Matíe 2

Lówùdùnyʋa yi yísradɔ̀dɔ̀ɔ̀ yɛ́ ka

1Zudéebhlɩɛ́ a dúó á wlele Bɛtlɛɛ́mʋ#2.1 Bɛtlɛɛ́mʋ: Lóo Davídɩ ɔ bhlé kʋʋ. a, mɔ̀ɔmɔ̀ á va Zozíi. Bhʋ́ a tányɩɛ́ lóo Elódʋ kámalɛ wá bhlɩ́ɛ́. Mà nyʋa à yì lagɔ̀drà a wɔlɩ́ a, á wlʋ́ dɛ́ɛ́ yrʋ́ la lɛ a, lé á yi Zelízalɛ́mʋ. 2Á yi a, á anɩ́: «Bhè, dɛ́gbá Zúfʋnyʋa a lóo á va lɛ́ a, kʋ a? À yɛ́ ɔ drèè ɛ́ kʋ dɛ́ɛ́ yrʋ́ la lɛ a, ɔ́mɔ́ à yi bʋbɔ̀ kà.» 3Mà lóo Elódʋ nú wɔlɩ́ɛ́ a, duo wlʋ́ ɔ yà Zelízalɛ́mʋ a nyʋa sɔ́ mnɩ́. 4Lé ɔ́ gʋ́gwlà Lagɔ̀bʋ̀bɔ̀nyʋ̀àkádàà yà lɔ̀ a másɛnyʋaá a lɔ̀fɩ́ɛ́ sɔ́ kʋ́, lé ɔ́ yrá á mà: «Bhè dɛ́gbá á na ká Kláyɩ́sɩ va á?» 5Á anɩ́: «Bɛtlɛɛ́mʋ! Zudéebhlɩ a mnɩ́, mɔ̀ɔmɔ̀ á na ká Kláyɩ́sɩ va. Lagɔ a nékʋ́cinyɔ jɩ́jrà wá mà:

6 Bɛtlɛɛ́mʋ!

Zudáabhlɩ a dúù,

A nɩ zɛ Zudáa a dí kádɩ̀ɛ̀ a,

Á yi sáà mɔ̀ zɛɛ̀.

Ɛ̀kʋ̀ʋ̀ a?

Lóo yi nà mnɩ́ wlʋ́.

Ɔ́mɔ́ nà kà kɛ́zɔ̀ Izrayɛ́lɩbhlɩ a mnɩ́ a

Nyʋaá fɩ́ɛ́ a tíetíenyɔ plɩ́. # 2.6 A zɛlɩɩ sáà Misée 5.1. »

7Ɩ́ ka ŋnɩ́ lé lóo Elódʋ zúzùò lé ɔ́ cíe nyʋa lé á wle lagɔ̀drà a wɔlɩ́ a yɩbhlɩ nyʋaá lé ɔ́ yrá á, tányɩ gbá mʋ́ lagɔ̀drèè flʋ zɔ̀ a, a srʋ ɔ́. 8Lé ɔ́ cíe á Bɛtlɛɛ́mʋ lé ɔ́ srʋ á mà: «A mʋ lé a yráyra námasa yʋ́ɔ́ a zà, a nɩ yɔ́ɔ́ a, a ká yi a ká mɔ́ɔ dí sa à, bhè mɔ́ɔ ná sɛ́fʋɔ́ kɔ́ɔ́ bʋbɔ̀ kà mʋ.» 9Lóo Elódʋ bhɩa cícíé zɔ̀ a, áa soglù lé á mʋ. Á mʋ a, á kʋ nyúzɔ kʋ́ lé á yɛ́ sɔ́kʋ́ drèè á yɛ́ wázɔ̀ dɛ́ɛ́ yrʋ́ la lɛ a. Ɛ́ kʋ á drɩ̀ mɔ̀ɔ, á jɩ́ɛ́ kʋ́ àààn, lé ɛ́ ŋnɩ dɛ́ á va yʋ́ɔ́ a wlúmilɩɩ́ lé ɛ́ tɔ́pʋ̀. 10Mà á yɛ́ drèè lé ɛ́ nynʋ́vʋ̀ a, lɔlɔɔ́ bhlá a, ʋ́ plɩ́ á gɔ̀. 11Lé á pla wlʋ a mnɩ́, á dʋdʋ̀ a, yʋ́ɔ́ yà ɔ nɛ́ Malíi sɔ́ lɛ̀, lé á sra yʋ́ɔ́ a drɩ̀ koti sá, lé á bʋbɔ̀ ʋ́ mɔ́, á dʋdʋ̀ á kètèkúí a mnɩ́ lé á bhá mɔ̀ɔ sìkàà yà nɔ́nʋ́nyokwié á wlele asáan sɔ́, lé dàŋwónié á wlele mílɩ a, lé á dàzɩ̀lɔ̀ɔ̀. 12Mà á pʋ́ sá a, yra a mnɩ́ɛ́ Lagɔ srʋ á mà: «A ná yrɩ́bha yɩ́ Lóo Elódʋ gɔ̀. Ɩ́ ka ŋnɩ́ a yígàdà nyúzɔ á bhli lé á mʋ́ a bhlé.»

Zɔ̀zɛ́fʋ yà Malíi sɔ́ gú lé á mʋ Ezíptɩ

13Lagɔ̀drà a wɔlɩ́ a yɩbhlɩ nyʋaá mʋ a, lé Zɔ̀zɛ́fʋ pʋ́ sa a, ɔ́ yra, lé Lagɔ a Kplɔkplɔzùzu srʋ ɔ́ mà: «Soglù bháʋ́ yʋ́ɔ́ lé ɔ nɛ́, lé yàsɔ́ gú lé a mʋ Ezíptɩ. Kʋ mɔ̀ɔmɔ̀, mà yruú nà kà ʋ́ kʋ lé ká mɔ̀ srʋ mà yrɩ́bhaà, mà lóo Elódʋ mʋ́mɔ yʋ́ɔ́ ɔ kɔ́ɔ́ bhlá.» 14Ɩ́ ka ŋnɩ́ lé Zɔ̀zɛ́fʋ soglù dɩ́bɩ̀ɛ̀ lé ɔ́ bháʋ́ Malíi yà yʋ́ɔ́ sɔ́, lé á gú lé á mʋ Ezíptɩ. 15Ɔ́ kʋ mɔ̀ɔmɔ̀ àààn lé lóo Elódʋ kú, cémʋ́ Lagɔ srʋ wá ɔ nékʋ́cinyɔ lé ɔ́ cí wá a, ɩ ká neé sralɔɔ̀. Sɩ́tɛ̀ Lagɔ a nékʋ́cinyɔ cí wá mà: Náa wle ná yʋ́ɔ́ lé ɩ́ srʋ ɔ́ mà ɔ wlʋ́ Ezíptɩ lé ɔ yi.#2.15 A zɛlɩɩ sáà Ozée 11.1.

Elódʋ bhlá yísradàda

16Tányɩɛ́ mʋ́ lóo Elódʋ yɩbhlɩ saá mà, lagɔ̀drà a wɔlɩ́ɛ́ a yɩbhlɩ nyʋaá áa nyɩ́glɩ̀lɔ̀ a, dɩɛ́ ɛ̀ bhlɔ́ a, ɛ́ plɩ́ ɔ́ gɔ̀, ɩ́ ka ŋnɩ́ lé ɔ́ cíe nyʋa Bɛtlɛɛ́mʋ lé mɔ̀ɔ a bhlɩ́ɛ́ fɩ́ɛ́ mnɩ́, a bhlá mɔ̀ɔ a yúwliyuo fɩ́ɛ́, bháa yísradàda jɩ̀ lé ŋnɩ yúóó à kà lɩkpɩ sɔ́ a jɩ̀. Ɔ́ yra lagɔ̀drà a yɩbhlɩ nyʋaá a, ɩ tányɩɛ́ á pápa wá a, ɛ́mɛ́ ɔ́ ŋwʋ́ yɩ́ lɛ́ duo kʋ́ lé ɔ́ bhlá yɩ́ lɛ́ yúóó. 17Sɩ́tɛ̀ mʋ́ Lagɔ a nékʋ́cinyɔ Zelemíi a cícíwɔlɩɛ́ sralɔ wá neé. 18Sɩ́tɛ̀ Zelemíi cí wá mà:

Niwɔlɩ wlʋ́ɛ́ Wlamáa,

Nyúgbùwɔ̀lɩ yà

Bhɔtɔwɔlɩ

Kɔ́kɔ́mnɩ́ sɔ́!

Nyɔ ŋwíé, lé ɔ́ zɩzra!

Wlasɛ́lɩ ŋwíé ɔ yúó!

Ɔ́ ŋwíé, lé ɔ nɩ́ yrá lé a bhibhió!

Ɔ yúó a lɔ̀fɩ́ɛ́ ya bhɩa. # 2.18 A zɛlɩɩ sáà Zele 31.15.

Zɔ̀zɛ́fʋ yà Malíi sɔ́ ya Ezíptɩ wlʋ́ á ya yi

19Tányɩɛ́ mʋ́ Elódʋ kú a, Lagɔ a Kplɔkplɔzùzu flʋ Zɔ̀zɛ́fʋ yra a mnɩ́ yɩ́ Ezíptɩ, 20lé ɔ́ srʋ ɔ́ mà: «Zɔ̀zɛ́fʋ soglù lé bháʋ́ yʋ́ɔ́ yà ɔ́ nɛ́ sɔ́, lé yà sɔ́ a yrɩ́bha Izrayɛ́lɩ, mà nyʋaá à mʋ́mɔ wá yʋ́ɔ́ à kɔ̀ɔ bhlá a, á ya kú.» 21Lagɔ a Kplɔkplɔzùzùò cí wɔlɩ́ɛ́ a, Zɔ̀zɛ́fʋ ɔ́ɔ soglù lé ɔ́ bháʋ́ yʋ́ɔ́ yà ɔ́ nɛ́ sɔ́, lé á yrɩ́bha Izrayɛ́lɩ. 22Mà ɔ́ nú mà Asɛlayúsʋ ya ɔ tʋ́ Elódʋ a léyikpoó jɩ̀ plɩ́ɩ a, lé ɔ́mɔ́ ŋwɔ́ɔ yɩ́ Zudée a lóo a, Zɔ̀zɛ́fʋ gúu Zudée a yrɩ́bhɛ kʋ́; ɔ́ kʋ sɔ́kʋ́ yrá lé Lagɔ cíloó gɔ̀, ɩ́mɩ́ nɩ lé ɔ́ mʋ Galiléebhlɩ a mnɩ́. 23Mɔ̀ a dúó á wlele Nazalɛ́tɩ a, mɔ̀ɔmɔ̀ á mʋ sí ka. Cémʋ́ Lagɔ a nékʋ́cinyʋa cí wá a, ɩ ká sáà neé sralɔɔ̀. Ɩ́mɩ́ ŋwɔ́ɔ wá mà: Nazalɛ́tɩ a nyɔ á na kɔ́ɔ́ wleè.

Atualmente Selecionado:

Matíe 2: NEY

Destaque

Copiar