Jan 20

Jézu nwale

(Mt 28:1–10; Mk 16:1–8; Lk 24:1–12)

1Dimansi nya bladi, dé tu ’ka tan kini lɛ é zima lo, Magadala le Mari da gɔlɛkoro na; yé é a ye léé, gɔlɛ a é sile gɔlɛkoro ’léé. 2É vlan buru yé é go Simɔn Piɛri valé Jézu zuozan bɛ lé ’bɛ sɔ Jézu lɛ, wo va. Yé é lé wo lɛ léé: Wo Mizan si gɔlɛkoro gi, yé fɛana lé wa pa, ko ’ka ana dɔɔa lo.

3Piɛri valé zuozan ’ko bɔra yé wo go gɔlɛkoro na. 4Wo fiénu go vlan nya ékeva, naa, Piɛri bɔluzan lé vlan?-?burule mini Piɛri zé ta yé ’bɛ bɔ é vinin gɔlɛkoro na. 5’Bɛ tua, yé ’bɛ sɔbɛnu ye tɛrɛ va, naa, é ’ka wɔra lɛ ana lo. 6Simɔn Piɛri lé, ’bɛ ke a zuo, dé ’bɛ bɔ yé ’bɛ wɔra gɔlɛkoro gi. Yé sɔbɛnu lé wo ke tɛrɛ va, é ’bɛnu ye, 7é valé sɔ lé wa vuru Jézu ’wuo ma, é a ye. ’Bɛ ’ka sɔbɛnu ’ko va lo, naa, a po a é pale ’té é a é plale é yɛrama. 8Yé zuozan ’ko lé, ’bɛ bɔ lao é vinin gɔlɛkoro na, ’bɛ wɔra é ziin yé ’bɛ a ye, yé ’bɛ bɔn‐in kini sin yé ’bɛ léé: Weboen lé. 9Naa, we lé é ke é gyɛle Kazambale lé sɛbɛ gi léé, é a lé Jézu é nwa gamunu va, wo ’ka tan ’bɛ gi ’ma lɛ lo. 10Yé Jézu zuozannu si ’bɛna yé wo go ’wolé kɔn ’léé.

Jézu bɔra Magadala le Mari va

(Mk 16:9–11)

11’Té Mari a é dɔle duowo béera gɔlɛkoro sɔnɔ, ’té éé wuvɔa. É a wuvɔna aan wo, yé é tua guru gi naginile we ma, 12yé é lanjenu fié ye, sɔ fu nya ’wo ta, é nyanale fɛana lé wo Jézu gale pa, ana, a do a a ’wuo vɔna zia, yé a do a a gane vɔna zia. 13Wo lé a lɛ léé: Lezan, mɛmalé i ke wuvɔnaa? É a zi pa wo lɛ léé: Wo anzan si yé fɛana lé wa pa, maa ’ka ana dɔɔa lo, azamalé. 14Dé é a we ’ko fena é nɔla yé é Jézu ye é dɔle, naa, é ’ka a gi dɔɔ lɛ léé, Jézu lé, lo. 15Jézu lé a lɛ léé: Lezan, mɛmalé i ke wuvɔnaa? De lé i ke a nagininaa? É dɔ a gi léé, zian féipazan lé, yé é lé a lɛ léé: Anzan, dé bii ɛ go a nya, fɛana lé bé pa, bé fe an lɛ yé maa a sia. 16Jézu lé a lɛ léé: Mari. É nɔla yé é lé a lɛ Ébru dére gi léé: Rabuni, ’bɛ gi léé, anzan blɛn. 17Jézu lé a lɛ léé: Té i buvɔ an ma lo. Maa ’ka tan go lɛ an Ti va lo. Naa, ’i go an zuanénu va; bé fe wo lɛ léé, maa a gona kaa Ti lé é ke kaalé Bale nya, a va. 18Magadala le Mari go a fe lɛ zuomunu lɛ léé: An Mizan ye, yé we lé é a fe an lɛ, yee lé ke ’ko.

Jézu bɔra é zuomunu va

(Mt 28:16–20; Mk 16:14–18; Lk 24:36–49)

19Yee dimansi duo nya é nyanadi, wo kanale Juifinu lee we ma, wo kɔn lɛ tan ’wo ta, yé Jézu da yé é dɔ wo méléna, yé é lé wo lɛ léé: ’Ka vo drɔɔ ma. 20É we ’ko fe aan wo wo lɛ, é bɛlaanu valé é sɛe gi nagɔɔn wo lɛ. Dé zuomunu Mizan ye, wo gi nana. 21Jézu lé é ziin wo lɛ léé: ’Ka vo drɔɔ ma. Fɛan zo lé an Ti an nwunvɔ, a zo duo lé maa ka nwunvɔa é ziin. 22Dére ’konu fele zuo, é wo suu é ’léé fu nya, yé é lé wo lɛ léé: ’Ka Léli Sauun ye ma. 23Mi lé ka a ma we vo alé wenyanénu lé we ma, wo ma we ’é vo; yé mi lé ka alé wenyanénu vo a nwiin, é dan vo lɛ a nwiin.

Tɔmas ’ka dɔ lɛ Jézu nwale ta lo

(1 Pi 1:8–9)

24Tɔmas lé wo wo yaa fiané nya, ’té é ke mi vu ta fié va mi do nya, bléyian va lé Jézu da a bɔlunu va, ’té yee ’ka ana lo. 25Zuomunu pɔnénu lé a lɛ léé: Ko Mizan ye. Naa, é lé wo lɛ léé: Dé maa ’ka pɔnténu pagi ye lɛ a bɛlaanu ma lo, yé dé maa ’ka an bɛnwɔlɛ wɔra lɛ pɔnténu pagi lo, yé dé maa ’ka an bɛ wɔra lɛ a sɛe gi lo, maa do ’ka dɔa we ’ko ta monomono lo.

26’Bɛ zuo yi sɔraa, Jézu zuomunu ke aan wo é ziin kɔn gi, ’té Tɔmas a wo va. ’Té kɔn lɛnu a é tanle. Jézu da, yé é dɔ wo méléna yé é léé: ’Ka vo drɔɔ ma. 27Yé é lé Tɔmas lɛ léé: ’I bɛnwɔlɛ bié ze yé ’i an bɛlaanu nagini a nya. ’I bɛ bié é ziin yé bé wɔra an sɛe gi. I bli ’é vo we lɛ, té i kɛlɛ wezavɔzan nya lo. 28Tɔmas lé a lɛ léé: Anzan valé anzé Bale. 29Jézu lé a lɛ léé: I an ye sin, amalé bé nyi si. Munu lé wo ’ka an ye lɛ lo, yé wa nyi si bɛ, wozé a néné.

Wean ma lé Jan élé sɛbɛ gyɛ

(1 Jn 5:11–13)

30Gyɛzorowe bɛnu kiɛre lé Jézu a kɛlɛ é zuomunu yuɛ va, maa ’ka wo gyɛ lɛ sɛbɛ ’ko gi lo. 31Naa, maa we ’konu gyɛ sɛbɛ gi ka bli vole a lɛ we ma léé, Jézu ɛ ke Krist nya, Kazambale Be nya, yé dé ka bli vo a lɛ yé ka béli a tɔ ma.

Atualmente Selecionado:

Jan 20: GOURU

Destaque

Copiar