Mǒhtûlû̌hǎhtûsa 1
1
Ta̤bô̌lò̤
1Bǎ Cǒmaradû̌ bô̌lò̤ ta̤ dǒ asakhû̌lû̌ nukha a bô̌lò̤ mǒkhû̌ kû̌ hǎkhû̌.#Yṳ̂ha 1:1-2; Hebrǔ 1:10 2Bǎ a bô̌lò̤sakhû̌lû̌ akhanu, hǎkhû̌ ayǎ̤yô̤yǎ̤gî̌nu alò̤tôlò̤bǎ tôcǒ tô̤̌, a ô̌ tòmòkhû̌ pepwǎ. Dǒ shidû̌shitewe̤ akhû̌nu akhǐsiwi̤ pepwǎ. Dě Cǒmara ayôla plò̌shǐ cû̌le̤cû̌ge dǒ shikhû̌.
3Htodě Cǒmaradû̌ hî̌ kû̌, “Ta̤lî ô̌htûhtò̌ mò̌,” dě ta̤lî ô̌htò̌.#Kôritu ginǐ̤bǎ tôbǎ 4:6 4Cǒmaradû̌ kè̌shǐ kû̌ ta̤lî nî̌ awô̌ dě asǎphlǒmô̤ mî̌ca, dě a bè̌khô̌kè ta̤lî kû̌ ta̤khǐ. 5Ta̤lî nî̌ Cǒmaradû̌ kaǎ ami̤ kû̌ lṳmṳ̌lî, dě ta̤khǐnu a kaǎ ami̤ kû̌ lṳmṳ̌khǐ. Lṳmṳ̌khǐ htodě lṳ̌mṳ̌lî hè, dě a behtò̌ tôni̤, dě khò̌tôni̤ mî̌ awǐlǒ tôni̤ hǒ.
6Dě Cǒmaradû̌ hî̌pô̤ kû̌, “Mǒshò̌lǎ̤ ô̌htûhtò̌ mò̌ dǒ shiginǐ̤khô aplǎkû, dě bè̌ khô̌kè shi dǒ mǒlǎ̤ kû̌ shi dǒ hǎkhû̌nu.”#Petarǔ ginǐ̤bǎ tôbǎ 3:5 7Pô̤̌nudě Cǒmaradû̌ bô̌lò̤ mǒshò̌lǎ̤, dě a bè̌ khô̌kè shi ô̌ dǒ mǒshò̌lǎ̤khû̌nu kû̌ shi ô̌ dǒ hǎkhû̌nu tokhlǒ. Dě a htûhtò̌ bò pô̤̌ a hî̌nu. 8Dě mǒshò̌lǎ̤ nî̌ Cǒmaradû̌ kaǎ ami̤ kû̌ mǒlǎ̤. Lṳmṳ̌khǐ htodě lṳ̌mṳ̌lî hè, dě a behtò̌ tôni̤, dě hǒnutôni̤ mî̌ ginǐ̤ni̤ tini̤.
9Dě Cǒmaradû̌ hî̌ kû̌, “Shi dǒ mǒlǎ̤ nutokhlǒ cû̌ô̌plǒ khô̌kè tôkû htodě hǎsûkhû̌ ô̌lṳ̌htò̌ mò̌,” dě a htûhtò̌ bò pô̤̌ a hî̌nu. 10Cǒmaradû̌ kaǎ hǎsûkhû̌nu ami̤ kû̌ hǎkhû̌, dě a kaǎ shi dǒ a cû̌ô̌plǒ khô̌lû̌û tôkû ami̤ kû̌ shidû̌shite̤we̤, dě Cǒmaradû̌ kè̌shǐ ata̤ma̤nu kû̌ awô̌ dě asǎphlǒmô̤ mî̌ca. 11Cǒmaradû̌ hî̌ pô̤̌ kû̌, “Sǒdosǒlǎ pṳ̂̌tocǒ dô̌htò̌phôhtò̌ bò mò̌. Sǒsusǒsǎ pṳ̂̌tocǒ phôhtò̌sǎhtò̌ bò mò̌, sǒmṳ̌wû̌bô lǒ̤bò sî, dô̌htò̌phôhtò̌ bò mò̌ bǎ hǎkhû̌nu pô̤̌ akhli kû̌ akhli lǎ̤klô sǎhtò̌ nunî̌,” dě a htûhtò̌ bò pô̤̌ a hî̌nu.#Hebrǔ 6:4 12Dě hǎkhû̌ dǐ sǎhtò̌phôhtò̌ bǎ sǒdosǒlǎ, sǒsusǒsǎ kû̌ sǒmṳ̌wû̌bô lǒ̤bò pô̤̌ akhli kû̌ akhli lǎ̤klô sǎhtò̌nu. Dě Cǒmaradû̌ kè̌shǐ ata̤ma̤nu kû̌ awô̌ dě asǎphlǒmô̤ mî̌ca. 13Lṳmṳ̌khǐ htodě lṳ̌mṳ̌lî hè, dě a behtò̌ tôni̤, dě hǒnṳtini̤ mî̌ suni̤ tini̤.
14Cǒmaradû̌ hî̌pô̤̌ kû̌, “Pô̤̌khô lṳmṳ̌khǐ kû̌ lṳmṳ̌lî gǔ ô̌khô̌ lû̌û ayanu ta̤lî ô̌htûhtò̌ mò̌ dǒ mǒlǎ̤nu, dě no ma̤mǎma̤dò lṳ̌ lò̤tôlò̤bǎ bǎ kòyò kû̌ ta̤shěta̤khǎ, mṳ̌ni̤mṳ̌sa kû̌ něla tokhlǒ. 15Dě ta̤lînu lîhtò̌ mò̌ dǒ mǒlǎ̤ dě shělî kakhalò̤ mò̌ dǒ hǎkhû̌nu.” Dě a htûhtò̌ bò pô̤̌ a hî̌nu. 16Cǒmaradû̌ bô̌lò̤ ta̤lî mî̌tè̌kodû̌ ginǐ̤mè, alîshû̌khlo tômè mî̌ lṳmṳ̌ dě a no lî lû̌û dǒ lṳmṳ̌sha, a lîjǎkhlo tômèmî̌ la dě a no lî lû̌û dǒ lṳmṳ̌khǐ, dě a bô̌lò̤ padô̌ shǎ sîtokhlǒ. 17Pô̤̌khô ta̤lî gǔ lî shěkakhalò̤ bǎ dǒ hǎkhû̌ ayanu, Cǒmaradû̌ dǐô̌ ta̤lî nutokhlǒ dǒ mǒlǎ̤. 18Kǎtô̤̌ a bè̌ ta̤lî nutokhlǒ dǒ a gǔ pǒ lṳmṳ̌khǐ kû̌ lṳmṳ̌sha dě a gǔ bè̌khô̌ ta̤khǐ kû̌ ta̤lî. Dě Cǒmaradû̌ kè̌shǐ ata̤ma̤nu kû̌ awô̌ dě asǎphlǒmô̤ mî̌ca. 19Lṳmṳ̌khǐ htodě lṳ̌mṳ̌lî hè, dě a behtò̌ tini̤, dě hǒo tini̤ mî̌ lǐ̤ni̤ tini̤.
20Cǒmaradû̌ hî̌ pô̤̌ kû̌, “Lǒ̤bò ta̤bô̌lò̤ pṳ̂̌꤮ tôcǒ dǒ a gòyò̤̌ dǒ shikû sîtokhlǒ ô̌htûhtò̌ dě ô̌behtò̌ mò̌ dǒ shikûnu. Htû̌phû̌ pṳ̂̌꤮ tôcǒ ô̌htûhtò̌ mò̌ dě wi̤ mò̌ dǒ mǒlǎ̤nu.” A hî̌ dě a htûhtò̌ bò pô̤̌ a hî̌nu. 21Pô̤̌nudě Cǒmaradû̌ bô̌lò̤ ta̤phû̌ta̤wè̤ dû̌ tokhlǒ dǒ shidû̌tawe̤kû kû̌ lǒ̤bò ta̤phû̌ta̤wè̤ dǒ shikû tokhlǒ dě a ô̌betî̌pî̌ htò̌ bò dǒ shidû̌shite̤we̤kû. A bô̌lò̤ htû̌phû̌yṳ̌phû̌ pṳ̂̌tocǒ dǒ a wi̤ dǒ mǒlǎ̤ sîtokhlǒ, dě Cǒmaradû̌ kè̌shǐ ata̤ma̤nu kû̌ awô̌ dě asǎphlǒmô̤ mî̌ca. 22Cǒmaradû̌ ǐshowî̤ lǒ̤bò ta̤phû̌ta̤wè̤ nutokhlǒ dě a hî̌ kû̌, “Ta̤phû̌ta̤wè̤ dǒ a ô̌ bǎ shidû̌kû nutokhlǒsî, phû̌phǎhtò̌ dû̌wî̤ lô̌khô nî̌, phû̌htò̌phǎhtò̌ phû̌ô̌wô̤̌ô̌plṳ̂ lô̌khô nî̌꤮,” dě a hî̌ htû̌phû̌yṳ̌phû̌ sîtokhlǒ kû̌, “Phû̌phǎ lô̌khô dǒ hǎkhû̌nu nî̌.” 23Lṳmṳ̌khǐ htodě lṳ̌mṳ̌lî hè, dě a behtò̌ tini̤, dě hǒo tini̤ mî̌ yè̤̌ni̤ tini̤.
24Htodě Cǒmaradû̌ hî̌ pô̤̌ kû̌, “Ǒ hǎkhû̌, dǐ ô̌htûhtò̌ mò̌ ta̤phû̌ta̤wè̤ dǒ ana̤ tokhlǒ bǎbǎ, ta̤phû̌ta̤wè̤ dǒ aplò̤ tokhlǒ bǎbǎ, lǒ̤bò pô̤̌ akhli kû̌ akhli ô̌ nu,” dě a htûhtò̌ bò pô̤̌ a hî̌nu. 25Pô̤̌nudě Cǒmaradû̌ bô̌lò̤ ta̤phû̌ta̤wè̤ dǒ ana̤ bǎbǎ, ta̤mi̤ta̤mò̤̌ tokhlǒ bǎbǎ, adû̌dû̌ apî̌tî̌ bò̌bò pô̤̌ akhli kû̌ akhli pô̤̌nudě, Cǒmaradû̌ kè̌shǐ ata̤ma̤nu kû̌ awô̌ dě a sǎphlǒtô mî̌ca. 26Cǒmaradû̌ hî̌ pô̤̌ kû̌, “Pa bô̌lò̤ wô̤̌wô̤̌ lû̌û kòyòhǎkhû̌phû̌ dǒ asô̌sô̌kû̌ panǎ̤ nu tǎ. Htodě ta̤mi̤ta̤mò̤̌ ô̌ dǒ shilǎ̤ nutokhlǒ bǎbǎ, htû̌phû̌yṳ̌phû̌ wi̤ dǒ mǒlǎ̤ nutokhlǒ bǎbǎ, kû̌ ta̤mi̤ta̤mò̤̌ ô̌ dǒ mi̤kla nutokhlǒ bǎbǎ, ta̤mi̤ta̤mò̤̌ dǒ kòyò bǔǐ dǒ dokûshô̌kû nutokhlǒ bǎbǎ, lǒ̤꤮ bònu pa ǐ kòyòhǎkhû̌phû̌ ata̤siwi̤sòwò̤ dě no pǒ bò kû̌ asî tǎ,” a hî̌ pô̤̌nu.
27Pô̤̌nudě Cǒmaradû̌ bô̌lò̤ kòyòhǎkhû̌phû̌ sô̌sô̌kû̌ anǎ̤ dě a bô̌ pwa̤khû kû̌ pwa̤mǒ̤nu asô̌sô̌kû̌ anǎ̤.#Mǒhtûlû̌hǎhtûsa 5:1-2; Matè̌ 19:4; Makǔ 10:6 28Htodě Cǒmaradû̌ ǐshowî̤ asî dě a hî̌ kû̌, “Phû̌ô̌wô̤̌ li̤ô̌plṳ̂ lô̌khô dě ô̌be hǎkhû̌ dě pǒǐ yǎ nî̌꤮. Dě ta̤mi̤ta̤mò̤̌ ô̌ dǒ shidû̌tawe̤kû nutokhlǒ bǎbǎ, htû̌phû̌yṳ̌phû̌ dǒ a wi̤ dǒ mǒlǎ̤ nutokhlǒ bǎbǎ, ta̤mi̤ta̤mò̤̌, ta̤mi̤ta̤mò̤̌ dǒ a cû̌ dǒ hǎkhû̌ nutokhlǒ pṳ̂̌꤮ tôcǒ bǎbǎ pǒǐ bò asî nî̌꤮.” 29Htodě Cǒmaradû̌ hî̌ pô̤̌ kû̌, “He ǐlò̤ bǎ sî sǒdosǒlǎ dǒ a gǔ sǎhtò̌phôhtò̌ bǎ sî lǎ̤ǎlǎ̤ô aya, kû̌ sǒsǎwû̌phô dǒ a gǔ sǎhtò̌phôhtò̌ bǎ sî lǎ̤ǎlǎ̤ô aya dǒ hǎkhû̌ tôběbònu hǒ. 30Bǎbǎkǎlè lǒ̤꤮ bò ta̤mi̤ta̤mò̤̌ ô̌ dǒ hǎkhû̌nu tokhlǒ, kû̌ htû̌phû̌yṳ̌phû̌ wi̤ dǒ mǒlǎ̤ nutokhlǒ kû̌ ta̤mi̤ta̤mò̤̌ dǒ adû̌dû̌ apî̌tî̌ lǒ̤꤮ bò dě ata̤htûpwa̤ ô̌ nutokhlǒ lǎ̤ǎ aya, he ǐlò̤ bǎ asî mi̤mṳ̌ kû̌ sǒdosǒlǎ.” dě a htûhtò̌ bò pô̤̌ a hî̌nu. 31Dě Cǒmaradû̌ kè̌shǐ lǒ̤bò a ma̤ ta̤ nutokhlǒ kû̌ awô̌ mî̌ca akhû̌akhî, a sǎphlǒmô̤ mî̌ca. Lṳmṳ̌khǐ htodě lṳ̌mṳ̌lî hè, dě a behtò̌ tini̤, dě hǒo tini̤ mî̌ asa susô̌.#Tîmôte awǐlǒ tôbǎ 4:4
Atualmente Selecionado:
Mǒhtûlû̌hǎhtûsa 1: KXF
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
Wycliffe USA
