luka 13

asa 13

arram wɩrla galo

1na kaja keno ləmɩnyo kworo gwuməḏɩjɩlo gwan liji leḏi jalil na bilaṯus uɽuḏi ŋuwəno ganu ŋagin ḏiḏuga ḏe ḏagin. 2nal yecu wɩrlijo ŋuɽuna nuleicɩno, nyalarno liji leno leḏi jalil lɩkieno gworki gi liji wei leḏi jalil gi gwune lɩmiḏe gwan ŋɩdi ŋeno a? 3namɩni nyi gweiceijɩno, awe; namɩni ḏa nya late lɩmawirla ga ŋuɽun ŋun ŋɩki no, nyaŋa wei dino nyalai liro gi luŋa. 4i nyalarno liji lun liro di na dubə lun lɩmani ḏimɩle iḏeḏe elo silowam nulɩɽinye, ləṯi gəmɩju gwutəno gi liji wei lun laṯɩje urucəlim a? 5namɩni nyi gweiceijɩno, awe; namɩni ḏa nya late lɩmawɩrla ga ŋuɽun ŋun ŋɩki no, nyaŋa wei dino nyalai liro gi luŋa.

gwuwɩda gwun gwate gwəṯi nyaɽe no

6nuluməḏɩjo ŋuɽuna ŋeno ŋun ŋɩlɩbo; gwiji gwete gwəṯi gwuwɩḏa gwukwuḏɩnu gi jɩneina ganu juŋun. nuwila gwunbunyi nyaɽe, nate nulbuje no. 7nueico gwiji gwun gwaṯɩdɩme jɩneina no, jɩḏilio jun jiro ṯəɽɩl jaṯijila nibunyi nyaɽe kwuwɩḏa kweno, namɩni nyate nyaṯɩnibuje no. wuɽəḏi ga. gwada ga nuape gala ga jai? 8nuwɩrlijo ŋuɽuna nueicɩno, gwele gwi, ouwɩrico gɩḏilio keno dino, kəbe nyi kwurəjo ga nyidoije ŋɩɽaḏa; 9na ḏa maɽe nyaɽe ŋuɽun ŋiŋir, na ḏa gwate maɽe nyaɽe no namɩni gɩdo ganu gouwuɽə ga.

ḏiŋiriḏa nanu ḏeḏi gwa gi lamon le sabiṯ

10na gwalɩmiḏo kwu dunu gwete gi lɩdunu leḏi elo gi lamon le sabiṯ. 11na gwa gwete je gwun gwəṯi gwuɽɩwə gwurebɩna jɩḏilio di na dubə, na gwuɽikədə luya le ḏuɽo na gwate gwəṯi ŋɩma gwaṯɩḏuḏɩni ga ḏuṯ no. 12na gwune na yecu aŋu nuəmɩḏe nueicɩno, gwa, ŋa makədəḏɩni ga gi ḏɩrebɩniḏa ḏuŋa. 13na nanŋele di duŋun elo. na cou nuwala ganu nubuḏi eloŋu. 14na gwele gweḏi dunu gweḏi elo wɩrlijo ŋuɽuna nuɽe ganu gi gwune yecu gwumuŋele muma gi lamon le sabiṯ, nueico liji no, ŋwamon ŋwo nyəɽɩl arram ŋwaŋwi liji ape ŋɩru, na ŋwamon ganu ŋweno eleḏalɩne ganu nyagelini muma, namɩni lamon le sabiṯ late liro no. 15na gwele wɩrlijo ŋuɽuna nueicɩno, nyaŋa lun ləṯi ŋuɽuna ganu ŋɩttən, nyaŋa wei nya late ləkedə nyɩḏrio nyalo ga i nyəɽɩgə kalo ŋagin gi lamon le sabiṯ nanyanyele nyalicio na? 16na gwa kweno gwiro ŋaɽe ŋeḏi ibraim, ŋigaki seiṯan jɩḏilio di na dubə, ŋate ŋiŋir ŋakədəḏɩni ga gi ḏɩkana ṯeno gi lamon le sabiṯ na? 17na gwune nuar dino, na wei lun lɩkiḏiḏɩle nalḏarape, na liji wei naldile ganu ŋɩru ŋun ŋaṯulape ŋɩbuḏo gworki.

ŋuɽun ŋun ŋɩlɩbo ŋeḏi ŋaɽe ŋeḏi kardal na yeḏi jɩduɽu

mṯ. 13:31-33, mks. 4:30-32

18nuarno, ŋele ŋeḏi elo ŋiro galakwe? nuarno ŋiro gi aŋe? 19ŋaro gi ŋaɽe ŋeḏi gwaɽe gwun gwan kardal ŋun ŋɩti, ŋɩma gwiji ape nugele gi jɩneina ganu juŋun; nubuḏe nuro gwaɽe gwun gwubuḏo naṯi nyiɽuwə nyeḏi kanyin wila naṯɩlḏɩre gi dima elo duŋun. 20nuaɽu nuar mɩna no, nuarno ŋele ŋeḏi elo ŋiro gi aŋe? 21ŋaro ŋi jɩduɽu jun japɩlo gwa nulbiji gi jəlmɩḏ ganu ṯəɽɩl jeḏi jilo, kəbe nalro jɩḏuɽu wei.

ḏəḏio ḏe ḏɩmiḏa ḏun ḏimə ganu

mṯ. 7:13-14,21-23

22naṯuwewele gi jɩmɩrɩgen na ŋwurgwom naṯualɩmiḏe na gwaṯuwewele urucəlim gwe. 23na gwete eicɩno, gwele gwi, liji lun louwirio liro lar ləkədəḏɩni ga? nuleicɩno, 24bɩɽiḏɩl nanu kani nyəḏi kouwɩr yun yimə ganu, gi gwune nyi gweiceŋɩno, lo lutu laṯɩbunyi larno ləḏi, nate naləṯi ŋɩma no. 25na ḏino ḏa gwele gweḏi dunu madiɽi malaŋiṯi ouwɩr, na nyalimajaḏaṯa gi ḏiḏuḏɩno kɩluḏo, nanyalapi gibia nyalarno, gwele, gwele, iḏijije. namɩni gwouwɩrlio ŋuɽuna gwajeicɩno, nyi gwate gwilɩŋiḏaje no, nya leḏi ne liro. 26na nyalarno, aniṯi gi jei ganu juŋa nanayu, nijilmɩni alɩmi gi daṯ dəri. 27na gwarno, nyi gweiceijɩno, nyi gwate gwilɩŋiḏaje no, nya leḏi ne liro; duḏɩl ganu lugwi nyaŋa wei lun lapo ŋuɽuna ŋɩki. 28ŋɩnəwei ḏərio gwula ḏaje na ḏiʼino gi jɩŋaḏ, ḏa nyalmaŋu ibraimŋ na isak na yagub, na wei lun liro nebɩŋa, ŋele ŋeḏi elo, namɩni nyalawini kɩluḏo. 29na luŋa lawila kalo gun gaṯɩn anyin abuḏa na kalo gun gaṯɩn anyin bɩɽe, na lakwogwo gwe na gelio gwe, nalajiga ŋele ŋeḏi elo. 30na eʼe, lun leḏi gɩdo ladare, namɩni lun leḏi gwerre laje gɩdo.

ḏɩkeḏa ḏugwore ḏeḏi ərudus

31na kaja keno na lɩbarɩsi wila lugwun kworo, naleicɩno, duḏi ŋele ŋɩneno. ərudus gwubunyaŋa gwaŋaɽinye. 32nuleicɩno, wiḏɩl nyuməḏɩjo ŋəjorio ŋono, nyi gwo gwuditi ḏiŋeroma na nyi gwo gwumiḏi liji gwunne, na giləganu, na gi lamon lun ləduji loro ṯəɽɩl nyi gwaṯɩmi ŋɩru ŋi. 33namɩni arram nyi gwele gwunne na giləganu na ŋwe gɩdo gwe, gi gwune ŋate ŋiŋir nebi gwaiyo kɩluḏo urucəlim no.

yecu gwəri gwula gwan urucəlim

mṯ. 23:37-39

34urucəlim kwe, urucəlim kwe, gwun gwaṯɩɽinye nebɩŋaije na ŋalauce nyɩdol nye lun lɩwəjɩnu lugwuŋa, ŋwamon ganu umɩnyo nyibunyu gwawəɽeico nyaɽe nyuŋa ldu lugwi gi gwune aṯɩn gaŋiro wəɽeice nyaɽe nyuŋun gi nɩbu ganu ŋamɩni donye. 35eʼe duno gwalo majɩnwelejene gwuḏu ganu. nyi gweiceijɩno, nya late linyiaŋu minu no kəbe gaja gila gun ganyaŋarno,

ḏɩbuḏia ḏaje lugwun gwun gwila jiri je jeḏi gwele gwun

gwiro elo.

Atualmente Selecionado:

luka 13: OTR1966

Destaque

Copiar