luka 24

asa 24

gil gwuḏu ganu

mṯ. 28:1-10, mks. 16:1-8, ywn. 20:1-10

1na gi lamon lun liro lɽa lun ləduji loro kwoɽoṯəɽɩl, gwerre mimmi gilio nalwele kil lapo ŋɩḏini ŋun ŋigelɩlo muma. 2nalbuje gɩḏolia ŋɩmaḏəḏiɽəḏini ga kil. 3gwune naləḏi nate nanbuje aŋɩna yeḏi gwele gwun gwan yecu no. 4na gi gwune jil gi ḏirio jei ga ŋuɽun ŋeno, na ləmɩnyo lɩttən lɩḏuḏɩnu lɩkanu jiria jiro nɩɽe jaṯar ganu lrmal lrmal. 5na gi gwune jil gi ḏɩḏonyɩḏa nalŋələḏəṯɩni ga kwɩnyəm, naleicɩno, gwuḏaro nanyabunyi gwun gwimiḏo gi liji lun laiyo? 6ŋu gwate gwo ŋɩne no, namɩni madiɽi. aḏɩŋanɩl galakwe gwuməḏijaje gi gwune gwijɩre jalil. 7nuarno, arram ŋaɽe ŋeḏi liji ŋəḏəḏini gi di ḏeḏi liji lun lɩki, ŋalɽinye gi luɽi lun lɩmalɩḏo ganu, na gi lamon lun ləduji loro ṯəɽɩl ŋədiɽi 8nalaḏɩŋane ŋuɽuna ŋuŋun. 9nalaɽuwe kil naluməḏɩjo calɩmis jun jiro di na gwete, na wei lun lɩṯanu ŋuɽuna ŋeno wei. 10na mariam majdaliya na yuna na mariam gwun gwiro nana gweḏi yagub, na la lun liro kaja lun lijille, liro lun luməḏɩjo duwəjo ŋuɽuna ŋeno. 11na ŋuɽun ŋagin nalro lagin gi ŋun ŋate ŋəṯi jei ganu no, nate naldeŋɩnejo no. 12na buṯrus diɽi nueneḏe kil, nuɽile nuŋalaḏe gi jiria jun jɩmɩde ganu jɩkɩɽɩbəḏɩl je jijo ga cucun, nuaɽuwe gwəbəḏi ga ṯuṯ kwulo gwuŋun ŋuɽun ŋun ŋɩmila.

yecu maŋini gi ṯaṯ ḏeḏi amwas

mks. 16:12-13

13na lɩttən lagin gi lamon lono nalwele gi lɩrgwom lete lola ganu urucəlim lar mil dubə ca lan amwas. 14naluməḏəṯelo ŋɩmaga gwan ŋuɽun ŋeno wei ŋun ŋɩmila. 15na gi gwune jil gi ḏuməḏo naṯɩlwɩrlijo gworo ŋuɽuna, na yecuŋu nuldikaḏaico gɩṯo naliwele. 16namɩni jei jagin rimi ganu lugwun nate nalaŋu nalɩŋe no. 17nuleicɩno, ŋuɽun ŋɩrṯa ŋun ŋuməḏəṯanyalelo na nyaŋa lɩwiḏi? nalḏuḏɩni ga nalriŋɩneḏe gi jei. 18na gwete gwun gwan kilibas nuwɩrlijo ŋuɽuna nueicɩno, ŋa gwiro gwetɩdo urucəlim nate nalɩŋe ŋun ŋɩmila ŋwamon ŋweno na? 19nuleicɩno, na ŋɩrṯa ŋiro? naleicɩno, ŋeno ŋeḏi yecu gweḏi nasɩra, gwun gwiro nebi, gwun gwəṯi ŋɩma ŋɩru na ŋuɽun gi jei ganu jeḏi elo na gi liji wei, 20na galakwe na jɩsis ḏəḏə jun jɩbuḏo na lele ləri, nalakɩmi ḏaiya ḏe nalɽinye gi luɽi lun lɩmalɩḏo ganu. 21namɩni anaŋa anḏuḏɩnɩjo anarno ŋu gwiro gwun gwəkədə isreiyil ga jili je namɩni ŋutəno ŋeno wei, gwunanyine gwiro lamon lun ləduji loro ṯəɽɩl gi gwune ŋuɽun ŋɩmila ŋeno. 22na la kworo lagəri lɩmijiobejega ṯuṯ; lijo mimmi gilio kil, 23na gwune nate nalbuje aŋɩma yuŋun no, nalwila nalarno laŋəḏi ḏəŋinio ḏeḏi liji leḏi kanyin nalarno ŋu məmɩḏe. 24na dino, kworo nalwele lun lijanale kil, nalbuje dino gi gwune ame la, namɩni ŋu nate nalaŋaḏa no. 25nuleicɩno, jɩɽilo ce na lun ləṯi dugwor dun daṯe daṯəmɩnyi cou ŋuɽuna wei ŋun ŋaṯɩl nebɩŋa umə no, 26ŋate ŋiro arram kɩrisṯo gwiḏe ŋɩdi ŋeno ki ŋuəḏi gi ḏoɽeḏa ḏuŋun na? 27nulaŋijo ŋuɽuna ŋan ŋu kɩḏam ganu geḏi elo uro ḏi musa kəbe ḏi nebɩŋa wei.

28nalwele gɩṯo gi lɩrgwom lun lɩweləḏɩne, nuro gi gwiji gwun gwar gwadare ŋuwele kɩɽelo gwe; 29nalakaḏaico ga naleicɩno, ilijiga gi gwune galo garo garage na anyin yar yabɩɽe. nuəḏi gwalijiga. 30gwune nalɩje gi ḏiṯa, nuape gia nueico eloŋu sukran nubɩleṯɩnya ganu nulɩḏəḏə. 31na jei jagin iḏini nallɩŋe nudu nuete lagin cou. 32nalar ŋɩmaga no, dugwor dage daṯe dijibuḏi nanu ḏa lɩmijuməḏɩjo gi ṯaṯ, na mijilaŋijo muma ŋun ŋijo kɩḏam ganu geḏi elo na? 33naldiɽi gi sa cono nalaɽuwe urucəlim; nalbuje calɩmis jun jiro di na gwete laɽuwaḏo ldu na lun lijille, 34nalarno, gwele gwun gwiro elo madiɽi gwerkwe ganu nuaŋinijo simianŋ. 35namɩni luŋa naluməḏɩjo ŋuɽuna ŋun ŋɩmila gi ṯaṯ, na galakwe gwilɩŋiḏɩlo gi ḏibɩleṯɩnyeḏa gia ganu.

yecu maŋini gi ḏuwəjo

mṯ. 28:16-20, mks. 16:14-18, ywn. 20:19-23

36na gi gwune jilo gi ḏuməḏo ŋuɽuna ŋeno, na yecuŋu ḏuḏɩni kɩlɩgi ganu lagin, nuleicɩno, ḏouwɩɽiḏa ḏaje lagalo. 37nalabo ganu ḏɩburɩbur naldonye, nalro gi larno laŋəḏi gwuɽɩwə. 38nuleicɩno, gwudaro gəko aṯaji dugwor pi ganu? na gwudaro na ḏuməḏɩno diɽi gi dugwor ganu dalo? 39aŋəḏɩl di ḏinyi na ŋwara ŋwi; nyi gwiro. ḏɩmumɩl nanu nanyaŋu; gi gwune gwuɽɩwə gwate gwəṯi jɩḏḏi na ŋwuya gi gwune aṯanyalaŋu ŋwəṯilo. 40na gwune nuumə dino nulaŋijo di duŋun na ŋwara ŋwuŋun. 41na gi gwune dilo ganu namɩni late lɩməmɩnyi no, nalobaga ṯuṯ, nuleicɩno, nya ləṯi ŋɩdio ŋe ḏiṯa ŋɩne a? 42nalḏəḏə lumi louwɩrio lununinu na laiya lɩti. 43nuape nuʼe gi jei ganu jagin.

44nuleicɩno, ŋeno ŋiro ŋuɽun ŋun ŋuməḏɩjejɩŋe gi gwune lore lijiga, nuarno arram alṯɩmi wei ŋun ŋulinu ŋan nyi kɩḏam geḏi elo ŋuɽun ŋun ŋigelijɩlo elo musaŋ, na nebɩŋa na gi delɩŋa. 45naliḏi ŋadɩgɩɽenya ŋagin kani allɩŋe gɩḏam geḏi elo, 46nuleicɩno, ŋulinu dino, arram kɩrisṯo gwiḏe dino, na gweḏiɽi gi liji lun laiyo gi lamon lun ləduji loro ṯəɽɩl, 47naluməḏɩjo jiri juŋun je ḏuwɩrlaḏe ga na ḏəbɩrio ŋɩdi ganu ŋun ŋɩki, gi liji wei uro urucəlim. 48na nyaŋa liro lun laŋiḏi ŋuɽuna ŋeno. 49na nyi gwajiwəḏɩjo ŋun ŋeiciŋɩŋe baba gwi; nyamɩni jaḏaṯa ga kamɩrɩgen yun yan urucəlim kəbe nyakani ŋɩma kanyin.

ḏiḏiɽo ḏeḏi yecu kanyin

mks. 16:19-20

50nuldeje kɩluḏo kəbe nalṯɩmi beṯiniya nuabuje di duŋun elo nulmora. 51na gi gwune ju lulmora nuəbɩri lagin, nuabuje kanyin. 52nalorṯeḏa nalaɽuwa urucəlim nalḏile ganu gworki; 53naṯilje kwu dunu gweḏi elo gwun gwubuḏo ŋwamon wei naṯɩlbuḏi eloŋu gwalorṯeḏa.

Atualmente Selecionado:

luka 24: OTR1966

Destaque

Copiar