Luk 20

Wa laa Jézu lee léé, de ɛ se kɛlɛ a lɛɛ?

(Mt 21:23–27; Mk 11:27–33)

1’Bɛ yinu la yi do nya, Jézu ke aan wo we paana munu gi Balebangikɔn gi ’té éé wenéné fé, Balebanmunu segelenu koo, sɛbɛgifemunu koo, mi segelenu koo, wo da a va, 2yé wo lé a lɛ léé: Se kaa nya lé i we ’konu kɛlaa? Yé mi kyɛn ɛ se ’ko kɛlɛ i lɛɛ? ’Bé fe ko lɛ. 3É lé wo lɛ léé: Maa dan we do laa lɛ ka lee é ziin. 4De ɛ Jan nwunvɔ munu batizéwonaa? Kazambale lé laa, munu léé? ’Ka a gi fe an lɛ. 5Yé wo ’wo va we ble yé wo léé: Dé ko fe léé, Kazambale ɛ a nwunvɔ, é dan fe lɛ léé: Mɛmalé ka ’ka ka bli vo lɛ a lɛ loo? 6Munu faa éé Jan yé balelayezan nya, bɛwemalé dé ko fe léé, munu ɛ nwunvɔ, munu faa é dan ko gyɛ lɛ gɔlɛ nya. 7Amalé wo léé, ’wo ’ka a gi dɔɔa lo. 8Yé Jézu lé wo lɛ léé: Maa é ziin, sean nya lé maa we ’konu kɛla, maa ’ka dan a gi fe lɛ ka lɛ lo.

Dɔrɔféi ma gɔné vɔle

(Mt 21:33–46; Mk 12:1–12)

9’Bɛ zuo Jézu kun gɔné do vɔle ma munu lɛ yé é léé: Gɔnézan do dɔrɔféi pa. É a bɛ pa féinwiinzannu lee, yé é go tɛrɛ bɛ la yé é mɔn ana mi. 10Dé dɔrɔporo sobléyi bɔ, é ’é wuozan do pa zia féinwiinzannu va, wolé féifɛ ke nɔle a lɛ we gi. Naa, féinwiinzannu a bla yé wa pa zia é lee koro nya. 11Yé é wuozan do pa é ziin zia, yé wo ’bɛ bla, yé wo ’bɛ sɔnɔ yé wo ’bɛ pa zia é lee koro nya. 12Yé é a yaazan pa é ziin zia yé wo ’bɛ tuo yé wo ’bɛ bin. 13Dɔrɔféizan léé: Maa dan a kɛlɛ lɛ kaa? An be lé é sɔ an lɛ, maa dan ’bɛ nwunvɔ lɛ; naa, dé wo dan ’bɛ lɛdɔ lɛ a maa? 14Naa, féinwiinzannu a ye aan wo, wo vo ’wo va weblena yé wo léé: A zarablezan lé ke ’ko; kaa a gyɛ, yé a zara ’é vo kaa lɛ. 15Yé wo go a be nya féi gini ma yé wa gyɛ. Sin, dɔrɔféizan é dan mɛ ɛ kɛlɛ lɛ wo lɛɛ? 16É dan da lɛ yé é féinwiinzannu ’konu gyɛ zamaga nya, yé é dɔrɔféi bɛ pa mi bɛnu lee.

Wo ’bɛ ’ma aan wo, wo léé: Té ’bɛ é kɛlɛ lo ma. 17Naa, Jézu wo nagini yé é léé: We lé wa gyɛ sɛbɛ gi léé:

Gɔlɛ lé kɔndɔmunu sɔn vɔ a ma

É kɛlɛ kɔnsungɔlɛ nya,

’bɛ gi lé nɔɔ? 18Mian é dia gɔlɛ ’ko ta, azan é dan ’wii lɛ, yé mian gɔlɛ ’ko dia a ta, azan pun é dan bo lɛ.

19Balebanmunu segelenu valé sɛbɛgifemunu a kwa kulina léé, wa kun a bléyi duo nya, naa, wa kanana munu lee. Wa ’ma léé, ’wo ma gɔné lé Jézu ke a vɔna, azama.

Gɔɔli banwole Sézaa lɛ

(Mt 22:15–22; Mk 12:13–17)

20Wa ’wozé zi ginina, yé munu lé ’bɛnu ’wobo kɛlɛ mi tegele zo, wo ’bɛnu pa zia léé, wo dia Jézu zi yé wa kun ébo dére ma yé wa nɔ minwiinmunu valé gbɔrɔnama lɛ. 21Munu ’ko we laa a lee léé: Kozan, ko a gi dɔɔ léé, i we fé yé i we paan munu gi tegele, yé i ’ka mi naginian é kɔlɛ ma lo, yé i Kazambale lé zi gɔɔn‐an munu lɛ webozen yɛrama. 22A se a ko lɛ léé, ko gɔɔli banwo Sézaa lɛ laa, té ko a banwo loo? 23Jézu wolé dabli dére dɔɔ yé é lé wo lɛ léé: 24’Ka dénié do nagɔɔn an lɛ. Foto ’ko valé sɛbɛgyɛle ’ko, de zé léé? Yé wo léé: Sézaa zé lé. 25Yé é lé wo lɛ léé: Amalé ’ka Sézaa zé fɛ nɔ Sézaa lɛ, yé ’ka Kazambale zé fɛ nɔ Kazambale lɛ. 26Wo ’ka a kunmawe ye lɛ a dérenu ma munu yuɛ va lo; naa, wo gi vuru alé we zi pale ma, yé wo vo é tadɔle.

Wo mi nwale gale va lé we laa Jézu lee

(Mt 22:23–33; Mk 12:18–27)

27Sadusémunu léé, mi ’ka nwaan gale va lo. Wo va mi kenu da Jézu va yé wo we ’ko laa a lee léé: 28Kozan, wean Moizi ko béli dɔ a nya, yee lé é ke ’ko: dé mi bwe ga dé a na a, yé alé né ’ka lo, é a lé a zuané a zara le si é bwe kulu bɔrale we ma. 29Naa, mi do benu a sɔrafié. A vininzan le si, yé ’bɛ ga yé a kulu ’ka vo lɛ a zuo lo. 30A fiézan a zara le si, 31yé a yaazan yee gyɛzara le duo si; wo sɔrafié faa a kɛlɛ yee ɛ zo, yé wo ga yé wo kulu ’ka vo lɛ wo zuo lo. 32’Bɛ zuo yé lezan ga. 33Naa, wo sɔrafié faa na lé é kyɛn, amalé gamunu nwabléyi va ’naan, é dan kɛlɛ lɛ wo va mi kyɛn ɛ na nyaa? 34Jézu lé wo lɛ léé: Bléyi ’ko vamunu éé le sié, ’té woo bo sié; 35naa, munu lé a yara lé ’wo tɛlɛ tɛlama we na ye yé wo nwa gale va bɛ, wo ’ka dan le si lɛ lo, yé wo ’ka dan bo si lɛ lo. 36Naa, wa bélé lanjenu zo, wa nwaga?-?munuvazannu nya amalé wa Kazambale benu nya, yé wo ’ka bɔa gale lɛ é dɛrɛ lo. 37Yiliné kyɛblele lé we kɛlɛ bléyian va, Moizi a nagɔɔn léé, mi éé nwaan gale va. É Mizambale laa, Abraam lé Bale, Izak lé Bale, Jakɔb lé Bale. 38Naa, dé Kazambale a mi do lé Bale nya, ’té azan a é yuɛma, dé é gaoo, é a é yuɛma duowo; naa, mi faa a mi yuɛmale nya Kazambale yuɛ gi. 39Sɛbɛgifemunu va mi kenu we fe yé wo léé: Kozan, bé fe é zima. 40Yé é ’ka dɔ lɛ wo gi léé, wo we do kpen laa a lee é dɛrɛ lo.

Jézu laale David be

(Mt 22:41–46; Mk 12:35–37)

41Jézu lé wo lɛ léé: Mɛmalé munu léé, Krist a David Be nyaa? 42Lɛrɛvɔ Sɛbɛ gi David bozen léé:

Mizambale lé anzan lɛ léé:

’I nyana an bɛyila

43Fɔɔ yé maa i nyanézannu pla i wuo.

44David Krist laa ’ézan ’naan, é kɛlɛ kaa yé Krist kɛlɛ David be nyaa?

Jézu sɛbɛgifemunu gi bɔra

(Mt 23:1–36; Mk 12:38–40; Lk 11:37–54)

45Bléyian va lé munu faa ke ’wo tɔné dɔna, é lé é zuomunu lɛ léé: 46’Ka yuɛ pa kabozen va sɛbɛgifemunu lé we ma; dɔwole varɔ grɔgrɔnu nya ’wo ta valé mi wele ’wo va gɔrɔ la sɔ wo lɛ; é sɔ wo lɛ léé, ’wo nyana bazorokɔnnu gi zi ’lɛ blinnu valé fɛti kɛlɛna zi ’lɛ blinnu ta; 47woo gyɛzaralomu lé kɔngifɛnu sié wo lee, ’té woo ba grɔgrɔnu zoroan munu lé wo yele we gi; ’ka yuɛ pa kabozen va wolé we ma. We lé é mini gwɛn ta, wo dan a ye lɛ.

Atualmente Selecionado:

Luk 20: GOURU

Destaque

Copiar