Matius 5

Yesus naftutu tomwatar na lenran

5:1-12

(Luk. 6:20-23)

1Noak ma Yesus nsalan ma tomwatar yadin rlarat I, I nti lenran das. Ne namtoran iane ma naftutu sir. Ma Ni manglartar rma ma rakmat I a nbal. 2Ne Yesus naftutu sir monuk ma nfalak,

3“Ngamone ber tomwatar ma rdaun feti to ubnir a na Ratu sounlury mpa rtikloi ma ralele lan I,

fali keta reluk Ni tomwatar noak ma I nfarete neluk Rai.

4Ngamone ber tomwatar ma dalmir suse,

fali keta Ratu nose ma dalmir a rsenang.#Yes. 61:2

5Ngamone ber tomwatar ma to rafdas sir,

fali keta ronri berkat ma Ratu nyoding ber sir a ne.#Mzm. 37:11

6Ngamone ber tomwatar ma rmpeang desar ma rose kabain botunar rlarat Ratu Ni mpempeang,

fali keta Ratu nose nlarat safe ma sir rmpeang a ne.#Yes. 55:1-2

7Ngamone ber tomwatar ma rlompang tomwat walyetar,

fali keta Ratu nlompang sir a nbal.

8Ngamone ber tomwatar ma dalmir a ranglerap,

fali keta nait e sir rsalan Ratu.#Mzm. 24:3-4

9Ngamone ber tomwatar ma rafngamone rbali tomwatar ma rkafre,

fali keta Ratu nal sir ma neluk angkir!

10Ngamone ber tomwatar ma tomwat walyetar rsil a rbabal sir a ne fali rose rlarat Ratu Ni mpempeang,

fali keta reluk Ratu Ni tomwatar noak ma I nfarete neluk Rai.#1Ptr. 3:14

11Ngamone ber a kmi ma mkyoman suse, fali mlyarat Yakw nwayat ma tomwat walyetar rarikan a kmi, rsil a rbabal a kmi, ma rfalak kabain yatkar a na kmi.#1Ptr. 4:14

12Fali luryain e nabyar rkoman suse farane nbal. Mpa farlan tomwatar rose kmi farane, ka mimpumpuki kmi ma dalmir a rsenang, fali keta myonri berkat silai ma Ratu nau ber a kmi a na surga ne.”#2Taw. 36:16; Kis. 7:52

Tnyanuk pupule na sire ma ngaodir

5:13-16

13Yesus nfalak a nbal, “Wangur, kmi myorip a na saryamprene ye farlan sire. Mpa ka mfyatutu mir adat ngamonar ber tomwat yatkar nema bise ma rose rlarat. Iane feleles farlan sire ma rpaki la raftelas tnyamar. Farlan kmi to myose farane, kmi feleles farlan sire ma mamal. Ma sire ma mamal a ne to bise ma raftelas a rbali. Iane nwayat ma sire ne to ubany lo, mpa keta ryebas ma ratai motak i.#Mrk. 9:50; Luk. 14:34-35

14Kmi ka mfyatutu dalamten ngamone ber tomwatar nema bise ma rbali sir ber Ratu. Iane feleles farlan kmi myeluk ngaodir ber tomwatar na saryamprene. Kmi myodir saryamprene ye myor kabain ngamonar ma kmi myose ne. Iane feleles farlan tomwatar rsalan kotar sa ma namin bubuar das, ma ni snyain idak resi, nwayat ma to bise ma ramudim i.#Yoh. 8:12; 9:5 15Tomwatar to rtutun damar betno ral ngusi la rsungap, nempa ka rtikloi damar a ne na impan nema idak tomwatar monuk na das dalam a ne.#Mrk. 4:21; Luk. 8:16; 11:33 16Feleles farlan kmi a nbal. Ka kmi myeluk ngaodir ber tomwat walyetar myor kabain ngamonar ma kmi myose ne. Kmi myose farane nema tomwatar rsalan kabain ngamonar ma myose ne, ma keta rdangin Amir ma namin surga.”#1Ptr. 2:12

Yesus naftutu tomwatar na tetetkar ma luryain e Ratu nal ber Musa

5:17-20

(Luk. 6:27-36)

17Yesus nfalak a nbal, “Wangur, ka kete mdyaun feti Yakw kmwa ma kwes kalin tetetkar ma luryain e, Ratu nal ber Musa ma nabyar nir anftutwar. Yakw kmwa e, to feti kwes kalin tetetkar a ne nempa la kufdiat safe ma rarengi na tetetkar ma nabyar nir kitpar. 18Ka mdyengar fen ngamone safe ma kfwalak ye: Ni botuan e, safe-safe ma rarengi na tetetkar ma luryain e Ratu nal ber Musa ne ka rafdiat sir a fuky. Noak ma langit ma saryamprene to ramwer a fuky e, keta to huruf fen lese nre titik fen lese nbal ma nlai nof Musa ni tetetkar.#Luk. 16:17 19Iane nwayat ma ka kete tomwate fen lese nbal ma nlangas tetetkar sa nof tetetkar a ne, boloka nrase feti tetetkar a ne to ubany. Ma ka kete naftutu tomwat walyetar ma rlangas tetetkar a ne. Farlan i nose farane keta i neluk tomwate ma to ubany desar nof Ratu Ni tomwatar monuk. Nempa tomwate ma nose nlarat tetetkar a ne ma naftutu tomwat walyetar ma rose rlarat tetetkar a ne nbal, keta i neluk tomwate ma ubany desar nof Ratu Ni tomwatar monuk. 20Mpa wangur, mdyengar fen ngamone safe ma kfwalak! Ka mireke desar ma myorip e myose mlyarat Ratu Ni mpempeang nlengan nof mangaftutu Musa ni faretar ma tomwat Farisyar. Fali farlan kmi to myose farane keta to myeluk Ratu Ni tomwatar noak ma I nfarete kmi neluk Rai.”

Yesus naftutu tomwatar nema ka kete rkafre

5:21-26

21Yesus nfalak a nbal, “Kmi mifai lo feti luryain e Ratu nal Ni tetetkar ber empmir-nusmir farye: ‘Ka kete mifen. Ise ma nafen ka rukun i.’#Kel. 20:13; Ul. 5:17 22Nempa Yakw kfwalak ber a kmi, ise ma narese wainy ma nalele Yakw keta Ratu nukun i. Ma ise ma narikan wainy, keta ror i far mangtetak agame ma rtetak ni ngrie na iano. Ma ise ma nfalak ber wainy a nbal feti nmod, ka ryebas i far au ma nfolur dedesar na neraka.

23Mpa kfwalak ber a kmi, nof a kmi ye tomwatar sa nose ma nloik ni snyompe ber Ratu. Nempa noak ma nose ma ntun ni snyompe ne na snyompe ain, ma nanremi feti i nose ma tomwatar sa dalamy maninik i, 24ka nau ni snyompe na snyompe ain a ne, ma nti nakmat tomwate ne ma nangamon nor i a fuky. I nose monuk farane betno nbali i ma nloik ni snyompe ber Ratu.

25Farlan tomwatar sa nose ma nmangadu kmi ber mangtetak, ka mireke ma mingamon myor i noak ma to nonry ngrie ne ber mangtetak a fuky. Fali farlan to myose farane, tomwate ne keta nor a kmi ber mangtetak, ma i keta nluan ni suldadwar ma rnau kmi a na sel. 26Yakw kfwalak ber a kmi, ni botuan e keta to bise ma mbyie sel a ne, terik ma mbyaras monuk mir utngar a ne.”

Yesus naftutu tomwatar ma kete ranronr

5:27-30

27Yesus nfalak a nbal, “Kmi mifai lo na tetetkar ma nfalak feti ‘Ka kete minronr.’#Kel. 20:14; Ul. 5:18 28Nempa Yakw kfwalak ber a kmi, farlan merwanar sa, nsalan motak batar sa ma nmpeang ma narwa nor i, iane feti merwane ne nanronr nor bate ne na dalamy lo. 29Mpa farlan matmir balisyae nose ma myose sale, ka myakil kalin ma myebas. Fali ni ngafele e matmir balisyae to namin, nlengan nof ma matmir du a ramin nempa ryebas a kmi far neraka.#Mat. 18:9; Mrk. 9:43 30Ma farlan limir balisyae nose ma myose sale, ka mtyukar kalin ma myebas. Fali ni ngafele e limir balisyae to namin nlengan nof ma limir du a ramin nempa ryebas a kmi far neraka.”#Mat. 18:8; Mrk. 9:43

Yesus naftutu mangafsawar ma kete rayebas sir

5:31-32

31Yesus nfalak a nbal, “Tetetkar sa nbal nfalak farye, ‘merwan mangafsawar sa ma nose ma nyebas sawany, ka i nal surat talak ber sawany a ne.’#Ul. 24:1-4; Mat. 19:7; Mrk. 10:4 32Yakw kfwalak ber a kmi: Merwane ma nafsau lo to bise ma nyebas sawany. Nempa farlan sawany nanronr betno i bise ma nyebas sawany a ne. Ma farlan sawany to nanronr nempa merwane nyebas i, iane feti nose ma sawany a ne nanronr, fali keta sawany a ne nafsau nor merwan walyete nbal. Ma merwane ma nafsau nor bate ma sawany nyebas i a ne lo, merwane ne nanronr a nbal.”#Mat. 19:9; Mrk. 10:11-12; Luk. 16:18; 1Kor. 7:10-11

Yesus naftutu tomwatar ma kete rlangas safe ma rsompe ber Ratu ne lo

5:33-37

33Yesus nfalak a nbal, “Kmi mifai lo na tetetkar ma nfalak feti, ‘Ka kete mlyangas safe ma msyompe ber Ratu ne lo. Nempa ka myose mlyarat safe-safe monuk ma myoding ber Ratu ne.’#Im. 19:12; Bil. 30:2; Ul. 23:21 34-35Nempa Yakw kfwalak ber a kmi, ka kete desar ma msyompe ma mlyang langit nre saryamprene. Fali langit a ne Ratu Ni matoran ain ma saryamprene ne ain ma Ratu nau emnir a na. Ma ka kete mlyang Yerusalem, fali iane ain ma Ray Silai namin.#Yak. 5:12; Yes. 66:1; Mat. 23:22; Mzm. 48:3 36Ma farlan msyompe e, ka kete mlyang ulmir a nbal, fali kmi to bise myose ma ulmir bukrir fen lese nbal ma rangfuty nre ramemetam. 37Mpa farlan botuan e ka mfyalak feti, au botuan. Ma farlan tate, ka mfyalak feti, tate. Fali farlan mfyalak kabain walyetar myof a ne, iane nof smwangat yatkar nir ulun.”

Yesus naftutu tomwatar ma ka kete rbalas yatak ber tomwatar ma rose yatak sir a ne

5:38-42

(Luk. 6:29-30)

38Yesus nfalak a nbal, “Kmi mifai lo feti na tetetkar ma nfalak feti, ‘Farlan tomwatar rose ma tomwat walyetar sa matany nre nifany a nbie, mpe ka ralin kalin matany ma nifany a ne nbal.’#Kel. 21:24; Im. 24:20; Ul. 19:21 39Nempa kfwalak ber a kmi, ka kete mbyalas yatak ber tomwatar ma rose yatak a kmi a ne. Farlan tomwatar rtef totokmir balisyae, ka myinrang ma rtef totokmir balisyae nbal. 40Ma farlan tomwatar rose ma rmangadu kmi ber mangtetak fali rmpeang ma ronri mir rabtyar, ka myal mir rabit melaswar ber sir a nbal. 41Ma farlan tomwatar sa nribut a kmi ma mibare ni kabanir doan kilo lese, ka mibare kabanir a ne doan kilwar du. 42Farlan tomwatar rtak kabanir sa nof a kmi e ka myal ber sir. Ma farlan tomwatar rpinjam kabanir sa nof a kmi, ka kete dalmir a rayatak ber sir.”

Ka mkyamis mir muswar

5:43-48

(Luk. 6:27-28; 6:32-36)

43Yesus nfalak a nbal, “Kmi mifai lo na tetetkar ma nfalak feti, ‘Ka mkyamis tomwat walyetar, ma mkyedan mir muswar.’#Im. 19:18 44Nempa Yakw kfwalak ber a kmi, ka mkyamis mir muswar, ma msyampayang ber Ratu ma nberkat tomwatar ma rsiksa kmi a ne. 45Farlan myose farane keta tomwatar rfalak feti Ratu angkir ber a kmi. Fali Ratu Ni dalamy ngamone ber tomwatar monuk. I nose lere ma snyain idak tomwat ngamonar ma tomwat yatkar. Ma ntolar udan ber tomwatar ma rmorip e ramlonry ma tomwatar ma rmorip e to ramlonry a nbal. 46Mpa farlan kmi mkyamis lan tomwatar ma rkamis a kmi, keta Ratu to nal sewe ber a kmi. Fali mangtak ulbatyar ma rayatak a ne biase rkamis tomwatar ma rkamis sir a ne nbal. 47Ma farlan kmi myalang lan tbwarmir, kete mdyaun feti safe ma myose ne nangafel a nlengan nof tomwat walyetar. Fali tomwatar ma to rafai Ratu ne, ralang lan tbwarnir a nbal. 48Iane nwayat ma ka myorip e, myose mlyarat Ratu Ni dalamy ngamone ma nfatutu ber tomwatar monuk a ne. Kmi myorip farane iane ma diat na Ratu sounlury.” #Im. 19:2; Ul. 18:13

Atualmente Selecionado:

Matius 5: YMD

Destaque

Copiar