombogat hedasogom,’ embetek wagagwa ovara, it ogo, yoparip denari ambiat wogeragagi. 11Wogirigya lagagimu, hidugu lagagwarik, enane winumuk vaga at ap eyavup werek ako yugugu dugwit, 12‘It hivis nunggu wagao yi, un horogat ogagao. Eke, nit andi, mo idup vaga yavup sat nenggetek ombok erogo ogagyo ovara, haren, “It inim wane-wane ogagao,” imbita lagindik onggo ninim wane-wane wokneregen yi, meyanat heyagyo.’
13“Yugugu lagagwama, at eyavup werek akoen ap it menda ambi yugugu dugwit, ‘Naswe wai. ‘Yavup ndugwis ambiat ogagu niniselok, onggo yoparip denari ambiat wokneraup sek aro,’ yiluk, yegep ako wane-wane ogagi atma, an weyak okhinipibuk. 14An nendawi en it hivis nunggu wagao ako, hat wokhigis wane-wane wogeragiluk imbitirikmu, hayoparip wokhigis andiat hedelok elak. 15An nadik nayoparip vaga nendawi en ogarup moga yiluk yegen yi? Eke, an enabwa en wogirigi andi vaga, hat hendawi uwa mbanggin yi?’ yiluk, yugogogi.”
16“Anderogo atma, it hivis menda ako andi, enendak arusogom, eke, enendak menda ako andi, hivis arusogom,” yiluk, yugeragagi.
Yesus en “An narusogom o,” yiluk, ambi inim yugeragagi wene
(Markus 10:32-34; Lukas 18:31-34)
17Yesus en wene andi yugirigya lagagirik, At ane welagwi menda eneyave 12 ako inim o Yerusalem lagu dugwit, enadik wonggabisiluk yugirigya dugwit, 18“Avyak wai. Nit o Yerusalem akoat lendagwi. Andoma nunggumundikmu, An Ap-At Endaklagagis ako, neyave vagarogo, it ap imam-imam enasini inim, it Ala wene vagago agarwik menda inim, woguruguselok, it ap akoen narupwak yiluk, wene yusogom. 19Wene yugu dogomundik, it ap weram Yakuri dek menda en nanggadi wakbanunggwi, nabirok nggotalogo natwis, neyave yo winik vaga lobalogo banunggwi, okbanupwak yiluk, wogerasogom. Woguruguselok, natu dogomwima, ndugwis mberen dukluk ndugwis ambi vaga Ala en niluk erogo mondok okbanisogon o,” yiluk, yugeragagi.
Yakobus Yohanes inisa en Yesus adema ambi nggino yugogogi wene
(Markus 10:35-45)
20Yugirigya lagagimu, At Sevedius aburi inisa ako eyagi inim wagu lagagwarik, avema seve yiluk, hwa akoen Yesus yugugu dugwit, “An ambi nggino yukhisogon.”
21Yugugu lagagimu, At Yesus en, “Hat hendawi embeten andi iru.”
Yugugu lagagimu, hwa akoen, “An neyagi iperen yi, hat havema bisapim andoma ambi Hat hinggis amotkan horakbagya, ambi hinggis hwarenggan horakbagya, okbisanok yiluk, yukhisiga o.”
22Yugugu lagagimu, At Yesus en, “Hit nggino yuknisagwi andi, hinunggut dugwit, nggino yuknisagwi. An nagas nudik nayogon ako andi, hit ogo ninim naup sek embetep?”
Yugirigya lagagimu, iren, “Yu. Nit ninim naup sek aro.”
23Yugugu lagagwama, Yesus en, “An nagas nudik hit naup segat ovara, neyave venak-venak bigigaup andi, Anen okbigigayogonbuk. An neyave venak-venak horakbisaup ako, Nasin en o muk erogo enogo bogogi ako adigat Aren okbisayogon o.”
24Yugeragagi ako it Yesus ane welagwi menda eneyave nin 10 akoen enaruk hunggu lagagwarik, iperen aorim-owaim ako mbereragagwa. 25Mberirugu lagagwama, At Yesus en yanggup yugeragagi ako wagu lagagwama, yugirigya dugwit, “It avakwa weram menda enasini vagenombogo agarwik andi, avakwa enavema sovabugwis, eke, it enasini ap ombok en yerogo ogarup, nderogo ogarup enane anye vaga yugurugwi, ogasagwi hinilup ovara, 26-28hit andi anderogo ogarup moga. An Ap-At Endaklagagis yi, hiren An nake ogagu dogovovok yiluk, wagatek. Ata, Anen hit henake ogagya dugwit, hit avakwa wisane An henake hambisogon vaga henonggo mbabaluk, heda visilogo bigigagiluk wagagis ako wane-wane, hit ap yi ambi ombok arup ombasagwi halok, enayelomanat arupwak. Hit ambi en, ‘An nendak ap ombok dogosogon o,’ imbita halok, at henavema dugwit, henake ogagya dogopwak,” yiluk, yugeragagi.
Ap mberen inil mbuk sek okbogogi wene
(Markus 10:46-52; Lukas 18:35-43)
29Yesus At ane welagwi menda inim o Yeriko en wulu wagu lagagwama, avakwa wisane amusek wagagwa. 30Wagusigik, ap mberen inil mbuk sup ombanma horaik dugwit, “Yesus sup yi vaga wandiga,” enaruk hunggu lagagwarik, enane ombok erogo yugu dugwit, “Nenasin wai. Hat Daut ombao yi, nenabwa hanen o,” yiluk, yugugusigik, 31it avakwa en ap ako enane mbup yupwak yiluk, mbereragagwa ovara, hegek, enane anye erogo ambi inim yugu dugwit, “Nenasin wai. Hat Daut ombao yi, nenabwa hanen o.”
32Anderogo yugwi ako At Yesus aruk hunggu lagagirik, yunggup erogo mbup yiluk, yugirigya dugwit, “An nggarogo okbigigaup yiluk, yagalagwi?”
33Yugirigya lagagimu, iren Yesus yugugu dugwit, “Ai, Nenasin. Ninil mbuk yi, sek okbininanok yiluk, yukhisagwi o.”
34Yugugu lagagwama, At Yesus en enabwa imbita lagagirik, inil ako inggis ao vakbugu hegek, inil awiya agu lagagwarik, Yesus inim wagagwa.
Atualmente Selecionado:
Matius 20: nbq2013
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
