Matíe 8

Zozíi yalɩma kosugɔ̀bhànyɔ

(Málɩ́kɩ 1.40‑45; Lúkɩ 5.12‑16)

1Tányɩɛ́ mʋ́ Zozíi wlʋ́ kíké wlú lé ɔ́ kwlíi a, nyʋa kɔ́kɔ́mnɩ́ jɩ́ ɔ́ kʋ́. 2Mà nyʋa nyièdɩ, kosugɔ̀bhànyɔ a múó kʋ mɔ̀ɔ, ɔ́ ŋnɩ ɔ́ gɔ̀ lé ɔ́ sra ɔ́ drɩ̀ koti sá, lé ɔ́ srʋ ɔ́ mà: «Kanyɔɔ̀, nɩ̀ yrá lé ká kplɔ a, ɩ̀ yi míi lé ɩ̀ yi mɔ́ɔ yalɩma!» 3Ɔ́ cí sɩ́tɛ̀ a, Zozíi fa sɔɔ́ lé ɔ́ gbɔ́ nyɔɔ́ lé ɔ́ srʋ ɔ́ mà: «Ɩ́ yrá lé kà yalɩma, yalɩma!» Ɔ́ cí kʋ́ɔ̀kʋ́ sɩ́tɛ̀ a, kosugɔ̀bhànyɔ̀ɔ̀ ɔ́ɔ yalɩma. 4Lé Zozíi srʋ ɔ́ mà: «Nàa srʋ nyɔ, mà mʋ lé Lagɔ̀bʋ̀bɔ̀nyɔ ká mɔ̀ yɛ́ lé kɔ̀ɔ̀ bʋbɔ̀lɩ̀ɛ̀ ɩ̀ kɩ̀ɩ wɔlɩ́ Moyízɩ cí wá a nyɛ́, lé nyʋa fɩ́ɛ́ ká saá yɩbhlɩ mà yà cɩ́cása yalɩma.#8.4 A zɛlɩɩ sáà Levíi 14.2‑32.»

Zozíi yalɩma sʋ́jàyʋ a cóyʋ

(Lúkɩ 7.1‑10; Záan 4.43‑54)

5Zozíi pla bhlà saá Kapɛnayʋ́mʋ bhè Wlɔmɛ́ɛsʋ̀jàà a kámanyɔ a múó yi ɔ́ drɩ̀, lé ɔ́ srʋ ɔ́ ɔ kɔ́ɔ́ kʋ́ yii. 6Ɔ́ bhibhio, ɔ́ anɩ́: «Kanyɔɔ̀, ná cóyʋ pʋ́ ɔ̀ gbó ɔ́ ya kplá ɔ́ yɛ́ kalɩmɛ ɔ́ klue.» 7Zozíi anɩ́: «À mʋ mà ɩ́ yie kɔ́ɔ́ yalɩma.» 8Sʋ́jàà a kámanyɔɔ́ anɩ́: «Kanyɔɔ̀, ɩ̀ ŋwnɔ́ kpanyɩ kʋ́ lé kà ná gbó pla nɩ́ɩ ne bhɩa. Cí wɔlɩdrè a múó mà ná cóyʋɔ́ yi yalɩma. 9Ɩ̀ dʋdʋɛɛ, mɔ́ɔ lɩ̀à ɩ́ ka kámanyʋa lé ná sɛ́fʋɔ́ sʋ́ja kʋ ná lɔ̀ zɔ̀, lé ɩ́ srʋɛ sʋ́jàyʋ mà: Mʋ lé ɔ́ mnɛ, lé ɩ́ srʋɛ ànɔ mà: Yi lé ɔ́ yie, lé ɩ́ srʋɛ sáà ná cóyʋɔ́ mà: Nɩ wɔlɩ́ɛ́ lɩ̀à, lé ɔ́ nií.» 10Mà tányɩɛ́ mʋ́ Zozíi nú sʋ́jàyʋ̀ɔ̀ a cícíwɔlɩɛ́ a, neé mnɔɔ́ lé ɔ́ srʋ nyʋaá à jɩ́ ɔ́ kʋ́ a, mà: «Náa srʋɛ amɔ cɩ́cása mà, dɛ́ Izrayɛ́lɩbhlɩɛ́ lɩ̀à a mnɩ́, nɩ́ àyɩ mɔ̀ɔ nyɔɔ́ kà sɩ́tɛ̀ a fádùò a yɛ́ɛ. 11Náa srʋɛ yɩ́ lɛ́ sáà amɔ mà, nyʋa kɔ́kɔ́mnɩ́ yi bhlɩ́ɛ́ jɩ̀ yrʋ́gàvlà lalɛ lé a wlʋ́ɛ́ jié a lé bhlɩ́ɛ́ jɩ̀ á falɛ lé á bhlie a wlʋ́, lé a yà Ablaámʋ, Izákɩ lé Zakɔ́bʋ sɔ́ yi kʋ́ lii Lagɔ a Léyibhlɩɛ́ a mnɩ́ mɔ̀ɔ. 12Lé nyʋaá à nà kà la Lagɔ a Léyibhlɩɛ́ jáa kʋ́ li a, á yi á jrùkʋ́ a cúcú a mnɩ́ páà. Mɔ̀ɔmɔ̀ á na ká kʋ lé a ká ŋwí lé a ká á glàa li.» 13Zozíi cíi lé ɩ́ bhli a, ɔ́ srʋ sʋ́ja a kámanyɔɔ́ mà: «Yrɩ́bhà lé mʋ nà gbó, mà wɔlɩ́ɛ́ ɩ̀ yrá a, Lagɔ ya nà fádùò yɛ́ ɔ́ ya nà cóyʋɔ́ yalɩma.» Bhʋ́ a tányɩɛ́ a múó a mnɩ́ɛ́, sʋ́jàyʋ̀ɔ̀ a cóyʋɔ́ yalɩma.

Zozíi yalɩma gupuonyʋa kɔ́kɔ́mnɩ́

(Málɩ́kɩ 1.29‑34; Lúkɩ 4.38‑41)

14Tányɩɛ́ a múó Zozíi mʋ Pɩ́ɛ́lɩ a gbó, ɔ́ yɛ́ Pɩ́ɛ́lɩ ɔ ŋwʋ́trɔ ɔ́ pʋ ʋ́, wɔtrɔkukó yɔɔ́ kla. 15Ɔ́ gbɔ́ ŋwnɔ́ɔ́ a glɔ̀gbá a, wɔtrɔɔ́ dúò lé ɔ́ soglù, lé ɔ́ bháa ʋ́ ɔ yɩ́gɔ̀ ŋwʋ̀ŋwʋ́ɛ́ kʋ́. 16Kosúgbòsa, nyʋaá nyumozìzi kʋ jɩ̀ a, á la á lɔ̀fɩ́ɛ́ Zozíi gɔ̀, a nɩ́ zumole bɛ́ mà ɔ́ bhá cícíwɔlɩ a pʋpʋ́ lé ɔ́ jɩ́ɩ nyumozìzìè, lé gupuonyʋa fɩ́ɛ́ yalɩma. 17Wɔlɩ́ɛ́ sɩ́tɛ̀ mʋ́ ɩ́ plɩ́ɩ lé Lagɔ a nékʋ́cinyɔ Ezayíi a cícíwɔlɩɛ́ ká neé sralɔ. Ɔ́ cí wá mà:

Nyɔɔ́ lìà

Ɔ́mɔ́ ɔ̀ bháʋ́ wɔlɩ́ɛ́ fɩ́ɛ́ ɩ̀ ŋwɔ́ɔ wá à kalɩmɛɛ́ a,

Lé ɔ́ bháʋ́ à bhlábhlágùò fɩ́ɛ́. # 8.17 A zɛlɩɩ sáà Eza 53.4.

Cégbá mʋ́ á jɩ́ɛ́ Zozíi kʋ́ a

(Lúkɩ 9.57‑62)

18Mà tányɩɛ́ mʋ́ Zozíi yɛ́ nyʋa kɔ́kɔ́mnɩ́ ɔ nyoku gɔ̀ a, ɔ́ srʋ ɔ́ kʋjɩ̀nyʋ̀àà mà a yɔ̀sɔ́ a ká nyɩ́é a bɩ́ díi. 19Mà á ká mʋ a, lɔ̀ a másɛ a múó yio gɔ̀ lé ɔ́ srʋ ɔ́ mà: «Cɩ́anyɔɔ̀, daá fɩ́ɛ́ nà kà mʋ a, ɩ́ yi mɔ̀ kʋ́ jɩ́!» 20Bhʋ́ Zozíi srʋ ɔ́ mà: «Ɩ̀ lɛ́bhɛ gboglìzàlɩɩ, ɩ́ ka ɩ́ siflií, ɩ mnɩ́ ɩ́ kʋɛ, nimni a sɛ́fʋɔ́, ɩ́ ka ɩ níní. Mà Nyɔɔ́ a Yuwliyʋɔ́ nɩ́ nyɔbhleda ka a.» 21Lé ɔ́ kʋjɩ̀nyʋ̀àà a nyièdɩ a nyɔ a múó srʋ ɔ́ mà: «Kanyɔɔ̀, ɩ́ yi mɔ̀ kʋ́ jɩ́ mà, nyɛ́ mɔ́ɔ tányɩ, lé ká fɩ́ɛ́ ɩ́ tʋ́ zízìè!» 22Bhʋ́ Zozíi srʋ ɔ́ mà: «Cíe kúdùkuo sá, a ká a kúó zízìè, mà mɔ̀, jɩ́ mɔ́ɔ kʋ́!»

Zozíi tɔ́pʋ lúlúó

(Málɩ́kɩ 4.35‑41; Lúkɩ 8.22‑25)

23Zozíi pla gɔ́lʋ́, lé ɔ́ kʋjɩ̀nyʋ̀àà falɔɔ́ nyúzɔ kʋ́. 24Mà á kʋ nyɩ́é klʋ́ lé lúlúó dúobhlí, á nɩ lé gɔ́lʋ́ɔ́ yíe nyú kʋ́, bhè sɩ́tɛ̀ ɩ́ kʋ bhè Zozíi ŋwɔ́mɛ. 25Lé ɔ́ kʋjɩ̀nyʋ̀àà ŋnɩ ɔ́ gɔ̀ lé á galɔɔ́, á anɩ́: «Kanyɔɔ̀, sa ʋ́ àmɔ̀ neé à nɩ̀ ka kú!» 26Lé ɔ́ srʋ á, ɔ́ anɩ́: «Ɛ̀kɛ̀ɛ̀ ŋanɩmɛ bhlá amɔ á? A Lagɔ a fádùò nɩ́ kɔ́ɔ̀kʋ́ mʋ́ tɛ́!» Ɔ́ soglù a, ɔ́ gágà vʋ̀vɔ̀lʋ̀ɔ̀ yà nyɩ́é sɔ́ kʋ́, fɩɩ́n bhè dìdinii. 27Mà neé mna á lɔ̀fɩ́ɛ́, á anɩ́: «Nyɩ́kpɔcegbá bhè vʋ̀vɔ̀lʋ yà nyɩ́é sɔ́ ŋwʋ́ɛ́ ʋ́ ɔ cícíwɔlɩ a?»

Zozíi sa nyʋa sɔ́ nyumozìzi jɩ̀

(Málɩ́kɩ 5.1‑20; Lúkɩ 8.26‑39)

28Tányɩɛ́ mʋ́ Zozíi ŋnɩ nyɩ́é a bɩ́ Gadalenɩbhlɩɛ́ a mnɩ́ a, nyʋa a sɔ́ wlʋ́ lési á nyièdɩ lé á yio gbɩ́dàlɩɩ́. Mà nyʋaá sɔ́ɔ́, nyumozìzi kʋ a jɩ̀, á ka ŋanɩmɛ kʋ́, ɩ́ ka ŋnɩ́ lé nyɔ nɩ́ plɩ́ɩ bhʋ́anɩ nyúzɔ̀drèè kʋ́. 29Mà nyʋaá sɔ́ɔ́ yiloó mʋ́ lé á sa yrè á nie: «Lagɔ a Yuwliyʋ! Wɔlɩ́ gbá ɩ̀ yrálɛ àmɔ̀ mʋ́ a? Nà yi lé kà àmɔ̀ kalɩmɛ mʋ́ ŋwʋ́ʋ? Bhè tányɩɛ́ Lagɔ ŋwʋ́ ʋ́ a, ɛ nɩ́ àyɩ ŋnɩ.» 30Mà á drɩ̀ mɔ̀ɔ, gékpíbhuzàlɩ a kpá kʋ ɔ̀ ɩ́ wlúe, ɩ́ lie. 31Bhè nyumozìzìè kʋ̀ nyʋaá sɔ́ɔ́ jɩ̀ a, ɩ́ sra Zozíi wlú, ɩ́ nie: «Ɩ́bhìè, nɩ̀ jɩ́ɩ àmɔ̀ a, fa àmɔ̀ gékpíbhuzàlɩ̀kpàà a mnɩ́!» 32Zozíi anɩ́: «A mʋ mɔ̀ɔmɔ̀!» Bhè nyumozìzìè wlʋ́ nyʋaá sɔ́ɔ́ jɩ̀ lé ɩ́ pla gékpíbhuzàlɩ̀kpàà a mnɩ́. Lé bhuzàlɩ̀ɛ̀ bháʋ́ sóo lé ɩ́ kwlíi gbʋgbʋ́ɔ́ lé ɩ́ kɔ́sɔ nyɩ́é lé ɩ́ lɔ̀fɩ́ɛ́ kú. 33Mà nyʋaá à fa la bhuzàlɩ̀ɛ̀ li ka a, á gú lé á mʋ dú lé á sa mɔ̀ɔ wɔlɩ́ɛ́ fɩ́ɛ́ ɩ̀ plɩ́ a, lé wɔlɩ́ɛ́ ɩ̀ ŋnɩ nyʋaá sɔ́ɔ́ nyumozìzìè kʋ la jɩ̀ a. 34Ɩ́ ka ŋnɩ́ lé dú a nyʋa fɩ́ɛ́ mʋ Zozíi nyúzɔ kʋ́. Á yɛ́ ɔ́ kɔ́ɔ̀kʋ́ a, á srɔɔ wlú lé á srʋ ɔ́ mà: «Wlʋ́ à bhlɩ́ɛ́ lɩ̀à mnɩ́.»

Atualmente Selecionado:

Matíe 8: NEY

Destaque

Copiar