यहून्ना 9
9
ईसु जलम का आँदानै आँख्या दि
1जद ईसु जार्यो हो, जणा बो एक मिनखनै देख्यो जखो जलमऊँ आँदो हो। 2बिका चेला बिऊँ बुज्या, “गरूजी, किका पाप की बजेऊँ ओ जलमऊँ आँदो ह, इका खुदका पाप, नहिस इका माँ-बाप का?”
3ईसु बोल्यो, “ओ नइ तो आपका माँ-बाप क अर नइ खुदका पाप की बजेऊँ आँदो ह। पण ओ इ ताँई आँदो ह, क इपै परमेसर को काम परगट हो सकै अर मिनख बिनै देखै। 4आ जरूरी ह क जखो मनै भेज्यो, बिका काम आपा दिन-दिनऊँ करल्या क्युं क रात होबाळी ह जद कोई काम कोनी करसी। 5#मत्त 5:14; यह 8:12जद ताँई म इ जगत म हूँ, म इ जगत का मिनखा को च्यानणो हूँ।”
6आ बोलर बो जमीन प थूक्यो अर बि थूकऊँ माटीनै सणी अर बा माटी बि आँदा मिनख की आँख्या प लगाई। 7अर बिऊँ बोल्यो, “जार सिलोह कूंड म धोले।” (सिलोह को मतबल “भेजेड़ो”) जणा बो मिनख जार आपकी आँख्या धोई अर देखबा लाग्यो अर पाछो आगो।
8जणा बिका आसपड़ोस का अर बे जखा बिनै पेली भीक माँगता देख्या हा बोल्या, “ओ बोई कोनी के जखो बेठ्यो-बेठ्यो भीक माँग्या करतो हो?” 9क्युंक बोलर्या हा, “ओ बोई ह।”
पण दुसरा बोलर्या हा, “नइ ओ बिकी जंय्यां को लागै ह, पण बो कोनी।”
जणा बो मिनख खुद बोल्यो, “म बोई हूँ।”
10बे बिऊँ बुज्या, “तनै इब कंय्यां दिखबा लाग्यो?”
11बो मिनख बोल्यो, “एक मिनख जिनै ईसु बोलीं हीं। बो माटी लेर बिनै सणी, अर मेरी आँख्या प मसळ दि अर मेरूँ बोल्यो, ‘जार सिलोह कूंड म धोले।’ जणा म जार धोयो अर मनै सुजबा लाग्यो।”
12बे बिऊँ बुज्या, “बो कठै ह?”
बो बोल्यो, “मनै कोनी बेरो।”
फरिसीया को बबाळ
13जणा मिनख बिनै, जखो पेला आँदो हो फरिसीया क कनै लेगा। 14जि दिन ईसु माटी सणर बिनै निरोगो कर्यो हो, बो अरामहाळो दिन हो। 15जणा फरिसी बी बि मिनखनै बुज्या, “तनै दिखबा कंय्यां लाग्यो?”
बो बाऊँ बोल्यो, “बो क्युंक आली माटी मेरी आँख्या प मसळी, म धोई अर इब म देख सकूँ हूँ।”
16क्युंक फरिसी बोल्या, “जखो मिनख ओ कर्यो ह। बो परमेसर कानिऊँ कोनी हो सकै क्युं क बो अरामहाळा दिन को मान कोनी करै।”
पण क्युंक दुसरा बोलबा लाग्या क, “एक पापी मिनख ओ चमत्कार कंय्यां दिखा सकै ह?” इ बात प बामै फूट पड़गी।
17जणा फरिसी बि मिनखनै एक बार ओज्यु बुज्या, “तू बिकै बारां म काँई बोलै ह, जखो तनै आँख्या दि?”
बो बोल्यो, “बो परमेसर की खेबाळो ह।”
18इ बात की बजेऊँ बे यहूदि अधिकारी बि मिनख की बात प क, बो आँदो हो अर इब देखबा लाग्यो जद ताँई बिस्वास कोनी कर्या जद ताँई बिका माँ-बापनै बुलार, 19आ कोनी बुज्या क, “के ओ थारो छोरो ह? के ओ आँदो जलम्यो हो? ज हो, जणा थे बताओ इब कंय्यां देख सकै ह।”
20बिका माँ-बाप बोल्या, “ओ म्हारोई छोरो ह। अर ओ जलमऊँ आँदो हो। 21पण म्हें कोनी जाणा इब ओ कंय्यां देखबा लाग्यो अर नइ म्हें आ जाणा क इनै कूण आँख्या दि। इब ओ टाबर तो आथ कोनी। ओ खुदई जुबाब दे सकै ह।” 22बिका घरका आ बात इ ताँई बोल्या, क्युं क बे यहूदि अधिकारीयाऊँ डरता हा। क्युं क बे सगळा एक मत होर्या हा, क जखो बी ईसुनै मसी कर मानसी बिनै अरदास करबाळी झघा म बड़बा कोनी दिओ जासी। 23जणाई तो बिका घरका खया हा क, “ओ टाबर तो आथ कोनी। ओ खुदई बता देसी!”
24दुसरका बे, बि मिनखनै बुलाया जखो जलमऊँ आँदो हो अर बिऊँ बोल्या, “तनै आँख्या मिली इ ताँई परमेसर की जे-जैकार कर! बि मिनख को नइ क्युं क म्हें जाणा हा बो मिनख पापी ह।”
25बो बोल्यो, “म कोनी जाणू क बो पापी ह क कोनी पण म एक बात जाणू हूँ क, म पेली आँदो हो अर इब देख सकूँ हूँ।”
26जणा बे बिऊँ बुज्या, “बो तेरै सागै काँई कर्यो? कंय्यांसिक बो तनै आँख्या दि?”
27बो बोल्यो, “म तो थानै सगळी बाता पेलीई खेदी, पण थे कोनी सुण्या। जणा पाछै इब ओज्यु थे कय्यालै सुण्बो चाओ हो? के थे बी बिका चेला बणबो चाओ हो?”
28बे बिकी बेजती करी अर बोल्या, “तूई होगो बिको चेलो, म्हें तो मूसा का चेला हां। 29म्हें जाणा हां क परमेसर मूसाऊँ बतळायो हो, पण इकै बारां म कोनी जाणा क ओ कठैऊँ आयो ह।”
30बो मिनख बोल्यो, “आ तो ताजूब की बात ह! थे बि मिनख क बारां म जाणोई कोनी क, बो कठैऊँ आयो ह। पण देखल्यो, बो मेरी आँख्या खोल दि। 31म्हें जाणा हा क परमेसर पाप्या की कोनी सुणै, पण भगता की जखा बोई करै जखो बो बाऊँ चावै ह, अंय्यांलका की परमेसर सुणै ह। 32इ सरस्टि की सरूआतऊँ कदैई सुणबा म कोनी आयो क, कोई जलम का आँदानै आँख्या दि। 33ज ओ मिनख परमेसर कानिऊँ नइ होतो जणा क्युंई कोनी कर सकै हो।”
34बे बिऊँ बोल्या, “तू तो पापऊँ जलम्यो ह, तू म्हानै काँई सीखावै ह ?” अर बे बिनै अरदास करबाळी झघाऊँ बारनै काड दिआ।
हिया को आँदो
35जद ईसु, जोक्यु होयो बिकै बारां म सुण्यो, जणा बो बिऊँ मिलर बोल्यो, “के तू मिनख का बेटा प बिस्वास करै ह?”
36बो मिनख बोल्यो, “म्हराज, थे मनै बताओ बो कूण ह, जिऊँ म बिपै बिस्वास करूं।” 37ईसु बिऊँ बोल्यो, “तू बिनै देख लिओ, अर जखो तेरै सागै बतळार्यो ह।”
38बो बोल्यो, “परबु, म बिस्वास करूं हूँ!” अर बिकै पगा म धोक खाई।
39ईसु बोल्यो, “म इ जगत म न्याय करबा आयो हूँ, जिऊँ आँदा देख सकै अर आँख्या हाळा आँदा होज्या।”
40क्युंक फरिसी जखा बिकन खड़्या हा, बे अ बाता सुणर बोल्या, “के तू म्हानै आँदा बतार्यो ह?”
41ईसु बाऊँ बोल्यो, “ज थे आँदा होता जणा पापी कोनी होता। पण बोलो हो क, ‘म्हानै सुजै ह’ जणाई तो थारो पाप बण्यो रेह्वै ह।”
Atualmente Selecionado:
यहून्ना 9: एस डब्लु वी
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
(c) 2010-2017, New Life Computer Institute. All rights reserved
