Luke 5

Baduki batsomi ba Sése àsɔle

1Letsuge lemochi va Sése àbade va tunge a mudibe a Sénésarɛte, piti a baate niyàkukule va pédi a ndɛ mu yoge mabige ma Nzɛmbi. 2Va tunge a mudibe muɛne, Sése nàmɔne mambunge mɔli ma balobi ba batchui bàsotege mu tsoke machinge ma bɔ. 3Sése ànage gutsɔ mbunge a Chime, nàlɛle ndɛ ndé: «Mate va tunge mudibe, woke gu mutéme. Sése àtsagele gutsɔ mbunge, nàlɔngese piti a baate.»

4Sése àmane lɔngese, nàlɛle Chime ndé: «Woke gu mutéme mudibe, béne bambɛgi bawɛ lerambe machinge ma béne.» 5Chime nàkale ndɛ ndé: «A Kumu, butsuge botchi bése lerɛmbi machinge tɔ lesakuéti tchui ti mumochi vɛ.» Tɔ mɛ bagabelege rambe machinge ndile ka mu wɛ léli. 6Bɔ bàrambe machinge, nibàkuate batchui mvuabɔvɛ. Kiti machinge nimàvɔte bakege. 7Bɔ nibàvɛse bambɛgi ba bɔ babàbade na mbunge ngule a mudibe yéne mu yade gu yiyamese bɔ. 8Chime Piɛre àmɔne tchambe muɛne, àsome mabɔnge va busu bua Sése, nàlɛle ndɛ ndé: «Kumu mate va pédi a mɛ, mɛ mutu wu mubi.» 9Muti bɔɔme buàkuate Chime bone bambɛgi bɛndi mu lerange la batchui lebɔ bàkuate. 10Sake bone Sa na baane ba Sébédé bambɛgi ba Chime, nibàmɔne na bɔ bɔɔme. Avanekaniva Sése àlɛle Chime ndé: «Niage bɔɔme mɔne, bande lɔlɔ, wɛ ndile ka baate wɛ kipɔtelenge mu lage bɔ ndjile a Nzɛmbi.» 11Bɔ bàgabege gu tunge a mudibe, bàgade mambunge, nibàduke Sése.

Sése abɛlese mutu ngua makédi

12Letsuge lemochi va Sése àbade gu musɛnge mukime, mutu ngua makédi àyade, àmɔne Sése, àsome mabɔnge mu tɔtɔ, àkundege lebunze va buse buɛndi, nàlɛle ndɛ ndé: «Kumu ti wɛ tɔnde, tɛndele mɛ niute.» 13Sése àsokele gɔgɔ, àbɛmbe ndɛ, nàlɛle ndɛ ndé: «Mɛ tɔnde mé wɛ tɛndege.» Vakɛtiavane makédi nimàfuade. 14Sése nàlɛle ndɛ ndé: «Ya dunguse tchambe muɛne.» Yɛnde gulidi muvédi a malage wɛ vɛde lelage le Muyise àlɛle, na mu muɛse baate botchi ti wɛ mabɛlege. 15Avane ndume a Sése niyàdunge mu bitchige biotchi. Piti a baate niyàkokenenge mu yoge mambe ma ndɛ yambelenge, na mu bo ndɛ bɛlese bɔ. 16Sése àmate va pfuɛchi a bɔ, nàyɛnde gu bɔnde Nzɛmbi gu itchige cha lepémbe.

Sése atɛmese ikate

17Letsuge lemochi va Sése àlɔngesenge, baate ba lebuli la bafarichi na basupili ba mangidi ma Nzɛmbi, bàbàmate gutsɔ mala makɛse a Ngalilé na Sudé na gu musɛnge a Sérusalɛme, nibàbade batsagele va pédi a ndɛ. Ndɛ nàbɛlese babéde mu bungudi bua Nzɛmbi buàbade na ndɛ. 18Baate batsuale ikate va yulu ikakele, nibàsage ningese chɔ gutsɔ nzɔ mu sose chɔ va busu bua Sése. 19Tɔ bɔ bàsàbakese ndjile ya ningele na chɔ vɛ, muti piti a baate yàbade mvuayɔvɛ. Bɔ bàvate na chɔ gu yulu a nzɔ, bàtube lechuleke, nibàkolese chɔ vatsɔ piti a baate va busu bua Sése. 20Sése àmɔne lebiɔge la baate muɛne, nàlɛle ikate ndé: «A mbɛgi a mɛ, mabi mawɛ bamachindele.» 21Basupili ba mangidi ma Nzɛmbi na baate ba lebuli la bafarichi, nibàlɛle gutsɔ mitéme mia bɔ bo: «Awunewu mutu wa vɔngele Nzɛmbi, wuwalɛle ndé mabi ma baate bamachindele guni amate?» Nzɛmbi ndɛ pénze niwulidi na bungudi bua chindele mabi ma baate. 22Sése wuwàyabenge mataase ma bɔ bàbade namɔ, nàlɛle bɔ ndé: «Béne muki lelidi na mataase ma mulinge wunewu?» 23Tchambe lelelidi page mu lɛle lini? Lɛle guati mabi mawɛ bachindili voki lɛle guati tɛmene, tole ikakele chawɛ, yɛnde gu nzɔ wɛ? 24Yabani ti mɛ Wuwàbɔnge ndjime a baate niwulidi na bungudi bua chindele baate maambe mamabi. Avane ndɛ nàlɛle ikate ndé: «Tɛmene, tole ikakele chawɛ, yɛnde gu nzɔ wɛ.» 25Tinatine ikate yitɛmene va mise ma baate, yitole ikakele chi ndɛ bàde alase va yulu a chɔ, nàyɛnde gu nzɔ ndɛ nakakese Nzɛmbi. 26Baate botchi bagémbe, nibàkakese Nzɛmbi. Bɔɔme bukuate bɔ, bɔ nibàlɛle bo: «Bése lɔlɔ lemoni mambe ma lesàmamɔne na bukale vɛ.»

Sése asɔle Levi

27Sése àmate mala ma va kɛse a Ngalilé, nàbakese Lévi mubongi a mapaga atsagele va itchige chi bàfutenge mapaga. Sése nàlɛle ndɛ ndé: 28«Tɛmene, duke mɛ.» Lévi àtɛmene, àtémbege biotchi bi ndɛ bàde na biɔ, nàduke Sése. 29Avanekaniva Lévi àsade mukungi wu munéni gu nzɔ ndɛ mu yimbese Sése. Babongi ba mapaga mvuabɔvɛ na baate bakime, nibàtchade bone abɔ. 30Baate ba lebuli la bafarichi na basupili ba mangidi ma Nzɛmbi bàningene pfuɛchi abɔ muɛne na bɔ muɛne, nibàlɛle baate ba Sése bo: «Béne muki latchade na babongi ba mapaga na baate ba ngua bubi bua mambe?» 31Sése nàkale bɔ ndé: «Baate bababɛle nibàbasage ngaange. Tɔ baate ba ngua maniute buédi, basasage ngaange vɛ.» 32Mɛ sayidi gu pɔtele baate babayɛbene vɛ. Mɛ gu pɔtele baate ba ngua bubi bua mambe mɛ yidi.

Sése ayambele mu tchambe la mine kugi

33Baate ba lebuli la bafarichi nibàlɛle Sése bo: «Lekɛse lotchi, baate ba Sa na ba bése ndile minenge kugi na bɔndenge. Tɔ baate bawɛ ndile tchadenge na niɔdenge.» 34Sése nàkale bɔ ndé: «Letsuge la lekuɛle, béne latoge lége biatchade nabia niɔde gulidi bambɛgi ba mutu wuwakuɛlene va ndɛ lidi bone abɔ?» 35Lekɛse nigone lelidi le bambɛne bákámase ngua lekuɛle va fuɛchi abɔ. Avanekaniva bɔ bákámine kugi.

36Sése nàbàtadele bɔ kokome ndé: «Mutu achitoge bɔnge irɛnde cha tsaande yanamanze mu bambe leséngi vɛ. Mbégi ndile mu nzɔle ndɛ kibake tsaande yanamanze mu bambe leséngi. Muti tsaande yanamanze ichitoge yɛbene na yakale vɛ.» 37Bachitɔge kɛle miduɛnge gutsɔ matsobe makale vɛ. Miduɛnge mi yɛle, matsobe mapasege, malame makapogege mu tɔtɔ. 38Ndile buédi mu kɛle malame mamabuɛ gutsɔ matsobe manamanze. 39Mutu amane malame mamabuɛ niɔde, ndɛ chibatoge miduɛnge niɔde vɛ.

Atualmente Selecionado:

Luke 5: NZB

Destaque

Copiar