मत्ती 14

हेरोदोसोन येसुन बारामा सोमवाळनो

(मरकुस 6:14-29; लुका 9:7-9)

1तिनी टेमे चोवथायीन देसोन राजा हेरोद येसुन बुलनो सोमव्यू, 2एने हेरोद तेरा सेवक काजे कोयू, “यु योहान बाप्तिस्मा आपनेवावू छे! चू मोरलामा गोथू जीव उठलु छे, इनान कोरता तेरेसी मोटला काम देखाय पोळतेला छे.”

योहानोन खुन

3काहाकि हेरोद तेरा भाश फिलीपोन लाडी हेरोदोन वोजेसी, योहान काजे धोरीन बांधी एने जेलमा घाल देदली होती. 4काहाकि योहान तीना काजे कोयलु होतु कि इना काजे राखनो तारेन कोरता वारलो नी होय. 5इनान कोरता हेरोद तीनाक मार नाखने कोरतू होतु, बाकीन माणसो काजे बिहतु होतु काहाकि चे तीनाक भविष्य कोरता मानता होता. 6बाकीन जेतार हेरोदोन पोयदा होयलू चू दाहळू आयु, ती हेरोदोन पुराय तीहीवारोमा नाच देखाळीन हेरोद काजे खुश कोरीन. 7इनापोर हेरोद कोसोम खायीन वचन आप्यू, “जो काय तू मांगीस मे तुसेक आपीस.” 8ची तेरी आयान सिकाळला पोरसी बुली, “योहान बाप्तिस्मा आपनेवावान मुंडको थाविमा न्या मेसेक मांगाळ दे” 9राजा हेरोद दुखी होयू, बाकीन आपनी कोसोमोन, एने साते बोसने वावान वोजेसी, आग्या आप्यू कि आपाय जाय. 10एने चू जेलमा माणसो काजे मुकलीन योहानोन मुनको काटाळ देदु. 11एने तेरो मुनको थाविमा लावाय गोयो एने पुराय काजे आपाय गोयो, जीनाक ची तेरी आयानचा लीन गोयी. 12तेत्यार योहानोन चेला आव्या एने तेरा धोळ काजे लीजायीन गाळ देदा, एने जायीन येसु काजे निरोप आप्या.

पाच हजार माणसोक खावाळनो

(मरकुस 6:30-44; लुका 9:10-17; योहान 6:1-14)

13जेतार येसु यो सोमव्यू, ती चू ढोंड्या पोर चोळीन चा गोथू काहनास सुनसान जागामा, एखलामात जात रोयू माणसे यो सोमवीन सोहोर-सोहोरोमा पायेत तेरे पोछोव चाल पोळ्या. 14येसु निकवीन तिंदरे ओगोव आव्यु एने एक मोटी गोरदी देख्यू एने तिंदरे पोर गिन कोऱ्यु एने तिंदरा बिमारी काजे वारू कोऱ्यु. 15जेतार सांतो होयो ती येसुन चेला तेरेनचा आव्या एने कोया, “जी सुनसान जागा छे एने वार होयने बाज गोयली छे; माणसो काजे मुकलाय जाय कि चे वस्तीमा जायीन आपनेन कोरता खाणो मुले लेये.” 16बाकीन येसु तीनु काजे कोयू, “हिंदरो जाणो जोरुरी नी होय! तुमुत हिनु काजे खाणो आपु.” 17चेला येसु काजे कोया, “न्या आमरे जुव पाच रुटा एने दुय माछा काजे छुळीन एने काय नी होय.” 18चू कोयू, “तीनाक न्या मारेंचा लीन आवू.” 19जेतार चू माणसो काजे खोडा पोर बोसने कोरीन कोयू, एने तिना पाच रुटा एने दुय माछा काजे लेदू; एने सोरग भूनी भावीन धन्यवाद कोऱ्यु एने रुटा तुडी तुडीन चेला काजे आप्यू, एने चेला माणसो काजे. 20जेतार आखा खायीन आफरी गोया, ती चेला वाचला तुकडा सी भोरला बारा टूपल्या चुट्या. 21एने खाणे वावा, बायरा एने पुऱ्या काजे छुळीन, पाच हजार माणसोन लगभग होता.

येसुन पाणी पोर चालनो

(मरकुस 6:45-52; योहान 6:16-21)

22तेत्यार चू तेतारुत आपना चेला काजे ढोंड्या पोर चोळनेन कोरीन कोयू कि चे हिंदरे पेहले पार जात रोये, जेतार चू माणसो काजे मुकली देये. 23चू माणसो काजे मुकलीन, प्रार्थना कोरनेन कोरीन ओगोव बोयडा पोर जात रोयू; एने सांतू चू एखलु होतु. 24तिनी टेमे ढोंड्यो दोरीयान इचमा लेहोरोसी डूलायती होती, काहाकि वाहवो सामने वावो होतो. 25एने येसु रातीन चोवथे घोळी दोरीया पोर चालतु जायीन तिंदरे साते आव्यु. 26चेला हिनाक दोरीयामा चालतलु देखीन बिह गोया एने कोयने बाज गोया, “यु भुतडू छे” एने बिकोन मारे आयळने बाज गोया. 27तेत्यार येसु तिंदरे साते तेतारुत वाते कोऱ्यु एने कोयू, “हिंमत धोरू! मे छे, बिहू मा.” 28पतरस तीनाक जोवाब आप्यू, “हे प्रभू, कोदि तुत छे, ती मेसेक तारे पुठी पाणी पोर चालीन आवनेन आग्या आप.” 29येसु कोयू, “आव” ती पतरस ढोंड्या पोर गोथू उतरीन येसुनचा जाणेन कोरीन पाणी पोर चालने बाज गोयू. 30बाकीन वाहवा काजे देखीन बिही गोयू, एने जेतार डूबने बाज गोयू ती आयळीन कोयू, “हे प्रभू, मेसेक वाचाड,” 31येसु तेतारुत हात ओगु कोरीन तीनाक धोर लेदू एने तीनाक कोयू, “हे कोमजुर भुरसू वावा, तू काहा शंका कोऱ्यु?” 32जेतार चे ढोंड्या पोर चोळ गोया, ती वाहवी हुगी होय गोयली. 33इनापोरसी जे ढोंड्या पोर होता, येसुक नोमोन कोरीन कोया, “छाचलीन, तू परमेश्वरोन पुऱ्यु छे.”

येसुन मांदला माणसो काजे वारू कोरनो

(मरकुस 6:53-56)

34चे पोल धोळे उतरीन गन्नेसरत जागामा पुग्या. 35चा वावा माणसे तीनाक उवखी लेदा एने आस-पास वावा आखा देसोमा खोबर कोय मुकल्या, एने आखा बिमारी वावा काजे येसुनचा लाव्या, 36एने माणसे येसु काजे विनता कोरणे बाज गोया कि चू आपना छिंदरा कुपरा काजे छिमने दे; एने जोतरा जोना तीनाक छिम्या, चे वारू होय गोया.

Atualmente Selecionado:

मत्ती 14: BFBNT

Destaque

Copiar