Marcos 7
7
Roo lei ba leob muda siil Nai Maromak ni lei
(Mateus 15:1-9)
1Roo ois grupu relijiaun Farizeu, nor mestri room enlaa lei Judeu ni, seir maa daas Jerusalem oid asour Jesus. 2-5Roo Judeu hailagaa nor roo Farizeu seirgaa fael tama lisan Judeu ni. Ezemplu kiid fee uri: arfiil naha aa, tenki haas lima muun, toom lisan ni noir. Arfiil suli ois basar, tenki riu muun. Manura meit, arfiil naha uza naam dapur ni man: uur, bian, kopu, buli, tenki haas muun laed, toom regra lisan ni, man hina uza oid aa.
Se roo Judeu seir man ba toom lisan idura ni noir, roo Farizeu room nor mestri room enlaa lei Judeu ni hii bruis.
Des manura fee, room bruis arfiil room fei Jesus ni eskolanti seir aa ba haas lima toom lisan ni noir. Manura fee room nee sala la Jesus dega, “Des sabiid fee O eskolanti room aa, ba haas lima muun? Manura, room kontra soub iit lisan ni noir ois tata-kala room!”
6Mahee Jesus ataan dega, “Iim uri, noir ahe kiid, fun ahe selu! Fes muna Nai Maromak ni gugu nor lama Isaías hlai Nai Maromak ni teor menon enlaa iim oid dega,
‘Roo seirgaa anai Au oid room gugu lea,
mahee room hua-lala roo ois Au.
7Room adora manura, tubu ba nei.
Room noir roo lisan
man room sium lisan ura ois Au,
mahee ba loos Au fee nee lisan ura.’#Isaías 29:13
Iim meit mes man loor. 8Iim fois telo soub Nai Maromak ni lei, oid toom lea roo lisan ni noir. 9Iim matenek tustus oid fun toom lea iim lisan ni noir i sei hoho la Nai Maromak ni lei.
10Fes muna faklau, iit tata Moises nee sai Nai Maromak ni lei dega, ‘Respeita iim ina nor iim ama.’ I Moises dega deis iid, ‘Se artuub iid foil ni ina ka ni ama, tenki kastigu maet ura.’#Ezodu 20:12; 21:17; Levitiku 20:9; Deuteronomio 5:16 11Nai Maromak ni noir manura, mahee iim noir ahe selu siil. Iim noir dega artuub iid leob kase la ni ina nor ni ama, ‘Au ba leob tulun deis iim, deslaa naam bae fee iim presisa, au promete telo soub naha nee la Nai Maromak’. 12Iid ura, iim ba nee lisensa la artuub too oid tulun ni ina nor ni ama. 13Deslaa ura fee nafai Au dega telo soub, iim fois telo Nai Maromak ni teor hua, oid troka siil nor iim lisan rasik. Nei lei rini fee iim troka telo soub manura.”
Naam klao fee sai ois roo hua-lala
(Mateus 15:10-20)
14Faklau telo, Jesus haah artuub rini bae fee nii hati kidura, oid dega, “Sei teliga maa, la iim oid taad. 15Sabiid lea fee tafae la roo bai lala, idura ba fun ura tita. Mahee sabiid fee sai ois roo hua lala, idura fee fun ura ba moo. 16[Entaun seen fee nei teliga, fliik kod-koed!]”#7:16:Eskritura Gregu Orijinal muna ba hlai versikulu 16.
17Toom maa Jesus nor ni eskolanti room fois bael roo seirgaa, i room laa tafae nii uum iid. I Ura ni eskolanti room tuuk la Ura “Lela-teor nafai too, dega sabiid?” 18Jesus ataan dega, “Iim meit ba taad ka? Lela-teor idura dega manuri: sabiid lea fee roo aa, idura kode, ba fun tita ura. 19Deslaa naam bae fee roo aa, ba loos tafae la ni hua-lala, mahee tafae la ura ni bai lala, ni fonori sai siil. (Manura, Nai Jesus dega, namaa hailagaa moo soub, roo leob aa namaa sabiid lea. Ba baud soub.)
20Mahee sabiid fee sai ois roo hua-lala, idura fee fun tita, raat Nai Maromak meit migia i boi futu nor ura. 21-22Deslaa naam klao rini sai ois roo hua-lala. Ezemplu: anoin klao, anoin nor fun sala seksual arbiru, fnao, loet roo, naa-huni, fun sala seksual nor roo bae fee ba loos o kaben, fun naam klao, aa maat roo, fun toom lea ni akar, hua sae, dega klao roo, tloo lolo, i ulu hatu sio.
23Entaun, naam klao seirgaa sai ois roo hua-lala. Idura fee fun tita roo. Nai Maromak meit migia.”
Nai Jesus tulun hiin iid, fedu ura ba loos roo Judeu
(Mateus 15:21-28)
24Faklau telo idura, Jesus room fois telo hati kidura oid laa nii hati kiid fedeis sidadi Tiru. Raat nii la-ura, Jesus tafae la nii uum iid, deslaa Ura boi fun roo taad Ura nii hati kidura. Mahee Ura koo lolo meit ba kode.
25-26Nii la ura, nei hiin iid fee ba loos roo Judeu. Ura mori nii rae Finisia, nii provinsi Siria. Arfiil ura fliik Jesus maa, ura laa asour enene. Ura diku nii Jesus ni ahe, i ura tuuk la Jesus oid laa toeh sai espiritu klao ois ni ana-hina.
27Mahee Jesus dega la ura, “Aan seirgaa tenki aa muun laed, deslaa ba kode huu aan seirgaa ni namaa oid nee la aus.”#7:27 Idura dega, Jesus tenki tulun muun Ni artuub Judeu room, hina tulun roo selu.
28Mahee hiin too ataan siil dega, “Doloo, Am-Nai! Mahee aus too heer bael mees sua, i ura meit aa namaa bae fee mou ois aan room ni bian.”#7:28 Idura dega, arfiil ni ana room aa, aus meit leob aa. Fedu Jesus leob tulun ni artuub rasik, mahee Ura meit leob tulun roo selu.
29Fliik manura, Jesus tafaar la hiin too dega, “O dega too, doloo tustus! Des manura o suli laab, deslaa espiritu klao too sai telo soub ois o ana.”
30I hiin too suli laa ni uma. Raat nii uum, ura fei ni ana boe bael i espiritu klao too sai telo soub ois ura ni ana.
Nai Jesus fun kode maen iid teliga baa nor molu
31Faklau telo, Jesus room fois telo hati kiid fedeis sidadi Tiru, i laa siil nii sidadi Sidon. Ois ura, room lolai raat taes Galileia. Toom maa, room meit laa nii rae Dekapolis.#7:31 ‘Dekapolis’ rae idura nei sidadi saguul 32Nii hati kidura, artuub room oid maen iid bae fee teliga baa nor kase ba kode, la nii Jesus, i room tuuk la Jesus oid tuul lima la maen too ni ulu la ura oid kode.
33I Jesus fois telo artuub utu kidura, oid laa mesa nor maen idura. Jesus fois ni lima hua la nii maen too ni teliga ruu. Toom maa, Ura meit luu aba la ni lima hua, oid fael maen too ni lama. 34Jesus tloo mata la leol lau, Ura daad snuga, i tafaar nor room tero Aram dega, “Efata!” (Teor-hua ura dega, “Dalaek soub la.”)
35Jesus dega lea manura, maen too ni teliga fliik enene. I maen ni lama kiid sio too meit mlai i ura kase kode enene.
36Idura faklau telo, room ubu ruu suli siil la roo utu seirgaa. Jesus baud room dega, “Fliik maa! Iim ba leob tuir la roo, dega, Au fee fun kode maen uri.” Fedu Jesus baud makaas, mahee room laa nee sai nii hati-hati. 37I roo hailagaa hleeh nor kauk ulu. Room meit nee taad la loor dega, “Jesus ura leob fun naam haigaa sai kode! Roo teliga baa leob fliik. Roo molu meit leob kase.”
Atualmente Selecionado:
Marcos 7: BMGM
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
© 2023 Wycliffe Bible Translators Inc
