Jenesis 26
26
Isac bosok liurai Abimelek kona ba nia kaben
1Iha tempu ida, rai hamlaha boot, hanesan rai hamlaha iha Abraão nia tempu. Nee duni, Isac baa husu lisensa ba Abimelek, ema Filistin sira nia liurai, atu nia hela iha aldeia Gerar. 2Nia halo nunee, tanba NAI Maromak hatudu Aan ona ba nia, dehan, “O la bele baa iha Ejitu. O ba hela iha rai nebee Hau sei hatudu ba o. 3-4Se o hela iha rai nee, Hau sei hamutuk ho o, i foo bensaun oi-oin ba o. Hau sei amenta o nia jerasaun halo barak teb-tebes, hanesan fitun iha loro leten. I Hau mos sei foo ba o ho o nia jerasaun sira rai nee hotu. Liu hosi o nia jerasaun, nasaun hotu-hotu iha mundu sei hetan bensaun. Nunee Hau kumpri ona Hau nia promesa ho o nia aman Abraão.#Apostolu sira nia Istoria 3:25; Galasia 3:8 5Hau halo buat sira nee hotu, tanba o nia aman halo tuir ona Hau nia liafuan, tuir ona Hau nia orden no Hau nia lei.” 6Nunee Isac hela lai iha Gerar.
7Rebeca nee oin kapaas teb-tebes. Bainhira ema iha fatin nee haree nia, sira husu kona ba nia. Maibee Isac hataan, “Rebeca hau nia alin.” Nia tauk se nia dehan, nia kaben, ema bele oho tiha nia, hodi hadau tiha Rebeca. 8Isac hela kleur ona iha nebaa, iha loron ida liurai Abimelek hateke hosi janela, nia haree Isac ho Rebeca hakuak malu no rei malu hela. 9Entaun nia haruka ema baa bolu Isac mai. Nia hatete, “Hau hatene loloos tiha ona katak feto nee o nia kaben. Nusaa mak o dehan fali, nia nee o nia alin?”
Isac hataan, “Amu liurai! Hau tauk, se hau dehan nia hau nia kaben, keta halo be ema oho tiha hau.”
10Liurai hataan, “Se ema ruma iha nee mak toba hamutuk ho o nia kaben karik, o bele foo sala mai ami. Nusaa mak o halo fali nunee mai ami?”
11I liurai Abimelek hatete ba nia povu tomak dehan, “Imi hotu rona didiak! See mak brani book ema nee ka nia kaben, hau kastigu mate nia.”
Ema Filistin istori malu ho Isac kona ba bee posu
12Iha tempu nee, Isac halo toos. I nia hetan rezultadu dala atus ida, tanba NAI Maromak foo bensaun ba nia. 13Nia riku amenta barak ba bebeik, too nia sai riku boot. 14Nia karau, bibi ho bibi malae amenta barak, i nia ema mos barak. Too ema Filistin sira laran moras nia.
15Uluk, Isac nia aman Abraão sira kee bee posu barak. Maibee agora ema Filistin sira enxe tiha bee posu sira nee hotu ho rai.
16I liurai Abimelek hatete ba Isac dehan, “Diak liu o husik tiha rai nee ona. Tan o iha ona poder liu ami.”
17Nunee Isac sai hosi fatin nee, i baa hela iha rai tetuk Gerar. 18Tuir mai, nia kee fila fali bee posu sira nebee ema enxe tiha ho rai. I nia foo naran ba bee posu sira nee, tuir naran nebee mak nia aman tau ona.
19Isac nia ema sira kee bee posu ida iha rai tetuk Gerar nee, kona loos iha bee matan ida, too bee fakar sai mai. 20Maibee bibi atan Gerar sira istori malu ho Isac nia bibi atan sira, tanba bee nee. Sira dehan, “Nee ami nia bee!” Nee mak Isac tau posu nee naran Esek, nee dehan katak ‘istori malu’.
21Depois Isac nia ema sira kee tan posu ida. Maibee sira diskuti malu fali, tanba bee posu nee. Nee mak Isac tau bee posu nee naran Sitna, nee dehan katak ‘diskuti malu’.
22Tuir mai, nia husik tiha fatin nee, baa kee fali iha fatin seluk. Iha bee posu nee sira la istori malu ona. Nee mak Isac tau bee posu nee naran Reobote, nee dehan katak ‘fatin luan’. I nia hatete, “Agora Maromak foo ona rai luan mai ita. Iha nee, ita foin bele aumenta barak.”
23Hosi fatin nee, Isac sira sai baa hela iha rai Berseba. 24Iha kalan nee, NAI Maromak hatudu Aan ba nia, hodi dehan, “Isac! Hau nee o nia aman Abraão nia Maromak. O keta tauk, tanba Hau mak kuidadu o. Hau sei foo bensaun ba o, i o nia jerasaun sei aumenta barak. Hau halo nunee, tanba Hau nia promesa ho o nia aman.”
25Depois Isac hada fatuk halo altar ida iha fatin nee, hodi agradese ba NAI Maromak. Nia hela iha fatin nee, i nia ema sira mos kee tan bee posu ida.
Isac ho Abimelek halo akordu
26Iha tempu nee, liurai Abimelek mai hosi Gerar hamutuk ho nia belun Auzate, ho nia komandante funu Fikól, atu hasoru Isac. 27Isac husu, “Amu liurai! Uluk, ita boot sira haruka ami sai tiha ona. Agora, imi mai halo saida tan?”
28I sira hataan, “Agora ami hatene ona katak Nai Maromak hamutuk ho senhor. Tanba nee, ami hanoin, diak liu ita halo akordu ida hodi jura dehan, 29imi sei la halo aat mai ami, nunee ami mos la halo aat ba imi. Ami halo diak duni ba imi, nee mak uluk imi sai ho dame hosi ami nia rain. Agora ami hatene, NAI Maromak foo bensaun ba imi.”
30Tuir mai, Isac halo festa ba sira, i sira hotu haan-hemu rame-rame. 31Iha aban dadeer-saan fali, sira halo juramentu. Depois Isac husik sira baa ho dame.
32Iha loron nee duni, Isac nia ema sira mai foo hatene ba nia, dehan, “Senhor! Ami kee ona bee posu, hetan ona bee.” 33Tuir mai, Isac foo naran ba bee posu nee Seba, nee dehan katak ‘juramentu’.#26:33:Iha lian Ebreu, Seba dehan katak ‘juramentu’ ka ‘hitu’ ka ‘destinu diak’. Ber dehan katak ‘posu’. Depois ema bolu sidade nee Berseba, too agora. I Isac foo naran ba bee posu nee Seba, nee dehan katak ‘juramentu’. Nunee ema bolu sidade nee Berseba, too agora.
Esaú kaben ho feto nain rua hosi suku seluk
34Bainhira Esaú tinan 40, nia kaben ho feto nain rua hosi suku Ete. Ida mak Beeri nia oan, naran Judite, i ida tan Elon nia oan, naran Bazemat. 35Feto nain rua nee halo Isac ho Rebeca laran susar.
Atualmente Selecionado:
Jenesis 26: BTDT
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
© 2024 Wycliffe Timor-Leste.
