ወንጌል ዘዮሐንስ 10

ምዕራፍ 10

በእንተ ኖላዊ ኄር

1አማን አማን እብለክሙ ዘኢቦአ እንተ አንቀጽ ውስተ ዐጸደ አባግዕ ወዐርገ እንተ ካልእ ገጽ ሰራቂ ወፈያት ወጕሕልያ ውእቱ። 2ወዘሰ እንተ አንቀጽ ይበውእ ኖላዌ አባግዕ ውእቱ። 3ወሎቱሰ ዐጻዊኒ ያርኅዎ ወአባግዕኒ ይሰምዓሁ ቃሎ ወይጼውዖን ለአባግዒሁ በበአስማቲሆን ወያወፅኦን ወያወፍሮን። 4ወሶበ አውፅኦን ወአውፈሮን ለኵሎን የሐውር ቅድሜሆን ወይተልዋሁ አባግዒሁ እስመ የአምራ ቃሎ። 5ወለነኪርሰ ኢይተልዋሁ አላ ይጐይያ እምኔሁ እስመ ኢየአምራ ቃሎ ለነኪር። 6ዘንተ ምሳሌ ይቤሎሙ እግዚእ ኢየሱስ ወእሙንቱሰ ኢያእመሩ ዘይቤሎሙ። 7ወካዕበ ይቤሎሙ እግዚእ ኢየሱስ አማን አማን እብለክሙ አነ ውእቱ አንቀጸ አባግዕ። 8#ኤር. 23፥2። ወኵሎሙ እለ መጽኡ እምቅድሜየ ሰረቅት ወጕሕልያ እሙንቱ ወባሕቱ ኢይሰምዓሆሙ አባግዕ። 9#መዝ. 22፥2፤ ሕዝ. 34፥14። አነ ውእቱ አንቀጸ አባግዕ ዘበአማን ዘቦአ ብእሲ እንተ ኀቤየ ይድኅን ወይበውእ ወይወፅእ ወይረክብ ምርዓየ። 10ወሰራቂሰ ኢይመጽእ ዘእንበለ ከመ ይስርቅ ወይጥባሕ ወያኀጕል ወአንሰኬ መጻእኩ ከመ ይርከቡ ሕይወተ ዘለዓለም ወፈድፋደ ይርከቡ። 11#15፥13፤ ኢሳ. 40፥11፤ ሕዝ. 37፥24። አነ ውእቱ ኖላዊ ኄር ወኖላዊሰ ኄር ይሜጡ ነፍሶ ቤዛ አባግዒሁ። 12ወዐሳብሰ ዘኢኮነ ኖላዌ ወዘኢኮና አባግዕ ዘዚኣሁ ሶበ ይሬኢ ተኵላ እንዘ ይመጽእ ይጐይይ ወየኀድግ አባግዒሁ ወይመሥጦን ተኵላ ወይዘርዎን ለአባግዕ። 13ወዐሳብሰ ይጐይይ እስመ ዐሳብ ውእቱ ወኢያኀዝኖ በእንተ አባግዕ። 14#2ጢሞ. 2፥19፤ መዝ. 79፥1። አነ ውእቱ ኖላዊ ኄር ወአአምር ዘዚኣየ መርዔትየ ወየአምራኒ እሊኣየ። 15#ማቴ. 11፥27፤ ሉቃ. 22፥33፤ ዘሌ. 24፥16። ወበከመ የአምረኒ አብ አነኒ አአምሮ ለአብ ወእሜጡ ነፍስየ ቤዛ አባግዕየ። 16#ሕዝ. 34፥31፤ ዘካ. 14፥9። ወብየ ካልኣትኒ አባግዕ እለ ኢኮና እምዝንቱ ዐጸድ ወኪያሆንሂ ሀለወኒ አምጽኦን ዝየ ወይሰምዓኒ ቃልየ ወይከውና አሐደ መርዔተ ለአሐዱ ኖላዊ። 17#ኢሳ. 53፥4-10። ወበእንተ ዝንቱ ያፈቅረኒ አብ እስመ አነ እሜጡ ነፍስየ ቤዛ አባግዕየ ከመ ካዕበ አንሥኣ። 18#5፥27። ወአልቦ ዘየሀይደንያ አላ ለልየ እሜጥዋ በፈቃድየ እስመ ብዉሕ ሊተ አንብራሂ ወእሢማ ወብዉሕ ሊተ ካዕበ አንሥኣ ዘንተ ትእዛዘ ነሣእኩ እምኀበ አቡየ። 19#9፥16፤ 7፥43። ወተናፈቁ እንከ ካዕበ አይሁድ በበይናቲሆሙ በእንተ ዝንቱ ነገር። 20ወይቤሉ ብዙኃን እምኔሆሙ ጋኔን አኀዞ ወየአብድ ምንትኑ ታጸምዕዎ። 21#መዝ. 145፥8። ወቦ እለ ይቤሉ ዝንቱ ነገር ኢኮነ ዘእምጋኔን ዘጋኔኑ ይክል ከሢተ አዕይንቲሆሙ ለዕዉራን።

በእንተ ሐድሶ ሕንጸታ ለኢየሩሳሌም

22ወኮነ በውእቱ መዋዕል ሐድሶ ሕንጸታ ለኢየሩሳሌም ወክረምት ውእቱ። 23#ግብረ ሐዋ. 3፥11። ወአንሶሰወ እግዚእ ኢየሱስ በቤተ መቅደስ በሕዋረ ሰሎሞን። 24ወዐገትዎ አይሁድ ወይቤልዎ እስከ ማእዜኑ ታመነድበነ ነፍሰነ ለእመ አንተሁ ውእቱ ክርስቶስ ንግረነ ገሃደ። 25#5፥36። ወአውሥአ እግዚእ ኢየሱስ ወይቤሎሙ ነገርኩክሙ ወኢተአምኑኒ ግብር ዘእገብር አነ በስመ አቡየ ውእቱ ሰማዕትየ። 26#8፥45-47። ወአንትሙሰ ኢተአምኑኒ እስመ ኢኮንክሙ እምነ አባግዕየ በከመ እቤለክሙ። 27ወአባግዕየሰ እሊኣየ ይሰምዓኒ ቃልየ ወአነሂ አአምሮን ወእማንቱ ይተልዋኒ። 28#3፥15፤ 18፥9። ወአነሂ እሁቦን ሕይወተ ዘለዓለም ወኢይትኀጐላ ለዓለም ወአልቦ ዘየሀይደንዮን እምእዴየ። 29#14፥28። እስመ አቡየ ዘወሀበንዮን ውእቱ የዐቢ እምኵሉ ወአልቦ ዘይክል ሀዪደ እምእዴሁ ለአቡየ። 30#5፥23፤ 1ዮሐ. 5፥7። አነ ወአብ አሐዱ ንሕነ።

በእንተ ጽልእ ዘአይሁድ ላዕለ እግዚእ ኢየሱስ

31ወነሥኡ አይሁድ እብነ ካዕበ ከመ ይውግርዎ። 32ወአውሥአ እግዚእ ኢየሱስ ወይቤሎሙ ብዙኀ ግብረ ሠናየ አርአይኩክሙ ዘእምኀበ አቡየ በአይ ግብር እምኔሆሙ ትዌግሩኒ። 33#5፥18። ወአውሥኡ አይሁድ ወይቤልዎ በእንተ ሠናይሰ ግብርከ ኢንዌግረከ ወባሕቱ በበይነ ፅርፈትከ እስመ እንዘ ሰብእ አንተ እግዚአብሔርሃ ትሬሲ ርእሰከ። 34#መዝ. 81፥6። ወአውሥአ እግዚእ ኢየሱስ ወይቤሎሙ አኮኑ ጽሑፍ ውስተ ኦሪትክሙ «አንሰ እቤ አማልክት አንትሙ።» 35ወሶበ ለእልክቱ አማልክት ይቤሎሙ እለ ኮነ ቃለ እግዚአብሔር ኀቤሆሙ ወኢይትከሀል ይትነሠት ቃለ መጽሐፍ። 36ወዘሰ ቀደሶ አብ ወፈነዎ ውስተ ዓለም እፎ እንከ ትብሉኒ ትፀርፍ ለእመ እቤለክሙ ወልደ እግዚአብሔር አነ። 37ወእመሰ ኢይገብር ግብሮ ለአቡየ ኢትእመኑ ብየ። 38ወእመሰ እገብር ለእመ ኪያየ ኢአመንክሙ ለግብርየ እመኑ ከመ ታእምሩ ወትጠይቁ ከመ አነ በአብ ወአብ ብየ። 39#8፥59፤ ሉቃ. 4፥30። ወኀሠሡ ካዕበ የአኀዝዎ ወአምሠጠ እምእዴሆሙ። 40#1፥28፤ 3፥25-28። ወሖረ ካዕበ ማዕዶተ ዮርዳኖስ ብሔረ ኀበ አጥመቀ ዮሐንስ ቀዲሙ ወነበረ ህየ። 41ወብዙኃን ሖሩ ኀቤሁ ወይቤሉ ዮሐንስ አልቦ ዘገብረ ተአምረ ወኢምንተኒ ወባሕቱ ኵሉ ዘይቤ ዮሐንስ በእንተዝ ብእሲ እሙነ ኮነ። 42ወብዙኃን እለ አምኑ ቦቱ በህየ።

Atualmente Selecionado:

ወንጌል ዘዮሐንስ 10: ሐኪግ

Destaque

Copiar