Luk 12

Té mi ébo drɔ lo

(Mt 16:6–12; 10:16–39)

1’Bɛ bléyi ’ko wuo, mi wuru é wuru boen zén ékeva, yé é vo sɛ yé wo wo ke zɔn wo gane nya, yé Jézu kun wefele ma é zuomunu lɛ é vinin yé é léé: ’Ka yuɛ pa kabozen va, Farizimunu lé lévɛn lé é ke mi lé ’ébo drɔle nya, alé we ma. 2Fɛ lé ke é yɔɔle yé a ta ’ka dan bɔra lɛ lo, ’bɛ fɛ ’ka lo, yé kyeengiwe lé, ’bɛ ’ka dan bɔra lɛ lo, ’bɛ ’ka lo. 3Bɛwemalé we faa lé ka fé é béli, é dan kɛlɛ lɛ yiéyi we nya, yé we lé ka fé mi tɔné gi kɔnmi zi, wo dan siaa lɛ a nya kɔn nwiin.

Mi kanamazan

(Mt 10:28–31)

4’Kaa lé ka ke an béénu nya, maa lé ka lɛ léé, wo lé woo mi kɔlɛ gya, yé ’bɛ zuo wo ’ka bɔa we bɛ kɛlɛle lɛ lo, té ka kana wonu lee lo. 5Mi lé é a lé ka kana a lee, maa dan ’bɛzan nagɔɔn lɛ ka lɛ. Mi lé dé é mi kɔlɛ gyɛ faa, a vulile jéɛna kyɛ va se ke a lɛ, a lee lé ’ka kana ma; iin, maa lé ka lɛ léé, mi lé é a lé ka kana a lee, yee lé é ke bɛ. 6Wo ’ka gbé soru daan su fié va loo? Naa, Kazambale gi ’ka é sanle wo va gbé do kpen ma lo. 7Yé ka nwun gɔ faa a é nɔnɔle. Bɛwemalé té ka kana lo; ka wea é mini gbé kiɛre ta.

Krist tɔ bɔrale munu va

(Mt 10:32–33; 12:32; 10:19–20)

8Maa lé ka lɛ léé, mian é an tɔ bɔraan munu va, maa blami Be maa dan a tɔ bɔra lɛ é ziin Kazambale lé lanjenu va; 9naa, mi lé é an tɔ yɔɔan munu va, maa dan ’bɛzan tɔ yɔɔ lɛ Kazambale lé lanjenu va.

10Dé mian wenaané fe maa blami Be ma, Bale é dan a ma we vo lɛ; naa, mian é Léli Sauun sɔnɔ, Bale ’ka dan a ma we vo lɛ lo.

11Dé wo go ka nya bazorokɔnzannu koo, mi segelenu koo, minwiinmunu koo, wo ’lɛ, dére lé ka dan a fe lɛ, é valé kalé wefebɛ, té ka ’bɛ gi bɔrɔ pa lo. 12We lé é a lé ka a fe, Léli Sauun ɛ dan a pa lɛ ka ’léé ’bɛ bléyi va.

Fuablezan lé é ke ’tugyɛzan nya, a ma gɔné vɔle

(BWgfz 8:9; 9:12; Jér 9:23–24)

13Mi gu va mi do lé Jézu lɛ léé: Anzan, ’bé fe an bwe lɛ léé, zarafɛnu lé wo vo ko lee, ’é a guli maa valé yee ma. 14Jézu lé a lɛ léé: Gɔnézan, de ɛ an dɔ kalé weblezan valé kalé fɛgulizan nyaa? 15A zuo é lé wo lɛ léé: ’Ka yuɛ pa kabozen va é zima blibɔle fɛnu ma lé we ma. Dé mi lé fɛnu a dioo, a vole é yuɛma ’ka sié ’bɛ va lo. 16Yé é gɔné do vɔ wo lɛ yé é léé:

Fuablezan do lé féi fɛ kɛlɛ di. 17Yé é ’wuo gi bɔrɔ yé é léé: Maa kɛla kaa? Naa, anlé féifɛnu zénna ’ka lo. 18Yé é léé: Maa kɛla ’ko zo: an dan anlé fɛ?-?tadɔkɔnnu ’wii lɛ, yé an dan kɔn blɛnnu dɔ lɛ; an dan anlé féifɛnu faa valé anlé fuafɛ bɛnu faa zén lɛ wo gi, 19yé maa dan a fe lɛ anboen lɛ léé: Anboen, ilé fɛnu ta a é dɔle lɛɛ kiɛre zé nya; ’i nyana, ’i fɛ ble, ’i fɛ mini, i gi ’é nana ma. 20Naa, Kazambale lé a lɛ léé: ’Tugyɛzan, kyɔ é béli ’ko, maa dan i laa lɛ; yé fɛnu lé i wo tadɔ bɛ, wo dan kɛlɛ lɛ de ɛ zé nyaa? 21Mi lé éé fɛwezannu zun dɔa ébo zé nya, yé é ’ka fɛwezannu tadɔa Kazambale va lo, a zo lé alé we ke.

Gibɔrɔpale

(Mt 6:25–34; 1 Tim 6:6–8; Ébr 13:5)

22A zuo Jézu lé é zuomunu lɛ léé: Bɛwemalé maa lé ka lɛ léé, té ka kalé tɛrɛla gi bɔrɔ pa lo, dé ka dan mɛ fɛ ble lɛɛ? Té ka ka kɔlɛ gi bɔrɔ pa lo, dé ka dan mɛ fɛ zén lɛ ka taa? 23Mi lé tɛrɛla mini fɛblele ta yé mi kɔlɛ mini sɔnu ta. 24’Ka kanwéinu nagini do. Wo ’ka fɛ do féi paan lo, yé wo ’ka fɛ do kulian lo, wolé ’saboo valé wolé ’sakɔn ’ka lo; yé Kazambale éé blefɛ no wo lɛ. Ka we ’ka mini lɛ mianénu lɛ loo? 25Ka va mi kyɛn ɛ bɔalɛ yé alé gi bɔrɔ pale a yi do zén a vaa? 26Amalé dé ka ’ka bɔa we kiiéné kɛlɛle lɛ lo, mɛmalé ka we koɛnu gi bɔrɔ paan? 27Bolu lé goo éé tin‐é fɛan zo, ’ka gi bɔrɔ ’bɛ ma do. Wo ’ka nyanama paan lo yé wo ’ka kununu zunwo lo. Naa, maa fe ka lɛ, Salomɔn bozen lé fua faa gi é ’ka sɔ zima zén lɛ é ta bélé bolu lé goo vwi zo lo. 28Bli pa Bale lɛ kiiéné zannu. Dé Kazambale éé sɔ zén‐é féi lunu ta ’bɛ zo, woo lé wo ke ana kyɔ yé tɛlɛ wo wo vuli ’furu gi, é ’ka dan kazé mini lɛ wozé ta loo? 29Yé ’kaa, té ka blefɛ valé minifɛ nagini lo, yé té ka wo gi bɔrɔ pa lo. 30Fɛ ’konu faa lé kwa lé tɛrɛlamunu ke a kulina. Naa, ka Ti a gi dɔɔ léé, ka mawe a wo gi. 31Naa, ’ka kwa kuli léé, ’ka kɛlɛ munu lé Kazambale ke é plale wo nwiin, wo vazannu nya yé Kazambale é dan fɛ ’konu faa nɔ lɛ ka lɛ ’bɛnu ta loru.

Lagi fɛwezannu

(Mt 6:19–21)

32’Bla palu kiéné, té ka kana monomono lo, fuatɛrɛ nɔle ka lɛ sɔ ka Ti lɛ é baba.

33’Ka ka leefɛnu dan yé ’ka a ma gɔɔli nɔ nyanégyɛmunu lɛ. Gɔɔli pa balanu lé wo ’ka sɛra lo, ’ka wo kɛlɛ kabo zé nya, yé fɛwezan lé é ’ka nyaan lo, ’ka wo téé la gi, fɛana lé kyeenwozan ’ka wɔraan lo, yé gyan ’ka vɔa fɛ ma lo, ana. 34Naa, fɛana lé kalé fɛwezan ke, ana duo lé ka bli ke.

Mi wuomunu lé wo vo é yuɛma

(Mt 25:1–13; Mk 13:33–37)

35’Ka sɔ vɔ ka tɛrɛla ma, yé kalé kyɛbɔ ’é bi ma. 36Munu lé wozan go lesile lé fɛti kɛlɛ lɛ yé wo vo a lɛbɛnna, léé, dé é da yé é duoli gyɛ tɔɔn ’wo kɔn lɛ so a lɛ, ’ka kɛlɛ bélé wo zo ma. 37Wuomunu lé wozan é dan bɔ lɛ wo ma é yuɛma, wozé é dan kɛlɛ lɛ é zima. Maa lé ka lɛ webozen nya léé, wozan é dan sɔ vɔ lɛ é tɛrɛla, yé é dan wo nyana lɛ tablé zi, yé é dan fɛ nɔ lɛ wo lɛ. 38Dé é bɔa tu laa? taa, dé é bɔa manegɔné vinin wele nyaa? Dé é bɔ é wuomunu ma é yuɛma, a wuomunu ’ko, wozé é dan kɛlɛ lɛ é zima. 39’Ka we ’ko gi dɔɔ é zima ma, dé é kɛlɛ léé, kɔnzan kyeenwozan dabléyi dɔɔ, ’té é dan vo lɛ é yuɛma yé é ’ka dan a nyi si lɛ léé, ’wo wɔra élé kɔn gi lo. 40Bléyian va lé é ’ka dɔa ka gi léé, maa blami Be é dan lo, an dan da lɛ ’bɛ bléyi va, amalé ’ka vo kabo ma’lɛrɛle nya.

Mi leezan zima valé mi leezan naané

(Mt 24:45–51; 25:14–30)

41Piɛri lé a lɛ léé: Mizan, ko ma gɔné lé bé vɔ laa, munu faa ma gɔné léé? 42Yé Mizan léé: Mi leezan yarapawelazan gi kinizan lé azan a plaan élé kɔngimunu nwiin léé, ’é wolé fɛblele nɔ wo lɛ a nɔbléyi nya, de léé? 43Mi leezan lé azan bɔ a ma we ’ko zo kɛlɛna, azé é dan kɛlɛ lɛ é zima. 44Maa lé ka lɛ webozen nya léé, é dan élé fɛnu faa bɛ pa lɛ a lee. 45Naa, dé a leezan ’ko a fe é bli gi léé: Anzan a mɔnna, yé é kun wuogɔnénu valé wuolomu blale koo, fɛblele koo, fɛminile koo, nwɛ tanle koo, wo ma, 46yian nya lé é ’ka ézan lɛbɛnna lo, yé bléyian va lé é ’ka a gi dɔɔa léé, ézan é dan lo, mi leezan ’ko, azan é dan da lɛ a bléyi nya, yé ’bɛ é dan a wi kini lɛ ékema, yé ’bɛ é dan azé kɛlɛ lɛ bélé tɔnégiplɛplɛzannu zé zo. 47Mi leezan lé ézan lé blibɔmawe dɔɔ, yé é ’ka fɛ do kpen ma’lɛrɛ lɛ lo, yé é ’ka alé blibɔmawe kɛlɛ lɛ lo, wo dan ’bɛzan bla lɛ kaii. 48Naa, mi lé é ’ka a gi dɔɔa lo, yé wenu lé é a lé wa bla a ma, yé é wo kɛlɛ bɛ, wo dan a bla lɛ sɛ. Mi lé wo fɛ nɔ a lɛ kiɛre, a lee lé wo dan fɛ kiɛre laa lɛ, yé wo dan a taa laa lɛ, mi lé wo fɛ kiɛre bɛ pa a lee, ’bɛzan lee.

Jézu éé munu kinié ékema

(Mt 10:34–36)

49Maa da kyɛ dia lɛ tɛrɛ la yé dé é nyaa bile nya ’naan, ’té maa a mɛ fɛ va é ziin? 50É a lé wo an batizéwo batizéwo bɛ do nya, yé maa a ’bɛ lɛsɔɔle lɛbɛnna nyanéblele kaii nya. 51É dɔ ka gi léé, an da munu vo lɛ ékeva drɔɔ tɛrɛ laa? Maa lé ka lɛ léé, gba. An da munu kini lɛ ékema. 52É sia bléyi ’ko va, dé mi soru a kɔn do gi, wo dan kini lɛ ékema; mi yaa péli é dan vɔ lɛ mi fié ma, yé mi fié péli é dan vɔ lɛ mi yaa ma. 53Yé mi é dan nwa lɛ é be ma, yé a be é dan nwa lɛ a ma, yé lezan é dan nwa lɛ é lu ma, yé a lu é dan nwa lɛ a ma, yé lezan é dan nwa lɛ é be na ma, yé a be na é dan nwa lɛ a ma.

Bléyi dɔɔle

(Mt 16:1–4; Mk 8:11–13)

54É lé é ziin mi gu lɛ léé: Dé ka lati ye nwana yirivɔnazia tɔɔn yé ka léé: Lɛɛ é dan da lɛ. Yé é kɛlɛ a zo. 55Dé yirinwana bɛyilazia fu a giéna yé ka léé: Kyɛyee é dan bɔ lɛ. Yé é kɛlɛ a zo. 56Bodrɔzannu, ka tɛrɛ la valé lagi tɔmasenu dɔɔ yé é kɛlɛ kaa yé ka ’ka bléyi ’ko zé dɔɔa loo?

Ilé we bɛ pa ékema i nyanézan va zia

(Mt 5:25–26)

57Dé we a tegeleoo, dé é ’ka tegele looo, mɛmalé kabozen ’ka a va sina dɔɔa loo? 58Dé bii valé i nyanézan a gona minwiinzan va, ’i kwa kuli yé ilé we bɛ pa ékema a va zia, dé é da go i nya weblezan va, yé weblezan i pa sunyanu lee, yé sunyanu i vɔ bokɔn gi. 59Maa fe i lɛ, i ’ka dan bɔra lɛ ’bɛna lo, fɔɔ ’té bélé gɔɔli faa nɔ ɛ wo, ’té alé su do kpen ’ka vo lɛ i lee lo.

Atualmente Selecionado:

Luk 12: GOURU

Destaque

Copiar