मत्ती 10
10
बारौ चैलै
(मर 3:13-19; 6:7-13; लूका 6:12-16; 9:1-6)
1तोबै तैणै आपणै बारौ चैलै खै आपणै धोरे बोईदै औरौ तिनु दुष्टआत्मा पांदी औधिकार दिया, कै तिनुखै निकाल़ौ औरौ सौबी भान्त की बीमारियों औरौ कमजोरी खै दूर कौरौ। 2बारौ चोणेयौंदे चैलै कै नांव ऐजै औसौ: आगला शमौन जैसकौ नांव तैणै पतरस राखौ, औरौ तैसका भाई अन्द्रियास; जब्दी का बैटा याकूब औरौ तैसका भाई यूहन्ना। 3फिलिप्पुस औरौ बरतुल्मै थोमा औरौ मामला लोणो वाल़ा मत्ती, हलफईस का बैटा याकूब औरौ तद्दै, 4शमौन कनानी, जिथका मतलब औसौ खिजकुटा, औरौ यहूदा इस्करियोती, जैणै तैसीखै पोकड़वाऐ बै दिया।
चैलै खै सेवा कारिए छाड़णै
5इनु बारौ चैलै खै यीशुए ऐजै आज्ञा देएयो भैजै कै, “बैगानै यहूदी लोगौ कै ढौबौ नै जाया, औरौ सामरी लोगौ कै कोसी नोगरो दै नै जाया। 6पौरौ इस्राएल देश कै घोराणे कै खौऐयौंदी भेड़ो कै धोरे जाया। 7औरौ हांडदै-हांडदै प्रचार कौरौ, औरौ बौल़ौ कै स्वर्ग का राज्य नेड़िक आए गौआ। 8बीमारों खै ठीक कौरौ: औरौ मौरेयौंदे खै जियुंदी कौरौ, कोढ़ियों खै शुध्द कौरौ: औरौ दुष्टआत्मा खै घाड़ो: तुऐं मुफ्त पाए राए, मुफ्त ही दैंव।
9आपणै बटुवे दु ना सूनु, औरौ ना पौयसै औरौ ना तांबा राखैया। 10बाटो पुंडे खै ना तौ झोल़ा राखैया, औरौ ना दो खोटणो, ना जूते औरौ ना डैंगा राखैया, जिथुकै मजदूर कै तिनकौ खाणौ भैटिणौ चैंई।
11जैसी कोसी नोगरो या गांव दै जांव तौ पौता कौरेया कै तिथै कुण आछौ औसौ? औरौ तांव तौड़ी तिथैदै नै निकल़ौ, तैसकैई घोरे रौव। 12औरौ घोरे कै भिटै जांदै ही तैसीखै आशीष दैया। 13जै तैसी घोरो कै लोग लायक हौलै तौ तोंवारै शान्तै तिनु पांदी बौणैयौंदे रौंदै, औरौ जै सै लायक नै हौलै तौ तोंवारै शान्तै तोंवारै धोरे पाछु आन्दै। 14औरौ जू कुणिए तुऔं खै ना अपनांव, औरौ तुंआरी बातौ ना शुणौ, तौ तैसी घोरे या नोगर दै पाछु निकल़दै बैई आपणै लातो कै धूल बै झाड़ै दैया। 15हांव तुऔं खै साचौ बुलू, न्याय कै दूसै तैसी नोगरो कै हालत सदोम औरौ अमोरा कै नोगरो कै हालत शै बै बैजाए जादा बुरी होंदी।”
आणौवाल़ा चैईथा सौमय
(मर 13:9-13; लूका 21:12-17)
16“दैखौ, हांव तुऔं भेड़ो कै जैशणै भेड़ियों कै बीच मुंजी छाड़ै दियु, इथकारिए शोंगोऊं कै जैशणै बुध्दिमान औरौ कबूतरों कै जैशणै भोल़ै बौणैया।
17पौरौ लोगौ कैईंदै चौकश रौया, जिथु सै तुऔं खै महासभाओ दै निलै औरौ तुऔं यहूदी सभा-घोरो दै कौड़ै लान्दै। 18तुऔं मुं कारिए राज्यपालो औरौ राजाओं कै सामणै तिनु पांदी, औरौ सौब देशो पांदी गवाह हौणौ कारिए पाहुंचाऐ जांदै।
19जोबै सै तुऔं खै पाकोड़ल़ै तौ ऐजै फिकर नै कौरेया, कै आमै का बुलू बै औरौ का कौरुबै, जिथुकै जू किछै तुऔं कै बौलणौ हौल़ौ, सैजौ तुऔं तौलोंई बौताए दैंदै। 20पौरौ बापू पौरमेशवर कै आत्मा तुऔं खै बौताए दैला कै तोंवारै का बौलणौ।
21लोग आपणै बिशवाशी भाईयों खै मार दैणौ कारिए थोमाले। औरौ बापू बै आपणै नानड़िया आरी ऐशैखैई कौरलै, औरौ नानड़िया आपणै माँ-बापू कै खिलाफ हौए जांदै, औरौ तिनु ओकी लैई मोरवाए दैंदै। 22औरौ तुऐं मैरै चैलै औसौ इथकारिए सौबै लोग तुऔंआरी बैर कौरलै; औरौ जू आपणै मौरणौ कै सौमय तौड़ी मुं पांदी भोरोशा राखलै पौरमेशवर तैसीकै बौचाल़ा।
23जौल़ौ सै तुऔं खै ऐकी नगर दै सतालै, तौ ओकी नोगरो दै दौड़ै जाया। हांव तुऔं कै साचौ बुलू, की तुऐं इस्राएल देश कै सौबी नोगरो दै इबी तौड़ी हौटै बै ना रोली तोबै हांव आदमी का बैटा तुऔं दा आगै आए जांदा।”
चैला हौणौ का मतलब
24“चैला आपणै गुरु दा बौड़ा ना हौंव; औरौ ना ही नोकर आपणै मालिक दा बौड़ा हौंव। 25चैलै का गुरु कै जैशणा हौणा, औरौ नोकरो का आपणै मालिक कै जैशणा हौणा काफी औसौ; औरौ जोबै तिनुऐ मुखै घोरो कै मालिक कै शैतान बौल़ै राए तौ ऐजै मैरै घोरो कै लोगौ कै हौजौ बै बुरै नांव शै बौईददै।
कोस दौ डौरी?
(लूका 12:2-7)
26औरौ तिनु लोगौ शै नै डौरेया जू तुऔं धमकी दैंव। सैजा सौमय आए गौआ जोबै सौबै किछै ढौकैयौंदो सामणै आए जांदो औरौ जू किछै छिपैयौंदो औसौ सैजौ सौबै लोग जाणै पांदै। 27जू हांव तुऔं खै इनारै दो बुलू, तिथुखै पेयाशै दो बौल़ौ, औरौ जू कानो-कान शुणौ तिथका छोतौ पांदी दा प्रचार कौरौ।
28जू शोरीर खै मारै सौकौ, पौरौ आत्मा खै ना मार सौकौ, तिनुदै नै डौरेया पौरौ पौरमेशवर दै डौरेया जू आत्मा औरौ शोरीर दु खै नरक दा नाश कौरे सौकौ।
29का चिड़कुल़ै का जोड़ा बैजाए सोसता ना बिको? तोबै बै जै तिनुमुंजी दी ऐक बै जोमीनो पांदी छुटै जांव तौ पिता कै तिनकै बारै मुंजी पौता चालै जांव। 30पौरमेशवर तोंवारै जिन्दगी कै सौबी बातौ कै परवाह कौरौ। औरौ सै ऐजौ बै जाणौ कै तोंवारै मुंडो दै कैतरै बाल़ औसौ। 31इथकारिए डौरेया नै, तुऐं बौहितै चिड़कुल़ै दै बै बौड़ैयो औसौ।”
यीशु कै मानणा या ना मानणा
(लूका 12:8-9; 12:51-53; 14:26-27)
32“जू कुणिए आदमी कै सामणै बौल़ौ, कै सै मैरै चैलै औसौ तिनुखै हांव बै आपणै स्वर्गीय पिता कै सामणै बुलूबा कै ऐजै मैरै चैलै औसौ। 33पौरौ जै कुणिए ओकी आदमी कै सामणै ऐजौ बौलणौ शै डौरौए कै ऐजै मैरै चैलै औसौ, तौ हांव आपणै पिता शै जू स्वर्ग दा औसौ, बौलदा कै ऐजै मैरै चैलै ना आथी।”
34“ऐशै नै सौमझैया, की हांव धोरती पांदी लोगौ कै बीच शान्तै लांदा आए रौआ, हांव शान्तै लांदा नै पौरौ लोगौ कै बीच मुंजी लोड़ाए कौरवाणौ कारिए आए रौआ। 35पौरौ हांव तौ इथकारिए आए रौआ, कै आदमी खै तिनकै बापू शै, बैटी खै तियांरै माँ शै, औरौ बहू खै तियांरी शाशु कै खिलाफ कौरे दियु। 36आदमी कै दुशमन तैसकै घोरो कै ही लोग हौंदै।
37जू माँ बापू खै मुं दा जादा प्यार कौरौ, सै मैरै लायक ना आथी, औरौ जू बैटा या बैटी खै मुं दा जादा प्यार कौरौ, सै मैरा चैला बौणणौ कै लायक ना आथी। 38औरौ जू मैरै चैलै हौणौ की बौजैह शै दुख सैहणौ औरौ मौरणौ कारिए बै तैयार ना आथी, सै मैरा चैला बाणणौ कै लायक ना आथी। 39जू आपणै जिन्दगी बौचाणौ कै कौचिश कौरला, सै सौदा कै जिन्दगी गवांए दैला, औरौ जू मैरी बौजैह शै आपणै जिन्दगी गवाऐ दैला, सै स्वर्ग दै सौदा खै जिन्दगी पाला।”
इनाम
(मर 9:41)
40“जू कुणिए मैरै नांव शै तुऔं खै अपनांव, सै मुखै अपनांव; औरौ जू कुणिए मुखै अपनांव, सै पौरमेशवर कै अपनांव, जैणै मुखै छाड़ै राए। 41जू पौरमेशवर कै बातौ बौताणौवाल़ै खै तैसकै बातौ बौताणौवाल़ै जाणैयौ अपनांव औसौ, सै पौरमेशवर कै बातौ बौताणौवाल़ै कै जैशणा ही इनाम पाला, औरौ जू धरमी जाणैयौ धरमी खै अपनांव सै भोल़ै आदमी कै जैशणा ही इनाम पाला।
42जू कुणिए इनु नानड़ै मुंजीदा ऐकी कै मैरा चैला जाणैबा सिरफ ऐक गिलास शैल़ै पाणी का पियालै, हांव तुऔं खै साचौ बुलू, कै पौरमेशवर जौरुर तैसी आदमी कै इनाम दैला।”
Atualmente Selecionado:
मत्ती 10: SRXNT
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
