Mattayo 3
3
1Leka pa magono gagalagala ahicha Yohana Wakubatisa, 2kuwandisa pa mapululu ga Yudaya, kujowa, Mupelaye; pakuya utwa wa kunani uwandamila. 3Pakuya uyu yuyu ajoweka nu Isaya wakulweta, kujowa,
Njowelo ya wakukwesa mu mapululu,
Muwikilengani ndila ya Bambo,
Mugolosaye barabara yake.
4Leka Yohana mwene akayili ni kyakufwata kyake kya lwagi lwa ngamila, nu lukoto lwa kikumba mu kiwuno mwake; na kyakulya kyake kikayili mapalasi ni uchi wa ku dasi. 5Bahalapala wakapiti mwanja kwa yombe Yerusalem ni Yudaya poha, ni ndima woha wakusyungutila pa Yordan; 6leka wakabatasiki nuyombe mu nkuka Yordan, kufumbula sambi syawe. 7Leka yombe pakaweni wingi wa waFarisayo na waSadukayo niwahicha ku ubatiso wake, akawajowili, Mwenga fihogosi fya mamoma, nani akawakiliti mwenga kukimbila pa kudada kula kuyii mu kuyicha? 8Mumu mupambike fipambiko fyakulinganila kupela: 9leka musihola kujowa mugati mwinu, Dadi tiyii nako Ibrahimu; pakuya niwajowela kukita pa maganga aga Mulungu ahotola kunjimakila Ibrahimu wana. 10Leka hino apa liwago liwikiki pa mikiga ya mabihi: mumu libihi liyi lyoha lyangapambika fyakunoga lidumulika, ni kutagika pa mwoto. 11Nenga nani niwabatisa pa machi kwa kupela: koma uyu yuayicha panyuma pa nenga ayii mwene makakala kulutila nenga, nukulinganila lepa nenga kunyanyamula sapato syake: yombe yawabatise nu Roho Mbalafu nu mwoto: 12kyakupepetela kyake kiyii pa kiwoko kyake, na yaguyule luwuga lwake; leka yawunganise ngano yake pa kikokoli kyake, koma masasa yagakunge mwoto wangali kusimisika.
13Bahalapala Yesu ahicha kuhuma pa Galilaya ku Yordan kwa Yohana kubatasika nuyombe. 14Koma Yohana akalonditi kundakalila kujowa, Nenga nilinganila kubatasika nu wenga, nu wenga uhicha kwa nenga? 15Leka Yesu pakahigiti akanjowili, Uyitakile hino: pakuya wiwila kutilinganila kumemesa ugolofu woha. Bahapa akanjitakili. 16Leka Yesu, pakabatasiki, hino apa akakweliti kuhuma pa machi: na lolaye, kunani kukadinduliki pa yombe, na akaweni Roho wa Mulungu kuselela ngati njiwa, ni kumhichila yombe; 17na lolaye, njowelo kuhumila kunani kujowa, Uyu yuyu Mwanangu wakuganika, pa yombe nigana nyamhope.
Atualmente Selecionado:
Mattayo 3: MGS1937
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
First published by the British and Foreign Bible Society in 1937.
