isizwur 2

rbbi iskr argaz d‑tmġart

1ġmkan ad‑kmmln ignwan d‑wakal ula kullu ma‑gisn‑illan. 2isunfu rbbi ġ‑wis ssa‑uwssan ašku ikmml tawuri lli‑iskr. 3ibark rbbi wis ssa‑uwssan iẓli‑t zġ‑uwssan yaḍni, ašku isunfa gis zġ‑twuri lli‑ġ‑ih̬lq kullu ma‑illan.

4ġmkad a‑iga isizwur n‑ignwan d‑wakal ġakud lliġ‑tn‑ih̬lq rbbi. lliġ iskr sidi rbbi akal d‑ignwan, 5ur‑ta‑tlli‑tzgzut ġ‑lh̬la ula tmġi tuga, ašku sidi rbbi ur‑ta‑d‑yuzn anẓar s‑wakal, d‑ur‑ta‑illi ma‑t‑ikkrzn, 6walaynni ar‑d‑aqlayn‑waman zġ‑ddu‑wakal ar‑sswan akal kullut. 7yasi ilmma sidi rbbi kra zġ‑ugdrur n‑wakal iskr zġ‑gis argaz, issunfs‑n ġ‑infurn n‑urgaz s‑rruḥ n‑tudrt, iwrri iddr.

8ikka‑ttin iẓẓa sidi rbbi yat talɛrṣt ġ‑tmazirt n‑ɛadan ġ‑tsga n‑usġlay n‑tafukt, ig gis argaz lli‑iskr. 9issmġi‑d sidi rbbi kullu ma‑igan aṣġar ifulkin ġ‑iẓri ula i‑umššu. tili‑gis‑tṣġart n‑tudrt ġ‑tuẓẓunt n‑talɛrṣt, nttat d‑tṣġart n‑twassna n‑ma‑ifulkin ula ma‑yʷh̬šnn. 10yili yan‑wasif ingi‑n ġ‑tmazirt n‑ɛadan ar‑isswa talɛrṣt. ibḍu gis f‑kkuẓ isaffn. 11amzwaru iga asif n‑fišun, ilulliy i‑kullu‑tmazirt n‑ḥawila lli‑ġ‑illa‑uwrġ. 12ifulki‑uwrġ lli‑illan ġ‑tmazirt‑an, ilint gis ula tujjutin mimnin d‑tẓratin ġʷlanin. 13wis sin iga asif n‑giḥun, ilulliy i‑kullu‑tmazirt n‑ḥabaš. 14wis kraḍ iga asif n‑ḥiddaql, ikka tamazirt n‑aššur ġ‑tsga n‑usġlay n‑tafukt. d‑wis kkuẓ iga asif n‑furat.

15yawi ilmma sidi rbbi argaz ig‑t ġ‑talɛrṣt n‑ɛadan a‑stt‑ikkrz igabl‑tt. 16yuṣṣa‑t sidi rbbi yini‑as: «a‑tšttat aynna trit zġ‑kullu tiṣġarin n‑talɛrṣt 17abla taṣġart n‑twassna n‑ma‑ifulkin ula ma‑yʷh̬šnn. a‑ur‑zġ‑gis‑tššt nttat, ašku ass nna‑zġ‑gis‑tššit, lmut a‑k‑id‑iqqann.»

18yini sidi rbbi: «ur‑ifulki a‑iqama‑urgaz waḥdut. rad‑as‑skrġ ma‑d‑dids‑yuškan a‑t‑iɛawn» 19iskr sidi rbbi ġ‑wakal kullu ma‑igan luḥuš n‑tagant d‑igḍaḍ n‑ignwan. yawi‑tn‑d s‑dar‑urgaz, a‑iẓr man ism a‑ra‑ig i‑kraygatt yan ġ‑lmh̬luqat‑an ddrnin. d‑ism nna‑ysn‑iga‑urgaz i‑kud yan, ġmkan a‑iqama ism‑ns. 20ig‑urgaz ism i‑kullu lbhaym d‑igḍaḍ n‑ignwan d‑luḥuš n‑tagant, walaynni ur‑gisn‑ityafa ma‑d‑yuškan d‑urgaz a‑t‑itɛawan.

21izzugz ilmma sidi rbbi iṭs iẓẓayn f‑urgaz. lliġ iṭṭas ikks yan zġ‑iġzdisn‑ns, irar aggas n‑ddat‑ns s‑tfiyi. 22aġzdis lli‑ikkis sidi rbbi i‑urgaz, iskr zġ‑gis tamġart, yawi‑tt‑id s‑dars. 23yini‑urgaz ġakudan: «h̬tad ġila tga ih̬ṣ zġ‑ih̬ṣan‑inu, tg tifiyi zġ‑tfiyi‑nu. rad‑as‑ttiniġ ‹tawtmt› ašku ttyawkkas zġ‑uwtm.» 24mayan a‑f‑ra‑ifl‑urgaz babas d‑innas imun d‑tmġart‑ns. hatni sin rad‑wrrin gn yat ddat. 25ġakudan argaz d‑tmġart‑ns ur‑lsin yat, walaynni ur‑a‑tn‑issḥššam mayan.

Atualmente Selecionado:

isizwur 2: SHILOT20

Destaque

Copiar