Genesis 3

Adanwan Evam mana cäsuculcanchu

1Ñatac Tayta Dios lluy chucaru uywacunacta camaśhancunapi culibraycämi#Apo 12.9; 20.2. llaqui-llaqui casquish caculläla. Paymi walmïta: “¿Tayta Diosćha cayćhu cä lantacunäpïta mana micapäcunayquipä rasunpa nipäcuśhulanqui, aw?” nin.

2-3Niptinmi walmica: “Lluy jaćhacunäpïmi wayuyninta micuchwan. Ñatac wirtap ćhawpinćhu wiñä lantapïmi ichá: ‘ama micapäcunquichu nï yataycapäcunquipischu, mana wañupäcunayquipä’ nil Tayta Dios nipämäla” nin.

4-5Niptinmi culibrayca: “¡Chay manam rasunpachu; manamá wañupäcunquichu! Aśhwanpam micülulꞌa Tayta Diosnu yaćhanqui mayannin allin mana allin caśhantapis. Chayta yaćhalmi micapäcunayquita Tayta Dios mana munanchu” nin.

6Chaymi walmica lantap micunan tuquilla caśhanta licälul munapälun, yaćhayniyu caytapis pinsälul chalalcul micülun. Jinamanꞌa wayapanman uycuptin paypis micülun.#Rom 5.12. 7Chaynu micüluptin-pachalla pulanpa ñawin quićhacacüluptinmi calalla capäcuśhanta tantiacälälin. Chaymi ïgus jaćhap lapincunapi jilacaćhaculcul atajachicucta lulacälälin.

8Ñatac waywamunan tardiñam wayapäwan walmica uyalïlälin Tayta Dios wirtaćhu pulishanta. Jinalmi jaćhacunäpa śhunꞌunman pacacälälin.

9Ñatac wayapätam Tayta Dios nin: “¿Mayćhümi cayanqui?” nil.

10Niptinmi wayapaca: “Cayćhu pulishayquita uyalïlulmi manchälú. Calalla cayalmi manchacuypi pacacülú” nin.

11Niptinmi Tayta Dios: “¿Pitan calalla caśhayquita nishulanqui? ¿Icha ‘amam micunquichu’ nishac jaćhapïta micülu imanqui?” nin.

12Niptinmi wayapaca: “Masannïpä umäśhayqui walmica uycämaptinmari micülú” nin.

13Niptinmi walmïta Tayta Dios: “Imactamá lulälunqui” nin.

Niptinmi payñatac: “Culibrayca śhunꞌüta awnïchimaptinmi micülú” nin.

14Chaymi Tayta Dios culibraycäta nin:

“Cay lulaśhayquipïtam,

lluy uywacunäpïpis mana allinpä licaśha canqui.

Cananpi puntaman allpämi micuyniqui canꞌa,

śhullwayllawanmi pulinquipis.

15Jinamanꞌa walmiwan mana allinpam licanacachishayqui.

Chaynüllam milayniquipis walmip milayninwan capäcunꞌa.

Am culibraycäpa milayniquim ancullaćhu caćhunꞌa;

walmïpa milayninñatacmi ichá umaćhu jaluśhunqui” nil.

16Walmïtañatacmi nin:

“Patayu cayal nanaywanmi apanqui;

ishyacunquipis nana-nanaywanmi.

Wayapayquitam munapanqui;

paypa munayninćhütacmi canquipis” nil.

17Wayapätañatacmi nin:

“Chay jaćhap wayuyninpi mana micunayquipä mićhacuyaptïpis,

walmiqui nishuśhayquitam ichá lulayta ćhapalanqui.

Chaymi am-laycu cay allpaca mana allinpä licaśha canꞌa.

Sumä ñacaywanmi micunayquipäpis walan-walan talinqui.

18Allpapis caśhacunawan cardo nishancunallactam wiñachinꞌa;#Rom 8.20; Heb 6.8.

munti jaćhacunallactam micunquipis.

19Cay allpapi lulaśha caśhayquiman cutinayquicamam

südayniquiwan micunayquipä talinqui.

Allpapi lulaśham canqui; allpallamantacmi cutinquipis” nil.

20Chaypïta wayapaca walminta “Eva” śhutiwanmi śhutichäla, lluy cawsäcunäpi wamä captinmari. 21Tayta Diosñatacmi uywap utanpïta müdanacta lulalcul wayapätawan walmintinta müdachila. 22Jinalculmi nin: “Canan cay wayapa yaꞌanchicnümi allincäta mana allincäta yaćhälun; yanꞌalätac wiña-wiñay cawsay canapä cä lantamanpis chacchaycülul, wiña-wiñay cawsayta talïlu imanman”#Apo 22.14. nil.

23Nilculmi Tayta Dios chay Eden wirtapi walmi-caricta alüla: “Allpäpi camäśha calmi allpäćhu lulapämunqui” nil. 24Chaynu nunäta alulculmi wirtap inti yalamunan lädunman querubin anjilcunäta ćhulälun. Jinaman sumä-sumä walayä juc ispädapis jinantin muyülïninpam muyuyäla wiña-wiñay cawsanapä cä jaćhaman mana mayanpis yaycunanpä.

Atualmente Selecionado:

Genesis 3: QVW

Destaque

Copiar