मट्टि 7
7
होइढा याॽमिचि आब्डिक् आटिमॆ खानावाँ
(लुका ६:३७-३८)
1“होइढाचि आब्डिक् आटिसाम्चिनॆ, मरहाङ् आन्ना स निवाँहाङ्ऎ आब्डिक् टिसानिनि। 2मान्ठाभनॆ मान्टहाङ् आन्नॆ होइढाचि आब्डिक् टिकाम्चिनि, मरहाङ्न आन्ना स आब्डिक् नुङ्मा लिकानि। आन्नॆ मान्टहाङ् सिःगुकाम्नि, मरहाङ्न आन्ना स सिःग्मा खाइहाङ्चाकानि 3मान्ठा आन्नॆ याॽमिचिम् मिक्पिऎ मिःछुॽमा याॽवा खाङ्टकाम्नॆ टर टाङ्पाम् मिक्बिऎ सिङ् चाइ खाङ्टकाम्निनॆ? 4टाङ्पाम् मिक्पिहा सिङ् आखाङ्टखुबॆ, ‘मान्टॽल होइक याॽमि आनामि मिक्पिऎ याॽवा लाबक्पिक्खाना’ लोकाम्नॆ? 5ओ हुन्नऎ याॽमि, याॽलि आनामि मिक्पि चुऎ डिड्ढा सिङ् लाबकॆ, हाङ् आनॆ होइक याॽमिमि मिक्पिऎ मिःछुॽमा याॽवा लाबक्माम् लागि काम्नुःर खाङ्टहिकुना।
6“सॆङ्सॆङॆ खानावाँ हुॽवाचि आपिट्टाम्चिनॆ। आक्र लॆटानि हाङ्ग आक्खाचि ऎन्डाप्मिहाङ् आन्ना हॆरुकानि। हाङ् टाङ्पामि मोटि बाक्चिबि ऎकक्पिटाम्चिम्नॆ। आक्र लॆटानि हाङ्ग आक्खाचिऎ उम्चि लाङ्ऎ म सिगुकुचि।
ङाःग्मॆ हाङ् यक्मॆ खानावाँ
(लुका ११:९-१३)
7“ङागानॆ आन्नॆ टक्चाकाम्नि, यगाम्नॆ आन्नॆ भेट्टकाम्नि हाङ् लम्भॆरॆङ्मा डुबाम्नॆ आन्नामि लागि हेम्ब। 8मान्ठाभनॆ ङाग्खुबॆ टक्चाकु, यक्खुबॆ यक्टःकु हाङ् लम्भॆरॆङ्मा डुप्खुबामि लागि हेम्ब। 9आन्नाबाङ् आसा चाइ गरक्मा याॽमि चु, टाङ्पाम् पासाऎ चारेपा ङाःग्मार लुङ्कॽवा पिक्खुबा? 10हाङ् ङा ङाग्मार पुसॆःॽमा पिक्खुबा? 11आन्ना काइसाहा याॽमि लॆकानि हाङ्स टाङ्पाम् चाचाचि काम्नुहा ठका पिॽमा लेकाम्नि हाङ्ग आन्नामि पारुबिऎ आपाऎ खोनुङ् ङाग्खुबाचि ऎॽवा डिरिक् सॆङ्सॆङॆ लावा पिॽमा लॆ कामानुङ् लेकु।
मिःछुॽमा नुङ् ढ्या लम्भॆरॆङ्मा
(लुका ६:३१; १३:२४)
12“होइढा याॽमिचिऎ आन्ना माङ् लॆपिॽङामिर मिनुकानि, आन्नॆ सङ्क खोचि आक्रक्न लॆटाम्चिनॆ, मान्ठाभनॆ मोसामि यायेॽमा हाङ् निवाँहाङ्मि खानावाँ लोखुबाचिऎ लोमिम्पा खानावाँऎ लोमा यकुवॆ चाइ गन।
13“मिःछुॽमा लम्भॆरॆङ्माबाङ् हङ्सिॽयु भॆनानॆ, मान्ठाभनॆ ढ्या लम्भॆरॆङ्मा हाङ् ढ्या लाम्फुऎ नाराक्पि टॆ। आक्क ढ्या लम्भॆरॆङ्माबाङ् लाम्ढुखुबाचि डिरिक् लिःक्मि। 14टर हिङ्खामाबि टॆखुबा लम्भॆरॆङ्मा हाङ् लाम्फु चाइ मिःछुॽमा हाङ् डुखा नुङ्मा लि। हाङ् आक्क लाम्फु चाइ मिःक्म याॽमिचिऎ टे भॆट्टकुचि।
याॽमिचि उम्चि योम्पक्बाङ् लेॽमॆ
(लुका ६:४३-४६; १३:२५-२७)
15“हुन्नहा निवाँहाङ्मि खानावाँ लोखुबाचिबाङ् नुःर पेनानॆ। खोचि सामुङ्र लॆसे आन्नाबि टाःक्मि, टर हङ्सिॽयु चाइ आक्खा याॽमिचि ठाॽनाम् हुॽवार किॽमालुहा लिःक्मि। 16आन्नॆ खोचि उम्चि योम्पक्बाङ् लेटखॆकाम्चिनि। माल् चिचिङ् नुङ्मा याॽवासिवाँबाङ् आङ्गुर हाङ् सिउडिबाङ् छाराक्फु बिगुऎ टा? 17गरहाङ् काम्नुहा बोटाऎ काम्नुहान उम्चा सिकु हाङ् काइसाहा बोटाऎ काइसाह न उम्चा सिकु। 18मरहाङ्न काम्नुऎ बोटाऎ काइसॆ उम्चा सिसुनि हाङ् काइसॆ बोटाऎ काम्नुऎ उम्चा सिसुनि। 19काम्नुऎ उम्चा आसिखुबा चोब्न बोटा डेट्ढाङ् हाङ् मिःबि टि। 20गरहाङ् आन्नॆ आक्खा निवाँहाङ्मि हुन्नहा खानावाँ लोखुबाचि उम्चि योम्पक्बाङ् लेकाम्नि।
21“काङा ‘पारभु, पारभु’ लोखुबा चोब्न याॽमिचि पारुबिऎ हाङ्डाम्पि भॆन्टक्मिनि। टर पारुबि चुऎ काम् आपामि निवाँ रक्न पाइखुबा याॽमि टे आक्कबि भॆनुक्। 22आक्क डिना ऎॽवा याॽमिचिऎ काङा गर लोःॽङामि ‘पारभु, पारभु, माल् काङ्कॆ आनाम् निङ्पि निवाँहाङ्बाङ् मायामुसिङ्कॆ? आनाम् निङ्पि खारिॽमाङ्चि मालाबकुङ्कॆ हाङ् आक्खॆॽमा योम्पक् मायिगुङ्कॆ?’ 23हाङ् कॆ आक्खाचि गरहाङ् काम्नुःर लोकुङ्चि, ‘ओ काइसा योम्पक् यिक्खुबाचि, कॆ आन्ना लेसानिनि। गबाङ् खाइहाङ् इट्टानॆ!’
निवाँटाङ्पा नुङ् निवाँ मॆड्डिङ्मा याॽमि
(लुका ६:४६-४७)
24“मसॆ आसॆ चाइ कॆ लोमिम्पा ग खानावाँ खेम्कुहाङ् लोमिम्पा आनुसारॆ पाइ, खो एक्क निवाँटाङ्पा याॽमि रक्मान लि। खोसॆ उम् खिम् लुङ्कॽवा सक्पि हेबुकु। 25हाङ् वारि टाआ, भोला हाङ् ढ्या हिॽयापा टाआहाङ् आक्क खिम्पि टःक्सिआ, टर आक्क माङ्स मालि, मान्ठाभनॆ आक्क खिम्मि ठुग्मा लुङ्कॽवा सक्पि चुआ। 26टर आसॆ चाइ काम् खानावाँ खेम्कुहाङ् मरक्न लॆःॽनि, म चाइ एक्क निवाँ मॆड्डिङ्मा याॽमि रक्मा लि। खोसॆ बालाउटाबि खिम् हेबुकु। 27हाङ् वारि टाआ, भोला अङा हाङ् ढ्या हिॽयापा टाआहाङ् आक्क खिम्पि टःक्सिआ हाङ् आक्क खिम् टॆःक्ढारा हाङ् किॽमालुलु लिमानुङ् लुक्खारा।”
28येसुऎ इघा खानावाँ इसिटु हाङ् खोम् खानावाँ खेम्खुबा आक्कुबिहा ऎॽवाहा याॽमिचि आक्खॆटुचि। 29मान्ठाभनॆ खोसॆ खोचि मोसामि यायेॽमा चिन्खुबाचिऎर हॆॽनॆ, टर ढ्या ढुप्पाट्ट नुङ् चिन्युक्सुचि।
Atualmente Selecionado:
मट्टि 7: LBR
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
© 2023, Wycliffe Bible Translators, Inc. and Nepal Bible Society
