Luk 4

Nagara na Ɛmɛtɔb Jisɔs

(Mat 4:1-11; Mak 1:12,13)

1Jisɔs, ason na Mbara Nɛfɛb, aru ya Jɔdan ka Mbara Nɛfɛb asɔnɛ amanam ka eyomo, 2ajɔ fa ka afo atanaba, jaji arinɛ ka afo ya, ngara yi njan ayaɛ, nnam ɛmɛgarɛ sɔng agbɔ.

3Ka nnam atɔɛ, “wɔ orena Mmɔ a Ɔsɔwɔ, tɔ natan nifa ɛyanga ejonɛnɛghɛ.”

4Jisɔs akpɛ, “Ayɛnɛ si: ‘Nnɛ arama kpen ka ejonɛnɛghɛ nanting.’ ”

5Nnam ɛsɔnɛ ayar ka bɔsɔ nkonkon amɛ ɛtɔngɛ oton eying kpakpa. 6Ka nnam atɔ Jisɔs, “Nkia nɔyɔ mbɔ wɔɔ na negere; atebsi amimkɛ nɔyɔ, ka nkɛ kpere nnɛ yi nsɛbsi nkiɛ. 7Ka Ɔkaghamna, nɔyɔ ni wɔɔ ɛjɔ nana.”

8Jisɔs akpɛ, “Amɛyɛnɛ si: ‘Kag Ntaa Ɔsɔwɔ ɛba, rɔghɔ yɛ nanting.’ ”

9Nnam ɛsɔnɛ amo ka Jɛrusalɛm eneɛ ama komo ka nɔkɔngɔ nju Ɔsɔwɔ. Atɔ Jisɔs “Orena Mmɔ a Ɔsɔwɔ, fɛb ma gbɔ fa. 10Ayɛnɛ ka nwɛr Ɔsɔwɔ si:

“ ‘Atɔ baɛnjɛl sa

ababa nnɔbɔnnɔbɔ;

11agbeba ka abɔ a mbɔ,

sɔng oki te ɛnɛn ka natan.’ ”

12Jisɔs akpɛ, “Nwɛr Ɔsɔwɔ arag si: ‘ki gara Ntaa Ɔsɔwɔ ɛba.’ ”

13Ngara yi nnam ɛkan na nagara ɛnɛ kpakpa, atamasighi Jisɔs ka ma ngara.

Atɛn Jisɔs ka Nasarɛt

(Mat 4:12-17; Mak 1:14,15)

14Jisɔs afɛnɛ ya Galili ka nsam a Mbara Nɛfɛb, ka oteb atebɛ ɛkɔnɔ ka ekpeghe ya wɔɔ. 15Ajɔ akpene mbɔ ka buju mfa Jus, ka anɛ wɔɔ ajɔ atighɛ.

16Jisɔs amo ka Nasarɛt ɛjɛbɛ ji abenge, ka ofo esiayɔ amo ka nju a mfa Jus si nɛwɛmɛ ɛnɛ ɛtɔngɔ. Jisɔs atam sa abeng nwɛr Ɔsɔwɔ. 17Akiɛ nwɛr Asaya mbono Ɔsɔwɔ. Atinni, ayɛ mfo ba ayɛnɛ:

18“Mbara Nɛfɛb Ntaa are nanaa,

atebsi amim sang

si ndag nyɛbɛ ɔka ntɔ akpak.

Amimto si ndag nanagha ntɔ agbɔkɔbɔ

ba anagga amar ayɛ mfo,

na anɛ ba niyiri afɔ nanagha,

19si atɔ anɛ ngara yi Ntaa ama sang sa atɔngɔ anɛ ɛbɛ ɔfa.”

20Ka Jisɔs afu nwɛr, asighi abɔ akɛ nnɛ a noto fa ama jɔ nji. Anɛ wɔɔ ka nju a mfa Jus amanga abriɛ, 21ka Jisɔs atɔ mbɔ, “Ɛnɛji ano ya aru ka nwɛr Ɔsɔwɔ yi mbeng na eyog amɛwɛmɛ.”

22Anɛ wɔɔ arag anɔba mbe atebɛ ɛfɛnɛ ɛkpɔmbɔ biji ka anɔba ano ya ajɔ arag. “Mmɔ a Josɛf sangna?” Abɔmmɔ.

23Jisɔs atɔ mbɔ, “Kɛdɛdɛghɛ nnyinyi si ɛtɔm na: ‘Ntaba anɛ ka aya, gbɔmba tab nana! Ne fa ka ɛjɛbɛ ɛja ji eyog si one ka Kafɛnum.’ ”

24“Ntɔ war kɛdɛdɛghɛ,” “mbono nakagha akpem ka ɛjɛbɛ ɛjɛ. 25Ntɔa ɛdɛdɛghɛ ebe abaka ba anu a mbɔ akpɔ ajɔ jɔ ka Isɛrɛl ka ngara Ɛlija, yi alab arina ka nnya ɛsa na ɛja ka nkoro ɔgba ajɔ ka nsisi. 26Ka Ɔsɔwɔ arito Ɛlija akɛ mbɔ, ato akɛ manka yi nnu akpɔ ka ɛjɛbɛ Sarafat ka ekpeghe Sidɔn. 27Ebe anɛ ba abini ajɔ jɔ ka Isɛrɛl ka ngara Ɛlisa mbono Ɔsɔwɔ, Ɔsɔwɔ aritab wawi erising Nɛman nnɛ a Siria nanting ya anɔbɔ.”

28Anɛ wɔɔ ka nju mfa Jus nete ɛsag mbɔ ka ji ayogho ji Jisɔs aragha. 29Atam ayimi, akamɛ aru ka ɛjɛbɛ mbɔ, akɔɛ amo ka bɔsɔ nkonkon ya asi Nasarɛt sɔng ajarɛ atob ka nɛsɛrɛ. 30Ka ajɛn asing fa ka ɛbɔngɔ mbɔ amo mba ɛyɛ.

Jisɔs Akama Abibi Atughu

(Mak 1:21-28)

31Asɛnɛ amo ka Kafɛnum, ɛjɛbɛ ka Galili, ka ofo esiayɔ agɔngɔ anɛ nekpene. 32Nekpene ɛnɛ ɛkpɔmbɔ biji, atebsi oteb ɛbɛ ekpe nɔyɔ. 33Munnu wiwi ajɔ ka nju a mfa Jus yi ebibi etughu eboɛ ɔsan. Abenge gbogbo, 34“Sɔng! Jisɔs nnɛ a ɛjɛbɛ Nasarɛt jɛji ofeghe warr ayɔ? Ɔmaba ɔmɔrɔbɔ warr? Nnyinyi nnɛ yi wɔ ore Mfɔ a nnɛ Ɔsɔwɔ!”

35“Gɔ ɛkan!” Jisɔs arag nkoronkoro “Ruɛ ka biji!” Ka ebibi etughu ɛtɛmmɛ etob ka ɛbɔngɔ anɛ wɔɔ ka aru arite ɛnɛn.

36Anɛ wɔɔ ɛkpɔmbɔ biji arag na atɛ, “Fa bagha nekpene ni? Afe nɔyɔ na nsam atɔ abibi atughu aru!” 37Ka oteb ateb Jisɔs emo ɛkɔnɔ wɔɔ.

Jisɔs Atab Ebe ka Aya

38Jisɔs atam ka nju a mfa Jus amo ka etek Simɔn. Ntakpa nefeb abɔb nnyɛ nka Simɔn, ka agɔrɔ Jisɔs sa ayighɛ nefeb ni. 39Ajɛrɛ akperɛ atɔ nefeb si ru, nefeb ɛkan. Atam naosunosu ajam ejonɛnɛghɛ nanaa akɛ mbɔ.

40Ka ngara nkruanjon, anɛ aba na anɛ ba akpe aya ka nganangana amakɔrɔ Jisɔs, akono kpere nnɛ ɔbɔ aya ɛkan. 41Abibi atughu aru ebe anɛ ka biji, abenge, “Wɔ ore Mmɔ a Ɔsɔwɔ!” Ka ayam mbɔ sa aki rag atebsi anyinyi si are nnanagha.

42Ngara yi efurusu ɛmakpara Jisɔs amo ka mfo ba ajɔ nanting. Anɛ ajɔ asɛbɛ ka ngara ya asi ka mfo ba are, alɔg si ajɔ fa nanɛ sɔng akimo asighi mbɔ. 43Ka Jisɔs atɔ mbɔ, “Noto ɛnaa ni si ndag nyɛbɛ ɔka oton Ɔsɔwɔ ka bɛjɛbɛ biga, atebsi jina ja atom si nne.” 44Ka ajɛn aragha ano Ɔsɔwɔ ka buju mfa Jus ka ekpeghe Judia.

Atualmente Selecionado:

Luk 4: NDD Nta

Destaque

Copiar