मत्ती 5
5
येशूगी काहङदोला ख्येप्टा नाङग्योकी सुङ
(लूक ६:२०-२६)
1मिह मिह-माहङ ओहङगेन ज़ी़ फान्ज्यो येशू काहङ च्यी़ला फेप्ती ज़्य़ू नाङसीन ओहले स्याहप्च्यीया़ॱआङ ओहङदी येशूगी साहर-सुहरला तेहसीन। 2ओहले येशूगी खुङया़ला दि ल़ेहमु सुङदी सुङ ख्येप्टा नाङसीन–
3 “सेमला प्राङबु येहकेनया़ # ५:३ सेमला प्राङबु येहकेनया़ : म़ेदी माक्योदी “किन्ज्यो थो़ला च्यी़राङ रेहवा पेहकेनया़” म़ेदी माक्यो यिहम्बा। काहजे सोनाम-साक्पु,
च्यिबेमाना स्यिहङगामकी क्याहल्सी # ५:३ स्यिहङगामकी क्याहल्सी : दि छिका केच्या साम्बाया़गी कार्छ्याला ज़ी़-नाङदोङ। खुङया़दीॱराङ यिहन।
4 तुहङाल पेहकेनया़ काहजे सोनाम-साक्पु,
च्यिबेमाना किन्ज्योगी खुङया़ला सेम क्यिपु नाङज्ये येह। #यशै ६१:२
5 ङ्येम्ज्युङ पेहकेनया़ काहजे सोनाम-साक्पु,
च्यिबेमाना खुङया़गी जाम्बुलीङला ओङ छ्य़े ङ्युहङज्ये येह। #भज ३७:११
6 किन्ज्योगी थुला ने़जेबा थाम्ज्यीराङ से़हया़ तेहन्दा डुप्च्यु म़ेदी सेम तिहङ यिहन्ज्युराङ चा़ पेहकेनया़ काहजे सोनाम-साक्पु,
च्यिबेमाना खुङया़गी चा़ पेहक्योगी से़हया़ किन्ज्योगी तेहन्दा डुप च्य़ू नाङज्ये येह। #यशै ५५:१,२
7 चेवा पेहकेनया़ काहजे सोनाम-साक्पु,
च्यिबेमाना किन्ज्योगीॱआङ खुङला चेवा जे नाङज्ये येह।
8 च्याहङज्यु सेम्बा येहकेनया़ काहजे सोनाम-साक्पु,
च्यिबेमाना खुङया़गी किन्ज्योला थोङज्ये येह। #
भज २४:३,४
9 थिम्बु-जामु पेह च्य़ूगेया़ काहजे सोनाम-साक्पु
च्यिबेमाना खुङया़ किन्ज्योगी पुह-पोहमो ओहङज्ये येह।
10 किन्ज्योगी का ङ्यिहन्गेमु मिहया़गी ङ्येन्ज्येन दाङ तुहक्पु तेर्केमु ना़गेन मिहया़ काहजे सोनाम-साक्पु,
च्यिबेमाना स्यिहङगामकी क्याहल्सी खुङया़दीॱराङ यिहन।” #१ पत्र ३:१४
11 “ङाहला यिह-छ्य़े पेहक्यो सोङबे मिहया़गी ख्याया़ला तुहक्पु तेर्च्ये येह, ख्याया़ला स्ये़हन्डील पेहच्ये येह ओहले स्योप क्याहप्ती ख्याया़ला टाह पेहती यिहन्जेराङ ताम चोक्पाया़ केन्ज्ये येह ख्याया़ काहजे सोनाम-साक्पु! #
१ पत्र ४:१४
12ओहजेला ख्याया़ क़ेहनाङ पेहतोङ, काहसो पेहतोङ च्यिबेमाना ख्याया़गी तेहन्दाला स्यिहङगामला च्याहगा छ्यिम्बुज्यी ज़्या़दी येहबा। तोहङमा तोहङमागी लुहङतेम्बाया़लाॱआङ मिहया़गी दि रोहवा पेहतीराङ तुहक्पु तेर्ते येहकें” म़ेदी येशूगी सुङ नाङसीन। #२ लुहक ३६:१६; ल़ेह ७:५२
छा दाङ येहसेरगी पे
(मर्क ९:५०; लूक १४:३४-३५; ११:३३)
13 “ख्याया़नी जाम्बुलीङगी छा यिहन, यिहॱनाङ छागी प्रे़हराङ याहल्सीमाना ओ़हदी येहपाराङ च्यि से़हगी छा प्रे़ह ज़ोज्ये ले? ओ़ह छानी फिला क्युर चाहङज्ये दाङ मिहगी काङबागी नेम्गे म़ेदीनी लेहमेन च्यि से़हॱलाङ फेन थो़ज्ये म़ेह।” #मर्क ९:५०; लूक १४:३४,३५
14 “ख्याया़ जाम्बुलीङगी येहसेर यिहम्बा। काहङदोला ज़ोक्योगी क्याहसा यिहप मी़हखुएँ। #
यूह ८:१२; ९:५ 15ओहले सुगीॱआङ लो पार्ते पादीगी उप्ती मे़हज्याएँ। तोहरोङ खाङबा नाहङगी मिहया़गी मी़ थोङज्यु म़ेदी ग्या़ थोम्बुला लो पार्ते ज़्या़एँ। #मर्क ४:२१; लूक ८:१६; ११:३३ 16ओ़ह ल़ेहमु पेहतीराङ ख्याया़गी येहसेर मिहया़गी पाहरक्यीला स्यारच्यु, मिहया़गी ख्याया़गी ल़ेह या़हबुया़ थोङदी स्यिहङगामला ज़्यू़गेन ख्याया़गी याहप्च्येन आबाला थुज्यी-छ्ये़ फुल्ज्यु” म़ेदी येशूगी सुङ नाङसीन। #१ पत्र २:१२
छ्य़े-ठिम ची़नाङ डुप्केन्गी तेहन्दाला सुङ
(लूक १६:१७)
17 “मोशागी नाङग्योकी छ्य़े-ठिम दाङ लुहङतेम्बाया़गी सुङ नाङग्यो स्याहल च्येच्येला ङाह ओहङग्यो म़ेदी मा़हने। ङाह ओ़ह मोशागी नाङग्योकी छ्य़े-ठिम दाङ लुहङतेम्बाया़गी सुङ नाङग्योकी स्याहल च्येच्येला मिहम्बा यिहॱनाङ तेहन्दा डुप च्य़ूज्येला ओहङग्यो यिहम्बा। 18तेहम्बाराङ ङाह ख्याया़ला माएँ, नाम दाङ जाम्बुलीङ तोङदी माहकाहल थु किन्ज्योगी नाङग्यो छ्य़े-ठिम नाहङगी फेमा म़ेदी फेमा स्याहलया़ॱआङ तेहन्दा डुप्च्ये येहबा। #लूक १६:१७ 19छ्य़े-ठिमगी फेमा म़ेदी फेमा काया़ गोम्गेन दाङ गोम्ज्येला लोप्केन मिह स्यिहङगामकी क्याहल्सीला थाम्ज्यी म़ेदी फेमा ओहङज्ये येह। यिहॱनाङ छ्य़े-ठिमला राहङॱआङ ची़एँ ओहले लेहमेनॱलाङ ची़नाङ डुप च्य़ूएँदी स्यिहङगामकी क्याहल्सीला थाम्ज्यी म़ेदी छ्यिम्बु ओहङज्ये येह। 20ओ़ह सोङबे ङाह ख्याया़ला माएँ, छ्य़े-ठिमगी काया़ला छ्य़े-ठिमकी लोबेनया़ दाङ फरिसीया़गी म़ेदी या़हबु पेहती मी़हचीसीमानानी ख्याया़ किन्ज्योगी क्याहल्सीला स्य़ूह ङ्युहङज्ये म़ेह।”
स्यिहताङ लाहङज्ये मेहयोहङगे माएँगी तेहन्दाला सुङदेन
21 “ख्याया़गी थे़दीॱराङ येह, तोहङमा तोहङमागी मिहया़ला दि ल़ेहमु म़ेदी येहकें, ‘ख्याया़गी मिह माहसे, ओहले का़हन्दीगी मिह सेकें खो ङ्य़ेहबा खुर्च्ये सी़हएँ।’ #
प्रस २०:१३; व्य ५:१७ 22यिहॱनाङ ङाह ख्याया़ला माएँ, का़हन्दीगी राहङगी नो़ह ङ्याम्बु स्यिहताङ पेहकें खो ङ्य़ेहबा खुर्च्ये सी़हएँ, ओहले का़हन्दीगी राहङगी नो़हला ङ्याप्च्यु पेहकें, खोगी छो़बा छ्यिम्बुगी दिनला ल़ेहन क्याहप कोहच्ये येह। यिहॱनाङ का़हन्दीगी राहङगी नो़हला ‘ख्ये उल्दुम्बा’ म़ेदी माएँ, खो ङ्याल्वागी मेहला छ्यिकेन्गी ज्यिक्पा ओहङज्ये येह।”
23 “ओ़ह सोङबे किन्ज्योला डेल्बा फुल्गे म़ेदी तोहङले ख्येगी नो़ह ख्ये ङ्याम्बु स्यिहताङ लाहङग्यो क्यी़ह ज्योर्सीन माना 24राहङगी डेल्बा, डेल्बा फुल्गे ग्या़ला क्युर ज़्या़दी लाहम्साङराङ काहल्दी राहङगी नो़ह ङ्याम्बु थिन्दाङ पेह ओ़ह तिङले च्यी़राङ ओहङदी राहङगी डेल्बा फुल्दोङ।”
25 “ठिम-खाङला लेप्कें म़ेदी तोहङले, लोहङ येहकें ती़हजीलाराङ राहङ ङ्याम्बु ठ़ूस्यी पेहकेन मिह ङ्याम्बु थिन्दाङ पेह। मिहन्सीमानानी ख्याला टाह पेहती ठिम ताङगे ठिम-पेनसाला ठिम स्युह डोज्ये येह ओहले ठिम-पेनगी ख्येला माक्मीया़गी लाहक्पाला चि क्याहप्च्ये येह ओहले ख्ये चोन-खाङला छ्यिच्ये येह। 26तेहम्बाराङ ङाह ख्येला माएँ, ख्येगी च्याल कोहकेन्गी थाम्ज्यीराङ टाङगा माहच्याल थु ख्ये ओहलेगी थेन ङ्युहङज्ये म़ेह!” म़ेदी येशूगी सुङ नाङसीन।
छ्येउ-छ्येंमु पेहच्ये मेहयोहङगे माएँगी तेहन्दाला सुङदेन
27 “‘छ्येउ-छ्येंमु पेहच्ये मेहयोहङगे’ माएँ तामनी ख्याया़गी थ़े सिहन्दी येह। #
प्रस २०:१४; व्य ५:१८ 28यिहॱनाङ ङाह ख्याया़ला माएँ, का़हन्दीगीॱआङ सुज्यी पी़हमी-पेहजाया़ला सेम चोक्पागी ताएँ, खोगी तोहङलेराङ राहङगी सेमला ओ़ह पी़हमी ङ्याम्बु छ्येउ-छ्येंमु पेह सिहन्ग्यो ओहङगे। 29का़हलेॱआङ ख्येगी योबा मी़गी ख्येला तिहक्पा पेह च्यू़सीमाना ओ़ह मी़ तेन्दी क्युर चोहङ, च्यिबेमाना ख्येगी ज़ुबु थाम्ज्यी ङ्याल्वाला छ्यिकें म़ेदीनी मी़ च्यी़ मे़हबाराङ काहवा यिहम्बा।#मत्ती १८:९; मर्क ९:४७ 30ओ़ह ल़ेहमुराङ, ख्ये राहङगी योबा लाहक्पागी राहङला तिहक्पा पेह च्यू़सीमाना ओ़ह लाहक्पा तुप्ती क्युर चोहङ। ख्येगी ज़ुबु दोगे ङ्याल्वाला छ्यिकें म़ेदीनी लाहक्पा च्यी़ मे़हबाराङ काहवा यिहम्बा।” #मत्ती १८:८; मर्क ९:४३
थाक्पा च्येकेन्गी तेहन्दाला सुङदेन
(मत्ती १९:९; मर्क १०:११-१२; लूक १६:१८)
31 “दि ल़ेहमुॱआङ म़ेदी येह, ‘का़हन्दीगी राहङगी पी़हमीला थाक्पा च्येकें, खोगी मोहला थाक्पा च्येक्योगी यिहगी प्री़हदी तेर्च्यु।’ #
व्य २४:१-४; मत्ती १९:७; मर्क १०:४ 32यिहॱनाङ ङाह ख्येला माएँ छ्येउ-छ्येंमु पेहक्यो म़ेदी लेहमेन केच्यालेगी राहङगी पी़हमीला थाक्पा च्येकेन्दीगी मोहला छ्येउ-छ्येंमु पेह च्य़ूएँ ओहले ओ़ह ल़ेहमु पेहती थाक्पा च्येक्यो पी़हमीला पा़हमा पेहकेन्दीगीॱआङ छ्येउ-छ्येंमु पेहक्यो ओहङगे।” #मत्ती १९:९; मर्क १०:११,१२; लूक १६:१८; १ कोर ७:१०,११
ना-क्याल्ज्ये मे़हयोहङगेन्गी तेहन्दाला सुङदेन
33 “ताहङबोगी मिहया़ला, ‘चिहन क्याहप्ती ना माहक्याल, ओहले चो़वो छ्येवा ङ्याम्बु ज़्या़क्योगी ताहम्ज्या डुप्तोङ’ म़ेदी माक्योदी ख्याया़ला क्यी़हराङ येह। #
लेवी १९:१२; गन्ती ३०:२; व्य २३:२१ 34यिहॱनाङ ङाह ख्याया़ला माएँ, ख्याया़गी च्यिगी तेहन्दाॱलाङ ना माहक्याल। स्यिहङगामकी मिहनला ना माहक्याल च्यिबेमाना ओ़हदी किन्ज्योगी ज़्य़ू-ठि यिहम्बा। #याक ५:१२; यशै ६६:१; मत्ती २३:२२ 35जाम्बुलीङगी मिहन तेन्दीॱआङ ना माहक्याल, ओ़हदीनी किन्ज्योगी स्याहप पा़ नाङगेन्गी ग्या़ यिहम्बा, ओहले यरूशलेमगी मिहन तेन्दीॱआङ ना माहक्याल, च्यिबेमाना ओ़हदीनी स्यिहङगामला ज़्य़ू नाङगेन क्याहल्बु छ्यिम्बुगी क्याहल्सी यिहम्बा।#यशै ६६:१; भज ४८:२ 36ओहले राहङगी गो़ दे़दीॱआङ ना माहक्याल, च्यिबेमाना ख्याया़गी राहङगी गो़गी टा क्युहङबा च्यिॱआङ, येहना कार्पु ज़ो ख़ूज्ये येहना नाहक्पु ज़ो ख़ूज्ये। 37च्यि ताम मा कोहच्ये येहबा, यिहम्बा माना यिहम्बा, मिहम्बा माना मिहम्बा म़ेदोङ। ओ़ह म़ेदी ल्हाक्पु तामनी ती़ह ङो़ले ओहङगे” म़ेदी येशूगी सुङ नाङसीन।
क्यिम्बा लेहन्ज्ये मेहयोहङगे माएँगी तेहन्दाला सुङदेन
(लूक ६:२९-३०)
38 “‘मी़गी क्यिम्बा मी़, ओहले सोगी क्यिम्बा सो’ माक्यो ख्याया़ला क्यी़हराङ येह। #प्रस २१:२४; लेवी २४:२०; व्य १९:२१ 39यिहॱनाङ ङाह ख्याया़ला माएँ, ख्याया़गी सु ङ्याम्बुॱआङ क्यिम्बा माहलेहन। का़हलेॱआङ सुज्यीगी ख्येगी योबा डाम्बाला क्याहप्सीमाना योमा डाम्बाॱआङ सेहतेर। 40का़हलेॱआङ सुज्यीगी खाम्ज्यु चे़दी ख्येगी छ्युबा ख्येर्च्ये छोल्सीमाना खोला ख्येगी योलसेनॱआङ तेर। 41का़हलेॱआङ सुज्यीगी ख्येला नेसा च्यी़ डे़ लाङ म़ेदी उर्चु पेहसीमाना खो ङ्याम्बु नेसा ङ्यी़ डे़ तेर। 42ओहले ख्ये ङ्याम्बु लाङगेनया़ला तेर, ओहले ख्ये ङ्याम्बु पेहलेन सेहच्ये छोल्गेया़ला पेहलेन तेर” म़ेदी येशूगी सुङ नाङसीन।
टाहॱलाङ चेवा पेह कोहकें
(लूक ६:२७-२८,३२-३६)
43 “‘खिम्जीला चेवा पेहतोङ, टाहलाती ङेन्ज्येन पेहतोङ’ म़ेदी माक्यो ख्याया़ला क्यी़हराङ येह। 44यिहॱनाङ ङाह ख्याया़ला माएँ, टाहया़लाॱआङ चेवा पेहतोङ। राहङला तुहक्पु तेर्केनया़गी तेहन्दाला सोल्वाङ ताप्तोङ, 45आहन्डा पेहसीमाना ख्याया़ स्यिहङगामला ज़्य़ू नाङगेन्गी याहप्च्येन आबागी पुह-पोहमो ओहङज्ये येह च्यिबेमाना किन्ज्योगी मिह चोक्पा दाङ मिह या़हबु ङ्यिकालाराङ ङ्यिहमागी टे़ह नाङगेन ओहले तिहक्च्येम्बा दाङ टाहङबु ङ्यिकाराङगी तेहन्दाला नाम क्याहप च्य़ू नाङगेन। 46राहङला चेवा पेहकेन मिह च्यी़लाॱराङ चेवा पेहसीमाना ख्याया़ला च्यि च्याहगा ज्योर्कें ले? दि ल़ेहमु चेवानी ठाल तुहएँ मिहया़गीॱआङ पेहकें। 47ख्याया़गी राहङगी ङ्येन्जेन-ङ्येहवाया़ला च्यी़राङ चेवा पेहसीमाना लेहमेनया़गी म़ेदी ल्हाक्पु च्यी़ पेहपा ले? च्यि लेहमेन क्यिहपागी मिहया़गीॱआङ ओ़ह ल़ेहमु मेहबेकें ले? 48ओ़ह सोङबे स्यिहङगामला ज़्य़ू नाङगेन्गी ख्याया़गी किन्ज्यो च्यिॱआङ क्येन म़ेहबा जेती ज़्य़ू नाङग्यो ल़ेहमुराङ ख्याया़ॱआङ ओ़ह ल़ेहमुराङ पेहती तेह कोहएँ” म़ेदी येशूगी सुङ नाङसीन। #लेवी १९:२; व्य १८:१३
Atualmente Selecionado:
मत्ती 5: HYLM
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
© 2023 (Active), Wycliffe Bible Translators, Inc. All rights reserved.
