MARKUS 6

Ɓaa bisi Yeso a ur usu Nazarat

1Ndiira maaso wa, Yeso yǝ lee hansǝsǝ yǝ kang a ur usu, emfǝɗkaa ɓǝsa ɓǝ ko ke ma sase. 2Kaa nwiiya Yahudawa tomsǝ wa, pa yǝ ntii fǝɗkǝ ɓeta wa, a hit kwau Yahudawa ɓa. Ɓeta dem ɓaa kurasǝsǝ ɓa, ɓǝ tom mbu weɗara ɓa, ɓǝn nkee me,

“Eɗ ɗa yǝ taa mbu ɓa nau? Ən nkaamǝra maa mbuka mbi ɓaa nasǝsǝ maasou, yǝn nkaasǝ yǝ tom mbu nhiinyanhiinya ɓau? 3U nwa sem an ankwaakǝ mbusa siya rau? Sem maasi ǝn yarsǝsǝ me Maryamu ya rau?, ɗǝm ɓaata ɓisa ǝn Yakubu ma Yusufu Ma Yahuda ɗǝm ma Siman ya rau? Sem ɓaata ɓisa mboona ndǝsǝ ke ma ɓosa a han ɓa wa rau?” Pa ɓǝ ɗaa dem.

4Pa Yeso yǝɓǝ nkee me, “An nawanto ya, yǝma mbarta hana na, pa sem a ur usu, ma haato usu ra” 5Yeso yǝ nkaa yǝ tom mbu nhiinyanhiinya ɓa kǝnso ra, ndub ɓeta ngeek ɓaa sem kwakwa ra ɓa, u yǝ tii ɓǝsǝ neme ɓǝ roɓ ɓa. 6Pa tomsǝ mbu nhiinyanhiinya ɓa, me ɓǝ na ɓongtǝra ra.

Yeso yǝ timi emfǝɗkaa ɓǝsa

Pa Yeso yǝ ɓaɗ a ura ngeek ngeek sa ya fǝɗkǝra. 7Pa yǝ yar ɓaa pu nhaa raɓ sǝɓa, yǝ ɓǝ timi raɓ raɓ, yǝ ɓǝ na kwangto a ɗuura wis kwalakwala wa.

8Yǝ na ɓǝ wanto me, “Sǝ kong too mbuka a nema a siko waaso ra, hana mbuseya, hana ɓukra, hana koɓa a siɓa waaso ra, pa kwalango maɗ kǝsa ma wa. 9Sǝ tung taa, pa sǝ kong too lukta raɓ ra. 10Nsaad ɗur sǝ kansǝ wa, sǝ kaɗ kǝnso, ndub fer kǝsaa lee ur siso wa. 11Nsaad han ɓaa konsǝ ra ɓa, hana ɓǝ mbisi kura mbu sǝn nkeesǝ ɓa, me kǝsǝ nii, sǝ haatǝ tula a natsa sǝsa, me a tom mbu maa a ɓoni.”

12Maso ɓǝ nii, ɓǝn nkee mara kwalari Kaa ra me ɓeta ɓǝ kong nfaata. 13Ɓǝ hik nsaamse dem ɓǝ punk yaro ɓaa sem kwakwa ra ɓa dem, ɓǝ roɓo.

Woɗa Yohannan an tom Baptisma ya

14Pa kuɓu Hiridus yǝ kura mara, me ɗǝnda Yeso ra kanan hana naa. Ɓaata ɓǝn nkee me, “Ən Yohanna an tom Baptisma ya ɓaa niksǝ a tiinan, ndǝ siso kwaasǝ yǝsǝ ma kwangto tom mbu nhiinyanhiinya ɓa wa, a sanii.”

15Pa ɓaata ɓoso ɓǝn nkee me, “Ən An nawanta ya Iliya.”

Ɓaata ɗǝm ɓǝn nkee me, “Awo, ǝn an nawanto keke ɓol a ɗaaso ɓan na wanto tangtang ɓa.”

16Pa Hiridus yǝ kurasǝ wa, pa yǝ nkee me, “Yohanna nǝ nǝngsǝ ɗuura yǝ nii sase a tina!”

17Me ka tangtang Hiridus ma nkweera ira, yǝ ti ɓaa ma Yohanna yaa kaan, yaa tii a hit neu ɓeta wan. Hiridus yǝ tom maaso me Hirudiya toone eɗ isi ya Filibus, u sase Hiridus yǝ konsǝ wa. 18Me Yohanna ka yǝ pǝta nkee Hiridus wan me, “Pam me ngǝ kon toone eɗ ɗange ya ra,” 19Mara sǝra ti Hirudiya yǝn nfee Yohanna a kuɗa, yǝn kǝr ɗǝɗa kama kiya toɗ Yohanna ra yǝ taa ra, 20me Hiridus yǝn kura kokto Yohanna wa. Yǝ maan me yǝ yaa ma ɓongtǝra ya, yaa ɗekɗek ya, siso kwaasǝ Hiridus yǝ maasǝ Yohanna yaɓ wa. Senta ita ǝn nii me Yohanna yǝn nkeesǝ mara, hana maaso yǝn yau yǝ kura mara Yohanna ra.

21A peɗe peɗe yǝ taa ɗǝɗa. A kaa haa Hiridus ɓa, yǝ yar hira me wiina ɓǝsa tinima ɓa ma ɓa kwang kwang a nsosame ɓa ma wiina a put Galili ɓa. 22Pa au Hirudiya ya toone yǝ wo yǝ hirhira, a tǝǝ Hiridus ma sik ɓisa pin.

Pa kuɓu yǝ nkee autoone kaya me, “Ngǝ nǝ taa nsaad mbu ngǝn taasǝ ɓa, ɗǝm kǝ nǝ ngǝ na.” 23Kuɓu yǝ kuu autoone kaya yaa nkee me, Nsaad mbu ngǝ taasǝ ɓa kǝnǝ ngǝ na hana ɓaakǝra kuɓsutu nwaano ra.

24Pa yǝ fiɗ yǝ taa maasi me, “Kǝnǝ kǝna mbiu?”

Maasi yaa nkee me, “Duura Yohanna an tom Baptisma ya ra.”

25Nok kǝnso autoone kaya, yǝ mon yǝ kanga a kuɓu ni ma kǝnara, yǝ nkee me, “Nǝn yau me ngǝnǝ na ɗuura Yohanna an tom Baptisma ya waso a taalo wa.”

26Pa kuɓu yǝ kura kuɗa tebteb ra dem, pa me ka yǝ wee kuuwo nǝn, ɗǝm ma waa ɓǝsǝ ke ma sase ɓa, pa yǝ yau me yaa ɓisi ra. 27Pa nok kǝnso yǝ timi nsosa me koya wo ma ɗuura Yohanna ra. Nsosa kawa yǝ ko koyǝ ndǝm ɗuura Yohanna ra a han neu ɓeta ɓa, 28pa yaa wo ma ɗuura kara a taalo, yǝ na autoone kaya, pa autoone kaya yǝ na maasi. 29Emfǝɗkaa Yohanna ɓa, ɓǝ kurasǝ wa, ɓǝ wo ɓǝ too maabiri isi, ɓǝ hoko.

Yeso yǝ nkwee ɓeta pusa pu puu wonon

30Pa tomsǝ wa ɓahona u Yeso yǝ timi ɓǝsǝ wa ɓǝ kang a sani, ɓaa nkee nsaad mbu ɓǝ tomsǝ ɓa, ma mbu ɓǝ fǝɗkǝsǝ ɓa. 31Pa ɓeta dem ɓaa ko ma wo ɓohona ɓǝ taa ɗǝɗa me ɓǝ se mbuseya ra, pa yǝ ɓǝ nkee me, “Sau ndǝ ko a han ɓeta semra ɓa me sǝ nwii.”

32Pa ɓǝ kana kurnyaamo ɓǝ ko a han ɓeta semra ɓa, ǝn ɓosa seɗe. 33Pa ɓǝn leesǝ hansǝsǝ wa, ɓeta dem ɓǝ wǝrǝ ɓǝ maa meen ɓosa, ɓǝ ntii moone a kira seno ra ma nata a ura ɓol ɓol ɓǝ fiɗsǝ wa ɓǝ nkaa kano. 34Pa Yeso yǝ hamsǝ wa, yǝ wǝr ɓeta kwausǝ dem, pa yǝ kura nyorataara ɓora, me yǝn wǝr ɓǝ nga tǝmnkaa an wanda semra ya. Pa yǝ ɓǝ ntii fǝɗkǝ mbusa wa ɓol ɓol.

35Kwang kaa kǝ kana pa emfǝɗkaa ɓǝsa ɓǝ wo a sani ɓaa nkee me, “Han ɓa ɓeta sem ra, ɗǝm kaa ǝn kankana. 36A ti pamo ɓet ɓa, me ɓǝ ko a ura sa ko ɓǝ kǝr mbuseya nkweere ɓose ɓǝ tiri.”

37Pa Yeso yǝɓǝ kak yǝ nkee me, “Saase sǝɓǝ na mbu ɓǝkaa se ɓa.” Pa ɓaa nkee me, “Ma tǝ haa koɓa ka puu antinima ya tuka pusa pu puu raɓ tǝ ɓǝn tiri mbuseya ɓǝ seu?”

38Yǝ ɓǝ nkee me, “Nkaadǝng mininiu sǝsǝ wau? So kosǝ sengge.”

Ɓǝ sengge sǝ wa, ɓǝ nkee me, “Nkaadǝng wonon ma nseeya raɓ.”

39Pa Yeso ya tii emfǝɗkaa ɓǝsa me ɓǝ nkee ɓeta ɓǝ kaɗ handa handa a pitira kiyo ra. 40Pa ɓǝ kaɗ handa handa ɓaata pusa pu pusa pu ɓaata pa wonon pa wonon. 41Yǝ tosǝ nkaadǝng wonon suwa ma nseeya raɓ sǝɓa. Pa yǝ nik ɗuura ɓoti yǝ na himara Kaa, ya ɓaa yǝ na emfǝɗkaa ɓǝsa ɓǝn kosǝ ɓeta. Ya ɓaa ɓeta nsaad nseeya raɓ sǝɓa. 42Nsaad ɓeta ɓǝ kǝu ɓǝ nkwee, 43ɗǝm emfǝɗkaa ɓǝ kwau nyǝwǝrta nkaadǝng ma nsenya pesǝ wa, a kung hote pu nhaa raɓ. 44Ɓet ɓǝ se sǝ mbuse sǝsǝ ɓa parata pusa pu pu wonon.

Yeso yǝ siki a mbraa ɓoti

45Pa Yeso yǝ ti emfǝɗkaa ɓisa nok ɓǝ kan a kurnyaamo, me ɓaa nkaa talo ɓǝ ko Betsaida, me usu kiya ti pamra ɓeta nhe. 46Ndiira yǝ ti ɓǝsǝ pamra wa, pa yǝ taa a yolo me ko yǝ tom kǝnara.

47Pa ɗikira a kana, kurnyaamo kawa ya ɗaaso aulaara wa, Yeso ɗǝm yaa han kira ɓa yǝ fin mbusa. 48Yǝ wǝrsǝ ɓǝn kweetǝ ma nyaawa me yoro ǝn tǝngsǝ. A pǝrta karfe taatǝn, pa yǝ ko a ɓoni, yǝn sikinsiki a ɗuura aulaara ra. Pa yǝ tom ngaa kiyǝ ɓǝ talǝ, 49pa ɓǝ wǝrsǝsǝ yǝn sikinsiki a ɗuura mbraa aulaara wa, pa ɓǝ wǝr nga yǝn simo, ɓǝ yauli, 50me ɓǝ nsaad ɓǝ wǝrsǝn ɓǝ maɗki.

Nok kǝnso yǝ ɓǝ nkee me, “Sǝ taarǝ ra, ǝn niina, sǝ kura kokto ra!” 51Pa yǝ kansǝ a kurnyaamo kawa ma ɓosa wa, pa yoro kawa yǝ nǝɗǝ. Pa nhiinyanhiinya to ɓǝ ma dem, 52me ɓǝ maa mbu nhiinyanhiinya yǝ nasǝ mbuseya ɓeta pusa pu woon suwa ra, mee kuɗa ɓora ma mbu yǝn sensǝn sen ɓa ra.

Yeso yǝ roɓ ɓaa sem kwakwa ra ɓa Janisarat

53Pa ɓǝ talsǝ aulaara wa, pa ɓǝ talsǝ wa, ɓǝ kan a put Janisarat wa, ɓǝ kaa kurnyaamo kawa a kira aulaara ra. 54Pa nok kǝnso ɓǝ fiɗsǝ a kurnyaamo a mbraa wa, ɓeta ɓǝ maa me ǝn Yeso. 55Ɓǝ ɓat a ur siso nsaad ɓǝn haa ɓa sem kwakwa ra ɓa, a ɗikra ɓa ko a han ɓǝ kurasǝ me yǝsǝ ɓa. 56Nsaad han yǝ kosǝ ɓa, hana kuɓ kwang uru ya, hana ur ngeek wa, hana a talte ɓǝn ti ɓaa sem kwakwa ra ɓa, a ee lumu ya. Ɓaa kǝna me yǝɓǝ ɓǝ lee ɓǝ ntee hana kal laulauwara usu maɗ, ɗǝm nsaad ɓaa ɓǝ nteesǝsǝ ɓa, ɓǝ roɓɓon.

Atualmente Selecionado:

MARKUS 6: LLA

Destaque

Copiar