Jan 3

Jézu valé Nikodɛm

(Ézék 36:25–27; 2 Kor 5:17; 1 Pi 1:3, 23)

1Naa, gɔné do ana, é a Farizi mi nya wa laama Nikodɛm; Juifimi segele lé. 2É da Jézu va é béli, yé é lé a lɛ léé: Anzan, ko a gi dɔɔ léé, bii a wepaamigizan lé é si Kazambale va, a nya. Gyɛzorowenu lé bé kɛla ’ko, dé Kazambale ’ka mi va lo, é ’ka bɔa wo kɛlɛle lɛ lo. 3Jézu lé a lɛ léé: Maa fe i lɛ kyɔ webozen nya, dé wo ’ka mi yaa lɛ é dɛrɛ lo, é ’ka dan kɛlɛ lɛ munu lé Kazambale ke é plale wo nwiin, wovazan do nya lo. 4Nikodɛm lé a lɛ léé: Dé mi a segele, wo bɔa a yaale lɛ kaa? Mi é bɔaléé, ’é wɔra é bu bɔn gi é ziin, yé wa dɛrɛ yaa? 5Jézu lé a lɛ léé: Maa fe i lɛ kyɔ webozen nya, dé wo ’ka mi yaa lɛ ’yi valé Kazambale Léli nya lo, é ’ka bɔa gole lɛ Kazambale lé fla lo. 6Fɛ lé wa yaa mi ma, ’bɛ a mi nya, yé fɛ lé wa yaa léli ma, ’bɛ a léli nya. 7Dé maa a fe i lɛ léé, é a lé wo ka yaa é dɛrɛ, té ’bɛ i gi vuru lo. 8Fɛana sɔ fu lɛ, ana lé éé giéan. Yé bé vun ’ma, naa, dé é si kyɛɛn? dé é go kyɛɛn? i ’ka wona dɔɔa lo. Mi faa lé wo wo yaa Kazambale Léli ma, a zo lé wolé we ke. 9Nikodɛm a laa a lee léé: We ’ko, é bɔa kɛlɛle lɛ kaa? 10Jézu lé a lɛ léé: Bii lé i we paan Izraɛlnu gi ’naan, yé bii ’ka we ’konu dɔɔa loo? 11Maa fe i lɛ kyɔ webozen nya, we lé ko dɔɔ, yee lé ko fé, yé we lé ko ana ye, yee lé ko fé, yé ko dére ’ka goo ka ’wuo gi lo. 12Dé maa tɛrɛlawenu fe ka lɛ, dé ka ’ka dɔ lɛ ’bɛ ta lo, dé maa lagiwenu fe ka lɛ, ka dan dɔ lɛ ’bɛ ta kaa? 13Mi vinin ’ka tan go lɛ la gi lo, ’té dé é ’ka mi lé é si la gi, maa blami Be lé an ke la gi mi, an nya lo.

14Yé fɛan zo lé Moizi méné dun bwi gi, a zo duo lé é a lé wo maa blami Be dun é ziin, 15léé, dé miomian bli vo an lɛ, é dan vo lɛ é yuɛma lɛɛfaama ’bɛ glɛ ’ka lo. 16Naa, Kazambale bli bɔ tɛrɛlamunu ma é baba, amalé é ’é Be wɔlɛ do kpen nɔ wolé we gi, léé, dé miomian bli vo a lɛ, é ’ka zamaga woo monomono lo, naa, é dan vo lɛ é yuɛma lɛɛfaama, ’bɛ glɛ ’ka lo. 17Kazambale ’ka é Be pa lɛ zia léé, ’é da tɛrɛlamunu lé we ble lo, naa, é a pa zia léé, ’é tɛrɛlamunu si we gi. 18Mi lé a bli vo Bale Be lɛ, wo ’ka dan alé we ble lɛ lo; naa, mi lé a bli ’ka vo a lɛ lo, wo alé we ble é kwakwa. A bli ’ka vo lɛ Kazambale Be wɔlɛ do kpen tɔ lɛ lo, azama. 19Wean ma lé woo munu lé we blé, yee lé ke ’ko: wo kɛlɛwenu a lɛrɛlɛrɛ; bɛwemalé san da aan wo tɛrɛ la, gunutinu sɔ wo lɛ é mini san ta. 20Miomian éé wenyané kɛla, san za a a gi yé é ’ka dan san va monomono lo, dé wo da é kɛlɛwenu ye; 21naa, mi lé éé we kɛla webozen yɛrama, yee ɛ dan san va, a nagɔɔnle we gi léé, ’é kɛlɛwenu a Kazambale lé blibɔmale nya.

É a lé Jézu ’é kɛlɛ blɛn yé an kɛlɛ kiéné

22’Bɛ zuo, Jézu go é zuomunu nya Judé tɛrɛ la; ana lé yee valé ’bɛnu nyana, yé é vo munu batizéwona. 23Énɔn lé é ke Salim sɔnɔ, ’yi kiɛre a ’bɛna, amalé Jan ke munu batizéwona ’bɛna. Munu da ’bɛna, ’wo batizéwole we gi. 24’Bɛ bléyi va ’té wo ’ka tan Jan vɔ lɛ bokɔn gi lo.

25Yé zavɔle nwa Jan zuomunu valé Juifi mi do méléna, mi kɛlɛle é zima lé we ma. 26Yé wo da Jan va, yé wo lé a lɛ léé: Kozan, mi lé é ke turu i va Juudɛn yuu zi, ’té bé mawe fe, é a munu batizéwona, ’té wo faa éé goo a va. 27Jan léé: Dé Bale ’ka fɛ nɔ lɛ mi lɛ lo, é ’ka bɔa fɛ yele lɛ lo. 28Kabozen, ka a anlé wenayezannu nya léé, maa a fe léé, maa ’ka Krist nya lo, naa, wo an pa é wo zia a ’lɛ. 29Mi lé le dɛrɛ ke a lee, yee ɛ ke lesizan nya; naa, lesizan béé lé, ’bɛ ke é dɔle ana, ’té ’bɛ éé tɔné dɔa lesizan dére lɛ bɛ, ’bɛ gi éé nanaan lesizan dére lé we ma; yé é ziin, gi nanale ’ko lé é ke anzé nya, ’bɛ lɛ a é sɔɔle. 30É a lé yee ɛ kɛlɛ blɛn yé maa ɛ kɛlɛ kiéné.

Mi lé é si la gi

31Mi lé é si loru, é a fɛ faa nwiin; mi lé é si tɛrɛ va, é a tɛrɛlami nya, yé éé we fé tɛrɛ la wefebɛ gi. Yé mi lé é si la gi, é a fɛ faa nwiin; 32yé we lé é a ye, é valé we lé é a ’ma, yee lé éé a fé yé a dére ’ka goo mi do kpen ’wuo gi lo. 33Mi lé é ’wuo dɔ a dére wuo, ’bɛzan léé: Kazambale a webozen nya. 34Naa, Kazambale ’ka ’é Léli nɔle glɛ dɔ lɛ a lɛ lo; bɛwemalé, mi lé Kazambale a pa zia, Kazambale dérenu lé éé a fé. 35Be sɔ Ti lɛ, yé é we faa bɛ pa a lee. 36Mi lé éé bli voo Be lɛ, é dan vo lɛ é yuɛma lɛɛfaama, ’bɛ glɛ ’ka lo, naa, mi lé éé Be lɛgaanma, é ’ka dan vo lɛ é yuɛma lo, naa, Kazambale bli é dan vo lɛ flina a ma. A zo lé Jan a fe wo lɛ.

Atualmente Selecionado:

Jan 3: GOURU

Destaque

Copiar