Jan 10
10
’Blagɔrɔ ma gɔné vɔle
(Ézék 34:1–19; 1 Pi 5:1–4)
1Maa fe ka lɛ kyɔ webozen nya, mian é ’ka wɔraan ’blagɔrɔ ’léé zia lo, naa, éé wɔraan a fɛ bɛna zia, é a kyeenwozan valé ’bla?-?gyɛzan nya. 2Naa, mi lé éé wɔraan gɔrɔ ’léé zia, é a ’blanu tabinzan nya. 3’Blagɔrɔtabinzan éé gɔrɔ lɛ soo a lɛ, yé ’blanu a dére maan. ’Blanu lé wo ke azé nya, éé wo laan ’wo tɔ nya, ’té éé goo wo nya béera. 4Abozen lé ’blanu faa bɔrale zuo, éé tawoo wo ’lɛ. ’Blanu a dére dɔɔ, amalé woo goo a zuo. 5Wo ’ka goo mi bɛnu zuo lo; wo ’ka mi bɛnu dére dɔɔa lo, amalé woo vian buruwo ’bɛnu lee baa.
6Jézu gɔné ’ko vɔ wo lɛ, Naa, we lé é ke a fena wo lɛ, wo ’ka a gi ’ma lɛ lo.
Jézu a ’blatabinzan zima nya
(LvS 23; Éf 5:25–27; 1 Pi 2:24–25)
7Jézu lé é ziin wo lɛ léé: Maa fe ka lɛ kyɔ webozen nya, maa a ’bla gɔrɔ ’léé nya. 8Munu faa lé wo da an ’lɛ é kyɛn, wa kyeenwozannu valé migyɛzannu nya. Naa, ’blanu ’ka tɔné dɔ lɛ wo lɛ monomono lo. 9Maa a gɔrɔ ’léé nya. Dé mian é wɔra an vazia é dan si lɛ we gi; é dan wɔra lɛ, yé é dan bɔra lɛ, yé é dan fɛblelenu ye lɛ. 10Kyeenwozan éé dan kyeenwole koo, fɛ gyɛle koo, fɛ sɛrɛle koo, wo saa ɛ we ma; an da ’blanu vole é yuɛma we gi, é valé wo fuu dɔle wo ta we ma fɔɔ yé é gié é glɛ ta.
11Maa a ’blatabinzan zima nya. ’Blatabinzan zima éé gaan ’élé ’blanu ta. 12Naa, nyanamapazan lé é ’ka ’blatabinzan nya lo, ’té ’blanu ’ka azé nya lo, dé é glau ye dana éé sié ’blanu zi yé éé vian buruwo, ’té glau éé wo kunwo, ’té ’bɛ éé wo fwilaan. 13Nyanamapazan éé vlan buruwo; é a nyanamapazan nya é pla, yé é ’ka ’blanu lé gi bɔrɔ paan lo, azama. 14Maa a ’blatabinzan zima nya. Maa anlé ’blanu dɔɔ yé wo an dɔɔ, 15fɛan zo lé an Ti an dɔɔ yé an Ti dɔɔ, a zo, yé maa gaan anlé ’blanu ta. 16’Bla bɛnu a é ziin anzé nya, ’té wo ’ka gɔrɔ ’ko gi ’blanu nya lo. ’Bɛnu é ziin, é a lé an da wo nya; wo dan an dére ’ma lɛ yé wo dan kɛlɛ lɛ trubɛ do kpen nya yé ’blatabinzan é dan kɛlɛ lɛ do kpen. 17Maa gaan an nwale é ziin we gi, bɛwemalé an sɔ an Ti lɛ. 18Mi do kpen ’ka an gya lo, naa, maa anbo no gale lɛ. A se a an lɛ léé, an ga yé a se a an lɛ léé, an nwa é ziin. ’Ko zo lé an Ti an béli dɔ.
19Dére ’konu lé we ma lé Juifinu gi bɔi é ziin. 20Wo va mi kiɛre léé: Yo a a gi; gwe a a ’wuo gi; mɛmalé ka tɔné dɔa a lɛɛ? 21Yé a kenu léé: Dére ’konu ’ka yoagizan dérenu nya lo; yo éé bɔaléé, é yuɛwiizannu yuɛnu fuoo?
Juifinu sɔn vɔ Jézu ma
(Jn 8:51–59; 14:9–11)
22Wa kɔn nɔle Bale lɛ lé fɛti kɛlɛna Jérusalɛm. 23É a dunubléyi nya ’té Jézu a dɔwona Balebangikɔn lɛɛ lé Salomɔn a kɛlɛ, a wuo. 24Yé Juifinu a zi lɛ sɔɔ yé wo lé a lɛ léé: Ko a ko tanyila, i dan ko bɔn‐in kini lɛ mɛ bléyi vaa? Dé bii ɛ ke Krist nya, bé fe ko lɛ kpaklaa.
25Jézu lé wo lɛ léé: Maa a fe ka lɛ yé ka ’ka dɔ lɛ a ta lo. Nyanamanu lé maa ke wo pana an Ti tɔ gi, woo ɛ an ma we fé. 26Naa, ka ’ka anlé ’blanu nya lo, bɛwemalé ka ’ka pa lɛ wo ta lo. 27Anlé ’blanu an dére maan, yé maa wo dɔɔ yé woo dan an zuo. 28Vole é yuɛma lé a glɛ ’ka lo, maa wo wɔra ’bɛ gi, yé wo ’ka dan zamaga wo lɛ monomono lo; yé mi do kpen ’ka dan wo si lɛ an lee gla nya lo. 29An Ti lé é wo nɔ an lɛ, a blɛn mini fɛ faa ta, yé mi do kpen ’ka bɔa wo sile lɛ an Ti lee gla nya lo. 30Maa valé an Ti, ko a do.
31Yé Juifinu gɔlɛ sia é ziin a gyɛle we ma.
32Jézu lé wo lɛ léé: Maa an Ti panyanama zima kiɛre pa ka yuɛ va; wo va nyanama kyɛn lé we ma lé ka gɔlɛ vulian an vaa? 33Juifinu lé a lɛ léé: Ko ’ka gɔlɛ vulina i va nyanama zin lé we ma lo; naa, i Kazambale sɔnɔ yé bii lé i ke mi nya, i ’ibo kɛlɛ Bale nya, amalé ko gɔlɛ vulian i va. 34Jézu a zi pa wo lɛ léé: É ’ka é gyɛle kalé bélidɔwe sɛbɛ gi léé:
Maa léé: Ka a balenu nya, loo?
35Munu lé wo Kazambale lé we fe wo lɛ, dé Kazambale lé sɛbɛ wo laa balenu, yé dé sɛbɛgiwe ’ka bɔaléé, é kɛlɛ we pla nya lo, 36maa lé Kazambale an pa é yɛrama yé é an pa zia tɛrɛlamunu va, dé maa a fe léé, Bale Be lé ke an nya, yé ka léé, an Bale sɔnɔɔ? 37Nyanama lé an Ti a paan, dé an ’ka a paan lo, té ka bli é vo an lɛ lo. 38Naa, dé maa wo paan, dé ka bli ’ka vo an lɛ lo, ka bli ’é vo yee nyanama ’konu lɛ, kalé a gi dɔɔle valé kalé a yele we gi léé, an Ti a an gi yé maa a an Ti gi.
39’Bɛna tɔɔn wa kwa kulina é ziin léé, wa kun; naa é so wo lee.
40Jézu go é ziin Juudɛn yuu zi, fɛana lé Jan munu batizéwo é vinin, ana. Yé é nyana ana. 41Mi kiɛre da a va yé wo léé: Jan ’ka gyɛzorowe do kpen kɛlɛ lɛ lo, naa, we faa lé Jan a fe mi ’ko ma, é a wezen nya. 42Yé mi kiɛre bli vo a lɛ ’bɛna.
Atualmente Selecionado:
Jan 10: GOURU
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
Alliance Biblique de Cote d'Ivoire 1979
