Wepélisiananu 7
7
Lɛɛ blɛɛn lé we
1Gakelebale lé Noé lɛ léé: ’I wɔra ’yitagoro gi, bii valé ilé munu nya; naa, maa i ye mi tégélé nya bléyi ’ko vamunu méléna. 2Wi zinzin faa lé ke bɛ, ’i wi vu ta ziɛn si wo dɔgɔnɔ do do gi, a gɔné sɔrafié, a da sɔrafié; winu lé wo ’ka wi zinzinnu nya lo, ’i wi fié si wo dɔgɔnɔ do do gi, a gɔné do, a da do; 3’i miané si wo dɔgɔnɔ faa do do gi vu ta ziɛn, a gɔné sɔrafié, a da sɔrafié; ’i wo pa i va, léé, té wo kulu é ga tɛrɛ la lo. 4Naa, é vo yi sɔrafié, yé maa dan lɛɛ da lɛ tɛrɛ la yi yɔ fié, bladi nyanadi, yé fɛ faa lé maa a kɛlɛ, maa dan wo si lɛ tɛrɛ la tata.
5We faa lé Gakelebale a fe Noé lɛ, é a kɛlɛ.
6Lɛɛ blɛn zun tɛrɛ la bléyian va, ’té Noé lɛɛ a wuru yaa. 7Noé koo, a benu koo, a na koo, a benu nanu koo, wo faa wɔra ’yitagoro gi, wo sole ’yi lee we gi. 8Wi zinzin koo, winu lé wo ’ka wi zinzin nya lo koo, mianénu koo, fɛnu faa lé éé kɔɔan tɛrɛ la koo, 9wo wɔra ’yitagoro gi Noé va, gɔnɔ do do gi fié fié, a gɔné do, a da do, fɛan zo lé Bale a fe Noé lɛ, a zo.
10’Bɛ zuo yi sɔrafié, lɛɛ blɛnblɛn da tɛrɛ la. 11Noé lɛɛ wuru yaazan, a moné fiézan, a moné yi vu ta sɔrafiézan nya, ’bɛ yi nya guru blɛn gi ’yiwuonu faa lɛ so, yé lanu gɔɔn lɛ so. 12Lɛɛ vo dana tɛrɛ la yi yɔ fié, bladi nyanadi. 13Noé koo, Noé benu, Sɛm valé Sam valé Jafɛt koo, Noé na valé Noé benu nanu yaa koo, wo faa wɔra ’yitagoro gi yi do nya; 14wo valé bwiiwinu faa dɔgɔnɔ koo, flawinu faa dɔgɔnɔ koo, tawoplɛlawinu faa dɔgɔnɔ koo, mianénu faa dɔgɔnɔ koo, miané kiénénu faa koo, fɛ faa lé wo bɛa ke koo, wo faa nya. 15Fɛ faa lé éé flin‐é, wo fié fié wɔra ’yitagoro gi Noé va. 16Fɛ faa wɔra é gɔné do, é da do, fɛan zo lé Kazambale a fe Noé lɛ, a zo. ’Bɛ zuo yé Gakelebale ’yitagoro lɛ tan wo ta.
17’Yi blɛn vo tɛrɛ la yi yɔ fié. ’Yinu fan, yé wo ’yitagoro nwa, yé é nwa tɛrɛ ta loru. 18’Yinu kɛlɛ blɛn, yé é fan kiɛre tɛrɛ la, yé ’yitagoro dɔ ’yinu ta loru. 19’Yinu kɛlɛ é ziin blɛɛn, yé gɔ grɔgrɔnu faa lé ke la faa wuo, ’yi wo ta pla. 20Gɔnu lé ’yi wo ta pla, ’yinu nwa wo ta loru mɛtrɛ sɔrafié é buu.
21Fɛnu faané lé éé kɔɔan tɛrɛ la, wo ga. Mianénu koo, flawinu valé bwigiwinu faa koo, winu faa lé woo tawoo ’wo plɛ la tɛrɛ la koo, munu faa koo, wo faa ga. 22Fɛnu faa lé woo flin‐é, ’té wo ke tɛrɛ gale ta, wo ga. 23Fɛ faa lé ke é yuɛma tɛrɛ la, wo faa ga tata, munu koo, winu koo, tawoplɛlawinu koo, mianénu koo, wo nya. Wo faa si tɛrɛ la tatata. Noé valé fɛnu faa lé wo ke a va ’yitagoro gi, wo saa ɛ vo. 24’Yinu fan tɛrɛ la yi yɔ sɔrafié wɔlɛ vu.
Atualmente Selecionado:
Wepélisiananu 7: GOURU
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
Alliance Biblique de Cote d'Ivoire 1979
