Luk 18

Gyɛzarale valé weblezan ma gɔné vɔle

(WP 32:24–29; Mk 7:24–30)

1Jézu gɔné do vɔ wo lɛ a gɔɔnle wo lɛ we gi léé, é a lé ’wo bazoro yifaama, té wo daan a ma lo. 2É léé: Weblezan do a fla do la; é ’ka kanaan Bale lee lo, yé mi do kpen lé we ’ka a yuɛ gi bɔa lo. 3Yé gyɛzara le do a é ziin yee fla duo ta, ’té ’bɛ éé dan a va, ’té ’bɛ a fé a lɛ léé: ’I maa valé an nyanézan lé we ble. 4Gɔnɔ kiɛre nya é ’ka a nyi si lɛ lo. Naa, ’bɛ zuo é lé é bli gi léé: Dé an ’ka kanaan Bale lee looo, dé mi do kpen lé we ’ka an yuɛ gi bɔa looo, 5maa ’ka flina yena le ’ko lee lo, bɛwemalé maa dan alé we ble lɛ, dé é da vo dana an va yifaama yé an wɔlɛ gi é nyaa. 6Mizan we taa fe, yé é léé: We lé weblezan ple ’ko ke a fena, ’ka ’ma ma. 7Yé munu lé Bale wo si a va ézé nya, ’té woo siaan a lɛ bladi nyanadi, é ’ka dan wo nyanémunu lé we ble lɛ loo? É dan mɔn lɛ faa ’lɛ yé é wolé we blee? 8Maa lé ka lɛ léé, é dan ’bɛnu lé we ble lɛ é kele. Naa, dé maa blami Be da, dé an dan bɔ lɛ blipamunu ma tɛrɛ laa?

Farizimi valé vagɔɔlisizan ma gɔné vɔle

(WGV 28:9, 13; 30:12–13)

9Yé é gɔné do vɔ é ziin, mi kenu lé é a wo gi léé, ’wa tegele ’té wo ’ka mi bɛnu yé mi nya wo yuɛ gi lo, wolé we ma. 10É léé: Mi fié go bazoro lɛ Balebangikɔn gi; a do a Farizimi nya, yé a do a vagɔɔlisizan nya. 11Yee lé ke Farizimi nya, é dɔ loru, yé é bazoro ébo lɛ ’ko zo, léé: Oo Bale, maa i bɔ vɔa léé, maa ’ka bélé mi pɔnénu lé wo ke mitablezannu koo, mi plenu koo, leginizannu koo, é ziin vagɔɔlisizan ’ko koo, wo zo lo; 12maa lɔrɔ sɔn‐o flɛyi do gɔnɔ fié; fɛnu faa lé maa wo yé, maa wo vuzan no i lɛ. 13Mi lé ’bɛ ke vagɔɔlisizan nya, ’bɛ dɔ baa, yé é ’ka dɔ lɛ ’bɛ gi boenwo lé é yara nwa la gi zia lo; naa, é kun é ’wuo ma ’té éé a fé léé: Oo, Kazambale, ’i nyanai zén maa wenyanékɛlɛzan ta. 14Maa lé ka lɛ léé, mi ’ko go élé kɔn ’léé mi tegele nya, é mini é bɔluzan ta. Naa, dé mian ébo nwaan blɛn wo dan a tua lɛ, yé mi lé ébo tuaan wo dan a nwa lɛ blɛn.

Jézu nénu drɔɔ vo

(Mt 19:13–15; Mk 10:13–16)

15Munu da é ziin né liinénu nya Jézu va, léé, ’é bɛ mane wo ma. Naa, a zuomunu we ’ko ye aan wo, wo we ble munu lé wo da nénu nya, wo va. 16Yé Jézu nénu laa ’wo da é va, yé é léma: ’Ka nunukénénénu vo, ’wo da an va. Té ka wo dale an va yi ga lo; naa, munu lé wo ke bélé nénu zo, Kazambale a é plale wo nwiin. 17Maa fe ka lɛ webozen nya léé, dé miomian é ’ka Kazambale plale é nwiin nyi sié bélé né kiéné zo lo, é ’ka dan wɔra lɛ Bale va lo.

Fuablezan lé we

(Mt 19:16–30; Mk 10:17–31)

18Minwiinzan do we laa Jézu lee léé: Anzan zin, maa kɛla kaa yé an vo é yuɛma lɛɛfaama yé a glɛ ’ka dɔa loo? 19Yé Jézu lé a lɛ léé: Mɛmalé i an laan mi ziin? Kazambale do kpen ɛ ke é zin. 20I bélidɔwenu dɔɔ: Té i le bɛ gini lo, té i mi gyɛ lo, té i kyeenwo lo, té i viéwo mi ma lo, i ti valé i bu lɛdɔma, woo lé. 21Gɔnézan léé: An we ’konu faa kɛlɛle pélisia ’té maa a pɛniɛné nya. 22Jézu ’bɛ ’ma aan wo yé é lé a lɛ léé: Ilé we do vo é ziin. ’Ilé fɛnu faa dan, yé bé mafɛ guli nyanégyɛmunu ma, yé i dan fɛwezan ye lɛ la gi. Dé i nyaa a nya faa ’i da an zuo. 23É fua ble é baba, bɛwemalé é dére ’konu ’ma aan wo a bli kyɛ dɔ. 24Jézu a ye aan wo léé, a bli kyɛ dɔ, é léé: Munu lé fuafɛnu ke wo lee, wo plale Kazambale wuo a wo ma tɔntɔn. 25Fuablezan plale Kazambale wuo a tɔntɔn é mini nyɔgɔmé wɔrale sɔ béé sééné yɛrɛ gi ta. 26Munu lé wo ke ’wo tɔné dɔna a lɛ, wo léé: De ɛ bɔalɛ léé, é si we gii? 27Jézu léé: We lé munu ’ka bɔa a kɛlɛle lɛ lo, Kazambale é bɔa a lɛ.

28Yé Piɛre léé: Bé ye, ko daan kolé fɛ faa ma yé ko da i zuo. 29Yé Jézu lé wo lɛ léé: Maa fe ka lɛ webozen nya léé, mian éé daan élé fɛnu ma, dé alé kɔn léé, dé a na léé, dé a bwenu léé, dé a lelenu léé, dé alé nénu léé, mi lé é daan wo ma Kazambale plale a nwiin lé we ma yé é ’ka wo lɛgi yé kiɛre yé é mini wo ta lao lo, ’bɛzan ’ka lo, 30yé alé tɛrɛla nyaale zuo é dan vo lɛ é yuɛma lɛɛfaama ’bɛ glɛ ’ka lo.

Jézu é gale fale vɔ a gɔnɔ yaazan nya

(Mt 20:17–19; Mk 10:32–34)

31Jézu mi vu ta fié bié ’é sɔnɔ yé é lé wo lɛ léé: Ka ye, kaa a gona Jérusalɛm yé we faa lé balelayemunu a gyɛ maa blami Be lé we ma, a lɛ é dan sɔɔ lɛ. 32Wo dan an nɔ lɛ bɛn bɛnu lɛ; wo dan an ma we nana lɛ; wo dan an sɔnɔ lɛ; wo dan ’wo ’lélibɔlɛ vɔ lɛ an ma, 33yé an blale wɛsɛné nya zuo wo dan an gyɛ lɛ; yé yi fié a yaazan nya an dan nwa lɛ gamunu va. 34Naa, wo ’ka we do kpen ’ma lɛ ’bɛ gi lo. ’Bɛ a wo ma we yɔɔle nya yé wo ’ka a dére gi ’ma lɛ lo.

Jézu yuɛwiizan béli Jériko sɔnɔ

(Mt 20:29–34; Mk 10:46–52)

35Jézu bɔ aan wo Jériko sɔnɔ, ’té yuɛwiizan do a é nyanale zi péli ta, ’té éé fɛ doro paan. 36É munu giéle vun ’ma aan wo yé é léé: Mɛ léé? 37Yé wo lé a lɛ léé: Nazarɛtzan Jézu ɛ ke giéna. 38Yé é siaa léé: David be Jézu, ’i nyanai zén an ta. 39Munu lé wo ke tawona zi ’lɛ, wo siaa a ta léé, ’é tadɔ. Naa, é siaa taawo plɛplɛ é ziin léé: David be, ’i nyanai zén an ta. 40Yé Jézu dɔ yé é lé munu lɛ léé, ’wo da a nya. É bié aan wo Jézu sɔnɔ yé ’bɛ a laa a lee léé: 41É sɔ i lɛ léé, maa mɛ ɛ kɛlɛ i lɛɛ? É léé: Mizan, an yuɛ ’é fuo ma. 42Jézu lé a lɛ léé: I yuɛ ’é fuo ma; ilé blipale ma lé i béli. 43’Bɛna tɔɔn, a yuɛ fuo yé é go Jézu zuo Kazambale tɔ zin bɔle nya. Munu faa ’bɛna ye aan wo, wo Kazambale tɔ zin fe.

Atualmente Selecionado:

Luk 18: GOURU

Destaque

Copiar