Matius 3
3
Polayatan Yohanes Pombaptis
(3:1-12)
(Mrk. 1:1-8; Luk. 3:3-9, 15-17; Yoh. 1:19-28)
1Timpu nantai Yohanes Pombaptis momula'i polayatannyo di padakng pasir di doerah Yudea. Io momboritoan, 2“Koraja'an Sorugo udah dampikam!#3:2: Kato ‘Sorugo’ opat digunoan boko urakng Yahudi oca' kinyo lansukng monyobut Allah. Jadi, sotilah Koraja'an Sorugo samo agatn Koraja'an Allah. Koraja'an Sorugo udah dampikam boroti Allah udah moutus siku' urakng rajo ko dunia, ia'an Yesus. Rajo Yesus paca'an momimpitn umant Allah inyo bondar, ia'an boko urakng inyo pocayo ko Sio. Tiat ponjolasan dikato pongantar huatan catatan kaki di Lukas 4:43. Jadi, botongga'cam kaitn bulah dosa ongko kaitn monyonangan hati Allah.” 3Yohanes ninam inyo joman komai nabi Yesaya padahan watu io bopandir:
“Ado urakng inyo mondongkakng-mondorah di padakng pasir,
‘Sodia'ancam jalatn pakai' Tuhatn. Bujurancam jalatn pakai' Sio’ ”.#3:3: Doi' buku nabi Yesaya 40:3
4Yohanes momakai jubah inyo dipulah doi' bulu unta. Ikat pinggakngnyo dipulah doi' kulit bonatakng. Io ongkah bopua' bunta' agatn madu hutatn.#3:4: Caro hidup Yohanes sama'an caro hidup Nabi Elia timpu joman komai (buku 2 Boko Rajo 1:8). Boko hal ni'in monunju'an obai Yohanes kinyo moutamoan pakai'annyo ongko pomakatnnyo. Io moutamoan momboritoan obai urakng gola' botongga' bulah dosa ongko monyonangan hati Allah. 5Banya' urakng datakng ko io doi' somuo doerah Yudea, tomansu' kota Yerusalem huatan somuo doerah sokitar sungai Yordan. 6Sia' moaku'i boko dosa sia' huatan Yohanes mombaptis sia' di Sungai Yordan.
7Apo banya' jam pomimpitn agama Yahudi pan datakng pakai' dibaptis. Ado doi' kolompok Farisi huatan kolompok Saduki. Watu Yohanes moniant sia', io bopandir, “Oi kaitn inyo jahat huatan licik sama'an ular biso!#3:7: Mungkitn kiasan ular ni'in boroti Rajo Sitatn Jangan bopikir kaitn ulih morarian diri doi' hukupan Allah nononyo. 8Kaitn gola' molabuhan porbuatan inyo bondar pakai' monunju'an obai kaitn bondar-bondar moninggalan dosa. 9Jangan bopikir dalapm hati: Koi koturutan doi' Abrahapm. Pasti Allah kinyo paca'an mohukupm koi. Ingant: Doi' boko batu ni'in pan Allah ulih bulah koturutan Abrahapm! 10Kapak pakai' monobakng kayu tuntukng ko akarnyo udah tosodia. Jadi tontanaman inyo kinyo mohasilan buah inyo boi', paca'an ditobakng ongko ditikapan ko api. 11Ado Urakng inyo paca'an datakng lopas aku. Sio lobih bokuaso daripadoku. Malahan monjadi hulutn-Nyo inyo palikng babah pan, aku kinyo cucu'.#3:11: Teks asli baso Yunani momakai kiasan ‘kinyo cucu' mombaba' sandal-Nyo.’ Aku mombaptis urakng agatn ara'i pakai' monunju'an obai sia' udah botongga' bulah dosa huatan monyonangan hati Allah. Apo Sio paca'an mombaptis urakng agatn Roh Allah ongko api.#3:11: Ado duo komungkitan pakai' roti ni'in. 1) Yesus paca'an mombaptis urakng inyo pocayo agatn Roh Allah, huatan urakng bukai agatn hukupan api. DAMO 2) Yesus paca'an mombaptis urakng agatn Roh Allah samo sama'an api momurnian logapm. 12Sio udah monjujut capatn pakai' monyongkayoan bigi' gandupm doi' johumannyo. Bigi' gandupm paca'an dikumpulan ko dalapm jurukng. Apo somuo johuman inyo kinyo boguno paca'an dicucul di dalapm api inyo kinyo kalo buta'.”
Yesus dibaptis
(3:13-17)
(Mrk. 1:9-11; Luk. 3:21-22; Yoh. 1:32-34)
13Lopas nantai, Yesus datakng doi' doerah Galilea ko sungai Yordan oca' Sio ulih dibaptis Yohanes. 14Apo Yohanes moncubo monula' Yesus. Yohanes bopandir ko Yesus, “Duatn kinyo pontikng datakng ko aku pakai' dibaptis! Sobondarnyo, aku inyo pontikng Duatn baptis!”
15Apo Yesus monimbas, “Biaram kolai molabuhan nantai dalapm watu ni'in. Obai agatn ubo nanam kito momonuhi somuo hal inyo dikohonda'i Allah.” Jadi, Yohanes monuruti pomandiran Yesus nantai. Io mombaptis Yesus.
16Lopas jadi dibaptis, Yesus hagar koluar doi' dalapm ara'i. Watu nantai jam, langit tobuka'. Yesus moniant Roh Allah turutn ko Io samo sama'an burukng daro. 17Lalu todinga' saro Allah doi' sorugo mongatoan, “Ninam Ana'-Ku inyo Ku kasihi. Io monyonangan hati-Ku.”
Atualmente Selecionado:
Matius 3: TBDS
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
