Matayo 14

Kufwa kwa Johana Mubatizi

(Marko 6:14-29; Luka 9:7-9)

1Nao ilya ngelo Mzuri Herode wa Galilaya kasikila uvoro ghwa Jesu; 2naye kawauza watumishi wake, “Uyu ni Johana Mubatizi azuka kufuma kwa wafwa; na kwa hung'u uwo na ndighi zedea wana mwakilimbita.” 3Kwani Herode omwatile Johana kamufunga na minyororo na kumungiza kifungoni kwa undu ghwa Herodia mke wa Filipo wakwawe. 4Johana Mubatizi omuzile, “Si kuirimana na sheria kumuusa.” 5Naye Herode oshaile kumuulagha, ela kaogha wandu, kwa kukala weluo wamwona Johana kukala ni tondolo. 6Ela kele ijua lya kuvalo Herode, mchana wa Herodia keja kavina hambiri ya wandu, na Herode kaboelo, 7hata kamughemela kamuza kamba umuhawagha icho chose elombagha. 8Naye kwa kufundo ni mee kalomba, “Nihawe chongo cha Johana Mubatizi kele bakuli.” 9Nao Mzuri kawasilo; ela kwa kukala olagile hambiri ya wagheni wake, kaghora ahawo. 10Nao katumana Johana apaso chongo kifungoni. 11Na chikaleto na bakuli chikahawo ulya mchana, naye kamughenzela mee. 12Wairimi wa Johana wekeja wakausa muli ghwake wakaghuzika. Nao wakaghenda wakamghorera Jesu.

Jesu kulyisa walume elfu sanu

(Marko 6:30-44; Luka 9:10-17; Johana 6:1-14)

13Nao Jesu aghenda asikila hung'u, kafuma alye kwa mashua, kaghenda andu kwa chanya. Ela makoghano waghenda wasikila wakamwirima kwa maghulu kufuma kele ilya mizi. 14Naye Jesu aghenda aselela pwani kaona ikoghano ibwaa, kawafwila waya kawaboesela wakongo wawe. 15Nao luma lwa hafukeni, wairimi wake wakamjila wakamuza, “Aha ni andu kwa chanya na ndamu kwaswa wauze makoghano waghende mizi mizi wakughulile chakulya.” 16Jesu kawauza, “Siiwafweni waghende kungi, wahaweni chakulya walye.” 17Nawo wakamuza, “Tio na mikate misanu tu na makumba maili.” 18Nao Jesu kawauza, “Ileteni aha kwangu.” 19Nao kaghora makoghano wakale kitembo kele nyasi. Nao ima kaiwata mikate misanu na makumba maili, kalola mlunguni, kavibarikia, kavunja na kuwahawa wairimi wake, nawo wairimi wakawahawa makoghano. 20Nawo wakalya wose wakaghuta. Nao wairimi wakashowa vikapu ikumi na vili va misusure ya mikate ihangalike. 21Na walye walyile weluo walume elfu sanu, wake na wanake siwetalilo.

Jesu kughenda ighulu ya meji

(Marko 6:45-52; Johana 6:15-21)

22Nao Jesu kawauza wairimi wangile kele mashua wakayaye kuwambuka chambuko cha bahari, naye kasigho kelagana na makoghano. 23Na nyuma ya kulagana na makoghano, kajoka mghondini keng'ori kulomba. Nao nahafukeni Jesu oluo alye ekeng'weri, 24na iyo ngelo ilya mashua yeluo yafika ghati ya bahari, nayo yeluo ikesukosuko ni mawimbi gha bahari, kwa kukala mbeo yeluo ikekwita gasi yake. 25Nao ifika kavui na kuela, Jesu keja kwa wairimi keghenda ighulu ya meji. 26Nao wairimi wamwona keghenda ighulu ya bahari, wakangilo ni wogha wakaghora, “Ni kisuga!” Nawo wakakema eri wawaruro. 27Ela iyo ngelo yenyi Jesu kaghoranya nawo, “Kaleni mang'oni! Nimi mwenyi simwadee wogha.” 28Nao Petro kamutumbulila, “Bwana, ngera nuwe, nuze nije kwako ighulu ya meji.” 29Jesu kamuza, “Njuu.” Nao aho Petro kafuma kele mashua kadyowa kughenda kwa Jesu ighulu ya meji. 30Ela aghenda aona mbeo kaogha, na adyowa kumalika, kakema, “Bwana nikize.” 31Nao iyo ngelo yenyi Jesu kaghorora mkonu ghwake kamwata, kemuza, “Mundu wa idumusi ichache, kudani wakala na ngera.” 32Nao wangila kele mashua, mbeo ikanyamala. 33Na wose weluo kele mashua wakamtasa, wekeghamba, “Fulo uwe nuwe Mwana wa Mlungu.”

Jesu kuboesa wakongo wa Genesareti

(Marko 6:53-56)

34Nao waghenda wawambuka bahari, wakafika isanga lya Genesareti. 35Nao wandu waghenda wamumanya, wakatumana uvoro isanga lyilya lyose wakamletela Jesu wose weluo wakongo. 36Wakamlomba awadumusile wawate kitambi cha nguo yake na wose wawatile wakabowa.

Atualmente Selecionado:

Matayo 14: SAGALLANT

Destaque

Copiar