GENESIS 9
9
1Ma tha God ka alua lea la fafia tha Noa ma kaluwane nia ki, ka una eri isada, Kwalafamulua keki oro faamau ka lae alaa, ma muki faafuṉua fanua na i iano. 2Ma mau la uri kamulua, ma aanu la uri kamulua, kai to fafia do maruki eki sui bana i fanua na i iano, ma fafia thaaro eki sui bana i mamaṉaa, ma fafia do eki sui bana na ka isu i fanua na i iano, ma fafia gwa i’a eki sui bana i la amali; nau ku falea naa do eki sui boo i abamulua. 3Si do ki sui bana na keki isu ma keki maruki bada, do eki na ṉa faṉa ifamulua; ’uria fale la na nau ku fale iamulua na ba ana kaala kwake, nau ku falea naa si do ki sui bana iamulua. 4Ma see ta do bia marukia nia, ’abuna neri, kera lufi kamulua musi ania. 5Ma ’abumulua ana marukia kamulua nau kwai rofea mamana boo; kwai rofea i abana do maruki‐ki sui bana; ma i abana imole; i abana doorana atona bana ta wane, kwai rofea marukia wane eri. 6Ni tei bana ne adea ’abuna imole kai igwa, imole kai duua ana ’abuna imole eri ne ilia: uria na sulia nuuna tha God nia e thauwai ana imole. 7Ma ni kamulua, kwalafamulua keki oro faamau ka lae alaa; muki tharea wela oro ki i fanua na i iano, ma muki oro faamau iei.
8Ma tha God ka ṉata mai satha Noa ma isana kaluwane nia ki bi nia, ka una eri, 9Ma ni nau, rikia fasi, ni nau ku kania naa alaofua nau bi kamulua, ma bia kwalafamulua iburiamulua; 10Ma bia do maruki eki sui bana na keka to bi kamulua, ana thaaro ki, ma aini katele ki, ma do maruki i masuu ki mai i fanua na i iano bi kamulua; bia do eki na kera kotho mai faisia i la aka, na do maruki sui bana i masuu ki mai i fanua na i iano. 11Ma ni nau kwai kania alaofua nau eri bi kamulua; me a’i kesi faafunuia lau do maruki‐ki sui bana ana kafo ki na sa kai olo lau fafia fanua; ma kei e’i lau ta olo lana kafo fasi kai thaulabatai nia fanua na i iano. 12Ma tha God ka una eri, Fafuilalaa nai nia ana alaofua eri na nau ku kania imaalutaku, ma ni kamulua, ma do maruki eki sui bana na ni isamulua, sulia unii wane na ni ki u toto si sui. 13Nau kwai alua fulaaro nau asi datha, ṉa fafuilalaa neri ana alaofua eri na kera kania imaalutaku ma fanua na i iano. 14Ma lalae mai, si maṉa nau toto kwai falea mai si datha fafia fanua na i iano, keki rikia boo fulaaro i lala si datha eri, 15Ma ni nau kwai onotoona alaofua nau eri na kera kania imaalutaku ma ni kamulua ma do maruki eki sui bana seede to bana; ma kafo eki ka a’i si baita, si fula lau ana olo lana kafo uria faafunui lana seena do maruki‐ki sui bana. 16Ma fulaaro kai to bana i lala si datha; ma ni nau kwai lio uria, fasi kwai onotoona alaofua eri na kai toto si sui, na kera kania imaalutana tha God ma do maruki‐ki sui bana seeda ka to bana i fanua na i iano. 17Ma tha God ka soree isatha Noa, Fafuilalaa nai nia ana alaofua na nau ku kania naa imaalutaku ma do maruki‐ki sui bana seeda ka to bana i fanua na i iano.
18Ma kaluwane tha Noa ki na kera kotho mai faisia ṉa aka, nai nida, tha Semo, ma tha Hamu, ma tha Jefeta: ma maka tha Kenana na tha Hamu. 19Ulu kaluwane tha Noa ki na ni kera: ma kwalafada kera lae tathaa uri la fanua na i iano ta fanua si e’i.
20Ma tha Noa ka thafalii ra i theegano, ka fasia oolee faene: 21Ma nia ka kuufia ta sii ana waene eri, ka kuu ka bula nia; sui ka talu bana i la biui‐maku nia. 22Ma tha Hamu, maka tha Kenana, e bubuṉia maka nia ne talu, ka faaroṉoa thoona ma thasina na kero ni thara. 23Ma ni keroa tha Semo ma tha Jefeta kero ṉalia mai tooni, keko alua i gwauna abadaroa, keko lae falaburi, keko thu fafia seena maka keroa ne talu; ma maade lio falaburi, kesi rikia seena maka keroa ne talu. 24Ma toto ka tharai faisia bula lana waene eri, tha Noa ka bii thaitoomana si ade la na kaluwane buri nia e ilia iana. 25Ma nia ka una eri, Taa la kai to fafia tha Kenana; nia toto ṉa wane ni ra ifana wane na keka ra ifana ina lana kera. 26Ma nia ka una eri, Keki taṉoa tha Jihova ṉa God tha Semo; ma toto wane ni ra nia na tha Kenana. 27Tha God kai faabaitaa tha Jefeta, ma nia kai to bana i biui‐maku tha Semo ki; ma toto wane ni ra nia na tha Kenana.
28Ma tha Noa ka to bana buriana olo lana kafo eki sulia ulu taleṉee fa ṉali ma lima tafulu fa ṉali. 29Ma fa boṉi eki sui bana ana to lana tha Noa, sikwa taleṉee fa ṉali ma lima tafulu fa ṉali: sui nia ka bii mae.
Atualmente Selecionado:
GENESIS 9: MLU1949
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
British and Foreign Bible Society 1949, 1951
