ମାର୍କ 5
5
ବୁତ୍କୁ ଡୁୟାଆତି ମାନାୟ୍ତିଙ୍ଗ୍ ଯୀଶୁ ହାର୍କିତାନ୍
(ମାଥି. ୮:୨୮-୩୪; ଲୁକ. ୮:୨୬-୩୯)
1ଯୀଶୁ ଆରେ ତା ଚେଲାହିର୍ ଗାଲିଲୀନି ହାମ୍ଦୁର୍ ହେ ପାଡ଼୍କା ଗରାଶିୟର୍ ମାନି ନାସ୍ତ ହାଚାର୍। 2ଯୀଶୁ ଡଙ୍ଗାତାଙ୍ଗ୍ ଜୁତିଦାପ୍ରେ ରକାନ୍ ବୁତ୍ଆତ୍ମା ଡୁୟାଆତାକାନ୍ ଦୁଗେର୍ ବାଟାତାଙ୍ଗ୍ ହସି ଯୀଶୁଙ୍ଗ୍ ଗିଟାଆତାନ୍। 3ହେୱାନ୍ ଦୁଗେର୍ ବାଟାତାକେ ବାହାକିଜି ମାଚାନ୍, ହେୱାନ୍ ବାୟାଲେକେ ଆଜି ମାଚାନ୍, ତାଙ୍ଗେଙ୍ଗ୍ ମାନାୟାର୍ ଗାଚ୍ଚେଙ୍ଗ୍ ଉପାୟ୍ କିଜି ମାଚାର୍, ଇନେସ୍କି ହିକ୍ଡ଼ିଙ୍ଗ୍ ହୁଦାଙ୍ଗ୍ ପା ଗାଚ୍ଚେଙ୍ଗ୍ ଆଡ୍ୱାଦାଙ୍ଗ୍ ମାଚାର୍। 4ହେୱାନ୍ କେତ୍ତର୍ କେଇନି ହିକ୍ଡ଼ିଙ୍ଗ୍ ନାଟ୍ପିସ୍ ମାଚାନ୍, ଆରେ କାଲ୍ନି ବାଡ଼ାଙ୍ଗ୍ ପା ଗନ୍ଦା-ଗନ୍ଦା କିଜି ଡ୍ରିକ୍ଚି ମାଚାନ୍, ହେଦାଙ୍ଗ୍ କାଜିଙ୍ଗ୍ ତାଙ୍ଗେଙ୍ଗ୍ ମାନାୟାର୍ ତାରେନ୍ ଗାଚ୍ଚି ଇଡ଼୍ଦେଙ୍ଗ୍ ଇନେରିଙ୍ଗ୍ ପା ସାକ୍ତି ହିଲାତାତ୍। 5ୱିଜୁଦିନ୍ ହେୱାନ୍ ୱେଡ଼ା ନାଣା ଦୁଗେର୍ତ ଆରେ କୁପ୍ଲି ତ ବୁଲାଆଜି ମାଚାନ୍, ଚେରାଆଜି ଦାରାକାଲ୍ ଲାହାଙ୍ଗ୍ ଜାର୍ ଗାଗାଡ଼୍ତିଙ୍ଗ୍ ଚିତ୍ରା କାବ୍ରା କିଜି ଇଡ଼୍ୟାଆଜି ମାଚାନ୍।
6ଦେହାତାଙ୍ଗ୍ ଯୀଶୁଙ୍ଗ୍ ହୁଡ଼୍ଜି ହେୱାନ୍ ହନ୍ଚି ୱାଜି ତାଙ୍ଗେଙ୍ଗ୍ ସନ୍ମାନ୍ ହିଦେଙ୍ଗ୍ ଜୱାର୍ କିତାନ୍। 7ଚେରାଆଜି ୱେଚ୍ଚାନ୍, “ଏ ସରଗ୍ନି ଈଶ୍ୱର ମେହି ଯୀଶୁ, ନା ଲାଗାୟ୍ ନିଦାଙ୍ଗ୍ ଇନା କାମାୟ୍ ମାନାତ୍? ନିଙ୍ଗେଙ୍ଗ୍ ଈଶ୍ୱର ତର୍ଦାଙ୍ଗ୍ ରାଣ୍ ହିଦ୍ନାଙ୍ଗା, ନାଙ୍ଗେଙ୍ଗ୍ କଷ୍ଟ ହିଦ୍ମା।” 8ଇନେସ୍କି ଯୀଶୁ ବୁତ୍ଆତ୍ମାତିଙ୍ଗ୍ ଆଗେ ଆଦେସ୍ ହିଜି ୱେଚ୍ଚି ମାଚାନ୍, “ଏ ବୁତ୍ଆତ୍ମା ଇୱାନ୍ତାଙ୍ଗ୍ ହସିହାଲା!”
9ଆରେ, ଯୀଶୁ ହେୱାନିଙ୍ଗ୍ ୱେନ୍ବାତାନ୍, “ନି ତର୍ ଇନାକା?” ହେୱାନ୍ ଯୀଶୁଙ୍ଗ୍ ୱେଚ୍ଚାନ୍, “ମାତର୍ ବୁତ୍କୁ ଦଳ୍, ଇନେସ୍କି ଆପେଙ୍ଗ୍ ବେସିହେନି ମାନାପ୍।” 10ହେୱାନ୍ ଯୀଶୁଙ୍ଗ୍ ଗୁୱାରି କିଜି ୱେଚ୍ଚାନ୍ “ଇ ବାହାତାଙ୍ଗ୍ ମାଙ୍ଗେଙ୍ଗ୍ ହପ୍ତାମା।” 11ହେବେ କୁପ୍ଲି ତାରେନ୍ ର ପାଞ୍ଜି ମାନ୍ଦା ହାରା ଆଜି ମାଚିକ୍। 12ବୁତ୍ଆତ୍ମାକ୍ ଯୀଶୁଙ୍ଗ୍ ଗୁୱାରି କିଜି ୱେଚ୍ଚିକ୍, “ହେ ପାଞ୍ଜିଙ୍ଗ୍ ବିତ୍ରେ ହଣ୍ଡେଙ୍ଗ୍ ମାଙ୍ଗେଙ୍ଗ୍ ଆଦେସ୍ ହିଦା।” 13ଯୀଶୁ ହେୱାରିଙ୍ଗ୍ ଆଦେସ୍ ହିତାନ୍ ଆରେ ବୁତ୍ଆତ୍ମାଙ୍ଗ୍ ହେ ମାନାୟ୍ତାଙ୍ଗ୍ ୱିଜୁ ହସି ପାଞ୍ଜିଙ୍ଗ୍ ବିତ୍ରେ ହଟିକ୍, ହେଦାଙ୍ଗ୍ କାଜିଙ୍ଗ୍ ପାଞ୍ଜିଙ୍ଗ୍ ତାରେନ୍ ବେଗି-ବେଗି ହନ୍ଚି ହାଲ୍ଜି ପାନ୍ତି କାଣ୍ଡିତାଙ୍ଗ୍ ହାମ୍ଦୁର୍ ବିତ୍ରେ ଗୁମ୍ଜି ହାତିକ୍। ପାଞ୍ଜିଙ୍ଗ୍ ଦୁଇହାଜାର୍ ଗଟା ମାଚିକ୍।
14ପାଞ୍ଜିଙ୍ଗ୍ ହାରାୟ୍ କିନି ମାନାୟ୍ ହନ୍ଚି ହାଲ୍ଜି ସହର୍ ଆରେ କଚଣ୍ନି ନାସ୍କୁକାଙ୍ଗ୍ ଇବେଣ୍ ୱେଚ୍ଚାର୍, ହେବେ ଇନାକା ଗଟାଆତାତ୍ନା ଇଞ୍ଜି ମାନାୟ୍ ହୁଡ଼୍ଦେଙ୍ଗ୍ ହାଚାର୍। 15ହେୱାର୍ ଯୀଶୁ ଲାଗାୟ୍ ୱାଜି ହୁଡ଼୍ତାର୍ ଇନେରିଙ୍ଗ୍ ଆଗେ ବୁତ୍ଆତ୍ମାକ୍ ଡୁଜି ମାଚିକ୍, ହେୱାନିଙ୍ଗ୍ ହେନ୍ଦ୍ରା ଉସ୍ପି ହାଦ୍ଦାରୁମ୍ ଆଜି କୁଚ୍ଚାକା ହୁଡ଼୍ଜି ହେୱାର୍ ପାଣ୍ଡ୍ରା ଆତାର୍। 16ବୁତ୍କୁ ଡୁୟାଆତାକାନ୍ ଇନେସ୍ କିଜି ହାର୍ ଆତାନ୍, ଆରେ ପାଞ୍ଜିଙ୍ଗ୍ ଇନେସ୍କିଜି ହାତିକ୍, ହେ ୱିଜୁଗଟ୍ନା ହୁଡ଼୍ତି ମାନାୟ୍ ହେ ମାନାୟାରିଙ୍ଗ୍ ୱେଚ୍ଚାର୍। 17ଇବେଣ୍ ୱେଚାକାର୍ ହେୱାର୍ ଯୀଶୁଙ୍ଗ୍ ୱେଚ୍ଚାର୍, “ଇବାହା ପିସ୍ତି ହାଞ୍ଜେଙ୍ଗ୍ ଗୁୱାରି କିତାର୍।”
18ପାଚେ ଯୀଶୁ ଡଙ୍ଗାତାକେ ଦୁମ୍ନିହିଙ୍ଗ୍ ଇମ୍ଣି ମାନାୟ୍ ବୁତ୍କୁ ତାଙ୍ଗ୍ ରକ୍ଷାପାଇ ଆଜି ମାଚାନ୍, ହେୱାନ୍ ଯୀଶୁ ଲାହାଙ୍ଗ୍ ମାଞ୍ଜେଙ୍ଗ୍ ଗୁୱାରି କିତାନ୍। 19ମାତର୍ ଯୀଶୁ ତା ଲାହାଙ୍ଗ୍ ହାଞ୍ଜେଙ୍ଗ୍ ମୁନା କିଜି ହେୱାନିଙ୍ଗ୍ ୱେଚ୍ଚାନ୍, “ମି ଇଞ୍ଜ ହାଲା, ଆରେ ମି ଲକ୍ବାକ୍ ଇଲ୍କୁକାଙ୍ଗ୍ ହାଲା, ନି କାଜିଙ୍ଗ୍ ମାପୃ ଇନା କିତାନ୍ନା ଆରେ ନି କାଜିଙ୍ଗ୍ ଇମ୍ଣି ଦୟା ଚଚ୍ଚାତାନ୍ନା, ଇବେଣ୍ ହେୱାରିଙ୍ଗ୍ ୱେଚା।” 20ହେବେତାଙ୍ଗ୍ ହେୱାନ୍ ତା ନାସ୍ ହାଲ୍ଜି, ଯୀଶୁ ତା କାଜିଙ୍ଗ୍ ଇନା-ଇନା କାମାୟ୍ କିଜି ମାଚାନ୍, ହେ ବେଣ୍ ପାଡ଼୍ହା ପାଡ଼୍ହି ଦଶ୍ଗଟା ସହର୍କୁକାଙ୍ଗ୍ ୱେଚ୍ଚି ବୁଲାଆତାନ୍, ଇୱିଜୁ ସହର୍କୁକାଙ୍ଗ୍ ଦେକାପଲି ଜିଲ୍ଲା ଇନାର୍। ଇନେର୍ ତା ବେଣ୍ ୱେଚାକାର୍ ୱିଜାର୍ କାବା ଆତାର୍।
ହାଃତି ଗାଡ଼୍ଚେ ଜିବୁନ୍ ଆତାତ୍ ବିଟାଡ଼୍ ରଗ୍ଆତାକା ହାର୍ ଆତାତ୍
(ମାଥି. ୯:୧୮-୨୬; ଲୁକ. ୮:୪୦-୫୬)
21ଯୀଶୁ ଆରେରଗ ଡଙ୍ଗାତାକେ ଗାଲିଲୀ ଜିଲ୍ଲାନି ହାମ୍ଦୁର୍ ନାସି ଆରେ ର ପାଡ଼୍କା ହାଚାନ୍, ହେ ହାମ୍ଦୁର୍ କାଣ୍ଡିତାକେ ବେସିହେନି ମାନାୟ୍ ଯୀଶୁତାକେ ରୁଣ୍ଡାଆତାର୍। 22ଯୀଶୁ ଇବେଣ୍ ୱେଚ୍ନିହିଙ୍ଗ୍ ଯିହୁଦିର୍ ପାର୍ତାନା ଇଲ୍ନି ମୁକ୍ୟା ଯାଇରସ୍ ୱାତାନ୍, ହେୱାନ୍ ୱାଜି ଯୀଶୁଙ୍ଗ୍ କାଲ୍ ତାରେନ୍ ସାରାଣ୍ ଏନ୍ତାନ୍, 23ଆରେ, ବେସି ଗୁୱାରି କିଜି ୱେଚ୍ଚାନ୍, “ମାଞ୍ଜ୍ କଇ ହାନାତ୍ଦେ। ହେଦେଲ୍ ଇନେସ୍ କିଜି ରକ୍ଷା ପାୟାଆନାତ୍ ହେଦାଙ୍ଗ୍ କାଜିଙ୍ଗ୍ ଏନେଙ୍ଗ୍ ମାଞ୍ଜ ୱାଜି ମାଞ୍ଜ୍ କଇଙ୍ଗ୍ ଆସ୍ପି ହାର୍ କିୟା, ଇନେସ୍କି ହେଦେଲ୍ ହାଃନାକା ଜିନାତ୍।”
24ଯୀଶୁ ତା ହୁଦାଙ୍ଗ୍ ହାନିହିଙ୍ଗ୍ ମାନାୟାର୍ ଯୀଶୁ ପାଚେ-ପାଚେ ହାଚାର୍, ଆରେ ତା ଜପି ତିବ୍ଗା ତିବ୍ଗି ଆଜି ମାଚାର୍। 25ହେ ମାନାୟ୍ ଗଉଲି ବିତ୍ରେ ର କଗ୍ଲେ ମାଚାତ୍ ହେଦେଲିଙ୍ଗ୍ ବାର ବାର୍ହୁ ପାତେକ୍ ବିଟାଡ଼୍ ରଗ୍ ଆସ୍ତି ମାଚାତ୍। 26ହେ କଗ୍ଲେ ଡାକ୍ଟର୍ ତାକେ ହାଲ୍ଜି ଡାବୁଙ୍ଗ୍ ୱିସ୍ତି ଚେକ୍ କିୟା ଆଜିମାନାତ୍, ମାତର୍ ହେଦେଲ୍ ହାର୍ ଆୱାଦାଙ୍ଗ୍ ଆଦିକ୍ହେ ଜବର୍ ଆଜିମାଚାତ୍। 27ହେ ବିଟାଡ଼୍ ରଗ୍ ଆହିଆତି କଗ୍ଲେ ଯୀଶୁ ମାନାୟାରିଙ୍ଗ୍ ହାର୍ କିତି କାମାୟ୍ନି ବେଣ୍ ୱେନ୍ଞ୍ଜି ମାନାୟ୍ ଗଉଲି ତାକେ ପାଚ୍ବାଗାୟ୍ ୱାଜି ତା ହେନ୍ଦ୍ରାତିଙ୍ଗ୍ ଆସ୍ପାତାତ୍। 28ଇନେସ୍କି ହେ ବିଟାଡ଼୍ ରଗ୍ ଆହିଆତି କଗ୍ଲେ ବାବିକିଜି ମାଚାତ୍, “ଆନେଙ୍ଗ୍ ଯୀଶୁ ଉସ୍ପିତି ହେନ୍ଦ୍ରାତିଙ୍ଗ୍ ଆସ୍ପିତିସ୍ ରକ୍ଷା ପାୟା ଆତାଙ୍ଗ୍ମା।” 29ହେଦେଲ୍ ଯୀଶୁ ଉସ୍ପିତି ହେନ୍ଦ୍ରାତିଙ୍ଗ୍ ଆସ୍ପିତି ଦାପ୍ରେ ତା ବିଟାଡ଼୍ ରଗ୍ତାଙ୍ଗ୍ ହାର୍ ଆତାତ୍, ଆରେ, ହେଦେଲ୍ ହେ ରଗ୍ତାଙ୍ଗ୍ ରକ୍ଷା ପାୟା ଆତାଙ୍ଗ୍ମା ଇଞ୍ଜି ପୁଚାତ୍।
30ହେଦାପ୍ରେ ଯୀଶୁ ଜାର୍ ଶାକ୍ତିତାଙ୍ଗ୍ ର ମାନାୟ୍ ହାର୍ଆତାକା ପୁନ୍ଞ୍ଜି, ମାନାୟ୍ ଗଉଲି ମାଦି ବୁଲାଆଜି ୱେନ୍ବାତାନ୍, “ନା ହେନ୍ଦ୍ରା ଇନେର୍ ଆସ୍ପାତାର୍?”
31ତା ଚେଲାହିର୍ ଯୀଶୁଙ୍ଗ୍ ୱେଚ୍ଚାର୍, “ଏନେଙ୍ଗ୍ ତ ହୁଡ଼୍ନାୟା ମାନାୟ୍ ଗଉଲି ନି ଚାରିବେଣ୍ତାଙ୍ଗ୍ ତିବ୍ଗା ତିବ୍ଗି ଆନାରା, ଆରେ ଏନେଙ୍ଗ୍ ୱେନ୍ବାଆଦ୍ନାୟା ଇନେର୍ ନାଙ୍ଗେଙ୍ଗ୍ ଆସ୍ପା ଆତ୍ତାର୍?”
32ମାତର୍ ଯୀଶୁଙ୍ଗ୍ ଇନେର୍ ଆସ୍ପାତାର୍ ହେଦାଙ୍ଗ୍ ପୁଞ୍ଜେଙ୍ଗ୍ ଚାରିବେଣ୍ତାଙ୍ଗ୍ ଇଟ୍କାଡ଼୍ କିତାନ୍। 33ହେ କଗ୍ଲେ ପୁଚାତ୍ କି ଯୀଶୁ ସାକ୍ତିତାଙ୍ଗ୍ ଆନେଙ୍ଗ୍ ହାର୍ ଆତାଙ୍ଗ୍ନା, ହେଦାଙ୍ଗ୍ କାଜିଙ୍ଗ୍ ଯୀଶୁ ଲାଗାୟ୍ ହାଲ୍ଜି ମେଣ୍ଡାକୁନ୍ଦି କିତାତ୍। ଆରେ ପାଣ୍ଡ୍ରୁତିଙ୍ଗ୍ ତ୍ରିଗ୍ଜି-ତ୍ରିଗ୍ଜି ଯୀଶୁଙ୍ଗ୍ ଆସ୍ପି ହାର୍ଆତି ୱିଜୁବେଣ୍ ୱେଚ୍ଚାତ୍। 34ହେବେତାଙ୍ଗ୍ ଯୀଶୁ ହେ କଗ୍ଲେଙ୍ଗ୍ ୱେଚ୍ଚାନ୍, “ଏ କଇ, ଏନେଙ୍ଗ୍ ନାଙ୍ଗେଙ୍ଗ୍ ପାର୍ତି କିତ୍ତାୟ୍ ହେ ପାର୍ତି ନିଙ୍ଗେଙ୍ଗ୍ ହାର୍ କିତ୍ତାତ୍, ଆରେ ଏନେଙ୍ଗ୍ ନି ରଗ୍ତାଙ୍ଗ୍ ହାର୍ ଆତାୟ୍, ନଙ୍ଗୟ୍ ଏନେଙ୍ଗ୍ ଶାନ୍ତିତାଙ୍ଗ୍ ହାଲା।”
35ଯୀଶୁ ହେ କଗ୍ଲେ ହୁଦାଙ୍ଗ୍ ବେଣ୍କିନିହିଙ୍ଗ୍, ପାର୍ତାନା ଇଲ୍ନି ମୁକ୍ଯା ଯାଇରସ୍ ଇଞ୍ଜାଙ୍ଗ୍ କେତେକ୍ ମାନାୟ୍ ୱାଜି ଯାଇରସ୍ ତିଙ୍ଗ୍ ୱେଚ୍ଚାର୍, “ମିଞ୍ଜ୍କଇ ହାତାତେ। ଗୁରୁଙ୍ଗ୍ ଇନା କିଦେଙ୍ଗ୍ ଆରେ ହଇରାଣ୍ କିନାୟା?”
36ମାତର୍ ଯୀଶୁ ହେ ବେଣ୍ ୱେନ୍ଞ୍ଜି ୱେନ୍ୱିତି ଲେକେ ପାର୍ତାନା ଇଲ୍ନି ମୁକ୍ଯା ଯାଇରସ୍ ତିଙ୍ଗ୍ ୱେଚ୍ଚାନ୍, “ପାଣ୍ଡ୍ରାଆମା ମାତର୍ ନାଙ୍ଗେଙ୍ଗ୍ ପାର୍ତି କିଦା।” 37ତାପାଚେ ଯୀଶୁ ଯାଇରସ୍ ହୁଦାଙ୍ଗ୍ ପିତର, ଯାକୁବ ଆରେ ତା ଟଣ୍ଡାହି ଯୋହନ୍ତିଙ୍ଗ୍ ଇ ତିନ୍ଜାଣ୍ ତିଙ୍ଗ୍ନେ ତା ଲାହାଙ୍ଗ୍ ହାଞ୍ଜେଙ୍ଗ୍ ୱେଚ୍ଚାନ୍, ଆରେ ଇନେରିଙ୍ଗ୍ ପା ବିତ୍ରେ ଅୱାତାର୍। 38ଯୀଶୁ ପାର୍ତାନା ଇଲ୍ନି ମୁକ୍ଯା ଯାଇରସ୍ ଇଞ୍ଜ ୱାତାନ୍। ଆରେ ହେୱାନ୍ ହେବେ ଆଦିକ୍ କାକୁଲ୍ତି ଆଜି ଆଡ଼୍ବାନାକା ହୁଡ଼୍ତାନ୍। 39ଯୀଶୁ ଇଲ୍ ବିତ୍ରେ ହାଲ୍ଜି ହେୱାରିଙ୍ଗ୍ ୱେଚ୍ଚାନ୍, “ଏପେଙ୍ଗ୍ ଏଲେଙ୍ଗ୍ କାକୁଲ୍ତି ଆଜି ଆଡ଼୍ବାମାଟ୍। ଗାଡ଼୍ଚେ ହାଃୱାତାତ୍ନା ମାତର୍ ହୁନ୍ଞ୍ଚାତ୍ନା।”
40ଇବେଣ୍ ୱେନ୍ଞ୍ଜି ଯୀଶୁଙ୍ଗ୍ କିଜ୍ରାଇ କିଜି ଗାଇତାର୍। ମାତର୍ ଯୀଶୁ ଗାଡ଼୍ଚେ ତେହି ଲାତ୍ରାହି ଆରେ ତା ତିନ୍ଜାଣ୍ ଚେଲାହିରିଙ୍ଗ୍ ପିସ୍ତି ୱିଜାକାରିଙ୍ଗ୍ ବାର୍ତି ହପ୍ତାନ୍, ତାପାଚେ ଗାଡ଼୍ଚେ ହୁନ୍ଚି ବାକ୍ରାତ ହାଚାର୍। 41ଆରେ ହେୱାନ୍ ଗାଡ଼୍ଚେ କେଇ ଆସ୍ତି ୱେଚ୍ଚାନ୍, “ଟଲିଥାକୁମ୍!” ଇଚିସ୍ ଏ କଇ, “ଆନେଙ୍ଗ୍ ୱେଚ୍ଚାନାଙ୍ଗା, ଏନେଙ୍ଗ୍ ନିଙ୍ଗା!” 42ହେଦାପ୍ରେ ଗାଡ଼୍ଚେ ନିଙ୍ଗ୍ଞ୍ଜି ତାଙ୍ଗ୍ଜି ବୁଲାଆଦେଙ୍ଗ୍ ହାଙ୍ଗ୍ତାତ୍, ତା ବୟସ୍ ବାର୍ ବାହ୍ରୁ ଆଜି ମାଚାତ୍। ଇ ଗଟ୍ନାତିଙ୍ଗ୍ ହୁଡ଼୍ଜି ୱିଜାକାର୍ କାବା ଆତାର୍। 43ଯୀଶୁ ଗାଡ଼୍ଚେ ତେହି ଲାତ୍ରାହିଙ୍ଗ୍ ଆଦେସ୍ ହିଜି ୱେଚ୍ଚାନ୍, “ହାଃତି ଗାଡ଼୍ଚେଙ୍ଗ୍ ଜିବୁନ୍ କିତାନ୍ ଇଞ୍ଜି ଇନେରିଙ୍ଗ୍ ପା ୱେଚ୍ମାଟ୍।” ଆରେ ଯୀଶୁ ତେହି ଲାତ୍ରାହିଙ୍ଗ୍ ୱେଚ୍ଚାନ୍, “ଗାଡ଼୍ଚେଙ୍ଗ୍ ଇନାକାପା ଚିଞ୍ଜେଙ୍ଗ୍ ହିୟାଟ୍।”
Atualmente Selecionado:
ମାର୍କ 5: PEGNT
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
